৩-১. সারিপুত্তত্থেরঅপদানং

অথ থেরাপদানং সুণাথ –

১৪১. ‘‘হিমৰন্তস্স অৰিদূরে, লম্বকো নাম পব্বতো;

অস্সমো সুকতো ময্হং, পণ্ণসালা সুমাপিতা.

১৪২. ‘‘উত্তানকূলা নদিকা, সুপতিত্থা মনোরমা;

সুসুদ্ধপুল়িনাকিণ্ণা, অৰিদূরে মমস্সমং.

১৪৩. ‘‘অসক্খরা অপব্ভারা, সাদু অপ্পটিগন্ধিকা;

সন্দতী নদিকা তত্থ, সোভযন্তা মমস্সমং.

১৪৪. ‘‘কুম্ভীলা মকরা চেত্থ, সুসুমারা [সুংসুমারা (সী. স্যা. )] চ কচ্ছপা;

চরন্তি নদিযা তত্থ, সোভযন্তা মমস্সমং.

১৪৫. ‘‘পাঠীনা পাৰুসা মচ্ছা, বলজা [ৰজলা (সী. স্যা.) জলজা (পী.)] মুঞ্জরোহিতা;

ৰগ্গল়া [ৰগ্গুলা (সী.) ৰগ্গুল়া (স্যা.) মগ্গুরা (থেরগাথা)] পপতাযন্তা, সোভযন্তি [পপতাযন্তি, সোভযন্তা (ক.)] মমস্সমং.

১৪৬. ‘‘উভো কূলেসু নদিযা, পুপ্ফিনো ফলিনো দুমা;

উভতো অভিলম্বন্তা, সোভযন্তি [অভিলম্বন্তি সোভযন্তা (ক.)] মমস্সমং.

১৪৭. ‘‘অম্বা সালা চ তিলকা, পাটলী সিন্দুৰারকা [সিন্দুৰারিকা (বহূসু)];

দিব্বগন্ধা সম্পৰন্তি, পুপ্ফিতা মম অস্সমে.

১৪৮. ‘‘চম্পকা সল়লা নীপা [নিম্বা (ক.)], নাগপুন্নাগকেতকা;

দিব্বগন্ধা সম্পৰন্তি, পুপ্ফিতা মম অস্সমে.

১৪৯. ‘‘অতিমুত্তা অসোকা চ, ভগিনীমালা চ পুপ্ফিতা;

অঙ্কোলা বিম্বিজালা [বিম্বজালা (ক.)] চ, পুপ্ফিতা মম অস্সমে.

১৫০. ‘‘কেতকা কন্দলি [কদলী (স্যা.)] চেৰ, গোধুকা তিণসূলিকা;

দিব্বগন্ধং সম্পৰন্তা, সোভযন্তি মমস্সমং.

১৫১. ‘‘কণিকারা কণ্ণিকা চ, অসনা অজ্জুনা বহূ;

দিব্বগন্ধং সম্পৰন্তা, সোভযন্তি মমস্সমং.

১৫২. ‘‘পুন্নাগা গিরিপুন্নাগা, কোৰিল়ারা চ পুপ্ফিতা;

দিব্বগন্ধং সম্পৰন্তা, সোভযন্তি মমস্সমং.

১৫৩. ‘‘উদ্ধালকা চ কুটজা, কদম্বা ৰকুলা বহূ;

দিব্বগন্ধং সম্পৰন্তা, সোভযন্তি মমস্সমং.

১৫৪. ‘‘আল়কা ইসিমুগ্গা চ, কদলিমাতুলুঙ্গিযো;

গন্ধোদকেন সংৰড্ঢা, ফলানি ধারযন্তি তে.

১৫৫. ‘‘অঞ্ঞে পুপ্ফন্তি পদুমা, অঞ্ঞে জাযন্তি কেসরী;

অঞ্ঞে ওপুপ্ফা পদুমা, পুপ্ফিতা তল়াকে তদা.

১৫৬. ‘‘গব্ভং গণ্হন্তি পদুমা, নিদ্ধাৰন্তি মুলাল়িযো;

সিংঘাটিপত্তমাকিণ্ণা, সোভন্তি তল়াকে তদা.

১৫৭. ‘‘নযিতা অম্বগন্ধী চ, উত্তলী বন্ধুজীৰকা;

দিব্বগন্ধা সম্পৰন্তি, পুপ্ফিতা তল়াকে তদা.

১৫৮. ‘‘পাঠীনা পাৰুসা মচ্ছা, বলজা মুঞ্জরোহিতা;

সংগুলা মগ্গুরা [মঙ্গুরা (সী. ক.)] চেৰ, ৰসন্তি তল়াকে তদা.

১৫৯. ‘‘কুম্ভীলা সুসুমারা চ, তন্তিগাহা চ রক্খসা;

ওগুহা [ওগাহা (স্যা.)] অজগরা চ, ৰসন্তি তল়াকে তদা.

১৬০. ‘‘পারেৰতা রৰিহংসা, চক্কৰাকা নদীচরা;

কোকিলা সুকসাল়িকা, উপজীৰন্তি তং সরং.

১৬১. ‘‘কুক্কুত্থকা কুল়ীরকা, ৰনে পোক্খরসাতকা;

দিন্দিভা সুৰপোতা চ, উপজীৰন্তি তং সরং.

১৬২. ‘‘হংসা কোঞ্চা মযূরা চ, কোকিলা তম্বচূল়কা [তম্বচূল়িকা (সী.)];

পম্পকা জীৰংজীৰা চ, উপজীৰন্তি তং সরং.

১৬৩. ‘‘কোসিকা পোট্ঠসীসা চ, কুররা সেনকা বহূ;

মহাকাল়া চ সকুণা, উপজীৰন্তি তং সরং.

১৬৪. ‘‘পসদা চ ৰরাহা চ, চমরা গণ্ডকা বহূ [ৰকা ভেরণ্ডকা বহূ (সী. স্যা.)];

রোহিচ্চা সুকপোতা [সুত্তপোতা (স্যা.)] চ, উপজীৰন্তি তং সরং.

১৬৫. ‘‘সীহব্যগ্ঘা চ দীপী চ, অচ্ছকোকতরচ্ছকা;

তিধা পভিন্নমাতঙ্গা, উপজীৰন্তি তং সরং.

১৬৬. ‘‘কিন্নরা ৰানরা চেৰ, অথোপি ৰনকম্মিকা;

চেতা চ লুদ্দকা চেৰ, উপজীৰন্তি তং সরং.

১৬৭. ‘‘তিন্দুকানি পিযালানি, মধুকা কাসুমারযো [কাসমারিযো (স্যা.)];

ধুৰং ফলানি ধারেন্তি, অৰিদূরে মমস্সমং.

১৬৮. ‘‘কোসম্বা [কোসুম্ভা (সী. স্যা.)] সল়লা নিম্বা [সল়লা নীপা (সী. স্যা.) পনসা অম্বা (?)], সাদুফলসমাযুতা;

ধুৰং ফলানি ধারেন্তি, অৰিদূরে মমস্সমং.

১৬৯. ‘‘হরীতকা আমলকা, অম্বজম্বুৰিভীতকা;

কোলা ভল্লাতকা বিল্লা, ফলানি ধারযন্তি তে.

১৭০. ‘‘আলুৰা চ কল়ম্বা চ, বিল়ালীতক্কল়ানি চ;

জীৰকা সুতকা চেৰ, বহুকা মম অস্সমে.

১৭১. ‘‘অস্সমস্সাৰিদূরম্হি, তল়াকাসুং সুনিম্মিতা;

অচ্ছোদকা সীতজলা, সুপতিত্থা মনোরমা.

১৭২. ‘‘পদুমুপ্পলসঞ্ছন্না, পুণ্ডরীকসমাযুতা;

মন্দালকেহি সঞ্ছন্না, দিব্বগন্ধো পৰাযতি.

১৭৩. ‘‘এৰং সব্বঙ্গসম্পন্নে, পুপ্ফিতে ফলিতে ৰনে;

সুকতে অস্সমে রম্মে, ৰিহরামি অহং তদা.

১৭৪. ‘‘সীলৰা ৰতসম্পন্নো [ৰত্তসম্পন্নো (স্যা.)], ঝাযী ঝানরতো সদা;

পঞ্চাভিঞ্ঞাবলপ্পত্তো, সুরুচি নাম তাপসো.

১৭৫. ‘‘চতুৰীসসহস্সানি, সিস্সা ময্হং উপট্ঠহু;

সব্বেৰ ব্রাহ্মণা এতে, জাতিমন্তো যসস্সিনো.

১৭৬. ‘‘লক্খণে ইতিহাসে চ, সনিঘণ্টুসকেটুভে;

পদকা ৰেয্যাকরণা, সধম্মে পারমিং গতা.

১৭৭. ‘‘উপ্পাতেসু নিমিত্তেসু, লক্খণেসু চ কোৰিদা;

পথব্যা ভূমন্তলিক্খে, মম সিস্সা সুসিক্খিতা.

১৭৮. ‘‘অপ্পিচ্ছা নিপকা এতে, অপ্পাহারা অলোলুপা;

লাভালাভেন সন্তুট্ঠা, পরিৰারেন্তি মং সদা.

১৭৯. ‘‘ঝাযী ঝানরতা ধীরা, সন্তচিত্তা সমাহিতা;

আকিঞ্চঞ্ঞং পত্থযন্তা, পরিৰারেন্তি মং সদা.

১৮০. ‘‘অভিঞ্ঞাপারমিপ্পত্তা, পেত্তিকে গোচরে রতা;

অন্তলিক্খচরা ধীরা, পরিৰারেন্তি মং সদা.

১৮১. ‘‘সংৰুতা ছসু দ্ৰারেসু, অনেজা রক্খিতিন্দ্রিযা;

অসংসট্ঠা চ তে ধীরা, মম সিস্সা দুরাসদা.

১৮২. ‘‘পল্লঙ্কেন নিসজ্জায, ঠানচঙ্কমনেন চ;

ৰীতিনামেন্তি তে রত্তিং, মম সিস্সা দুরাসদা.

১৮৩. ‘‘রজনীযে ন রজ্জন্তি, দুস্সনীযে ন দুস্সরে;

মোহনীযে ন মুয্হন্তি, মম সিস্সা দুরাসদা.

১৮৪. ‘‘ইদ্ধিং ৰীমংসমানা তে, ৰত্তন্তি নিচ্চকালিকং;

পথৰিং [পঠৰিং (সী. স্যা.)] তে পকম্পেন্তি, সারম্ভেন দুরাসদা.

১৮৫. ‘‘কীল়মানা চ তে সিস্সা, কীল়ন্তি ঝানকীল়িতং;

জম্বুতো ফলমানেন্তি, মম সিস্সা দুরাসদা.

১৮৬. ‘‘অঞ্ঞে গচ্ছন্তি গোযানং, অঞ্ঞে পুব্বৰিদেহকং [পুব্বৰিদেহনং (স্যা. ক.)];

অঞ্ঞে চ উত্তরকুরুং, এসনায দুরাসদা.

১৮৭. ‘‘পুরতো পেসেন্তি খারিং, পচ্ছতো চ ৰজন্তি তে;

চতুৰীসসহস্সেহি, ছাদিতং হোতি অম্বরং.

১৮৮. ‘‘অগ্গিপাকী অনগ্গী চ, দন্তোদুক্খলিকাপি চ;

অস্মেন কোট্টিতা কেচি, পৰত্তফলভোজনা.

১৮৯. ‘‘উদকোরোহণা কেচি, সাযং পাতো সুচীরতা;

তোযাভিসেচনকরা, মম সিস্সা দুরাসদা.

১৯০. ‘‘পরূল়্হকচ্ছনখলোমা, পঙ্কদন্তা রজস্সিরা;

গন্ধিতা সীলগন্ধেন, মম সিস্সা দুরাসদা.

১৯১. ‘‘পাতোৰ সন্নিপতিত্ৰা, জটিলা উগ্গতাপনা;

লাভালাভং পকিত্তেত্ৰা, গচ্ছন্তি অম্বরে তদা.

১৯২. ‘‘এতেসং পক্কমন্তানং, মহাসদ্দো পৰত্ততি;

অজিনচম্মসদ্দেন, মুদিতা হোন্তি দেৰতা.

১৯৩. ‘‘দিসোদিসং পক্কমন্তি, অন্তলিক্খচরা ইসী;

সকে বলেনুপত্থদ্ধা, তে গচ্ছন্তি যদিচ্ছকং.

১৯৪. ‘‘পথৰীকম্পকা এতে, সব্বেৰ নভচারিনো;

উগ্গতেজা দুপ্পসহা, সাগরোৰ অখোভিযা.

১৯৫. ‘‘ঠানচঙ্কমিনো কেচি, কেচি নেসজ্জিকা ইসী;

পৰত্তভোজনা কেচি, মম সিস্সা দুরাসদা.

১৯৬. ‘‘মেত্তাৰিহারিনো এতে, হিতেসী সব্বপাণিনং;

অনত্তুক্কংসকা সব্বে, ন তে ৰম্ভেন্তি কস্সচি.

১৯৭. ‘‘সীহরাজাৰসম্ভীতা, গজরাজাৰ থামৰা;

দুরাসদা ব্যগ্ঘারিৰ, আগচ্ছন্তি মমন্তিকে.

১৯৮. ‘‘ৰিজ্জাধরা দেৰতা চ, নাগগন্ধব্বরক্খসা;

কুম্ভণ্ডা দানৰা গরুল়া, উপজীৰন্তি তং সরং.

১৯৯. ‘‘তে জটাখারিভরিতা, অজিনুত্তরৰাসনা;

অন্তলিক্খচরা সব্বে, উপজীৰন্তি তং সরং.

২০০. ‘‘সদানুচ্ছৰিকা [তদানুচ্ছৰিকা (স্যা. ক.)] এতে, অঞ্ঞমঞ্ঞং সগারৰা;

চতুব্বীসসহস্সানং, খিপিতসদ্দো ন ৰিজ্জতি.

২০১. ‘‘পাদে পাদং নিক্খিপন্তা, অপ্পসদ্দা সুসংৰুতা;

উপসঙ্কম্ম সব্বেৰ [সব্বে তে (স্যা.)], সিরসা ৰন্দরে মমং.

২০২. ‘‘তেহি সিস্সেহি পরিৰুতো, সন্তেহি চ তপস্সিভি;

ৰসামি অস্সমে তত্থ, ঝাযী ঝানরতো অহং.

২০৩. ‘‘ইসীনং সীলগন্ধেন, পুপ্ফগন্ধেন চূভযং;

ফলীনং ফলগন্ধেন, গন্ধিতো হোতি অস্সমো.

২০৪. ‘‘রত্তিন্দিৰং ন জানামি, অরতি মে ন ৰিজ্জতি;

সকে সিস্সে ওৰদন্তো, ভিয্যো হাসং লভামহং.

২০৫. ‘‘পুপ্ফানং পুপ্ফমানানং, ফলানঞ্চ ৰিপচ্চতং;

দিব্বগন্ধা পৰাযন্তি, সোভযন্তা মমস্সমং.

২০৬. ‘‘সমাধিম্হা ৰুট্ঠহিত্ৰা, আতাপী নিপকো অহং;

খারিভারং গহেত্ৰান, ৰনং অজ্ঝোগহিং অহং.

২০৭. ‘‘উপ্পাতে সুপিনে চাপি, লক্খণেসু সুসিক্খিতো;

পৰত্তমানং [ৰত্তমানং (ক.)] মন্তপদং, ধারযামি অহং তদা.

২০৮. ‘‘অনোমদস্সী ভগৰা, লোকজেট্ঠো নরাসভো;

ৰিৰেককামো সম্বুদ্ধো, হিমৰন্তমুপাগমি.

২০৯. ‘‘অজ্ঝোগাহেত্ৰা হিমৰন্তং, অগ্গো কারুণিকো মুনি;

পল্লঙ্কং আভুজিত্ৰান, নিসীদি পুরিসুত্তমো.

২১০. ‘‘তমদ্দসাহং সম্বুদ্ধং, সপ্পভাসং মনোরমং;

ইন্দীৰরংৰ জলিতং, আদিত্তংৰ হুতাসনং.

২১১. ‘‘জলন্তং দীপরুক্খংৰ, ৰিজ্জুতং গগণে যথা;

সুফুল্লং সালরাজংৰ, অদ্দসং লোকনাযকং.

২১২. ‘‘অযং নাগো মহাৰীরো, দুক্খস্সন্তকরো মুনি;

ইমং দস্সনমাগম্ম, সব্বদুক্খা পমুচ্চরে.

২১৩. ‘‘দিস্ৰানাহং দেৰদেৰং, লক্খণং উপধারযিং;

বুদ্ধো নু খো ন ৰা বুদ্ধো, হন্দ পস্সামি চক্খুমং.

২১৪. ‘‘সহস্সারানি চক্কানি, দিস্সন্তি চরণুত্তমে;

লক্খণানিস্স দিস্ৰান, নিট্ঠং গচ্ছিং তথাগতে.