১০. বুদ্ধুপট্ঠাকত্থেরঅপদানং

৫৬. ‘‘ৰিপস্সিস্স ভগৰতো, অহোসিং সঙ্খধম্মকো;

নিচ্চুপট্ঠানযুত্তোম্হি, সুগতস্স মহেসিনো.

৫৭. ‘‘উপট্ঠানফলং পস্স, লোকনাথস্স তাদিনো;

সট্ঠিতূরিযসহস্সানি, পরিৰারেন্তি মং সদা.

৫৮. ‘‘একনৰুতিতো কপ্পে, উপট্ঠহিং মহাইসিং;

দুগ্গতিং নাভিজানামি, উপট্ঠানস্সিদং ফলং.

৫৯. ‘‘চতুৰীসে [চতুনৰুতে (স্যা.)] ইতো কপ্পে, মহানিগ্ঘোসনামকা;

সোল়সাসিংসু রাজানো, চক্কৰত্তী মহব্বলা.

৬০. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা বুদ্ধুপট্ঠাকো থেরো ইমা গাথাযো অভাসিত্থাতি.

বুদ্ধুপট্ঠাকত্থেরস্সাপদানং দসমং.

সুধাৰগ্গো দসমো.

তস্সুদ্দানং –

সুধা সুচিন্তি চেল়ঞ্চ, সূচী চ গন্ধমালিযো;

তিপুপ্ফিযো মধুসেনা, ৰেয্যাৰচ্চো চুপট্ঠকো;

সমসট্ঠি চ গাথাযো, অস্মিং ৰগ্গে পকিত্তিতা.

অথ ৰগ্গুদ্দানং –

বুদ্ধৰগ্গো হি পঠমো, সীহাসনি সুভূতি চ;

কুণ্ডধানো উপালি চ, বীজনিসকচিন্তি চ.

নাগসমালো তিমিরো, সুধাৰগ্গেন তে দস;

চতুদ্দসসতা গাথা, পঞ্চপঞ্ঞাসমেৰ চ.

বুদ্ধৰগ্গদসকং.