৬. কুসুমাসনিযত্থেরঅপদানং

৬৫. ‘‘নগরে ধঞ্ঞৰতিযা, অহোসিং ব্রাহ্মণো তদা;

লক্খণে ইতিহাসে চ, সনিঘণ্ডুসকেটুভে.

৬৬. ‘‘পদকো ৰেয্যাকরণো, নিমিত্তকোৰিদো অহং;

মন্তে চ সিস্সে ৰাচেসিং, তিণ্ণং ৰেদান পারগূ.

৬৭. ‘‘পঞ্চ উপ্পলহত্থানি, পিট্ঠিযং ঠপিতানি মে;

আহুতিং যিট্ঠুকামোহং, পিতুমাতুসমাগমে.

৬৮. ‘‘তদা ৰিপস্সী ভগৰা, ভিক্খুসঙ্ঘপুরক্খতো;

ওভাসেন্তো দিসা সব্বা, আগচ্ছতি নরাসভো.

৬৯. ‘‘আসনং পঞ্ঞপেত্ৰান, নিমন্তেত্ৰা মহামুনিং;

সন্থরিত্ৰান তং পুপ্ফং, অভিনেসিং সকং ঘরং.

৭০. ‘‘যং মে অত্থি সকে গেহে, আমিসং পচ্চুপট্ঠিতং;

তাহং বুদ্ধস্স পাদাসিং, পসন্নো সেহি পাণিভি.

৭১. ‘‘ভুত্তাৰিং কালমঞ্ঞায, পুপ্ফহত্থমদাসহং;

অনুমোদিত্ৰান সব্বঞ্ঞূ, পক্কামি উত্তরামুখো.

৭২. ‘‘একনৰুতিতো কপ্পে, যং পুপ্ফমদদিং তদা;

দুগ্গতিং নাভিজানামি, পুপ্ফদানস্সিদং ফলং.

৭৩. ‘‘অনন্তরং ইতো কপ্পে, রাজাহুং ৰরদস্সনো;

সত্তরতনসম্পন্নো, চক্কৰত্তী মহব্বলো.

৭৪. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা কুসুমাসনিযো থেরো ইমা গাথাযো অভাসিত্থাতি.

কুসুমাসনিযত্থেরস্সাপদানং ছট্ঠং.