১২. মহাপরিৰারৰগ্গো

১. মহাপরিৰারকত্থেরঅপদানং

১. ‘‘ৰিপস্সী নাম ভগৰা, লোকজেট্ঠো নরাসভো;

অট্ঠসট্ঠিসহস্সেহি, পাৰিসি বন্ধুমং তদা.

২. ‘‘নগরা অভিনিক্খম্ম, অগমং দীপচেতিযং;

অদ্দসং ৰিরজং বুদ্ধং, আহুতীনং পটিগ্গহং.

৩. ‘‘চুল্লাসীতিসহস্সানি, যক্খা ময্হং উপন্তিকে;

উপট্ঠহন্তি সক্কচ্চং [মং নিচ্চং (ক.)], ইন্দংৰ তিদসা গণা.

৪. ‘‘ভৰনা অভিনিক্খম্ম, দুস্সং পগ্গয্হহং তদা;

সিরসা অভিৰাদেসিং, তঞ্চাদাসিং মহেসিনো.

৫. ‘‘অহো বুদ্ধো অহো ধম্মো, অহো নো সত্থু সম্পদা;

বুদ্ধস্স আনুভাৰেন, ৰসুধাযং পকম্পথ.

৬. ‘‘তঞ্চ অচ্ছরিযং দিস্ৰা, অব্ভুতং লোমহংসনং;

বুদ্ধে চিত্তং পসাদেমি, দ্ৰিপদিন্দম্হি তাদিনে.

৭. ‘‘সোহং চিত্তং পসাদেত্ৰা, দুস্সং দত্ৰান সত্থুনো;

সরণঞ্চ উপাগচ্ছিং, সামচ্চো সপরিজ্জনো.

৮. ‘‘একনৰুতিতো কপ্পে, যং কম্মমকরিং তদা;

দুগ্গতিং নাভিজানামি, বুদ্ধপূজাযিদং ফলং.

৯. ‘‘ইতো পন্নরসে কপ্পে, সোল়সাসুং সুৰাহনা [সোল়সাসিংসু ৰাহনো (স্যা.)];

সত্তরতনসম্পন্না, চক্কৰত্তী মহব্বলা.

১০. ‘‘পটিসম্ভিদা চতস্সো, ৰিমোক্খাপি চ অট্ঠিমে;

ছল়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা মহাপরিৰারকো থেরো ইমা গাথাযো অভাসিত্থাতি.

মহাপরিৰারকত্থেরস্সাপদানং পঠমং.

২. সুমঙ্গলত্থেরঅপদানং

১১. ‘‘অত্থদস্সী জিনৰরো, লোকজেট্ঠো নরাসভো;

ৰিহারা অভিনিক্খম্ম, তল়াকং উপসঙ্কমি.

১২. ‘‘ন্হত্ৰা পিত্ৰা চ সম্বুদ্ধো, উত্তরিত্ৰেকচীৰরো;

অট্ঠাসি ভগৰা তত্থ, ৰিলোকেন্তো দিসোদিসং.

১৩. ‘‘ভৰনে উপৰিট্ঠোহং, অদ্দসং লোকনাযকং;

হট্ঠো হট্ঠেন চিত্তেন, অপ্ফোটেসিং অহং তদা.

১৪. ‘‘সতরংসিংৰ জোতন্তং, পভাসন্তংৰ কঞ্চনং [ইমিনা পাদদ্ৰযেন পুরিমপাদদ্ৰযস্স পুরতো ভৰিতব্বং];

নচ্চগীতে পযুত্তোহং, পঞ্চঙ্গতূরিযম্হি চ.

১৫. ‘‘যং যং যোনুপপজ্জামি, দেৰত্তং অথ মানুসং;

সব্বে সত্তে অভিভোমি, ৰিপুলো হোতি মে যসো [অযঞ্চ গাথা পরিগ্গহেতিগাথায অনন্তরমেৰ ঠাতুং যুত্তা].

১৬. ‘‘নমো তে পুরিসাজঞ্ঞ, নমো তে পুরিসুত্তম;

অত্তানং তোসযিত্ৰান, পরে তোসেসি ত্ৰং মুনি.

১৭. ‘‘পরিগ্গহে [পরিগ্গয্হ (সী.), পরিগ্গহিত্ৰা (স্যা.), পরিগ্গহেন (ক.)] নিসীদিত্ৰা, হাসং কত্ৰান সুব্বতে;

উপট্ঠহিত্ৰা সম্বুদ্ধং, তুসিতং উপপজ্জহং.

১৮. ‘‘সোল়সেতো কপ্পসতে, দ্ৰিনৰএকচিন্তিতা;

সত্তরতনসম্পন্না, চক্কৰত্তী মহব্বলা.

১৯. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সুমঙ্গলো থেরো ইমা গাথাযো অভাসিত্থাতি.

সুমঙ্গলত্থেরস্সাপদানং দুতিযং.

৩. সরণগমনিযত্থেরঅপদানং

২০. ‘‘উভিন্নং দেৰরাজূনং, সঙ্গামো সমুপট্ঠিতো;

অহোসি সমুপব্যূল়্হো [সমুপব্বূল়্হো (সী.)], মহাঘোসো অৰত্তথ [পৰত্তথ (সী.)].

২১. ‘‘পদুমুত্তরো লোকৰিদূ, আহুতীনং পটিগ্গহো;

অন্তলিক্খে ঠিতো সত্থা, সংৰেজেসি মহাজনং.

২২. ‘‘সব্বে দেৰা অত্তমনা, নিক্খিত্তকৰচাৰুধা;

সম্বুদ্ধং অভিৰাদেত্ৰা, একগ্গাসিংসু তাৰদে.

২৩. ‘‘ময্হং [অম্হং (সী.)] সঙ্কপ্পমঞ্ঞায, ৰাচাসভিমুদীরযি;

অনুকম্পকো লোকৰিদূ, নিব্বাপেসি মহাজনং.

২৪. ‘‘পদুট্ঠচিত্তো মনুজো, একপাণং ৰিহেঠযং;

তেন চিত্তপ্পদোসেন, অপাযং উপপজ্জতি.

২৫. ‘‘সঙ্গামসীসে নাগোৰ, বহূ পাণে ৰিহেঠযং;

নিব্বাপেথ সকং চিত্তং, মা হঞ্ঞিত্থো পুনপ্পুনং.

২৬. ‘‘দ্ৰিন্নম্পি যক্খরাজূনং, সেনা সা ৰিম্হিতা অহু [সেনাযো ৰিম্হিতা অহূ (সী.), সেনাপি সমিতা অহু (স্যা.)];

সরণঞ্চ উপাগচ্ছুং, লোকজেট্ঠং সুতাদিনং.

২৭. ‘‘সঞ্ঞাপেত্ৰান জনতং, পদমুদ্ধরি [উদ্ধরি পন (সী. স্যা.)] চক্খুমা;

পেক্খমানোৰ দেৰেহি, পক্কামি উত্তরামুখো.

২৮. ‘‘পঠমং সরণং গচ্ছিং, দ্ৰিপদিন্দস্স তাদিনো;

কপ্পানং সতসহস্সং, দুগ্গতিং নুপপজ্জহং.

২৯. ‘‘মহাদুন্দুভিনামা চ, সোল়সাসুং রথেসভা;

তিংসকপ্পসহস্সম্হি, রাজানো চক্কৰত্তিনো.

৩০. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সরণগমনিযো থেরো ইমা গাথাযো অভাসিত্থাতি.

সরণগমনিযত্থেরস্সাপদানং ততিযং.

৪. একাসনিযত্থেরঅপদানং

৩১. ‘‘ৰরুণো নাম নামেন, দেৰরাজা অহং তদা;

উপট্ঠহেসিং সম্বুদ্ধং, সযোগ্গবলৰাহনো.

৩২. ‘‘নিব্বুতে লোকনাথম্হি, অত্থদস্সীনরুত্তমে;

তূরিযং সব্বমাদায, অগমং বোধিমুত্তমং.

৩৩. ‘‘ৰাদিতেন চ নচ্চেন, সম্মতাল়সমাহিতো;

সম্মুখা ৰিয সম্বুদ্ধং, উপট্ঠিং বোধিমুত্তমং.

৩৪. ‘‘উপট্ঠহিত্ৰা তং বোধিং, ধরণীরুহপাদপং;

পল্লঙ্কং আভুজিত্ৰান, তত্থ কালঙ্কতো অহং.

৩৫. ‘‘সককম্মাভিরদ্ধোহং, পসন্নো বোধিমুত্তমে;

তেন চিত্তপ্পসাদেন, নিম্মানং উপপজ্জহং.

৩৬. ‘‘সট্ঠিতূরিযসহস্সানি, পরিৰারেন্তি মং সদা;

মনুস্সেসু চ দেৰেসু, ৰত্তমানং ভৰাভৰে.

৩৭. ‘‘তিৰিধগ্গী নিব্বুতা ময্হং, ভৰা সব্বে সমূহতা;

ধারেমি অন্তিমং দেহং, সম্মাসম্বুদ্ধসাসনে [অযঞ্চ গাথা পটিসম্ভিদা চতস্সেতিগাথায একসম্বন্ধা ভৰিতং যুত্তা].

৩৮. ‘‘সুবাহূ নাম নামেন, চতুত্তিংসাসু খত্তিযা;

সত্তরতনসম্পন্না, পঞ্চকপ্পসতে ইতো.

৩৯. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা একাসনিযো থেরো ইমা গাথাযো অভাসিত্থাতি.

একাসনিযত্থেরস্সাপদানং চতুত্থং.

৫. সুৰণ্ণপুপ্ফিযত্থেরঅপদানং

৪০. ‘‘ৰিপস্সী নাম ভগৰা, লোকজেট্ঠো নরাসভো;

নিসিন্নো জনকাযস্স, দেসেসি অমতং পদং.

৪১. ‘‘তস্সাহং ধম্মং সুত্ৰান, দ্ৰিপদিন্দস্স তাদিনো;

সোণ্ণপুপ্ফানি চত্তারি, বুদ্ধস্স অভিরোপযিং.

৪২. ‘‘সুৰণ্ণচ্ছদনং আসি, যাৰতা পরিসা তদা;

বুদ্ধাভা চ সুৰণ্ণাভা, আলোকো ৰিপুলো অহু.

৪৩. ‘‘উদগ্গচিত্তো সুমনো, ৰেদজাতো কতঞ্জলী;

ৰিত্তিসঞ্জননো তেসং, দিট্ঠধম্মসুখাৰহো.

৪৪. ‘‘আযাচিত্ৰান সম্বুদ্ধং, ৰন্দিত্ৰান চ সুব্বতং;

পামোজ্জং জনযিত্ৰান, সকং ভৰনুপাগমিং.

৪৫. ‘‘ভৰনে উপৰিট্ঠোহং, বুদ্ধসেট্ঠং অনুস্সরিং;

তেন চিত্তপ্পসাদেন, তুসিতং উপপজ্জহং.

৪৬. ‘‘একনৰুতিতো কপ্পে, যং পুপ্ফমভিরোপযিং;

দুগ্গতিং নাভিজানামি, বুদ্ধপূজাযিদং ফলং.

৪৭. ‘‘সোল়সাসিংসু রাজানো, নেমিসম্মতনামকা;

তেতালীসে ইতো কপ্পে, চক্কৰত্তী মহব্বলা.

৪৮. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সুৰণ্ণপুপ্ফিযো থেরো ইমা গাথাযো অভাসিত্থাতি.

সুৰণ্ণপুপ্ফিযত্থেরস্সাপদানং পঞ্চমং.

৬. চিতকপূজকত্থেরঅপদানং

৪৯. ‘‘ৰসামি রাজাযতনে, সামচ্চো সপরিজ্জনো;

পরিনিব্বুতে ভগৰতি, সিখিনো লোকবন্ধুনো.

৫০. ‘‘পসন্নচিত্তো সুমনো, চিতকং অগমাসহং;

তূরিযং তত্থ ৰাদেত্ৰা, গন্ধমালং সমোকিরিং.

৫১. ‘‘চিতম্হি পূজং কত্ৰান, ৰন্দিত্ৰা চিতকং অহং;

পসন্নচিত্তো সুমনো, সকং ভৰনুপাগমিং.

৫২. ‘‘ভৰনে উপৰিট্ঠোহং, চিতপূজং অনুস্সরিং;

তেন কম্মেন দ্ৰিপদিন্দ, লোকজেট্ঠ নরাসভ.

৫৩. ‘‘অনুভোত্ৰান সম্পত্তিং, দেৰেসু মানুসেসু চ;

পত্তোম্হি অচলং ঠানং, হিত্ৰা জযপরাজযং.

৫৪. ‘‘একত্তিংসে ইতো কপ্পে, যং পুপ্ফমভিরোপযিং;

দুগ্গতিং নাভিজানামি, চিতপূজাযিদং ফলং.

৫৫. ‘‘একূনতিংসকপ্পম্হি, ইতো সোল়স রাজানো;

উগ্গতা নাম নামেন, চক্কৰত্তী মহব্বলা.

৫৬. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা চিতকপূজকো থেরো ইমা গাথাযো অভাসিত্থাতি.

চিতকপূজকত্থেরস্সাপদানং ছট্ঠং.

৭. বুদ্ধসঞ্ঞকত্থেরঅপদানং

৫৭. ‘‘যদা ৰিপস্সী লোকগ্গো, আযুসঙ্খারমোস্সজি;

পথৰী সম্পকম্পিত্থ, মেদনী জলমেখলা.

৫৮. ‘‘ওততং ৰিত্থতং [ওততং ৰিততং (স্যা.)] ময্হং, সুৰিচিত্তৰটংসকং [সুচিচিত্তং পপঞ্চকং (স্যা.)];

ভৰনম্পি পকম্পিত্থ, বুদ্ধস্স আযুসঙ্খযে.

৫৯. ‘‘তাসো ময্হং সমুপ্পন্নো, ভৰনে সম্পকম্পিতে;

উপ্পাদো [উপ্পাতো (?)] নু কিমত্থায, আলোকো ৰিপুলো অহু.

৬০. ‘‘ৰেস্সৰণো ইধাগম্ম, নিব্বাপেসি মহাজনং;

পাণভূতে [পাণভুতং (স্যা.), পাণভূনং (সী. ক.)] ভযং নত্থি, একগ্গা হোথ সংৰুতা [সগারৰা (স্যা.)].

৬১. ‘‘অহো বুদ্ধো অহো ধম্মো, অহো নো সত্থু সম্পদা;

যস্মিং উপ্পজ্জমানম্হি, পথৰী [পঠৰী (সী. স্যা.)] সম্পকম্পতি.

৬২. ‘‘বুদ্ধানুভাৰং কিত্তেত্ৰা, কপ্পং সগ্গম্হি মোদহং;

অৰসেসেসু কপ্পেসু, কুসলং চরিতং [করিতং (সী. স্যা.), কারিতং (ক.)] মযা.

৬৩. ‘‘একনৰুতিতো কপ্পে, যং সঞ্ঞমলভিং তদা;

দুগ্গতিং নাভিজানামি, বুদ্ধসঞ্ঞাযিদং ফলং.

৬৪. ‘‘ইতো চুদ্দসকপ্পম্হি, রাজা আসিং পতাপৰা;

সমিতো নাম নামেন, চক্কৰত্তী মহব্বলো.

৬৫. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা বুদ্ধসঞ্ঞকো থেরো ইমা গাথাযো অভাসিত্থাতি.

বুদ্ধসঞ্ঞকত্থেরস্সাপদানং সত্তমং.

৮. মগ্গসঞ্ঞকত্থেরঅপদানং

৬৬. ‘‘পদুমুত্তরবুদ্ধস্স, সাৰকা ৰনচারিনো;

ৰিপ্পনট্ঠা ব্রহারঞ্ঞে, অন্ধাৰ অনুসুয্যরে [অনুসুযরে (সী.)].

৬৭. ‘‘অনুস্সরিত্ৰা সম্বুদ্ধং, পদুমুত্তরনাযকং;