১৫. ছত্তৰগ্গো

১. অতিছত্তিযত্থেরঅপদানং

১. ‘‘পরিনিব্বুতে ভগৰতি, অত্থদস্সীনরুত্তমে;

ছত্তাতিছত্তং [ছত্তাধিছত্তং (সী.)] কারেত্ৰা, থূপম্হি অভিরোপযিং.

২. ‘‘কালেন কালমাগন্ত্ৰা, নমস্সিং লোকনাযকং [সত্থু চেতিযং (সী.)];

পুপ্ফচ্ছদনং কত্ৰান, ছত্তম্হি অভিরোপযিং.

৩. ‘‘সত্তরসে কপ্পসতে, দেৰরজ্জমকারযিং;

মনুস্সত্তং ন গচ্ছামি, থূপপূজাযিদং ফলং.

৪. ‘‘পটিসম্ভিদা চতস্সো, ৰিমোক্খাপি চ অট্ঠিমে;

ছল়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা অতিছত্তিযো [অধিছত্তিযো (সী. স্যা.)] থেরো ইমা গাথাযো অভাসিত্থাতি.

অতিছত্তিযত্থেরস্সাপদানং পঠমং.

২. থম্ভারোপকত্থেরঅপদানং

৫. ‘‘নিব্বুতে লোকনাথম্হি, ধম্মদস্সীনরাসভে;

আরোপেসিং ধজত্থম্ভং, বুদ্ধসেট্ঠস্স চেতিযে.

৬. ‘‘নিস্সেণিং মাপযিত্ৰান, থূপসেট্ঠং সমারুহিং;

জাতিপুপ্ফং গহেত্ৰান, থূপম্হি অভিরোপযিং.

৭. ‘‘অহো বুদ্ধো অহো ধম্মো, অহো নো সত্থু সম্পদা;

দুগ্গতিং নাভিজানামি, থূপপূজাযিদং ফলং.

৮. ‘‘চতুন্নৰুতিতো কপ্পে, থূপসীখসনামকা;

সোল়সাসিংসু রাজানো, চক্কৰত্তী মহব্বলা.

৯. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা থম্ভারোপকো থেরো ইমা গাথাযো অভাসিত্থাতি.

থম্ভারোপকত্থেরস্সাপদানং দুতিযং.

৩. ৰেদিকারকত্থেরঅপদানং

১০. ‘‘নিব্বুতে লোকনাথম্হি, পিযদস্সীনরুত্তমে;

পসন্নচিত্তো সুমনো, মুত্তাৰেদিমকাসহং.

১১. ‘‘মণীহি পরিৰারেত্ৰা, অকাসিং ৰেদিমুত্তমং;

ৰেদিকায মহং কত্ৰা, তত্থ কালঙ্কতো অহং.

১২. ‘‘যং যং যোনুপপজ্জামি, দেৰত্তং অথ মানুসং;

মণী ধারেন্তি আকাসে, পুঞ্ঞকম্মস্সিদং ফলং.

১৩. ‘‘সোল়সিতো কপ্পসতে, মণিপ্পভাসনামকা;

ছত্তিংসাসিংসু [বাত্তিংসাসিংসু (সী. স্যা.)] রাজানো, চক্কৰত্তী মহব্বলা.

১৪. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ৰেদিকারকো থেরো ইমা গাথাযো অভাসিত্থাতি.

ৰেদিকারকত্থেরস্সাপদানং ততিযং.

৪. সপরিৰারিযত্থেরঅপদানং

১৫. ‘‘পদুমুত্তরো নাম জিনো, লোকজেট্ঠো নরাসভো;

জলিত্ৰা অগ্গিক্খন্ধোৰ, সম্বুদ্ধো পরিনিব্বুতো.

১৬. ‘‘নিব্বুতে চ মহাৰীরে, থূপো ৰিত্থারিকো অহু;

দূরতোৰ [অহোরত্তং (সী.), থূপদত্তং (স্যা.)] উপট্ঠেন্তি, ধাতুগেহৰরুত্তমে.

১৭. ‘‘পসন্নচিত্তো সুমনো, অকং চন্দনৰেদিকং;

দিস্সতি থূপখন্ধো চ [দীযতি ধূমক্খন্ধো চ (সী.), দীযতি ধূপগন্ধো চ (স্যা.)], থূপানুচ্ছৰিকো তদা.

১৮. ‘‘ভৰে নিব্বত্তমানম্হি, দেৰত্তে অথ মানুসে;

ওমত্তং মে ন পস্সামি, পুব্বকম্মস্সিদং ফলং.

১৯. ‘‘পঞ্চদসকপ্পসতে, ইতো অট্ঠ জনা অহুং;

সব্বে সমত্তনামা তে, চক্কৰত্তী মহব্বলা.

২০. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সপরিৰারিযো থেরো ইমা গাথাযো অভাসিত্থাতি.

সপরিৰারিযত্থেরস্সাপদানং চতুত্থং.

৫. উমাপুপ্ফিযত্থেরঅপদানং

২১. ‘‘নিব্বুতে লোকমহিতে [লোকনাথম্হি (সী.)], আহুতীনং পটিগ্গহে;

সিদ্ধত্থম্হি ভগৰতি, মহাথূপমহো অহু.

২২. ‘‘মহে পৰত্তমানম্হি, সিদ্ধত্থস্স মহেসিনো;

উমাপুপ্ফং [উম্মাপুপ্ফং (সব্বত্থ)] গহেত্ৰান, থূপম্হি অভিরোপযিং.

২৩. ‘‘চতুন্নৰুতিতো কপ্পে, যং পুপ্ফমভিরোপযিং;

দুগ্গতিং নাভিজানামি, থূপপূজাযিদং [পুপ্ফপূজাযিদং (স্যা.), বুদ্ধপূজাযিদং (ক.)] ফলং.

২৪. ‘‘ইতো চ নৰমে কপ্পে, সোমদেৰসনামকা;

পঞ্চাসীতিসু রাজানো, চক্কৰত্তী মহব্বলা.

২৫. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা উমাপুপ্ফিযো থেরো ইমা গাথাযো অভাসিত্থাতি.

উমাপুপ্ফিযত্থেরস্সাপদানং পঞ্চমং.

৬. অনুলেপদাযকত্থেরঅপদানং

২৬. ‘‘অনোমদস্সীমুনিনো, বোধিৰেদিমকাসহং;

সুধায পিণ্ডং দত্ৰান, পাণিকম্মং অকাসহং.

২৭. ‘‘দিস্ৰা তং সুকতং কম্মং, অনোমদস্সী নরুত্তমো;

ভিক্খুসঙ্ঘে ঠিতো সত্থা, ইমং গাথং অভাসথ.

২৮. ‘‘‘ইমিনা সুধকম্মেন, চেতনাপণিধীহি চ;

সম্পত্তিং অনুভোত্ৰান, দুক্খস্সন্তং করিস্সতি’.

২৯. ‘‘পসন্নমুখৰণ্ণোম্হি, একগ্গো সুসমাহিতো;

ধারেমি অন্তিমং দেহং, সম্মাসম্বুদ্ধসাসনে.

৩০. ‘‘ইতো কপ্পসতে আসিং, পরিপুণ্ণে অনূনকে [পরিপুণ্ণো অনূনকো (স্যা.)];

রাজা সব্বঘনো নাম, চক্কৰত্তী মহব্বলো.

৩১. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা অনুলেপদাযকো থেরো ইমা গাথাযো অভাসিত্থাতি.

অনুলেপদাযকত্থেরস্সাপদানং ছট্ঠং.

৭. মগ্গদাযকত্থেরঅপদানং

৩২. ‘‘উত্তরিত্ৰান নদিকং, ৰনং গচ্ছতি চক্খুমা;

তমদ্দসাসিং সম্বুদ্ধং, সিদ্ধত্থং ৰরলক্খণং.

৩৩. ‘‘কুদাল [কুদ্দাল (সী. স্যা.)] পিটকমাদায, সমং কত্ৰান তং পথং;

সত্থারং অভিৰাদেত্ৰা, সকং চিত্তং পসাদযিং.

৩৪. ‘‘চতুন্নৰুতিতো কপ্পে, যং কম্মমকরিং তদা;

দুগ্গতিং নাভিজানামি, মগ্গদানস্সিদং ফলং.

৩৫. ‘‘সত্তপঞ্ঞাসকপ্পম্হি, একো আসিং জনাধিপো;

নামেন সুপ্পবুদ্ধোতি, নাযকো সো নরিস্সরো.

৩৬. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা মগ্গদাযকো থেরো ইমা গাথাযো অভাসিত্থাতি.

মগ্গদাযকত্থেরস্সাপদানং সত্তমং.

৮. ফলকদাযকত্থেরঅপদানং

৩৭. ‘‘যানকারো পুরে আসিং, দারুকম্মে সুসিক্খিতো;

চন্দনং ফলকং কত্ৰা, অদাসিং লোকবন্ধুনো.

৩৮. ‘‘পভাসতি ইদং ব্যম্হং, সুৰণ্ণস্স সুনিম্মিতং;

হত্থিযানং অস্সযানং, দিব্বযানং উপট্ঠিতং.

৩৯. ‘‘পাসাদা সিৰিকা চেৰ, নিব্বত্তন্তি যদিচ্ছকং;

অক্খুব্ভং [অক্খোভং (সী.)] রতনং ময্হং, ফলকস্স ইদং ফলং.

৪০. ‘‘একনৰুতিতো কপ্পে, ফলকং যমহং দদিং;

দুগ্গতিং নাভিজানামি, ফলকস্স ইদং ফলং.

৪১. ‘‘সত্তপঞ্ঞাসকপ্পম্হি, চতুরো নিম্মিতাৰ্হযা;

সত্তরতনসম্পন্না, চক্কৰত্তী মহব্বলা.

৪২. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ফলকদাযকো থেরো ইমা গাথাযো অভাসিত্থাতি.

ফলকদাযকত্থেরস্সাপদানং অট্ঠমং.

৯. ৰটংসকিযত্থেরঅপদানং

৪৩. ‘‘সুমেধো নাম নামেন, সযম্ভূ অপরাজিতো;

ৰিৰেকমনুব্রূহন্তো, অজ্ঝোগহি মহাৰনং.

৪৪. ‘‘সল়লং পুপ্ফিতং দিস্ৰা, গন্থিত্ৰান [বন্ধিত্ৰান (সী.)] ৰটংসকং;

বুদ্ধস্স অভিরোপেসিং, সম্মুখা লোকনাযকং.

৪৫. ‘‘তিংসকপ্পসহস্সম্হি, যং পুপ্ফমভিরোপযিং;

দুগ্গতিং নাভিজানামি, বুদ্ধপূজাযিদং ফলং.

৪৬. ‘‘ঊনৰীসে কপ্পসতে, সোল়সাসুং সুনিম্মিতা;

সত্তরতনসম্পন্না, চক্কৰত্তী মহব্বলা.

৪৭. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ৰটংসকিযো থেরো ইমা গাথাযো অভাসিত্থাতি.

ৰটংসকিযত্থেরস্সাপদানং নৰমং.

১০. পল্লঙ্কদাযকত্থেরঅপদানং

৪৮. ‘‘সুমেধস্স ভগৰতো, লোকজেট্ঠস্স তাদিনো;

পল্লঙ্কো হি মযা দিন্নো, সউত্তরসপচ্ছদো.

৪৯. ‘‘সত্তরতনসম্পন্নো, পল্লঙ্কো আসি সো তদা;

মম সঙ্কপ্পমঞ্ঞায, নিব্বত্ততি সদা মম.

৫০. ‘‘তিংসকপ্পসহস্সম্হি, পল্লঙ্কমদদিং তদা;

দুগ্গতিং নাভিজানামি, পল্লঙ্কস্স ইদং ফলং.

৫১. ‘‘ৰীসকপ্পসহস্সম্হি, সুৰণ্ণাভা তযো জনা;

সত্তরতনসম্পন্না, চক্কৰত্তী মহব্বলা.

৫২. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা পল্লঙ্কদাযকো থেরো ইমা গাথাযো অভাসিত্থাতি.

পল্লঙ্কদাযকত্থেরস্সাপদানং দসমং.

ছত্তৰগ্গো পন্নরসমো.