১. গন্ধধূপিযত্থেরঅপদানং

১. ‘‘সিদ্ধত্থস্স ভগৰতো, গন্ধধূপং অদাসহং;

সুমনেহি পটিচ্ছন্নং, বুদ্ধানুচ্ছৰিকঞ্চ তং.

২. ‘‘কঞ্চনগ্ঘিযসঙ্কাসং, বুদ্ধং লোকগ্গনাযকং;

ইন্দীৰরংৰ জলিতং, আদিত্তংৰ হুতাসনং.

৩. ‘‘ব্যগ্ঘুসভংৰ পৰরং, অভিজাতংৰ কেসরিং;

নিসিন্নং সমণানগ্গং, ভিক্খুসঙ্ঘপুরক্খতং.

৪. ‘‘দিস্ৰা চিত্তং পসাদেত্ৰা, পগ্গহেত্ৰান অঞ্জলিং;

ৰন্দিত্ৰা সত্থুনো পাদে, পক্কামিং উত্তরামুখো.

৫. ‘‘চতুন্নৰুতিতো কপ্পে, যং গন্ধমদদিং তদা;

দুগ্গতিং নাভিজানামি, গন্ধপূজাযিদং ফলং.

৬. ‘‘পটিসম্ভিদা চতস্সো, ৰিমোক্খাপি চ অট্ঠিমে;

ছল়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা গন্ধধূপিযো থেরো ইমা গাথাযো অভাসিত্থাতি.

গন্ধধূপিযত্থেরস্সাপদানং পঠমং.