৮. দুস্সদাযকত্থেরঅপদানং

৩৮. ‘‘তিৰরাযং পুরে রম্মে, রাজপুত্তোসহং [রাজপুত্তো অহং (সী. স্যা.)] তদা;

পণ্ণাকারং লভিত্ৰান, উপসন্তস্সদাসহং.

৩৯. ‘‘অধিৰাসেসি ভগৰা, ৰত্থং [নৰং (ক.)] হত্থেন আমসি;

সিদ্ধত্থো অধিৰাসেত্ৰা, ৰেহাসং নভমুগ্গমি.

৪০. ‘‘বুদ্ধস্স গচ্ছমানস্স, দুস্সা ধাৰন্তি পচ্ছতো;

তত্থ চিত্তং পসাদেসিং, বুদ্ধো নো অগ্গপুগ্গলো.

৪১. ‘‘চতুন্নৰুতিতো কপ্পে, যং দুস্সমদদিং তদা;

দুগ্গতিং নাভিজানামি, দুস্সদানস্সিদং ফলং.

৪২. ‘‘সত্তসট্ঠিম্হিতো কপ্পে, চক্কৰত্তী তদা অহু;

পরিসুদ্ধোতি নামেন, মনুজিন্দো মহব্বলো.

৪৩. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা দুস্সদাযকো থেরো ইমা গাথাযো অভাসিত্থাতি.

দুস্সদাযকত্থেরস্সাপদানং অট্ঠমং.