১. সেরেয্যকত্থেরঅপদানং

১. ‘‘অজ্ঝাযকো মন্তধরো, তিণ্ণং ৰেদান পারগূ;

অব্ভোকাসে ঠিতো সন্তো, অদ্দসং লোকনাযকং.

২. ‘‘সীহং যথা ৰনচরং, ব্যগ্ঘরাজংৰ নিত্তসং;

তিধাপভিন্নমাতঙ্গং, কুঞ্জরংৰ মহেসিনং.

৩. ‘‘সেরেয্যকং গহেত্ৰান, আকাসে উক্খিপিং [নিক্খিপিং (ক.)] অহং;

বুদ্ধস্স আনুভাৰেন, পরিৰারেন্তি সব্বসো [সব্বতো (সী.)].

৪. ‘‘অধিট্ঠহি মহাৰীরো, সব্বঞ্ঞূ লোকনাযকো;

সমন্তা পুপ্ফচ্ছদনা, ওকিরিংসু নরাসভং.

৫. ‘‘ততো সা পুপ্ফকঞ্চুকা, অন্তোৰণ্টা বহিমুখা;

সত্তাহং ছদনং কত্ৰা, ততো অন্তরধাযথ.

৬. ‘‘তঞ্চ অচ্ছরিযং দিস্ৰা, অব্ভুতং লোমহংসনং;

বুদ্ধে চিত্তং পসাদেসিং, সুগতে লোকনাযকে.

৭. ‘‘তেন চিত্তপ্পসাদেন, সুক্কমূলেন চোদিতো;

কপ্পানং সতসহস্সং, দুগ্গতিং নুপপজ্জহং.

৮. ‘‘পন্নরসসহস্সম্হি, কপ্পানং পঞ্চৰীসতি;

ৰীতমলা [চিত্তমালা (সী.), ৰিলামালা (স্যা.)] সমানা চ, চক্কৰত্তী মহব্বলা.

৯. ‘‘পটিসম্ভিদা চতস্সো, ৰিমোক্খাপি চ অট্ঠিমে;

ছল়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা সেরেয্যকো থেরো ইমা গাথাযো অভাসিত্থাতি.

সেরেয্যকত্থেরস্সাপদানং পঠমং.