৪. পঞ্চসীলসমাদানিযত্থেরঅপদানং

১৩৪. ‘‘নগরে চন্দৰতিযা, ভতকো আসহং তদা;

পরকম্মাযনে যুত্তো, পব্বজ্জং ন লভামহং.

১৩৫. ‘‘মহন্ধকারপিহিতা, তিৰিধগ্গীহি ডয্হরে;

কেন নু খো উপাযেন, ৰিসংযুত্তো ভৰে অহং.

১৩৬. ‘‘দেয্যধম্মো চ মে নত্থি, ৰরাকো ভতকো অহং;

যংনূনাহং পঞ্চসীলং, রক্খেয্যং পরিপূরযং.

১৩৭. ‘‘অনোমদস্সিস্স মুনিনো, নিসভো নাম সাৰকো;

তমহং উপসঙ্কম্ম, পঞ্চসিক্খাপদগ্গহিং.

১৩৮. ‘‘ৰস্সসতসহস্সানি, আযু ৰিজ্জতি তাৰদে;

তাৰতা পঞ্চসীলানি, পরিপুণ্ণানি গোপযিং.

১৩৯. ‘‘মচ্চুকালে চ সম্পত্তে, দেৰা অস্সাসযন্তি মং;

‘রথো সহস্সযুত্তো তে, মারিসাযং [মারিসস্স (ক.)] উপট্ঠিতো’.

১৪০. ‘‘ৰত্তন্তে চরিমে চিত্তে, মম সীলং অনুস্সরিং;

তেন কম্মেন সুকতেন, তাৰতিংসং অগচ্ছহং.

১৪১. ‘‘তিংসক্খত্তুঞ্চ দেৰিন্দো, দেৰরজ্জমকারযিং;

দিব্বসুখং [দিব্বং সুখং (সী.)] অনুভৰিং, অচ্ছরাহি পুরক্খতো.

১৪২. ‘‘পঞ্চসত্ততিক্খত্তুঞ্চ, চক্কৰত্তী অহোসহং;

পদেসরজ্জং ৰিপুলং, গণনাতো অসঙ্খিযং.

১৪৩. ‘‘দেৰলোকা চৰিত্ৰান, সুক্কমূলেন চোদিতো;

পুরে ৰেসালিযং জাতো, মহাসালে সুঅড্ঢকে.

১৪৪. ‘‘ৰস্সূপনাযিকে কালে, দিপ্পন্তে [দিব্বন্তি (ক.)] জিনসাসনে;

মাতা চ মে পিতা চেৰ, পঞ্চসিক্খাপদগ্গহুং.

১৪৫. ‘‘সহ সুত্ৰানহং সীলং, মম সীলং অনুস্সরিং;

একাসনে নিসীদিত্ৰা, অরহত্তমপাপুণিং.

১৪৬. ‘‘জাতিযা পঞ্চৰস্সেন, অরহত্তমপাপুণিং;

উপসম্পাদযি বুদ্ধো, গুণমঞ্ঞায চক্খুমা.

১৪৭. ‘‘পরিপুণ্ণানি গোপেত্ৰা, পঞ্চসিক্খাপদানহং;

অপরিমেয্যে ইতো কপ্পে, ৰিনিপাতং ন গচ্ছহং.

১৪৮. ‘‘স্ৰাহং যসমনুভৰিং, তেসং সীলান ৰাহসা;

কপ্পকোটিম্পি কিত্তেন্তো, কিত্তযে একদেসকং.

১৪৯. ‘‘পঞ্চসীলানি গোপেত্ৰা, তযো হেতূ লভামহং;

দীঘাযুকো মহাভোগো, তিক্খপঞ্ঞো ভৰামহং.

১৫০. ‘‘সংকিত্তেন্তো চ [পকিত্তেন্তোৰ (সী.), পকিত্তেন্তে চ (স্যা.)] সব্বেসং, অভিমত্তঞ্চ পোরিসং;

ভৰাভৰে সংসরিত্ৰা, এতে ঠানে লভামহং.

১৫১. ‘‘অপরিমেয্যসীলেসু, ৰত্তন্তা জিনসাৰকা;

ভৰেসু যদি রজ্জেয্যুং, ৰিপাকো কীদিসো ভৰে.

১৫২. ‘‘সুচিণ্ণং মে পঞ্চসীলং, ভতকেন তপস্সিনা [ৰিপস্সিনা (সী.)];

তেন সীলেনহং অজ্জ, মোচযিং সব্ববন্ধনা.

১৫৩. ‘‘অপরিমেয্যে ইতো কপ্পে, পঞ্চসীলানি গোপযিং;

দুগ্গতিং নাভিজানামি, পঞ্চসীলানিদং ফলং.

১৫৪. ‘‘পটিসম্ভিদা চতস্সো, ৰিমোক্খাপি চ অট্ঠিমে;

ছল়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা পঞ্চসীলসমাদানিযো থেরো ইমা গাথাযো অভাসিত্থাতি.

পঞ্চসীলসমাদানিযত্থেরস্সাপদানং চতুত্থং.