৭. বুদ্ধসঞ্ঞকত্থেরঅপদানং

৫৭. ‘‘যদা ৰিপস্সী লোকগ্গো, আযুসঙ্খারমোস্সজি;

পথৰী সম্পকম্পিত্থ, মেদনী জলমেখলা.

৫৮. ‘‘ওততং ৰিত্থতং [ওততং ৰিততং (স্যা.)] ময্হং, সুৰিচিত্তৰটংসকং [সুচিচিত্তং পপঞ্চকং (স্যা.)];

ভৰনম্পি পকম্পিত্থ, বুদ্ধস্স আযুসঙ্খযে.

৫৯. ‘‘তাসো ময্হং সমুপ্পন্নো, ভৰনে সম্পকম্পিতে;

উপ্পাদো [উপ্পাতো (?)] নু কিমত্থায, আলোকো ৰিপুলো অহু.

৬০. ‘‘ৰেস্সৰণো ইধাগম্ম, নিব্বাপেসি মহাজনং;

পাণভূতে [পাণভুতং (স্যা.), পাণভূনং (সী. ক.)] ভযং নত্থি, একগ্গা হোথ সংৰুতা [সগারৰা (স্যা.)].

৬১. ‘‘অহো বুদ্ধো অহো ধম্মো, অহো নো সত্থু সম্পদা;

যস্মিং উপ্পজ্জমানম্হি, পথৰী [পঠৰী (সী. স্যা.)] সম্পকম্পতি.

৬২. ‘‘বুদ্ধানুভাৰং কিত্তেত্ৰা, কপ্পং সগ্গম্হি মোদহং;

অৰসেসেসু কপ্পেসু, কুসলং চরিতং [করিতং (সী. স্যা.), কারিতং (ক.)] মযা.

৬৩. ‘‘একনৰুতিতো কপ্পে, যং সঞ্ঞমলভিং তদা;

দুগ্গতিং নাভিজানামি, বুদ্ধসঞ্ঞাযিদং ফলং.

৬৪. ‘‘ইতো চুদ্দসকপ্পম্হি, রাজা আসিং পতাপৰা;

সমিতো নাম নামেন, চক্কৰত্তী মহব্বলো.

৬৫. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা বুদ্ধসঞ্ঞকো থেরো ইমা গাথাযো অভাসিত্থাতি.

বুদ্ধসঞ্ঞকত্থেরস্সাপদানং সত্তমং.