১০. পদুমপূজকত্থেরঅপদানং

৯৭. ‘‘হিমৰন্তস্সাৰিদূরে, গোতমো নাম পব্বতো;

নানারুক্খেহি সঞ্ছন্নো, মহাভূতগণালযো.

৯৮. ‘‘ৰেমজ্ঝম্হি চ তস্সাসি, অস্সমো অভিনিম্মিতো;

পুরক্খতো সসিস্সেহি, ৰসামি অস্সমে অহং.

৯৯. ‘‘আযন্তু মে সিস্সগণা, পদুমং আহরন্তু মে;

বুদ্ধপূজং করিস্সামি, দ্ৰিপদিন্দস্স তাদিনো.

১০০. ‘‘এৰন্তি তে পটিস্সুত্ৰা, পদুমং আহরিংসু মে;

তথা নিমিত্তং কত্ৰাহং, বুদ্ধস্স অভিরোপযিং.

১০১. ‘‘সিস্সে তদা সমানেত্ৰা, সাধুকং অনুসাসহং;

মা খো তুম্হে পমজ্জিত্থ, অপ্পমাদো সুখাৰহো.

১০২. ‘‘এৰং সমনুসাসিত্ৰা, তে সিস্সে ৰচনক্খমে;

অপ্পমাদগুণে যুত্তো, তদা কালঙ্কতো অহং.

১০৩. ‘‘একনৰুতিতো কপ্পে, যং পুপ্ফমভিরোপযিং;

দুগ্গতিং নাভিজানামি, বুদ্ধপূজাযিদং ফলং.

১০৪. ‘‘একপঞ্ঞাসকপ্পম্হি, রাজা আসিং জলুত্তমো;

সত্তরতনসম্পন্নো, চক্কৰত্তী মহব্বলো.

১০৫. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা পদুমপূজকো থেরো ইমা গাথাযো অভাসিত্থাতি;

পদুমপূজকত্থেরস্সাপদানং দসমং.

সেরেয্যৰগ্গো তেরসমো.