৫. একঞ্জলিকত্থেরঅপদানং

১৯. ‘‘উদুম্বরে ৰসন্তস্স, নিযতে পণ্ণসন্থরে;

ৰুত্থোকাসো মযা দিন্নো, সমণস্স মহেসিনো.

২০. ‘‘তিস্সস্স দ্ৰিপদিন্দস্স, লোকনাথস্স তাদিনো;

অঞ্জলিং পগ্গহেত্ৰান, সন্থরিং পুপ্ফসন্থরং.

২১. ‘‘দ্ৰেনৰুতে ইতো কপ্পে, যং করিং পুপ্ফসন্থরং;

দুগ্গতিং নাভিজানামি, সন্থরস্স ইদং ফলং.

২২. ‘‘ইতো চুদ্দসকপ্পম্হি, অহোসিং মনুজাধিপো;

একঅঞ্জলিকো নাম, চক্কৰত্তী মহব্বলো.

২৩. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা একঞ্জলিকো থেরো ইমা গাথাযো অভাসিত্থাতি.

একঞ্জলিকত্থেরস্সাপদানং পঞ্চমং.