২৮. সুৰণ্ণবিব্বোহনৰগ্গো

১. সুৰণ্ণবিব্বোহনিযত্থেরঅপদানং

১. ‘‘একাসনং অহমদং, পসন্নো সেহি পাণিভি;

বিব্বোহনঞ্চ [বিম্বোহনঞ্চ (সী. পী.)] পাদাসিং, উত্তমত্থস্স পত্তিযা.

২. ‘‘একনৰুতিতো কপ্পে, বিব্বোহনমদাসহং;

দুগ্গতিং নাভিজানামি, বিব্বোহনস্সিদং ফলং.

৩. ‘‘ইতো তেসট্ঠিমে কপ্পে, অসমো নাম খত্তিযো;

সত্তরতনসম্পন্নো, চক্কৰত্তী মহব্বলো.

৪. ‘‘পটিসম্ভিদা চতস্সো, ৰিমোক্খাপি চ অট্ঠিমে;

ছল়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা সুৰণ্ণবিব্বোহনিযো থেরো ইমা গাথাযো অভাসিত্থাতি.

সুৰণ্ণবিব্বোহনিযত্থেরস্সাপদানং পঠমং.

২. তিলমুট্ঠিদাযকত্থেরঅপদানং

৫. ‘‘মম সঙ্কপ্পমঞ্ঞায, সত্থা লোকগ্গনাযকো;

মনোমযেন কাযেন, ইদ্ধিযা উপসঙ্কমি.

৬. ‘‘সত্থারং উপসঙ্কন্তং, ৰন্দিত্ৰা পুরিসুত্তমং;

পসন্নচিত্তো সুমনো, তিলমুট্ঠিমদাসহং.

৭. ‘‘একনৰুতিতো কপ্পে, যং দানমদদিং তদা;

দুগ্গতিং নাভিজানামি, তিলমুট্ঠিযিদং ফলং.

৮. ‘‘ইতো সোল়সকপ্পম্হি, তন্তিসো [খন্তিযো (স্যা.)] নাম খত্তিযো;

সত্তরতনসম্পন্নো, চক্কৰত্তী মহব্বলো.

৯. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা তিলমুট্ঠিদাযকো থেরো ইমা গাথাযো অভাসিত্থাতি.

তিলমুট্ঠিদাযকত্থেরস্সাপদানং দুতিযং.

৩. চঙ্কোটকিযত্থেরঅপদানং

১০. ‘‘মহাসমুদ্দং নিস্সায, ৰসতী পব্বতন্তরে;

পচ্চুগ্গন্ত্ৰান কত্ৰান [পচ্চুগ্গন্ত্ৰান’কাসহং (অট্ঠ.), পচ্চুগ্গমনং কত্ৰান (?)], চঙ্কোটক [চঙ্গোটক (সী.)] মদাসহং.

১১. ‘‘সিদ্ধত্থস্স মহেসিনো, সব্বসত্তানুকম্পিনো [সযম্ভুস্সানুকম্পিনো (স্যা.)];

পুপ্ফচঙ্কোটকং দত্ৰা, কপ্পং সগ্গম্হি মোদহং.

১২. ‘‘চতুন্নৰুতিতো কপ্পে, চঙ্কোটকমদং তদা;

দুগ্গতিং নাভিজানামি, চঙ্কোটকস্সিদং ফলং.

১৩. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা চঙ্কোটকিযো থেরো ইমা গাথাযো অভাসিত্থাতি.

চঙ্কোটকিযত্থেরস্সাপদানং ততিযং.

৪. অব্ভঞ্জনদাযকত্থেরঅপদানং

১৪. ‘‘কোণ্ডঞ্ঞস্স ভগৰতো, ৰীতরাগস্স তাদিনো;

আকাসসমচিত্তস্স [অকক্কসচিত্তস্সাথ (অট্ঠ.)], নিপ্পপঞ্চস্স ঝাযিনো.

১৫. ‘‘সব্বমোহাতিৰত্তস্স, সব্বলোকহিতেসিনো;

অব্ভঞ্জনং মযা দিন্নং, দ্ৰিপদিন্দস্স তাদিনো.

১৬. ‘‘অপরিমেয্যে ইতো কপ্পে, অব্ভঞ্জনমদং তদা [অম্ভঞ্জনমদাসহং (স্যা.)];

দুগ্গতিং নাভিজানামি, অব্ভঞ্জনস্সিদং ফলং.

১৭. ‘‘ইতো পন্নরসে কপ্পে, চিরপ্পো নাম খত্তিযো;

সত্তরতনসম্পন্নো, চক্কৰত্তী মহব্বলো.

১৮. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা অব্ভঞ্জনদাযকো থেরো ইমা গাথাযো অভাসিত্থাতি.

অব্ভঞ্জনদাযকত্থেরস্সাপদানং চতুত্থং.

৫. একঞ্জলিকত্থেরঅপদানং

১৯. ‘‘উদুম্বরে ৰসন্তস্স, নিযতে পণ্ণসন্থরে;

ৰুত্থোকাসো মযা দিন্নো, সমণস্স মহেসিনো.

২০. ‘‘তিস্সস্স দ্ৰিপদিন্দস্স, লোকনাথস্স তাদিনো;

অঞ্জলিং পগ্গহেত্ৰান, সন্থরিং পুপ্ফসন্থরং.

২১. ‘‘দ্ৰেনৰুতে ইতো কপ্পে, যং করিং পুপ্ফসন্থরং;

দুগ্গতিং নাভিজানামি, সন্থরস্স ইদং ফলং.

২২. ‘‘ইতো চুদ্দসকপ্পম্হি, অহোসিং মনুজাধিপো;

একঅঞ্জলিকো নাম, চক্কৰত্তী মহব্বলো.

২৩. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা একঞ্জলিকো থেরো ইমা গাথাযো অভাসিত্থাতি.

একঞ্জলিকত্থেরস্সাপদানং পঞ্চমং.

৬. পোত্থকদাযকত্থেরঅপদানং

২৪. ‘‘সত্থারং ধম্মমারব্ভ, সঙ্ঘঞ্চাপি মহেসিনং;

পোত্থদানং মযা দিন্নং, দক্খিণেয্যে অনুত্তরে.

২৫. ‘‘একনৰুতিতো কপ্পে, যং কম্মমকরিং তদা;

দুগ্গতিং নাভিজানামি, পোত্থদানস্সিদং ফলং.

২৬. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা পোত্থকদাযকো থেরো ইমা গাথাযো অভাসিত্থাতি.

পোত্থকদাযকত্থেরস্সাপদানং ছট্ঠং.

৭. চিতকপূজকত্থেরঅপদানং

২৭. ‘‘চন্দভাগানদীতীরে, অনুসোতং ৰজামহং;

সত্ত মালুৰপুপ্ফানি, চিতমারোপযিং অহং.

২৮. ‘‘চতুন্নৰুতিতো কপ্পে, চিতকং যমপূজযিং;

দুগ্গতিং নাভিজানামি, চিতপূজাযিদং ফলং.

২৯. ‘‘সত্তসট্ঠিম্হিতো কপ্পে, পটিজগ্গসনামকা;

সত্তরতনসম্পন্না, সত্তাসুং চক্কৰত্তিনো [পটিজগ্গসনামকো; সত্তরতনসম্পন্নো, চক্কৰত্তী মহব্বলো (স্যা.)].

৩০. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা চিতকপূজকো থেরো ইমা গাথাযো অভাসিত্থাতি.

চিতকপূজকত্থেরস্সাপদানং সত্তমং.

৮. আলুৰদাযকত্থেরঅপদানং

৩১. ‘‘পব্বতে হিমৰন্তম্হি, মহাসিন্ধু সুদস্সনা;

তত্থদ্দসং ৰীতরাগং, সুপ্পভাসং সুদস্সনং.

৩২. ‘‘পরমোপসমে যুত্তং, দিস্ৰা ৰিম্হিতমানসো;

আলুৰং তস্স পাদাসিং, পসন্নো সেহি পাণিভি.

৩৩. ‘‘একত্তিংসে ইতো কপ্পে, যং ফলমদদিং তদা;

দুগ্গতিং নাভিজানামি, আলুৰস্স ইদং ফলং.

৩৪. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা আলুৰদাযকো থেরো ইমা গাথাযো অভাসিত্থাতি.

আলুৰদাযকত্থেরস্সাপদানং অট্ঠমং.

৯. একপুণ্ডরীকত্থেরঅপদানং

৩৫. ‘‘রোমসো নাম নামেন, সযম্ভূ সুব্বতো [সপ্পভো (স্যা.)] তদা;

পুণ্ডরীকং মযা দিন্নং, ৰিপ্পসন্নেন চেতসা.

৩৬. ‘‘চতুন্নৰুতিতো কপ্পে, পুণ্ডরীকমদং তদা;

দুগ্গতিং নাভিজানামি, পুণ্ডরীকস্সিদং ফলং.

৩৭. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা একপুণ্ডরীকো থেরো ইমা গাথাযো অভাসিত্থাতি.

একপুণ্ডরীকত্থেরস্সাপদানং নৰমং.

১০. তরণীযত্থেরঅপদানং

৩৮. ‘‘মহাপথম্হি ৰিসমে, সেতু কারাপিতো মযা;

তরণত্থায লোকস্স, পসন্নো সেহি পাণিভি.

৩৯. ‘‘একনৰুতিতো কপ্পে, যো সেতু কারিতো মযা;

দুগ্গতিং নাভিজানামি, সেতুদানস্সিদং ফলং.

৪০. ‘‘পঞ্চপঞ্ঞাসিতো কপ্পে, একো আসিং সমোগধো;

সত্তরতনসম্পন্নো, চক্কৰত্তী মহব্বলো.

৪১. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা তরণীযো থেরো ইমা গাথাযো অভাসিত্থাতি.

তরণীযত্থেরস্সাপদানং দসমং.

সুৰণ্ণবিব্বোহনৰগ্গো অট্ঠৰীসতিমো.