৯. পচ্চুপট্ঠানসঞ্ঞকত্থেরঅপদানং

৭২. ‘‘অত্থদস্সিম্হি সুগতে, নিব্বুতে সমনন্তরা;

যক্খযোনিং উপপজ্জিং, যসং পত্তো চহং তদা.

৭৩. ‘‘দুল্লদ্ধং ৰত মে আসি, দুপ্পভাতং দুরুট্ঠিতং;

যং মে ভোগে ৰিজ্জমানে, পরিনিব্বাযি চক্খুমা.

৭৪. ‘‘মম সঙ্কপ্পমঞ্ঞায, সাগরো নাম সাৰকো;

মমুদ্ধরিতুকামো সো, আগচ্ছি মম সন্তিকং.

৭৫. ‘‘কিং নু সোচসি মা ভাযি, চর ধম্মং সুমেধস;

অনুপ্পদিন্না বুদ্ধেন, সব্বেসং বীজসম্পদা.

৭৬. ‘‘সো চে পূজেয্য সম্বুদ্ধং, তিট্ঠন্তং লোকনাযকং;

ধাতুং সাসপমত্তম্পি, নিব্বুতস্সাপি পূজযে.

৭৭. ‘‘সমে চিত্তপ্পসাদম্হি, সমং পুঞ্ঞং মহগ্গতং;

তস্মা থূপং করিত্ৰান, পূজেহি জিনধাতুযো.

৭৮. ‘‘সাগরস্স ৰচো সুত্ৰা, বুদ্ধথূপং অকাসহং;

পঞ্চৰস্সে পরিচরিং, মুনিনো থূপমুত্তমং.

৭৯. ‘‘তেন কম্মেন দ্ৰিপদিন্দ, লোকজেট্ঠ নরাসভ;

সম্পত্তিং অনুভোত্ৰান, অরহত্তমপাপুণিং.

৮০. ‘‘ভূরিপঞ্ঞা চ চত্তারো, সত্তকপ্পসতে ইতো;

সত্তরতনসম্পন্না, চক্কৰত্তী মহব্বলা.

৮১. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা পচ্চুপট্ঠানসঞ্ঞকো থেরো ইমা গাথাযো অভাসিত্থাতি.

পচ্চুপট্ঠানসঞ্ঞকত্থেরস্সাপদানং নৰমং.