২২. হত্থিৰগ্গো

১. হত্থিদাযকত্থেরঅপদানং

১. ‘‘সিদ্ধত্থস্স ভগৰতো, দ্ৰিপদিন্দস্স তাদিনো;

নাগসেট্ঠো মযা দিন্নো, ঈসাদন্তো উরূল়্হৰা.

২. ‘‘উত্তমত্থং অনুভোমি, সন্তিপদমনুত্তরং;

নাগদানং [অগ্গদানং (সী. ক.)] মযা দিন্নং, সব্বলোকহিতেসিনো.

৩. ‘‘চতুন্নৰুতিতো কপ্পে, যং নাগ [দান (সী. ক.)] মদদিং তদা;

দুগ্গতিং নাভিজানামি, নাগদানস্সিদং ফলং.

৪. ‘‘অট্ঠসত্ততিকপ্পম্হি, সোল়সাসিংসু খত্তিযা;

সমন্তপাসাদিকা নাম, চক্কৰত্তী মহব্বলা.

৫. ‘‘পটিসম্ভিদা চতস্সো, ৰিমোক্খাপি চ অট্ঠিমে;

ছল়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা হত্থিদাযকো থেরো ইমা গাথাযো অভাসিত্থাতি.

হত্থিদাযকত্থেরস্সাপদানং পঠমং.

২. পানধিদাযকত্থেরঅপদানং

৬. ‘‘আরঞ্ঞিকস্স ইসিনো, চিররত্ততপস্সিনো [ঝাযিনো, মেত্তচিত্ততপস্সিনো (স্যা.)];

বুদ্ধস্স [ধম্মস্স (স্যা. ক.)] ভাৰিতত্তস্স, অদাসিং পানধিং অহং.

৭. ‘‘তেন কম্মেন দ্ৰিপদিন্দ, লোকজেট্ঠ নরাসভ;

দিব্বযানং [সব্বং যানং (সী.)] অনুভোমি, পুব্বকম্মস্সিদং ফলং.

৮. ‘‘চতুন্নৰুতে ইতো কপ্পে, যং কম্মমকরিং তদা;

দুগ্গতিং নাভিজানামি, পানধিস্স ইদং ফলং.

৯. ‘‘সত্তসত্ততিতো কপ্পে, অট্ঠ আসিংসু খত্তিযা;

সুযানা নাম নামেন, চক্কৰত্তী মহব্বলা.

১০. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা পানধিদাযকো থেরো ইমা গাথাযো অভাসিত্থাতি.

পানধিদাযকত্থেরস্সাপদানং দুতিযং.

৩. সচ্চসঞ্ঞকত্থেরঅপদানং

১১. ‘‘ৰেস্সভূ তম্হি সমযে, ভিক্খুসঙ্ঘপুরক্খতো;

দেসেতি অরিযসচ্চানি, নিব্বাপেন্তো মহাজনং.

১২. ‘‘পরমকারুঞ্ঞপত্তোম্হি, সমিতিং অগমাসহং;

সোহং নিসিন্নকো সন্তো, ধম্মমস্সোসি সত্থুনো.

১৩. ‘‘তস্সাহং ধম্মং সুত্ৰান, দেৰলোকং অগচ্ছহং;

তিংসকপ্পানি দেৰেসু, অৰসিং তত্থহং পুরে.

১৪. ‘‘একত্তিংসে ইতো কপ্পে, যং সঞ্ঞমলভিং তদা;

দুগ্গতিং নাভিজানামি, সচ্চসঞ্ঞাযিদং ফলং.

১৫. ‘‘ছব্বীসম্হি ইতো কপ্পে, একো আসিং জনাধিপো;

একফুসিতনামেন, চক্কৰত্তী মহব্বলো.

১৬. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সচ্চসঞ্ঞকো থেরো ইমা গাথাযো অভাসিত্থাতি.

সচ্চসঞ্ঞকত্থেরস্সাপদানং ততিযং.

৪. একসঞ্ঞকত্থেরঅপদানং

১৭. ‘‘দুমগ্গে পংসুকূলিকং [পংসুকূলকং (?)], লগ্গং দিস্ৰান সত্থুনো;

অঞ্জলিং পগ্গহেত্ৰান, পংসুকূলং অৰন্দহং.

১৮. ‘‘একত্তিংসে ইতো কপ্পে, যং সঞ্ঞমলভিং তদা;

দুগ্গতিং নাভিজানামি, বুদ্ধপূজাযিদং ফলং.

১৯. ‘‘পঞ্চৰীসে ইতো কপ্পে, একো আসিং জনাধিপো;

অমিতাভোতি নামেন, চক্কৰত্তী মহব্বলো.

২০. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা একসঞ্ঞকো থেরো ইমা গাথাযো অভাসিত্থাতি.

একসঞ্ঞকত্থেরস্সাপদানং চতুত্থং.

৫. রংসিসঞ্ঞকত্থেরঅপদানং

২১. ‘‘উদেন্তং সতরংসিংৰ, পীতরংসিংৰ [সিতরংসিং ৰ (সী. স্যা.)] ভাণুমং;

ব্যগ্ঘূসভংৰ পৰরং, সুজাতং পব্বতন্তরে.

২২. ‘‘বুদ্ধস্স আনুভাৰো সো, জলতে পব্বতন্তরে;

রংসে [রংস্যা (?)] চিত্তং পসাদেত্ৰা, কপ্পং সগ্গম্হি মোদহং.

২৩. ‘‘অৰসেসেসু কপ্পেসু, কুসলং চরিতং মযা;

তেন চিত্তপ্পসাদেন, বুদ্ধানুস্সতিযাপি চ.

২৪. ‘‘তিংসকপ্পসহস্সেতো, যং সঞ্ঞমলভিং তদা;

দুগ্গতিং নাভিজানামি, বুদ্ধসঞ্ঞাযিদং ফলং.

২৫. ‘‘সত্তপঞ্ঞাসকপ্পম্হি, একো আসিং জনাধিপো;

সুজাতো নাম নামেন, চক্কৰত্তী মহব্বলো.

২৬. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা রংসিসঞ্ঞকো থেরো ইমা গাথাযো অভাসিত্থাতি.

রংসিসঞ্ঞকত্থেরস্সাপদানং পঞ্চমং.

৬. সন্ধিতত্থেরঅপদানং

২৭. ‘‘অস্সত্থে হরিতোভাসে, সংৰিরূল়্হম্হি পাদপে;

একং বুদ্ধগতং সঞ্ঞং, অলভিংহং [অলভিস্সং (সী.)] পতিস্সতো.

২৮. ‘‘একত্তিংসে ইতো কপ্পে, যং সঞ্ঞমলভিং তদা;

তস্সা সঞ্ঞায ৰাহসা, পত্তো মে আসৰক্খযো.

২৯. ‘‘ইতো তেরসকপ্পম্হি, ধনিট্ঠো নাম খত্তিযো;

সত্তরতনসম্পন্নো, চক্কৰত্তী মহব্বলো.

৩০. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সন্ধিতো [সণ্ঠিতো (সী.)] থেরো ইমা গাথাযো অভাসিত্থাতি.

সন্ধিতত্থেরস্সাপদানং ছট্ঠং.

৭. তালৰণ্টদাযকত্থেরঅপদানং

৩১. ‘‘তালৰণ্টং মযা দিন্নং, তিস্সস্সাদিচ্চবন্ধুনো;

গিম্হনিব্বাপনত্থায, পরিল়াহোপসন্তিযা.

৩২. ‘‘সন্নিব্বাপেমি রাগগ্গিং, দোসগ্গিঞ্চ তদুত্তরিং;

নিব্বাপেমি চ মোহগ্গিং, তালৰণ্টস্সিদং ফলং.

৩৩. ‘‘কিলেসা ঝাপিতা ময্হং, ভৰা সব্বে সমূহতা;

ধারেমি অন্তিমং দেহং, সম্মাসম্বুদ্ধসাসনে.

৩৪. ‘‘দ্ৰেনৰুতে ইতো কপ্পে, যং কম্মমকরিং তদা;

দুগ্গতিং নাভিজানামি, তালৰণ্টস্সিদং ফলং.

৩৫. ‘‘তেসট্ঠিম্হি ইতো কপ্পে, মহানামসনামকো;

সত্তরতনসম্পন্নো, চক্কৰত্তী মহব্বলো.

৩৬. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা তালৰণ্টদাযকো থেরো ইমা গাথাযো অভাসিত্থাতি.

তালৰণ্টদাযকত্থেরস্সাপদানং সত্তমং.

৮. অক্কন্তসঞ্ঞকত্থেরঅপদানং

৩৭. ‘‘কুসাটকং গহেত্ৰান, উপজ্ঝাযস্সহং পুরে;

মন্তঞ্চ অনুসিক্খামি, গন্থাদোসস্স [কণ্ডভেদস্স (সী.), গণ্ডভেদস্স (স্যা.)] পত্তিযা.

৩৮. ‘‘অদ্দসং ৰিরজং বুদ্ধং, আহুতীনং পটিগ্গহং;

উসভং পৰরং অগ্গং, তিস্সং বুদ্ধং গণুত্তমং [গজুত্তমং (স্যা.)].

৩৯. ‘‘কুসাটকং পত্থরিতং, অক্কমন্তং নরুত্তমং;

সমুগ্গতং মহাৰীরং, লোকজেট্ঠং নরাসভং.

৪০. ‘‘দিস্ৰা তং লোকপজ্জোতং, ৰিমলং চন্দসন্নিভং;

অৰন্দিং সত্থুনো পাদে, ৰিপ্পসন্নেন চেতসা.

৪১. ‘‘চতুন্নৰুতিতো কপ্পে, যং অদাসিং কুসাটকং;

দুগ্গতিং নাভিজানামি, কুসাটকস্সিদং ফলং.

৪২. ‘‘সত্ততিংসে ইতো কপ্পে, একো আসিং জনাধিপো;

সুনন্দো নাম নামেন, চক্কৰত্তী মহব্বলো.

৪৩. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা অক্কন্তসঞ্ঞকো থেরো ইমা গাথাযো অভাসিত্থাতি;

অক্কন্তসঞ্ঞকত্থেরস্সাপদানং অট্ঠমং.

৯. সপ্পিদাযকত্থেরঅপদানং

৪৪. ‘‘নিসিন্নো পাসাদৰরে, নারীগণপুরক্খতো;

ব্যাধিতং সমণং দিস্ৰা, অভিনামেসহং ঘরং.

৪৫. ‘‘উপৰিট্ঠং মহাৰীরং, দেৰদেৰং নরাসভং;

সপ্পিতেলং মযা দিন্নং, সিদ্ধত্থস্স মহেসিনো.

৪৬. ‘‘পস্সদ্ধদরথং দিস্ৰা, ৰিপ্পসন্নমুখিন্দ্রিযং;

ৰন্দিত্ৰা সত্থুনো পাদে, অনুসংসাৰযিং পুরে.

৪৭. ‘‘দিস্ৰা মং সুপ্পসন্নত্তং [সুপ্পসন্নন্তং (স্যা. ক.) সুপ্পসন্নচিত্তন্তি অত্থো], ইদ্ধিযা পারমিঙ্গতো;

নভং অব্ভুগ্গমী ধীরো, হংসরাজাৰ অম্বরে.

৪৮. ‘‘চতুন্নৰুতিতো কপ্পে, যং দানমদদিং তদা;

দুগ্গতিং নাভিজানামি, সপ্পিতেলস্সিদং ফলং.

৪৯. ‘‘ইতো সত্তরসে কপ্পে, জুতিদেৰ [দুতিদেৰ (স্যা.), তুতিদেৰ (ক.)] সনামকো;

সত্তরতনসম্পন্নো, চক্কৰত্তী মহব্বলো.

৫০. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সপ্পিদাযকো থেরো ইমা গাথাযো অভাসিত্থাতি.

সপ্পিদাযকত্থেরস্সাপদানং নৰমং.

১০. পাপনিৰারিযত্থেরঅপদানং

৫১. ‘‘পিযদস্সিস্স ভগৰতো, চঙ্কমং সোধিতং মযা;

নল়কেহি পটিচ্ছন্নং, ৰাতাতপনিৰারণং.

৫২. ‘‘পাপং ৰিৰজ্জনত্থায, কুসলস্সুপসম্পদা;

কিলেসানং পহানায, পদহিং সত্থু সাসনে.

৫৩. ‘‘ইতো একাদসে কপ্পে, অগ্গিদেৰোতি ৰিস্সুতো;

সত্তরতনসম্পন্নো, চক্কৰত্তী মহব্বলো.

৫৪. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা পাপনিৰারিযো [ৰাতাতপনিৰারিযো (?)] থেরো ইমা গাথাযো অভাসিত্থাতি.

পাপনিৰারিযত্থেরস্সাপদানং দসমং.

হত্থিৰগ্গো বাৰীসতিমো.