৭. তালৰণ্টদাযকত্থেরঅপদানং

৩১. ‘‘তালৰণ্টং মযা দিন্নং, তিস্সস্সাদিচ্চবন্ধুনো;

গিম্হনিব্বাপনত্থায, পরিল়াহোপসন্তিযা.

৩২. ‘‘সন্নিব্বাপেমি রাগগ্গিং, দোসগ্গিঞ্চ তদুত্তরিং;

নিব্বাপেমি চ মোহগ্গিং, তালৰণ্টস্সিদং ফলং.

৩৩. ‘‘কিলেসা ঝাপিতা ময্হং, ভৰা সব্বে সমূহতা;

ধারেমি অন্তিমং দেহং, সম্মাসম্বুদ্ধসাসনে.

৩৪. ‘‘দ্ৰেনৰুতে ইতো কপ্পে, যং কম্মমকরিং তদা;

দুগ্গতিং নাভিজানামি, তালৰণ্টস্সিদং ফলং.

৩৫. ‘‘তেসট্ঠিম্হি ইতো কপ্পে, মহানামসনামকো;

সত্তরতনসম্পন্নো, চক্কৰত্তী মহব্বলো.

৩৬. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা তালৰণ্টদাযকো থেরো ইমা গাথাযো অভাসিত্থাতি.

তালৰণ্টদাযকত্থেরস্সাপদানং সত্তমং.