৩-৪. অনুরুদ্ধত্থেরঅপদানং

৪২১. ‘‘সুমেধং ভগৰন্তাহং, লোকজেট্ঠং নরাসভং;

ৰূপকট্ঠং ৰিহরন্তং, অদ্দসং লোকনাযকং.

৪২২. ‘‘উপগন্ত্ৰান সম্বুদ্ধং, সুমেধং লোকনাযকং;

অঞ্জলিং পগ্গহেত্ৰান, বুদ্ধসেট্ঠমযাচহং.

৪২৩. ‘‘অনুকম্প মহাৰীর, লোকজেট্ঠ নরাসভ;

পদীপং তে পদস্সামি, রুক্খমূলম্হি ঝাযতো.

৪২৪. ‘‘অধিৰাসেসি সো ধীরো, সযম্ভূ ৰদতং ৰরো;

দুমেসু ৰিনিৰিজ্ঝিত্ৰা, যন্তং যোজিযহং তদা.

৪২৫. ‘‘সহস্সৰট্টিং পাদাসিং, বুদ্ধস্স লোকবন্ধুনো;

সত্তাহং পজ্জলিত্ৰান, দীপা ৰূপসমিংসু মে.

৪২৬. ‘‘তেন চিত্তপ্পসাদেন, চেতনাপণিধীহি চ;

জহিত্ৰা মানুসং দেহং, ৰিমানমুপপজ্জহং.

৪২৭. ‘‘উপপন্নস্স দেৰত্তং, ব্যম্হং আসি সুনিম্মিতং;

সমন্ততো পজ্জলতি, দীপদানস্সিদং ফলং.

৪২৮. ‘‘সমন্তা যোজনসতং, ৰিরোচেসিমহং তদা;

সব্বে দেৰে অভিভোমি, দীপদানস্সিদং ফলং.

৪২৯. ‘‘তিংসকপ্পানি দেৰিন্দো, দেৰরজ্জমকারযিং;

ন মং কেচীতিমঞ্ঞন্তি, দীপদানস্সিদং ফলং.

৪৩০. ‘‘অট্ঠৰীসতিক্খত্তুঞ্চ, চক্কৰত্তী অহোসহং;

দিৰা রত্তিঞ্চ পস্সামি, সমন্তা যোজনং তদা.

৪৩১. ‘‘সহস্সলোকং ঞাণেন, পস্সামি সত্থু সাসনে;

দিব্বচক্খুমনুপ্পত্তো, দীপদানস্সিদং ফলং.

৪৩২. ‘‘সুমেধো নাম সম্বুদ্ধো, তিংসকপ্পসহস্সিতো;

তস্স দীপো মযা দিন্নো, ৰিপ্পসন্নেন চেতসা.

৪৩৩. ‘‘পটিসম্ভিদা চতস্সো, ৰিমোক্খাপি চ অট্ঠিমে;

ছল়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা অনুরুদ্ধো থেরো ইমা গাথাযো অভাসিত্থাতি.

অনুরুদ্ধত্থেরস্সাপদানং চতুত্থং.