৯. তিকিচ্ছকত্থেরঅপদানং

৩৯. ‘‘নগরে বন্ধুমতিযা, ৰেজ্জো আসিং সুসিক্খিতো;

আতুরানং সদুক্খানং, মহাজনসুখাৰহো.

৪০. ‘‘ব্যাধিতং সমণং দিস্ৰা, সীলৰন্তং মহাজুতিং;

পসন্নচিত্তো সুমনো, ভেসজ্জমদদিং তদা.

৪১. ‘‘অরোগো আসি তেনেৰ, সমণো সংৰুতিন্দ্রিযো;

অসোকো নাম নামেন, উপট্ঠাকো ৰিপস্সিনো.

৪২. ‘‘একনৰুতিতো কপ্পে, যং ওসধমদাসহং;

দুগ্গতিং নাভিজানামি, ভেসজ্জস্স ইদং ফলং.

৪৩. ‘‘ইতো চ অট্ঠমে কপ্পে, সব্বোসধসনামকো;

সত্তরতনসম্পন্নো, চক্কৰত্তী মহব্বলো.

৪৪. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা তিকিচ্ছকো থেরো ইমা গাথাযো অভাসিত্থাতি.

তিকিচ্ছকত্থেরস্সাপদানং নৰমং.