১. কুমুদমালিযত্থেরঅপদানং

১. ‘‘পব্বতে হিমৰন্তম্হি, মহাজাতস্সরো অহু;

তত্থজো রক্খসো আসিং, ঘোররূপো মহব্বলো.

২. ‘‘কুমুদং পুপ্ফতে তত্থ, চক্কমত্তানি জাযরে;

ওচিনামি চ তং পুপ্ফং, বলিনো সমিতিং তদা.

৩. ‘‘অত্থদস্সী তু ভগৰা, দ্ৰিপদিন্দো নরাসভো;

পুপ্ফসঙ্কোচিতং [পুপ্ফং সঙ্কোচিতং (সী. স্যা.), পুপ্ফং সমোচিতং (?)] দিস্ৰা, আগচ্ছি মম সন্তিকং.

৪. ‘‘উপাগতঞ্চ সম্বুদ্ধং, দেৰদেৰং নরাসভং;

সব্বঞ্চ পুপ্ফং পগ্গয্হ, বুদ্ধস্স অভিরোপযিং.

৫. ‘‘যাৰতা হিমৰন্তন্তা, পরিসা সা [হিমৰন্তস্মিং, যাৰ মালা (স্যা.)] তদা অহু;

তাৰচ্ছদনসম্পন্নো, অগমাসি তথাগতো.

৬. ‘‘অট্ঠারসে কপ্পসতে, যং পুপ্ফমভিরোপযিং;

দুগ্গতিং নাভিজানামি, বুদ্ধপূজাযিদং ফলং.

৭. ‘‘ইতো পন্নরসে কপ্পে, সত্তাহেসুং জনাধিপা;

সহস্সরথনামা তে, চক্কৰত্তী মহব্বলা.

৮. ‘‘পটিসম্ভিদা চতস্সো, ৰিমোক্খাপি চ অট্ঠিমে;

ছল়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা কুমুদমালিযো থেরো ইমা গাথাযো অভাসিত্থাতি.

কুমুদমালিযত্থেরস্সাপদানং পঠমং.