১০. সুধাৰগ্গো

১. সুধাপিণ্ডিযত্থেরঅপদানং

১. ‘‘পূজারহে পূজযতো, বুদ্ধে যদি ৰ সাৰকে;

পপঞ্চসমতিক্কন্তে, তিণ্ণসোকপরিদ্দৰে.

২. ‘‘তে তাদিসে পূজযতো, নিব্বুতে অকুতোভযে;

ন সক্কা পুঞ্ঞং সঙ্খাতুং, ইমেত্তমপি [ইদম্মত্তন্তি (সী.), ইমেত্থমপি (ক.)] কেনচি.

৩. ‘‘চতুন্নমপি দীপানং, ইস্সরং যোধ কারযে;

একিস্সা পূজনাযেতং, কলং নাগ্ঘতি সোল়সিং.

৪. ‘‘সিদ্ধত্থস্স নরগ্গস্স, চেতিযে ফলিতন্তরে;

সুধাপিণ্ডো মযা দিন্নো, ৰিপ্পসন্নেন চেতসা.

৫. ‘‘চতুন্নৰুতিতো কপ্পে, যং কম্মমকরিং তদা;

দুগ্গতিং নাভিজানামি, পটিসঙ্খারস্সিদং ফলং.

৬. ‘‘ইতো তিংসতিকপ্পম্হি, পটিসঙ্খারসৰ্হযা;

সত্তরতনসম্পন্না, তেরস চক্কৰত্তিনো.

৭. ‘‘পটিসম্ভিদা চতস্সো, ৰিমোক্খাপি চ অট্ঠিমে;

ছল়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা সুধাপিণ্ডিযো থেরো ইমা গাথাযো অভাসিত্থাতি.

সুধাপিণ্ডিযত্থেরস্সাপদানং পঠমং.

২. সুচিন্তিকত্থেরঅপদানং

৮. ‘‘তিস্সস্স লোকনাথস্স, সুদ্ধপীঠমদাসহং;

হট্ঠো হট্ঠেন চিত্তেন, বুদ্ধস্সাদিচ্চবন্ধুনো.

৯. ‘‘অট্ঠারসে [অট্ঠতিংসে (সী. স্যা.)] ইতো কপ্পে, রাজা আসিং মহারুচি;

ভোগো চ ৰিপুলো আসি, সযনঞ্চ অনপ্পকং.

১০. ‘‘পীঠং বুদ্ধস্স দত্ৰান, ৰিপ্পসন্নেন চেতসা;

অনুভোমি সকং কম্মং, পুব্বে সুকতমত্তনো.

১১. ‘‘দ্ৰেনৰুতে ইতো কপ্পে, যং পীঠমদদিং তদা;

দুগ্গতিং নাভিজানামি, পীঠদানস্সিদং ফলং.

১২. ‘‘অট্ঠতিংসে ইতো কপ্পে, তযো তে চক্কৰত্তিনো;

রুচি উপরুচি চেৰ, মহারুচি ততিযকো.

১৩. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সুচিন্তিকো থেরো ইমা গাথাযো অভাসিত্থাতি.

সুচিন্তিকত্থেরস্সাপদানং দুতিযং.

৩. অড্ঢচেল়কত্থেরঅপদানং

১৪. ‘‘তিস্সস্সাহং ভগৰতো, উপড্ঢদুস্সমদাসহং;

পরমকাপঞ্ঞপত্তোম্হি [পরমকারুঞ্ঞপত্তোম্হি (স্যা. ক.)], দুগ্গতেন [দুগ্গন্ধেন (সী.)] সমপ্পিতো.

১৫. ‘‘উপড্ঢদুস্সং দত্ৰান, কপ্পং সগ্গম্হি মোদহং;

অৰসেসেসু কপ্পেসু, কুসলং কারিতং মযা.

১৬. ‘‘দ্ৰেনৰুতে ইতো কপ্পে, যং দুস্সমদদিং তদা;

দুগ্গতিং নাভিজানামি, দুস্সদানস্সিদং ফলং.

১৭. ‘‘একূনপঞ্ঞাসকপ্পম্হি [একপঞ্ঞাসকপ্পম্হি (স্যা.)], রাজানো চক্কৰত্তিনো;

সমন্তচ্ছদনা নাম, বাত্তিংসাসুং [খত্তিযাসুং (স্যা. ক.)] জনাধিপা.

১৮. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা অড্ঢচেল়কো থেরো ইমা গাথাযো অভাসিত্থাতি.

অড্ঢচেল়কত্থেরস্সাপদানং ততিযং.

৪. সূচিদাযকত্থেরঅপদানং

১৯. ‘‘কম্মারোহং পুরে আসিং, বন্ধুমাযং পুরুত্তমে;

সূচিদানং মযা দিন্নং, ৰিপস্সিস্স মহেসিনো.

২০. ‘‘ৰজিরগ্গসমং ঞাণং, হোতি কম্মেন তাদিসং;

ৰিরাগোম্হি ৰিমুত্তোম্হি [ৰিভৰোম্হি ৰিভত্তোম্হি (ক.)], পত্তোম্হি আসৰক্খযং.

২১. ‘‘অতীতে চ ভৰে সব্বে, ৰত্তমানে চনাগতে [অতীতা চ ভৰা সব্বে, ৰত্তমানা চ’নাগতা (স্যা. ক.)];

ঞাণেন ৰিচিনিং সব্বং, সূচিদানস্সিদং ফলং.

২২. ‘‘একনৰুতিতো কপ্পে, সত্তাসুং ৰজিরৰ্হযা;

সত্তরতনসম্পন্না, চক্কৰত্তী মহব্বলা.

২৩. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সূচিদাযকো থেরো ইমা গাথাযো অভাসিত্থাতি.

সূচিদাযকত্থেরস্সাপদানং চতুত্থং.

৫. গন্ধমালিযত্থেরঅপদানং

২৪. ‘‘সিদ্ধত্থস্স ভগৰতো, গন্ধথূপং অকাসহং;

সুমনেহি পটিচ্ছন্নং, বুদ্ধানুচ্ছৰিকং কতং.

২৫. ‘‘কঞ্চনগ্ঘিযসঙ্কাসং, বুদ্ধং লোকগ্গনাযকং;

ইন্দীৰরংৰ জলিতং, আদিত্তংৰ হুতাসনং.

২৬. ‘‘ব্যগ্ঘূসভংৰ পৰরং, অভিজাতংৰ কেসরিং;

নিসিন্নং সমণানগ্গং, ভিক্খুসঙ্ঘপুরক্খতং.

২৭. ‘‘ৰন্দিত্ৰা সত্থুনো পাদে, পক্কামিং উত্তরামুখো;

চতুন্নৰুতিতো কপ্পে, গন্ধমালং যতো অদং.

২৮. ‘‘বুদ্ধে কতস্স কারস্স, ফলেনাহং ৰিসেসতো;

দুগ্গতিং নাভিজানামি, বুদ্ধপূজাযিদং ফলং.

২৯. ‘‘চত্তারীসম্হি একূনে, কপ্পে আসিংসু সোল়স;

দেৰগন্ধসনামা তে, রাজানো চক্কৰত্তিনো.

৩০. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা গন্ধমালিযো থেরো ইমা গাথাযো অভাসিত্থাতি.

গন্ধমালিযত্থেরস্সাপদানং পঞ্চমং.

৬. তিপুপ্ফিযত্থেরঅপদানং

৩১. ‘‘মিগলুদ্দো পুরে আসিং, অরঞ্ঞে কাননে অহং [ব্রহা (স্যা.)];

পাটলিং হরিতং দিস্ৰা, তীণি পুপ্ফানি ওকিরিং.

৩২. ‘‘পতিতপত্তানি [সত্তপত্তানি (সী.), সতপত্তানি (ক.), সুক্খপণ্ণানি (স্যা.)] গণ্হিত্ৰা, বহি ছড্ডেসহং তদা;

অন্তোসুদ্ধং বহিসুদ্ধং, সুৰিমুত্তং অনাসৰং.

৩৩. ‘‘সম্মুখা ৰিয সম্বুদ্ধং, ৰিপস্সিং লোকনাযকং;

পাটলিং অভিৰাদেত্ৰা, তত্থ কালঙ্কতো অহং.

৩৪. ‘‘একনৰুতিতো কপ্পে, যং বোধিমভিপূজযিং;

দুগ্গতিং নাভিজানামি, বোধিপূজাযিদং ফলং.

৩৫. ‘‘সমন্তপাসাদিকা নাম, তেরসাসিংসু রাজিনো;

ইতো তেত্তিংসকপ্পম্হি [তিংসতিকপ্পম্হি (স্যা.)], চক্কৰত্তী মহব্বলা.

৩৬. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা তিপুপ্ফিযো থেরো ইমা গাথাযো অভাসিত্থাতি.

তিপুপ্ফিযত্থেরস্সাপদানং ছট্ঠং.

৭. মধুপিণ্ডিকত্থেরঅপদানং

৩৭. ‘‘ৰিপিনে [ৰিৰনে (স্যা. অট্ঠ.)] কাননে দিস্ৰা, অপ্পসদ্দে নিরাকুলে;

সিদ্ধত্থং ইসিনং সেট্ঠং, আহুতীনং পটিগ্গহং.

৩৮. ‘‘নিব্বুতত্তং [নিব্বুতগ্গং (ক.), নিব্বূতিকং (স্যা.)] মহানাগং, নিসভাজানিযং যথা;

ওসধিংৰ ৰিরোচন্তং, দেৰসঙ্ঘনমস্সিতং.

৩৯. ‘‘ৰিত্তি মমাহু তাৰদে [ৰিত্তি মে পাহুনা তাৰ (সী. স্যা.)], ঞাণং উপ্পজ্জি তাৰদে;

ৰুট্ঠিতস্স সমাধিম্হা, মধুং দত্ৰান সত্থুনো.

৪০. ‘‘ৰন্দিত্ৰা সত্থুনো পাদে, পক্কামিং পাচিনামুখো;

চতুত্তিংসম্হি কপ্পম্হি, রাজা আসিং সুদস্সনো.

৪১. ‘‘মধু ভিসেহি সৰতি, ভোজনম্হি চ তাৰদে;

মধুৰস্সং পৰস্সিত্থ, পুব্বকম্মস্সিদং ফলং.

৪২. ‘‘চতুন্নৰুতিতো কপ্পে, যং মধুং অদদিং তদা;

দুগ্গতিং নাভিজানামি, মধুদানস্সিদং ফলং.

৪৩. ‘‘চতুত্তিংসে ইতো কপ্পে, চত্তারো তে সুদস্সনা;

সত্তরতনসম্পন্না, চক্কৰত্তী মহব্বলা.

৪৪. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা মধুপিণ্ডিকো থেরো ইমা গাথাযো অভাসিত্থাতি.

মধুপিণ্ডিকত্থেরস্সাপদানং সত্তমং.

৮. সেনাসনদাযকত্থেরঅপদানং

৪৫. ‘‘সিদ্ধত্থস্স ভগৰতো, অদাসিং পণ্ণসন্থরং;

সমন্তা উপহারঞ্চ, কুসুমং ওকিরিং অহং.

৪৬. ‘‘পাসাদেৰং গুণং রম্মং [পাসাদে চ গুহং রম্মং (স্যা.)], অনুভোমি মহারহং;

মহগ্ঘানি চ পুপ্ফানি, সযনেভিসৰন্তি মে.

৪৭. ‘‘সযনেহং তুৰট্টামি, ৰিচিত্তে পুপ্ফসন্থতে;

পুপ্ফৰুট্ঠি চ সযনে, অভিৰস্সতি তাৰদে.

৪৮. ‘‘চতুন্নৰুতিতো কপ্পে, অদাসিং পণ্ণসন্থরং;

দুগ্গতিং নাভিজানামি, সন্থরস্স ইদং ফলং.

৪৯. ‘‘তিণসন্থরকা নাম, সত্তেতে চক্কৰত্তিনো;

ইতো তে পঞ্চমে কপ্পে, উপ্পজ্জিংসু জনাধিপা.

৫০. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা সেনাসনদাযকো থেরো ইমা গাথাযো অভাসিত্থাতি.

সেনাসনদাযকত্থেরস্সাপদানং অট্ঠমং.

৯. ৰেয্যাৰচ্চকত্থেরঅপদানং

৫১. ‘‘ৰিপস্সিস্স ভগৰতো, মহাপূগগণো অহু;

ৰেয্যাৰচ্চকরো আসিং, সব্বকিচ্চেসু ৰাৰটো [ব্যাৰটো (সী. স্যা.)].

৫২. ‘‘দেয্যধম্মো চ মে নত্থি, সুগতস্স মহেসিনো;

অৰন্দিং সত্থুনো পাদে, ৰিপ্পসন্নেন চেতসা.

৫৩. ‘‘একনৰুতিতো কপ্পে, ৰেয্যাৰচ্চং অকাসহং;

দুগ্গতিং নাভিজানামি, ৰেয্যাৰচ্চস্সিদং ফলং.

৫৪. ‘‘ইতো চ অট্ঠমে কপ্পে, রাজা আসিং সুচিন্তিতো;

সত্তরতনসম্পন্নো, চক্কৰত্তী মহব্বলো.

৫৫. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা ৰেয্যাৰচ্চকো থেরো ইমা গাথাযো অভাসিত্থাতি.

ৰেয্যাৰচ্চকত্থেরস্সাপদানং নৰমং.

১০. বুদ্ধুপট্ঠাকত্থেরঅপদানং

৫৬. ‘‘ৰিপস্সিস্স ভগৰতো, অহোসিং সঙ্খধম্মকো;

নিচ্চুপট্ঠানযুত্তোম্হি, সুগতস্স মহেসিনো.

৫৭. ‘‘উপট্ঠানফলং পস্স, লোকনাথস্স তাদিনো;

সট্ঠিতূরিযসহস্সানি, পরিৰারেন্তি মং সদা.

৫৮. ‘‘একনৰুতিতো কপ্পে, উপট্ঠহিং মহাইসিং;

দুগ্গতিং নাভিজানামি, উপট্ঠানস্সিদং ফলং.

৫৯. ‘‘চতুৰীসে [চতুনৰুতে (স্যা.)] ইতো কপ্পে, মহানিগ্ঘোসনামকা;

সোল়সাসিংসু রাজানো, চক্কৰত্তী মহব্বলা.

৬০. ‘‘পটিসম্ভিদা চতস্সো…পে… কতং বুদ্ধস্স সাসনং’’.

ইত্থং সুদং আযস্মা বুদ্ধুপট্ঠাকো থেরো ইমা গাথাযো অভাসিত্থাতি.

বুদ্ধুপট্ঠাকত্থেরস্সাপদানং দসমং.

সুধাৰগ্গো দসমো.

তস্সুদ্দানং –

সুধা সুচিন্তি চেল়ঞ্চ, সূচী চ গন্ধমালিযো;

তিপুপ্ফিযো মধুসেনা, ৰেয্যাৰচ্চো চুপট্ঠকো;

সমসট্ঠি চ গাথাযো, অস্মিং ৰগ্গে পকিত্তিতা.

অথ ৰগ্গুদ্দানং –

বুদ্ধৰগ্গো হি পঠমো, সীহাসনি সুভূতি চ;

কুণ্ডধানো উপালি চ, বীজনিসকচিন্তি চ.