৩-৩. মহাকস্সপত্থেরঅপদানং

৩৯৮. ‘‘পদুমুত্তরস্স ভগৰতো, লোকজেট্ঠস্স তাদিনো;

নিব্বুতে লোকনাথম্হি, পূজং কুব্বন্তি সত্থুনো.

৩৯৯. ‘‘উদগ্গচিত্তা জনতা, আমোদিতপমোদিতা;

তেসু সংৰেগজাতেসু, পীতি মে উদপজ্জথ.

৪০০. ‘‘ঞাতিমিত্তে সমানেত্ৰা, ইদং ৰচনমব্রৰিং;

পরিনিব্বুতো মহাৰীরো, হন্দ পূজং করোমসে.

৪০১. ‘‘সাধূতি তে পটিস্সুত্ৰা, ভিয্যো হাসং জনিংসু মে;

বুদ্ধস্মিং লোকনাথম্হি, কাহাম পুঞ্ঞসঞ্চযং.

৪০২. ‘‘অগ্ঘিযং সুকতং কত্ৰা, সতহত্থসমুগ্গতং;

দিযড্ঢহত্থপত্থটং, ৰিমানং নভমুগ্গতং.

৪০৩. ‘‘কত্ৰান হম্মিযং তত্থ, তালপন্তীহি চিত্তিতং;

সকং চিত্তং পসাদেত্ৰা, চেতিযং পূজযুত্তমং.

৪০৪. ‘‘অগ্গিক্খন্ধোৰ জলিতো, কিংসুকো ইৰ [সালরাজাৰ (সী.)] ফুল্লিতো;

ইন্দলট্ঠীৰ আকাসে, ওভাসেতি চতুদ্দিসা.

৪০৫. ‘‘তত্থ চিত্তং পসাদেত্ৰা, কত্ৰান কুসলং বহুং;

পুব্বকম্মং সরিত্ৰান, তিদসং উপপজ্জহং.

৪০৬. ‘‘সহস্সযুত্তং হযৰাহিং, দিব্বযানমধিট্ঠিতো;

উব্বিদ্ধং ভৰনং ময্হং, সত্তভূমং সমুগ্গতং.

৪০৭. ‘‘কূটাগারসহস্সানি, সব্বসোণ্ণমযা অহুং;

জলন্তি সকতেজেন, দিসা সব্বা পভাসযং.

৪০৮. ‘‘সন্তি অঞ্ঞেপি নিয্যূহা, লোহিতঙ্গমযা তদা;

তেপি জোতন্তি আভায, সমন্তা চতুরো দিসা.

৪০৯. ‘‘পুঞ্ঞকম্মাভিনিব্বত্তা, কূটাগারা সুনিম্মিতা;

মণিমযাপি জোতন্তি, দিসা দস [দিসোদিসং (স্যা.)] সমন্ততো.

৪১০. ‘‘তেসং উজ্জোতমানানং, ওভাসো ৰিপুলো অহু;

সব্বে দেৰে অভিভোমি, পুঞ্ঞকম্মস্সিদং ফলং.

৪১১. ‘‘সট্ঠিকপ্পসহস্সম্হি, উব্বিদ্ধো নাম খত্তিযো;

চাতুরন্তো ৰিজিতাৰী, পথৰিং আৰসিং অহং.

৪১২. ‘‘তথেৰ ভদ্দকে কপ্পে, তিংসক্খত্তুং অহোসহং;

সককম্মাভিরদ্ধোম্হি, চক্কৰত্তী মহব্বলো.

৪১৩. ‘‘সত্তরতনসম্পন্নো, চতুদীপম্হি ইস্সরো;

তত্থাপি ভৰনং ময্হং, ইন্দলট্ঠীৰ উগ্গতং.

৪১৪. ‘‘আযামতো চতুব্বীসং, ৰিত্থারেন চ দ্ৰাদস;

রম্মণং [রম্মকং (সী. স্যা.)] নাম নগরং, দল়্হপাকারতোরণং.

৪১৫. ‘‘আযামতো পঞ্চসতং, ৰিত্থারেন তদড্ঢকং;

আকিণ্ণং জনকাযেহি, তিদসানং পুরং ৰিয.

৪১৬. ‘‘যথা সূচিঘরে সূচী, পক্খিত্তা পণ্ণৰীসতি;

অঞ্ঞমঞ্ঞং পঘট্টেন্তি, আকিণ্ণং হোতি লঙ্কতং [তং তদা (সী.), সততা (স্যা.), সঙ্করং (?)].

৪১৭. ‘‘এৰম্পি নগরং ময্হং, হত্থিস্সরথসংকুলং;

মনুস্সেহি সদাকিণ্ণং, রম্মণং নগরুত্তমং.

৪১৮. ‘‘তত্থ ভুত্ৰা পিৰিত্ৰা চ, পুন দেৰত্তনং গতো [পুনপি দেৰতঙ্গতো (ক.)].

ভৰে পচ্ছিমকে ময্হং, অহোসি কুলসম্পদা.

৪১৯. ‘‘ব্রাহ্মঞ্ঞকুলসম্ভূতো, মহারতনসঞ্চযো;

অসীতিকোটিযো হিত্ৰা, হিরঞ্ঞস্সাপি পব্বজিং.

৪২০. ‘‘পটিসম্ভিদা চতস্সো, ৰিমোক্খাপি চ অট্ঠিমে;

ছল়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা মহাকস্সপো থেরো ইমা গাথাযো অভাসিত্থাতি.

মহাকস্সপত্থেরস্সাপদানং ততিযং.