৩. তিসরণগমনিযত্থেরঅপদানং

১০৬. ‘‘নগরে চন্দৰতিযা [বন্ধুমতিযা (অট্ঠ.)], মাতুউপট্ঠাকো [মাতুপট্ঠাযকো (সী.), মাতুপট্ঠানকো (স্যা.)] অহুং;

অন্ধা মাতা পিতা ময্হং, তে পোসেমি অহং তদা.

১০৭. ‘‘রহোগতো নিসীদিত্ৰা, এৰং চিন্তেসহং তদা;

পোসেন্তো মাতাপিতরো, পব্বজ্জং ন লভামহং.

১০৮. ‘‘মহন্ধকারপিহিতা [তমন্ধকারপিহিতা (স্যা.)], তিৰিধগ্গীহি ডয্হরে;

এতাদিসে ভৰে [ভযে (সী.)] জাতে, নত্থি কোচি ৰিনাযকো.

১০৯. ‘‘বুদ্ধো লোকে সমুপ্পন্নো, দিপ্পতি [দিব্বতি (ক.)] [জিনসাসনং (সী.)] দানি সাসনং;

সক্কা উদ্ধরিতুং অত্তা, পুঞ্ঞকামেন জন্তুনা.

১১০. ‘‘উগ্গয্হ তীণি সরণে, পরিপুণ্ণানি গোপযিং;

তেন কম্মেন সুকতেন, পটিমোক্খামি দুগ্গতিং.

১১১. ‘‘নিসভো নাম সমণো, বুদ্ধস্স অগ্গসাৰকো;

তমহং উপগন্ত্ৰান, সরণগমনং গহিং.

১১২. ‘‘ৰস্সসতসহস্সানি, আযু ৰিজ্জতি তাৰদে;

তাৰতা সরণগমনং, পরিপুণ্ণং অগোপযিং.

১১৩. ‘‘চরিমে ৰত্তমানম্হি, সরণং তং অনুস্সরিং;

তেন কম্মেন সুকতেন, তাৰতিংসং অগচ্ছহং.

১১৪. ‘‘দেৰলোকগতো সন্তো, পুঞ্ঞকম্মসমাহিতো;

যং দেসং [যং যং দেসং (স্যা.)] উপপজ্জামি [উপগচ্ছামি (সী.)], অট্ঠ হেতূ লভামহং.

১১৫. ‘‘দিসাসু পূজিতো হোমি, তিক্খপঞ্ঞো ভৰামহং;

সব্বে দেৰানুৰত্তন্তি, অমিতভোগং লভামহং.

১১৬. ‘‘সুৰণ্ণৰণ্ণো সব্বত্থ, পটিকন্তো ভৰামহং;

মিত্তানং অচলো হোমি, যসো অব্ভুগ্গতো মমং.

১১৭. ‘‘অসীতিক্খত্তু দেৰিন্দো, দেৰরজ্জমকারযিং;

দিব্বসুখং অনুভৰিং, অচ্ছরাহি পুরক্খতো.

১১৮. ‘‘পঞ্চসত্ততিক্খত্তুঞ্চ, চক্কৰত্তী অহোসহং;

পদেসরজ্জং ৰিপুলং, গণনাতো অসঙ্খিযং.

১১৯. ‘‘পচ্ছিমে ভৰে সম্পত্তে, পুঞ্ঞকম্মসমাহিতো;

পুরে সাৰত্থিযং জাতো, মহাসালে সুঅড্ঢকে.

১২০. ‘‘নগরা নিক্খমিত্ৰান, দারকেহি পুরক্খতো;

হসখিড্ডসমঙ্গীহং [সাহং খিড্ডসমঙ্গী (স্যা.)], সঙ্ঘারামং উপাগমিং.

১২১. ‘‘তত্থদ্দসাসিং [তত্থদ্দসাহং (ক.)] সমণং, ৰিপ্পমুত্তং নিরূপধিং;

সো মে ধম্মমদেসেসি, সরণঞ্চ অদাসি মে.

১২২. ‘‘সোহং সুত্ৰান সরণং, সরণং মে অনুস্সরিং;

একাসনে নিসীদিত্ৰা, অরহত্তমপাপুণিং.

১২৩. ‘‘জাতিযা সত্তমে ৰস্সে, অরহত্তমপাপুণিং;

উপসম্পাদযি বুদ্ধো, গুণমঞ্ঞায চক্খুমা.

১২৪. ‘‘অপরিমেয্যে ইতো কপ্পে, সরণানি অগচ্ছহং;

ততো মে সুকতং কম্মং, ফলং দস্সেসি মে ইধ.

১২৫. ‘‘সুগোপিতং মে সরণং, মানসং সুপ্পণীহিতং;

অনুভোত্ৰা যসং সব্বং, পত্তোম্হি অচলং পদং.

১২৬. ‘‘যেসং সোতাৰধানত্থি, সুণোথ মম ভাসতো;

অহং [অত্থং (স্যা.)] ৰো কথযিস্সামি, সামং দিট্ঠং পদং মম.

১২৭. ‘‘‘বুদ্ধো লোকে সমুপ্পন্নো, ৰত্ততে জিনসাসনং;

অমতা ৰাদিতা ভেরী, সোকসল্লৰিনোদনা.

১২৮. ‘‘‘যথাসকেন থামেন, পুঞ্ঞক্খেত্তে অনুত্তরে;

অধিকারং করেয্যাথ, পস্সযিস্সথ নিব্বুতিং.

১২৯. ‘‘‘পগ্গয্হ তীণি সরণে, পঞ্চসীলানি গোপিয;

বুদ্ধে চিত্তং পসাদেত্ৰা, দুক্খস্সন্তং করিস্সথ.

১৩০. ‘‘‘সম্মা ধম্মং ভাৰেত্ৰান [মমোপমং করিত্ৰান (সী. স্যা.)], সীলানি পরিগোপিয;

অচিরং অরহত্তং ৰো, সব্বেপি পাপুণিস্সথ.

১৩১. ‘‘‘তেৰিজ্জো ইদ্ধিপত্তোম্হি, চেতোপরিযকোৰিদো;

সাৰকো তে মহাৰীর, সরণো [চরণে (সী. স্যা.)] ৰন্দতি সত্থুনো’.

১৩২. ‘‘অপরিমেয্যে ইতো কপ্পে, সরণং বুদ্ধস্স গচ্ছহং;

দুগ্গতিং নাভিজানামি, সরণং গমনে ফলং.

১৩৩. ‘‘পটিসম্ভিদা চতস্সো, ৰিমোক্খাপি চ অট্ঠিমে;

ছল়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা তিসরণগমনিযো থেরো ইমা গাথাযো অভাসিত্থাতি.

তিসরণগমনিযত্থেরস্সাপদানং ততিযং.