৯. একচারিযত্থেরঅপদানং

৫১. ‘‘তাৰতিংসেসু দেৰেসু, মহাঘোসো তদা অহু;

বুদ্ধো চ লোকে নিব্বাতি, মযঞ্চম্হ সরাগিনো.

৫২. ‘‘তেসং সংৰেগজাতানং, সোকসল্লসমঙ্গিনং;

সবলেন উপত্থদ্ধো, অগমং বুদ্ধসন্তিকং.

৫৩. ‘‘মন্দারৰং গহেত্ৰান, সঙ্গীতি [সণ্হিতং (সী.), সঙ্গিতং (স্যা.)] অভিনিম্মিতং;

পরিনিব্বুতকালম্হি, বুদ্ধস্স অভিরোপযিং.

৫৪. ‘‘সব্বে দেৰানুমোদিংসু, অচ্ছরাযো চ মে তদা;

কপ্পানং সতসহস্সং, দুগ্গতিং নুপপজ্জহং.

৫৫. ‘‘সট্ঠিকপ্পসহস্সম্হি, ইতো সোল়স তে জনা;

মহামল্লজনা নাম, চক্কৰত্তী মহব্বলা.

৫৬. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা একচারিযো থেরো ইমা গাথাযো অভাসিত্থাতি.

একচারিযত্থেরস্সাপদানং নৰমং.