১৩. সেরেয্যৰগ্গো

১. সেরেয্যকত্থেরঅপদানং

১. ‘‘অজ্ঝাযকো মন্তধরো, তিণ্ণং ৰেদান পারগূ;

অব্ভোকাসে ঠিতো সন্তো, অদ্দসং লোকনাযকং.

২. ‘‘সীহং যথা ৰনচরং, ব্যগ্ঘরাজংৰ নিত্তসং;

তিধাপভিন্নমাতঙ্গং, কুঞ্জরংৰ মহেসিনং.

৩. ‘‘সেরেয্যকং গহেত্ৰান, আকাসে উক্খিপিং [নিক্খিপিং (ক.)] অহং;

বুদ্ধস্স আনুভাৰেন, পরিৰারেন্তি সব্বসো [সব্বতো (সী.)].

৪. ‘‘অধিট্ঠহি মহাৰীরো, সব্বঞ্ঞূ লোকনাযকো;

সমন্তা পুপ্ফচ্ছদনা, ওকিরিংসু নরাসভং.

৫. ‘‘ততো সা পুপ্ফকঞ্চুকা, অন্তোৰণ্টা বহিমুখা;

সত্তাহং ছদনং কত্ৰা, ততো অন্তরধাযথ.

৬. ‘‘তঞ্চ অচ্ছরিযং দিস্ৰা, অব্ভুতং লোমহংসনং;

বুদ্ধে চিত্তং পসাদেসিং, সুগতে লোকনাযকে.

৭. ‘‘তেন চিত্তপ্পসাদেন, সুক্কমূলেন চোদিতো;

কপ্পানং সতসহস্সং, দুগ্গতিং নুপপজ্জহং.

৮. ‘‘পন্নরসসহস্সম্হি, কপ্পানং পঞ্চৰীসতি;

ৰীতমলা [চিত্তমালা (সী.), ৰিলামালা (স্যা.)] সমানা চ, চক্কৰত্তী মহব্বলা.

৯. ‘‘পটিসম্ভিদা চতস্সো, ৰিমোক্খাপি চ অট্ঠিমে;

ছল়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা সেরেয্যকো থেরো ইমা গাথাযো অভাসিত্থাতি.

সেরেয্যকত্থেরস্সাপদানং পঠমং.

২. পুপ্ফথূপিযত্থেরঅপদানং

১০. ‘‘হিমৰন্তস্সাৰিদূরে, কুক্কুরো নাম [কুক্কুটো নাম (সী.)] পব্বতো;

ৰেমজ্ঝে তস্স ৰসতি, ব্রাহ্মণো মন্তপারগূ.

১১. ‘‘পঞ্চ সিস্সসহস্সানি, পরিৰারেন্তি মং সদা;

পুব্বুট্ঠাযী চ তে আসুং, মন্তেসু চ ৰিসারদা.

১২. ‘‘বুদ্ধো লোকে সমুপ্পন্নো, তং ৰিজানাথ নো ভৰং;

অসীতিব্যঞ্জনানস্স, বাত্তিংসৰরলক্খণা.

১৩. ‘‘ব্যামপ্পভো জিনৰরো, আদিচ্চোৰ ৰিরোচতি;

সিস্সানং ৰচনং সুত্ৰা, ব্রাহ্মণো মন্তপারগূ.

১৪. ‘‘অস্সমা অভিনিক্খম্ম, দিসং পুচ্ছতি সিস্সকে [ব্রাহ্মণো (স্যা.)];

যম্হি দেসে মহাৰীরো, ৰসতি লোকনাযকো.

১৫. ‘‘তাহং দিসং নমস্সিস্সং, জিনং অপ্পটিপুগ্গলং;

উদগ্গচিত্তো সুমনো, পূজেসিং তং তথাগতং.

১৬. ‘‘এথ সিস্সা গমিস্সাম, দক্খিস্সাম তথাগতং;

ৰন্দিত্ৰা সত্থুনো পাদে, সোস্সাম জিনসাসনং.

১৭. ‘‘একাহং অভিনিক্খম্ম, ব্যাধিং পটিলভিং অহং;

ব্যাধিনা পীল়িতো সন্তো, সালং ৰাসযিতুং গমিং.

১৮. ‘‘সব্বে সিস্সে সমানেত্ৰা, অপুচ্ছিং তে তথাগতং;

কীদিসং লোকনাথস্স, গুণং পরমবুদ্ধিনো.

১৯. ‘‘তে মে পুট্ঠা ৰিযাকংসু, যথা দস্সাৰিনো তথা;

সক্কচ্চং বুদ্ধসেট্ঠং তং, দেসেসুং [দস্সেসুং (সী. স্যা.)] মম সম্মুখা.

২০. ‘‘তেসাহং ৰচনং সুত্ৰা, সকং চিত্তং পসাদযিং;

পুপ্ফেহি থূপং কত্ৰান, তত্থ কালঙ্কতো অহং.

২১. ‘‘তে মে সরীরং ঝাপেত্ৰা, অগমুং বুদ্ধসন্তিকং;

অঞ্জলিং পগ্গহেত্ৰান, সত্থারমভিৰাদযুং.

২২. ‘‘পুপ্ফেহি থূপং কত্ৰান, সুগতস্স মহেসিনো;

কপ্পানং সতসহস্সং, দুগ্গতিং নুপপজ্জহং.

২৩. ‘‘চত্তালীসসহস্সম্হি, কপ্পে সোল়স খত্তিযা;

নামেনগ্গিসমা নাম, চক্কৰত্তী মহব্বলা.

২৪. ‘‘ৰীসকপ্পসহস্সম্হি, রাজানো চক্কৰত্তিনো;

ঘতাসনসনামাৰ, অট্ঠত্তিংস মহীপতী.

২৫. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা পুপ্ফথূপিযো থেরো ইমা গাথাযো অভাসিত্থাতি.

পুপ্ফথূপিযত্থেরস্সাপদানং দুতিযং.

৩. পাযসদাযকত্থেরঅপদানং

২৬. ‘‘সুৰণ্ণৰণ্ণো সম্বুদ্ধো, বাত্তিংসৰরলক্খণো;

পৰনা [পধানো (ক.)] অভিনিক্খন্তো, ভিক্খুসঙ্ঘপুরক্খতো [সুৰণ্ণৰণ্ণং …পে… পুরক্খতং-এৰং দুতিযন্তৰসেন সী. স্যা. পোত্থকেসু দিস্সতি].

২৭. ‘‘মহচ্চা [সহত্থা (স্যা. ক.)] কংসপাতিযা, ৰড্ঢেত্ৰা পাযসং [পাযাসং (স্যা. ক.)] অহং;

আহুতিং যিট্ঠুকামো সো, উপনেসিং বলিং অহং.

২৮. ‘‘ভগৰা তম্হি সমযে, লোকজেট্ঠো নরাসভো;

চঙ্কমং সুসমারূল়্হো, অম্বরে অনিলাযনে.

২৯. ‘‘তঞ্চ অচ্ছরিযং দিস্ৰা, অব্ভুতং লোমহংসনং;

ঠপযিত্ৰা কংসপাতিং, ৰিপস্সিং অভিৰাদযিং.

৩০. ‘‘তুৰং দেৰোসি [বুদ্ধোসি (স্যা.)] সব্বঞ্ঞূ, সদেৰে সহমানুসে;

অনুকম্পং উপাদায, পটিগণ্হ মহামুনি.

৩১. ‘‘পটিগ্গহেসি ভগৰা, সব্বঞ্ঞূ লোকনাযকো;

মম সঙ্কপ্পমঞ্ঞায, সত্থা লোকে মহামুনি [অনুত্তরো (স্যা.)].

৩২. ‘‘একনৰুতিতো কপ্পে, যং দানমদদিং তদা;

দুগ্গতিং নাভিজানামি, পাযসস্স [পাযাসস্স (স্যা. ক.)] ইদং ফলং.

৩৩. ‘‘একতালীসিতো কপ্পে, বুদ্ধো নামাসি খত্তিযো;

সত্তরতনসম্পন্নো, চক্কৰত্তী মহব্বলো.

৩৪. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা পাযসদাযকো [পাযাসদাযকো (স্যা. ক.)] থেরো ইমা গাথাযো অভাসিত্থাতি.

পাযসদাযকত্থেরস্সাপদানং ততিযং.

৪. গন্ধোদকিযত্থেরঅপদানং

৩৫. ‘‘নিসজ্জ পাসাদৰরে, ৰিপস্সিং অদ্দসং জিনং;

ককুধং ৰিলসন্তংৰ, সব্বঞ্ঞুং তমনাসকং [সব্বঞ্ঞুত্তমনাযকং (স্যা.), সব্বঞ্ঞুতমনাসৰং (ক.)].

৩৬. ‘‘পাসাদস্সাৰিদূরে চ, গচ্ছতি লোকনাযকো;

পভা নিদ্ধাৰতে তস্স, যথা চ সতরংসিনো.

৩৭. ‘‘গন্ধোদকঞ্চ পগ্গয্হ, বুদ্ধসেট্ঠং সমোকিরিং;

তেন চিত্তপ্পসাদেন, তত্থ কালঙ্কতো অহং.

৩৮. ‘‘একনৰুতিতো কপ্পে, যং গন্ধোদকমাকিরিং;

দুগ্গতিং নাভিজানামি, বুদ্ধপূজাযিদং ফলং.

৩৯. ‘‘একত্তিংসে ইতো কপ্পে, সুগন্ধো নাম খত্তিযো;

সত্তরতনসম্পন্নো, চক্কৰত্তী মহব্বলো.

৪০. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা গন্ধোদকিযো থেরো ইমা গাথাযো অভাসিত্থাতি.

গন্ধোদকিযত্থেরস্সাপদানং চতুত্থং.

৫. সম্মুখাথৰিকত্থেরঅপদানং

৪১. ‘‘জাযমানে ৰিপস্সিম্হি, নিমিত্তং ব্যাকরিং অহং;

‘নিব্বাপযিঞ্চ [নিব্বাপযং চ (সী. স্যা.), নিব্বাপযন্তো (?)] জনতং, বুদ্ধো লোকে ভৰিস্সতি.

৪২. ‘‘‘যস্মিঞ্চ জাযমানস্মিং, দসসহস্সি কম্পতি;

সো দানি ভগৰা সত্থা, ধম্মং দেসেতি চক্খুমা.

৪৩. ‘‘‘যস্মিঞ্চ জাযমানস্মিং, আলোকো ৰিপুলো অহু;

সো দানি ভগৰা সত্থা, ধম্মং দেসেতি চক্খুমা.

৪৪. ‘‘‘যস্মিঞ্চ জাযমানস্মিং, সরিতাযো ন সন্দযুং [সন্দিসুং (সী. স্যা.)];

সো দানি ভগৰা সত্থা, ধম্মং দেসেতি চক্খুমা.

৪৫. ‘‘‘যস্মিঞ্চ জাযমানস্মিং, অৰীচগ্গি ন পজ্জলি;

সো দানি ভগৰা সত্থা, ধম্মং দেসেতি চক্খুমা.

৪৬. ‘‘‘যস্মিঞ্চ জাযমানস্মিং, পক্খিসঙ্ঘো ন সংচরি;

সো দানি ভগৰা সত্থা, ধম্মং দেসেতি চক্খুমা.

৪৭. ‘‘‘যস্মিঞ্চ জাযমানস্মিং, ৰাতক্খন্ধো ন ৰাযতি;

সো দানি ভগৰা সত্থা, ধম্মং দেসেতি চক্খুমা.

৪৮. ‘‘‘যস্মিঞ্চ জাযমানস্মিং, সব্বরতনানি জোতযুং [জোতিসুং (সী. স্যা.)];

সো দানি ভগৰা সত্থা, ধম্মং দেসেতি চক্খুমা.

৪৯. ‘‘‘যস্মিঞ্চ জাযমানস্মিং, সত্তাসুং পদৰিক্কমা;

সো দানি ভগৰা সত্থা, ধম্মং দেসেতি চক্খুমা.

৫০. ‘‘‘জাতমত্তো চ সম্বুদ্ধো, দিসা সব্বা ৰিলোকযি;

ৰাচাসভিমুদীরেসি, এসা বুদ্ধান ধম্মতা’.

৫১. ‘‘সংৰেজযিত্ৰা জনতং, থৰিত্ৰা লোকনাযকং;

সম্বুদ্ধং অভিৰাদেত্ৰা, পক্কামিং পাচিনামুখো.

৫২. ‘‘একনৰুতিতো কপ্পে, যং বুদ্ধমভিথোমযিং;

দুগ্গতিং নাভিজানামি, থোমনায ইদং ফলং.

৫৩. ‘‘ইতো নৰুতিকপ্পম্হি, সম্মুখাথৰিকৰ্হযো;

সত্তরতনসম্পন্নো, চক্কৰত্তী মহব্বলো.

৫৪. ‘‘পথৰীদুন্দুভি নাম [দুদ্দসি নাম (ক.)], একূননৰুতিম্হিতো;

সত্তরতনসম্পন্নো, চক্কৰত্তী মহব্বলো.

৫৫. ‘‘অট্ঠাসীতিম্হিতো কপ্পে, ওভাসো নাম খত্তিযো;

সত্তরতনসম্পন্নো, চক্কৰত্তী মহব্বলো.

৫৬. ‘‘সত্তাসীতিম্হিতো কপ্পে, সরিতচ্ছেদনৰ্হযো;

সত্তরতনসম্পন্নো, চক্কৰত্তী মহব্বলো.

৫৭. ‘‘অগ্গিনিব্বাপনো নাম, কপ্পানং ছল়সীতিযা;

সত্তরতনসম্পন্নো, চক্কৰত্তী মহব্বলো.

৫৮. ‘‘গতিপচ্ছেদনো নাম, কপ্পানং পঞ্চসীতিযা;

সত্তরতনসম্পন্নো, চক্কৰত্তী মহব্বলো.

৫৯. ‘‘রাজা ৰাতসমো নাম, কপ্পানং চুল্লসীতিযা;

সত্তরতনসম্পন্নো, চক্কৰত্তী মহব্বলো.

৬০. ‘‘রতনপজ্জলো নাম, কপ্পানং তেঅসীতিযা;

সত্তরতনসম্পন্নো, চক্কৰত্তী মহব্বলো.

৬১. ‘‘পদৰিক্কমনো নাম, কপ্পানং দ্ৰেঅসীতিযা;

সত্তরতনসম্পন্নো, চক্কৰত্তী মহব্বলো.

৬২. ‘‘রাজা ৰিলোকনো নাম, কপ্পানং একসীতিযা;

সত্তরতনসম্পন্নো, চক্কৰত্তী মহব্বলো.

৬৩. ‘‘গিরসারোতি নামেন, কপ্পেসীতিম্হি খত্তিযো;

সত্তরতনসম্পন্নো, চক্কৰত্তী মহব্বলো.

৬৪. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সম্মুখাথৰিকো থেরো ইমা গাথাযো অভাসিত্থাতি.

সম্মুখাথৰিকত্থেরস্সাপদানং পঞ্চমং.

৬. কুসুমাসনিযত্থেরঅপদানং

৬৫. ‘‘নগরে ধঞ্ঞৰতিযা, অহোসিং ব্রাহ্মণো তদা;

লক্খণে ইতিহাসে চ, সনিঘণ্ডুসকেটুভে.

৬৬. ‘‘পদকো ৰেয্যাকরণো, নিমিত্তকোৰিদো অহং;

মন্তে চ সিস্সে ৰাচেসিং, তিণ্ণং ৰেদান পারগূ.

৬৭. ‘‘পঞ্চ উপ্পলহত্থানি, পিট্ঠিযং ঠপিতানি মে;

আহুতিং যিট্ঠুকামোহং, পিতুমাতুসমাগমে.

৬৮. ‘‘তদা ৰিপস্সী ভগৰা, ভিক্খুসঙ্ঘপুরক্খতো;

ওভাসেন্তো দিসা সব্বা, আগচ্ছতি নরাসভো.

৬৯. ‘‘আসনং পঞ্ঞপেত্ৰান, নিমন্তেত্ৰা মহামুনিং;