২৪. উদকাসনৰগ্গো

১. উদকাসনদাযকত্থেরঅপদানং

১. ‘‘আরামদ্ৰারা নিক্খম্ম, ফলকং সন্থরিং অহং;

উদকঞ্চ উপট্ঠাসিং, উত্তমত্থস্স পত্তিযা.

২. ‘‘একত্তিংসে ইতো কপ্পে, যং কম্মমকরিং তদা;

দুগ্গতিং নাভিজানামি, আসনে চোদকে ফলং.

৩. ‘‘ইতো পন্নরসে কপ্পে, অভিসামসমৰ্হযো;

সত্তরতনসম্পন্নো, চক্কৰত্তী মহব্বলো.

৪. ‘‘পটিসম্ভিদা চতস্সো, ৰিমোক্খাপি চ অট্ঠিমে;

ছল়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা উদকাসনদাযকো থেরো ইমা গাথাযো অভাসিত্থাতি.

উদকাসনদাযকত্থেরস্সাপদানং পঠমং.

২. ভাজনপালকত্থেরঅপদানং

৫. ‘‘নগরে বন্ধুমতিযা, কুম্ভকারো অহং তদা;

ভাজনং অনুপালেসিং, ভিক্খুসঙ্ঘস্স তাৰদে.

৬. ‘‘একনৰুতিতো কপ্পে, ভাজনং অনুপালযিং;

দুগ্গতিং নাভিজানামি, ভাজনস্স ইদং ফলং.

৭. ‘‘তেপঞ্ঞাসে ইতো কপ্পে, অনন্তজালিনামকো;

সত্তরতনসম্পন্নো, চক্কৰত্তী মহব্বলো.

৮. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ভাজনপালকো [ভাজনদাযকো (সী. স্যা.)] থেরো ইমা গাথাযো অভাসিত্থাতি.

ভাজনপালকত্থেরস্সাপদানং দুতিযং.

৩. সালপুপ্ফিযত্থেরঅপদানং

৯. ‘‘অরুণৰতিযা নগরে, অহোসিং পূপিকো তদা;

মম দ্ৰারেন গচ্ছন্তং, সিখিনং অদ্দসং জিনং.

১০. ‘‘বুদ্ধস্স পত্তং পগ্গয্হ, সালপুপ্ফং অদাসহং;

সম্মগ্গতস্স বুদ্ধস্স, ৰিপ্পসন্নেন চেতসা.

১১. ‘‘একত্তিংসে ইতো কপ্পে, যং পুপ্ফমভিদাসহং [যং খজ্জকমদাসহং (সী.), যং খজ্জমভিদাসহং (ক.) সালপুপ্ফনামকং খজ্জকং ৰা ভৰেয্য];

দুগ্গতিং নাভিজানামি, সালপুপ্ফস্সিদং ফলং.

১২. ‘‘ইতো চুদ্দসকপ্পম্হি, অহোসিং অমিতঞ্জলো;

সত্তরতনসম্পন্নো, চক্কৰত্তী মহব্বলো.

১৩. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সালপুপ্ফিযো থেরো ইমা গাথাযো অভাসিত্থাতি.

সালপুপ্ফিযত্থেরস্সাপদানং ততিযং.

৪. কিলঞ্জদাযকত্থেরঅপদানং

১৪. ‘‘তিৰরাযং পুরে রম্মে, নল়কারো অহং তদা;

সিদ্ধত্থে লোকপজ্জোতে, পসন্না জনতা তহিং.

১৫. ‘‘পূজত্থং লোকনাথস্স, কিলঞ্জং পরিযেসতি;

বুদ্ধপূজং করোন্তানং, কিলঞ্জং অদদিং অহং.

১৬. ‘‘চতুন্নৰুতিতো কপ্পে, যং কম্মমকরিং তদা;

দুগ্গতিং নাভিজানামি, কিলঞ্জস্স ইদং ফলং.

১৭. ‘‘সত্তসত্ততিকপ্পম্হি, রাজা আসিং জলদ্ধরো [জুতিন্ধরো (সী.)];

সত্তরতনসম্পন্নো, চক্কৰত্তী মহব্বলো.

১৮. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা কিলঞ্জদাযকো থেরো ইমা গাথাযো অভাসিত্থাতি.

কিলঞ্জদাযকত্থেরস্সাপদানং চতুত্থং.

৫. ৰেদিকারকত্থেরঅপদানং

১৯. ‘‘ৰিপস্সিনো ভগৰতো, বোধিযা পাদপুত্তমে;

পসন্নচিত্তো সুমনো, কারেসিং ৰেদিকং অহং.

২০. ‘‘একনৰুতিতো কপ্পে, কারেসিং ৰেদিকং অহং;

দুগ্গতিং নাভিজানামি, ৰেদিকায ইদং ফলং.

২১. ‘‘ইতো একাদসে কপ্পে, অহোসিং সূরিযস্সমো;

সত্তরত্তনসম্পন্নো, চক্কৰত্তী মহব্বলো.

২২. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ৰেদিকারকো থেরো ইমা গাথাযো অভাসিত্থাতি.

ৰেদিকারকত্থেরস্সাপদানং পঞ্চমং.

৬. ৰণ্ণকারত্থেরঅপদানং

২৩. ‘‘নগরে অরুণৰতিযা, ৰণ্ণকারো অহং তদা;

চেতিযে দুস্সভণ্ডানি, নানাৰণ্ণং রজেসহং [রজিং অহং (ক.), রজেমহং (স্যা.)].

২৪. ‘‘একত্তিংসে ইতো কপ্পে, যং ৰণ্ণং রজযিং তদা;

দুগ্গতিং নাভিজানামি, ৰণ্ণদানস্সিদং ফলং.

২৫. ‘‘ইতো তেৰীসতিকপ্পে, ৰণ্ণসম [চন্দুপম (সী.), চন্দসম (স্যা.)] সনামকো;

সত্তরতনসম্পন্নো, চক্কৰত্তী মহব্বলো.

২৬. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ৰণ্ণকারো থেরো ইমা গাথাযো অভাসিত্থাতি.

ৰণ্ণকারত্থেরস্সাপদানং ছট্ঠং.

৭. পিযালপুপ্ফিযত্থেরঅপদানং

২৭. ‘‘মিগলুদ্দো পুরে আসিং, অরঞ্ঞে কাননে অহং;

পিযালং পুপ্ফিতং দিস্ৰা, গতমগ্গে খিপিং অহং.

২৮. ‘‘একনৰুতিতো কপ্পে, যং পুপ্ফমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

২৯. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা পিযালপুপ্ফিযো থেরো ইমা গাথাযো অভাসিত্থাতি.

পিযালপুপ্ফিযত্থেরস্সাপদানং সত্তমং.

৮. অম্বযাগদাযকত্থেরঅপদানং

৩০. ‘‘সকে সিপ্পে অপত্থদ্ধো, অগমং কাননং অহং;

সম্বুদ্ধং যন্তং দিস্ৰান, অম্বযাগং অদাসহং.

৩১. ‘‘একনৰুতিতো কপ্পে, যং দানমদদিং তদা;

দুগ্গতিং নাভিজানামি, অম্বযাগস্সিদং ফলং.

৩২. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা অম্বযাগদাযকো থেরো ইমা গাথাযো অভাসিত্থাতি.

অম্বযাগদাযকত্থেরস্সাপদানং অট্ঠমং.

৯. জগতিকারকত্থেরঅপদানং

৩৩. ‘‘নিব্বুতে লোকনাথম্হি, অত্থদস্সি নরুত্তমে;

জগতী কারিতা ময্হং, বুদ্ধস্স থূপমুত্তমে.

৩৪. ‘‘অট্ঠারসে কপ্পসতে, যং কম্মমকরিং তদা;

দুগ্গতিং নাভিজানামি, জগতিযা ইদং ফলং.

৩৫. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা জগতিকারকো থেরো ইমা গাথাযো অভাসিত্থাতি.

জগতিকারকত্থেরস্সাপদানং নৰমং.

১০. ৰাসিদাযকত্থেরঅপদানং

৩৬. ‘‘কম্মারোহং পুরে আসিং, তিৰরাযং পুরুত্তমে;

একা ৰাসি মযা দিন্না, সযম্ভুং অপরাজিতং [সযম্ভুম্হিপরাজিতে (?)].

৩৭. ‘‘চতুন্নৰুতিতো কপ্পে, যং ৰাসিমদদিং তদা;

দুগ্গতিং নাভিজানামি, ৰাসিদানস্সিদং ফলং.

৩৮. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ৰাসিদাযকো থেরো ইমা গাথাযো অভাসিত্থাতি.

ৰাসিদাযকত্থেরস্সাপদানং দসমং.

উদকাসনৰগ্গো চতুৰীসতিমো.