৫. পুপ্ফাসনদাযকত্থেরঅপদানং

২০. ‘‘সুৰণ্ণৰণ্ণং সম্বুদ্ধং, পীতরংসিংৰ [সতরংসিংৰ (সী. স্যা.)] ভাণুমং;

অৰিদূরেন গচ্ছন্তং, সিদ্ধত্থং অপরাজিতং.

২১. ‘‘তস্স পচ্চুগ্গমিত্ৰান, পৰেসেত্ৰান অস্সমং;

পুপ্ফাসনং মযা দিন্নং, ৰিপ্পসন্নেন চেতসা.

২২. ‘‘অঞ্জলিং পগ্গহেত্ৰান, ৰেদজাতো তদা অহং;

বুদ্ধে চিত্তং পসাদেত্ৰা, তং কম্মং পরিণামযিং.

২৩. ‘‘যং মে অত্থি কতং পুঞ্ঞং, সযম্ভুম্হপরাজিতে;

সব্বেন তেন কুসলেন, ৰিমলো হোমি সাসনে.

২৪. ‘‘চতুন্নৰুতিতো কপ্পে, পুপ্ফাসনমদং তদা;

দুগ্গতিং নাভিজানামি, পুপ্ফাসনস্সিদং ফলং.

২৫. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা পুপ্ফাসনদাযকো থেরো ইমা গাথাযো অভাসিত্থাতি.

পুপ্ফাসনদাযকত্থেরস্সাপদানং পঞ্চমং.