১. সীহাসনদাযকত্থেরঅপদানং

১. ‘‘নিব্বুতে লোকনাথম্হি, সিদ্ধত্থে দ্ৰিপদুত্তমে [দিপদুত্তমে (সী. স্যা.)];

ৰিত্থারিকে পাৰচনে, বাহুজঞ্ঞম্হি সাসনে.

২. ‘‘পসন্নচিত্তো সুমনো, সীহাসনমকাসহং;

সীহাসনং করিত্ৰান, পাদপীঠমকাসহং.

৩. ‘‘সীহাসনে চ ৰস্সন্তে, ঘরং তত্থ অকাসহং;

তেন চিত্তপ্পসাদেন, তুসিতং উপপজ্জহং.

৪. ‘‘আযামেন চতুব্বীস, যোজনং আসি [যোজনাসিংসু (স্যা. ক.)] তাৰদে;

ৰিমানং সুকতং ময্হং, ৰিত্থারেন চতুদ্দস.

৫. ‘‘সতং [সত্ত (স্যা.)] কঞ্ঞাসহস্সানি, পরিৰারেন্তি মং সদা;

সোণ্ণমযঞ্চ পল্লঙ্কং, ব্যম্হে আসি সুনিম্মিতং.

৬. ‘‘হত্থিযানং অস্সযানং, দিব্বযানং উপট্ঠিতং;

পাসাদা সিৰিকা চেৰ, নিব্বত্তন্তি যদিচ্ছকং.

৭. ‘‘মণিমযা চ পল্লঙ্কা, অঞ্ঞে সারমযা বহূ;

নিব্বত্তন্তি মমং সব্বে, সীহাসনস্সিদং ফলং.

৮. ‘‘সোণ্ণমযা রূপিমযা, ফলিকাৰেল়ুরিযামযা;

পাদুকা অভিরূহামি, পাদপীঠস্সিদং ফলং.

৯. ‘‘চতুন্নৰুতিতো [চতুনৰুতে ইতো (সী. স্যা.)] কপ্পে, যং কম্মমকরিং তদা;

দুগ্গতিং নাভিজানামি, পুঞ্ঞকম্মস্সিদং ফলং.

১০. ‘‘তেসত্ততিম্হিতো কপ্পে, ইন্দনামা তযো জনা;

দ্ৰেসত্ততিম্হিতো কপ্পে, তযো সুমননামকা.

১১. ‘‘সমসত্ততিতো কপ্পে, তযো ৰরুণনামকা;

সত্তরতনসম্পন্না, চতুদীপম্হি ইস্সরা.

১২. ‘‘পটিসম্ভিদা চতস্সো, ৰিমোক্খাপি চ অট্ঠিমে;

ছল়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা সীহাসনদাযকো থেরো ইমা গাথাযো অভাসিত্থাতি.

সীহাসনদাযকত্থেরস্সাপদানং পঠমং.