৩-২. মহামোগ্গল্লানত্থেরঅপদানং

৩৭৫. ‘‘অনোমদস্সী ভগৰা, লোকজেট্ঠো নরাসভো;

ৰিহাসি হিমৰন্তম্হি, দেৰসঙ্ঘপুরক্খতো.

৩৭৬. ‘‘ৰরুণো নাম নামেন, নাগরাজা অহং তদা;

কামরূপী ৰিকুব্বামি, মহোদধিনিৰাসহং.

৩৭৭. ‘‘সঙ্গণিযং গণং হিত্ৰা, তূরিযং পট্ঠপেসহং;

সম্বুদ্ধং পরিৰারেত্ৰা, ৰাদেসুং অচ্ছরা তদা.

৩৭৮. ‘‘ৰজ্জমানেসু তূরেসু, দেৰা তূরানি [তুরিযেসু, দেৰা তুরিযানি (সী. স্যা.)] ৰজ্জযুং;

উভিন্নং সদ্দং সুত্ৰান, বুদ্ধোপি সম্পবুজ্ঝথ.

৩৭৯. ‘‘নিমন্তেত্ৰান সম্বুদ্ধং, সকং ভৰনুপাগমিং;

আসনং পঞ্ঞপেত্ৰান, কালমারোচযিং অহং.

৩৮০. ‘‘খীণাসৰসহস্সেহি, পরিৰুতো লোকনাযকো;

ওভাসেন্তো দিসা সব্বা, ভৰনং মে উপাগমি.

৩৮১. ‘‘উপৰিট্ঠং মহাৰীরং, দেৰদেৰং নরাসভং;

সভিক্খুসঙ্ঘং তপ্পেসিং [সন্তপ্পেসিং (স্যা.), তপ্পেমি (ক.)], অন্নপানেনহং তদা.

৩৮২. ‘‘অনুমোদি মহাৰীরো, সযম্ভূ অগ্গপুগ্গলো;

ভিক্খুসঙ্ঘে নিসীদিত্ৰা, ইমা গাথা অভাসথ.

৩৮৩. ‘‘‘যো সো [যং সো (ক.)] সঙ্ঘং অপূজেসি, বুদ্ধঞ্চ লোকনাযকং;

তেন চিত্তপ্পসাদেন, দেৰলোকং গমিস্সতি.

৩৮৪. ‘‘‘সত্তসত্ততিক্খত্তুঞ্চ, দেৰরজ্জং করিস্সতি;

পথব্যা রজ্জং অট্ঠসতং, ৰসুধং আৰসিস্সতি.

৩৮৫. ‘‘‘পঞ্চপঞ্ঞাসক্খত্তুঞ্চ, চক্কৰত্তী ভৰিস্সতি;

ভোগা অসঙ্খিযা তস্স, উপ্পজ্জিস্সন্তি তাৰদে.

৩৮৬. ‘‘‘অপরিমেয্যে ইতো কপ্পে, ওক্কাককুলসম্ভৰো;

গোতমো নাম গোত্তেন [নামেন (সী.)], সত্থা লোকে ভৰিস্সতি.

৩৮৭. ‘‘‘নিরযা সো চৰিত্ৰান, মনুস্সতং গমিস্সতি;

কোলিতো নাম নামেন, ব্রহ্মবন্ধু ভৰিস্সতি.

৩৮৮. ‘‘‘সো পচ্ছা পব্বজিত্ৰান, কুসলমূলেন চোদিতো;

গোতমস্স ভগৰতো, দুতিযো হেস্সতি সাৰকো.

৩৮৯. ‘‘‘আরদ্ধৰীরিযো পহিতত্তো, ইদ্ধিযা পারমিং গতো;

সব্বাসৰে পরিঞ্ঞায, নিব্বাযিস্সতিনাসৰো’.

৩৯০. ‘‘পাপমিত্তোপনিস্সায, কামরাগৰসং গতো;

মাতরং পিতরঞ্চাপি, ঘাতযিং দুট্ঠমানসো.

৩৯১. ‘‘যং যং যোনুপপজ্জামি, নিরযং অথ মানুসং;

পাপকম্মসমঙ্গিতা, ভিন্নসীসো মরামহং.

৩৯২. ‘‘ইদং পচ্ছিমকং ময্হং, চরিমো ৰত্ততে ভৰো;

ইধাপি এদিসো ময্হং, মরণকালে ভৰিস্সতি.

৩৯৩. ‘‘পৰিৰেকমনুযুত্তো, সমাধিভাৰনারতো;

সব্বাসৰে পরিঞ্ঞায, ৰিহরামি অনাসৰো.

৩৯৪. ‘‘ধরণিম্পি সুগম্ভীরং, বহলং দুপ্পধংসিযং;

ৰামঙ্গুট্ঠেন খোভেয্যং, ইদ্ধিযা পারমিং গতো.

৩৯৫. ‘‘অস্মিমানং ন পস্সামি, মানো ময্হং ন ৰিজ্জতি;

সামণেরে উপাদায, গরুচিত্তং করোমহং.

৩৯৬. ‘‘অপরিমেয্যে ইতো কপ্পে, যং কম্মমভিনীহরিং;

তাহং ভূমিমনুপ্পত্তো, পত্তোম্হি আসৰক্খযং.

৩৯৭. ‘‘পটিসম্ভিদা চতস্সো, ৰিমোক্খাপি চ অট্ঠিমে;

ছল়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা মহামোগ্গল্লানো থেরো ইমা গাথাযো অভাসিত্থাতি.

মহামোগ্গল্লানত্থেরস্সাপদানং দুতিযং.