২. পুলিনপূজকত্থেরঅপদানং

৭. ‘‘ককুধং ৰিলসন্তংৰ, নিসভাজানিযং যথা;

ওসধিংৰ ৰিরোচন্তং, ওভাসন্তং নরাসভং.

৮. ‘‘অঞ্জলিং পগ্গহেত্ৰান, অৰন্দিং সত্থুনো অহং;

সত্থারং পরিৰণ্ণেসিং, সককম্মেন তোসযিং [তোসিতো (সী.)].

৯. ‘‘সুসুদ্ধং পুলিনং গয্হ, গতমগ্গে সমোকিরিং;

উচ্ছঙ্গেন গহেত্ৰান, ৰিপস্সিস্স মহেসিনো.

১০. ‘‘ততো উপড্ঢপুলিনং, ৰিপ্পসন্নেন চেতসা;

দিৰাৰিহারে ওসিঞ্চিং, দ্ৰিপদিন্দস্স তাদিনো.

১১. ‘‘একনৰুতিতো কপ্পে, পুলিনং যমসিঞ্চহং;

দুগ্গতিং নাভিজানামি, পুলিনস্স ইদং ফলং.

১২. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা পুলিনপূজকো থেরো ইমা গাথাযো অভাসিত্থাতি.

পুলিনপূজকত্থেরস্সাপদানং দুতিযং.