৪. যঞ্ঞসামিকত্থেরঅপদানং

১৭. ‘‘জাতিযা সত্তৰস্সোহং, অহোসিং মন্তপারগূ;

কুলৰত্তং [কুলৰংসং (সী. স্যা.)] অধারেসিং, যঞ্ঞো উস্সাহিতো মযা.

১৮. ‘‘চুল্লাসীতিসহস্সানি, পসূ হঞ্ঞন্তি মে তদা;

সারথম্ভুপনীতানি [তারস্মীহি উপনীতানি (ক.), সারস্মিংহি উপনীতানি (স্যা.)], যঞ্ঞত্থায উপট্ঠিতা.

১৯. ‘‘উক্কামুখপহট্ঠোৰ, খদিরঙ্গারসন্নিভো;

উদযন্তোৰ সূরিযো, পুণ্ণমাযেৰ [পুণ্ণমাসেৰ (সী.)] চন্দিমা.

২০. ‘‘সিদ্ধত্থো সব্বসিদ্ধত্থো, তিলোকমহিতো হিতো;

উপগন্ত্ৰান সম্বুদ্ধো, ইদং ৰচনমব্রৰি.

২১. ‘‘‘অহিংসা সব্বপাণীনং, কুমার মম রুচ্চতি;

থেয্যা চ অতিচারা চ, মজ্জপানা চ আরতি.

২২. ‘‘‘রতি চ সমচরিযায, বাহুসচ্চং কতঞ্ঞুতা;

দিট্ঠে ধম্মে পরত্থ চ, ধম্মা এতে পসংসিযা.

২৩. ‘‘‘এতে ধম্মে ভাৰযিত্ৰা, সব্বসত্তহিতে রতো [হিতেসিতো (ক.)];

বুদ্ধে চিত্তং পসাদেত্ৰা, ভাৰেহি মগ্গমুত্তমং’.

২৪. ‘‘ইদং ৰত্ৰান সব্বঞ্ঞূ, লোকজেট্ঠো নরাসভো;

মমেৰং অনুসাসিত্ৰা, ৰেহাসং উগ্গতো গতো.

২৫. ‘‘পুব্বে চিত্তং ৰিসোধেত্ৰা, পচ্ছা চিত্তং পসাদযিং;

তেন চিত্তপ্পসাদেন, তুসিতং উপপজ্জহং.

২৬. ‘‘চতুন্নৰুতিতো কপ্পে, যদা চিত্তং পসাদযিং;

দুগ্গতিং নাভিজানামি, বুদ্ধসঞ্ঞাযিদং ফলং.

২৭. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা যঞ্ঞসামিকো থেরো ইমা গাথাযো অভাসিত্থাতি.

যঞ্ঞসামিকত্থেরস্সাপদানং চতুত্থং.