২৫. তুৰরদাযকৰগ্গো

১. তুৰরদাযকত্থেরঅপদানং

১. ‘‘মিগলুদ্দো পুরে আসিং, অরঞ্ঞে কাননে অহং;

ভরিত্ৰা তুৰরমাদায [ভরিত্ৰা তুরৰমাদায (ক.), ভজ্জিতং তুৰরমাদায (?) এত্থ তুৰরন্তি মুগ্গকলাযসদিসং তুৰরট্ঠিন্তি তদট্ঠকথা; তুৰরো ধঞ্ঞভেদেতি সক্কতাভিধানে], সঙ্ঘস্স অদদিং অহং.

২. ‘‘একনৰুতিতো কপ্পে, যং দানমদদিং তদা;

দুগ্গতিং নাভিজানামি, তুৰরস্স ইদং ফলং.

৩. ‘‘পটিসম্ভিদা চতস্সো, ৰিমোক্খাপি চ অট্ঠিমে;

ছল়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা তুৰরদাযকো থেরো ইমা গাথাযো অভাসিত্থাতি.

তুৰরদাযকত্থেরস্সাপদানং পঠমং.

২. নাগকেসরিযত্থেরঅপদানং

৪. ‘‘ধনুং অদ্ৰেজ্ঝং কত্ৰান, ৰনমজ্ঝোগহিং অহং;

কেসরং ওগতং [ওসরং (স্যা.), ওসটং (সী.)] দিস্ৰা, পতপত্তং সমুট্ঠিতং.

৫. ‘‘উভো হত্থেহি পগ্গয্হ, সিরে কত্ৰান অঞ্জলিং;

বুদ্ধস্স অভিরোপেসিং, তিস্সস্স লোকবন্ধুনো.

৬. ‘‘দ্ৰেনৰুতে ইতো কপ্পে, যং পুপ্ফমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

৭. ‘‘তেসত্ততিম্হি কপ্পম্হি [সত্তসত্ততিমে কপ্পে (স্যা.)], সত্ত কেসরনামকা;

সত্তরতনসম্পন্না, চক্কৰত্তী মহব্বলা.

৮. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা নাগকেসরিযো থেরো ইমা গাথাযো অভাসিত্থাতি.

নাগকেসরিযত্থেরস্সাপদানং দুতিযং.

৩. নল়িনকেসরিযত্থেরঅপদানং

৯. ‘‘জাতস্সরস্স ৰেমজ্ঝে, ৰসামি জলকুক্কুটো;

অদ্দসাহং [অথদ্দসং (সী. স্যা.)] দেৰদেৰং, গচ্ছন্তং অনিলঞ্জসে.

১০. ‘‘তুণ্ডেন কেসরিং [কেসরং (স্যা.)] গয্হ, ৰিপ্পসন্নেন চেতসা;

বুদ্ধস্স অভিরোপেসিং, তিস্সস্স লোকবন্ধুনো.

১১. ‘‘দ্ৰেনৰুতে ইতো কপ্পে, যং পুপ্ফমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

১২. ‘‘তেসত্ততিম্হি কপ্পম্হি, সত্ত কেসরনামকা [সতপত্তসনামকো (সী. স্যা.)];

সত্তরতনসম্পন্না, চক্কৰত্তী মহব্বলা.

১৩. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা নল়িনকেসরিযো থেরো ইমা গাথাযো অভাসিত্থাতি.

নল়িনকেসরিযত্থেরস্সাপদানং ততিযং.

৪. ৰিরৰপুপ্ফিযত্থেরঅপদানং

১৪. ‘‘খীণাসৰসহস্সেহি, নিয্যাতি লোকনাযকো;

ৰিরৰপুপ্ফমাদায [ৰিরৰিপুপ্ফং পগ্গয্হ (সী.)], বুদ্ধস্স অভিরোপযিং.

১৫. ‘‘একনৰুতিতো কপ্পে, যং পুপ্ফমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

১৬. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ৰিরৰপুপ্ফিযো থেরো ইমা গাথাযো অভাসিত্থাতি.

ৰিরৰপুপ্ফিযত্থেরস্সাপদানং চতুত্থং.

৫. কুটিধূপকত্থেরঅপদানং

১৭. ‘‘সিদ্ধত্থস্স ভগৰতো, অহোসিং কুটিগোপকো;

কালেন কালং ধূপেসিং, পসন্নো সেহি পাণিভি.

১৮. ‘‘চতুন্নৰুতিতো কপ্পে, যং কম্মমকরিং তদা;

দুগ্গতিং নাভিজানামি, ধূপদানস্সিদং [বুদ্ধপূজাযিদং (সী.)] ফলং.

১৯. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা কুটিধূপকো থেরো ইমা গাথাযো অভাসিত্থাতি.

কুটিধূপকত্থেরস্সাপদানং পঞ্চমং.

৬. পত্তদাযকত্থেরঅপদানং

২০. ‘‘পরমেন দমথেন, সিদ্ধত্থস্স মহেসিনো;

পত্তদানং মযা দিন্নং, উজুভূতস্স তাদিনো.

২১. ‘‘চতুন্নৰুতিতো কপ্পে, যং দানমদদিং তদা;

দুগ্গতিং নাভিজানামি, পত্তদানস্সিদং ফলং.

২২. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা পত্তদাযকো থেরো ইমা গাথাযো অভাসিত্থাতি.

পত্তদাযকত্থেরস্সাপদানং ছট্ঠং.

৭. ধাতুপূজকত্থেরঅপদানং

২৩. ‘‘নিব্বুতে লোকনাথম্হি, সিদ্ধত্থম্হি নরুত্তমে;

একা ধাতু মযা লদ্ধা, দ্ৰিপদিন্দস্স তাদিনো.

২৪. ‘‘তাহং ধাতুং গহেত্ৰান, বুদ্ধস্সাদিচ্চবন্ধুনো;

পঞ্চৰস্সে পরিচরিং, তিট্ঠন্তংৰ নরুত্তমং.

২৫. ‘‘চতুন্নৰুতিতো কপ্পে, যং ধাতুং পূজযিং তদা;

দুগ্গতিং নাভিজানামি, ধাতুপট্ঠহনে ফলং.

২৬. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ধাতুপূজকো থেরো ইমা গাথাযো অভাসিত্থাতি.

ধাতুপূজকত্থেরস্সাপদানং সত্তমং.

৮. সত্তলিপুপ্ফপূজকত্থেরঅপদানং

২৭. ‘‘সত্ত সত্তলিপুপ্ফানি, সীসে কত্ৰানহং তদা;

বুদ্ধস্স অভিরোপেসিং, ৰেস্সভুম্হি নরুত্তমে [ৰিভত্তিৰিপল্লাসো চিন্তেতব্বো].

২৮. ‘‘একত্তিংসে ইতো কপ্পে, যং পুপ্ফমভিপূজযিং;

দুগ্গতিং নাভিজানামি, বুদ্ধপূজাযিদং ফলং.

২৯. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সত্তলিপুপ্ফপূজকো থেরো ইমা গাথাযো অভাসিত্থাতি.

সত্তলিপুপ্ফপূজকত্থেরস্সাপদানং অট্ঠমং.

৯. বিম্বিজালিযত্থেরঅপদানং

৩০. ‘‘পদুমুত্তরো নাম জিনো, সযম্ভূ অগ্গপুগ্গলো;

চতুসচ্চং পকাসেতি, দীপেতি অমতং পদং.

৩১. ‘‘বিম্বিজালকপুপ্ফানি [বিম্বজালকপুপ্ফানি (ক.)], পুথু কত্ৰানহং তদা;

বুদ্ধস্স অভিরোপেসিং, দ্ৰিপদিন্দস্স তাদিনো.

৩২. ‘‘অট্ঠসট্ঠিম্হিতো কপ্পে, চতুরো কিঞ্জকেসরা;

সত্তরতনসম্পন্না, চক্কৰত্তী মহব্বলা.

৩৩. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা বিম্বিজালিযো থেরো ইমা গাথাযো অভাসিত্থাতি.

বিম্বিজালিযত্থেরস্সাপদানং নৰমং.

১০. উদ্দালকদাযকত্থেরঅপদানং

৩৪. ‘‘ককুধো নাম নামেন, সযম্ভূ অপরাজিতো;

পৰনা নিক্খমিত্ৰান, অনুপ্পত্তো মহানদিং.

৩৫. ‘‘উদ্দালকং গহেত্ৰান, সযম্ভুস্স অদাসহং;

সংযতস্সুজুভূতস্স, পসন্নমানসো অহং.

৩৬. ‘‘একত্তিংসে ইতো কপ্পে, যং পুপ্ফমভিপূজযিং;

দুগ্গতিং নাভিজানামি, পুপ্ফদানস্সিদং ফলং.

৩৭. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা উদ্দালকদাযকো থেরো ইমা গাথাযো অভাসিত্থাতি.

উদ্দালকদাযকত্থেরস্সাপদানং দসমং.

তুৰরদাযকৰগ্গো পঞ্চৰীসতিমো.