২. পচ্চেকবুদ্ধঅপদানং

অথ পচ্চেকবুদ্ধাপদানং সুণাথ –

৮৩. ‘‘তথাগতং জেতৰনে ৰসন্তং, অপুচ্ছি ৰেদেহমুনী নতঙ্গো;

‘পচ্চেকবুদ্ধা কির নাম হোন্তি, ভৰন্তি তে হেতুভি কেহি ৰীর’ [ধীর (সী.) ধীরা (স্যা.)].

৮৪. ‘‘তদাহ সব্বঞ্ঞুৰরো মহেসী, আনন্দভদ্দং মধুরস্সরেন;

‘যে পুব্ববুদ্ধেসু [সব্ববুদ্ধেসু (স্যা. ক.)] কতাধিকারা, অলদ্ধমোক্খা জিনসাসনেসু.

৮৫. ‘‘‘তেনেৰ সংৰেগমুখেন ধীরা, ৰিনাপি বুদ্ধেহি সুতিক্খপঞ্ঞা;

আরম্মণেনাপি পরিত্তকেন, পচ্চেকবোধিং অনুপাপুণন্তি.

৮৬. ‘‘‘সব্বম্হি লোকম্হি মমং ঠপেত্ৰা, পচ্চেকবুদ্ধেহি সমোৰ নত্থি;

তেসং ইমং ৰণ্ণপদেসমত্তং, ৰক্খামহং সাধু মহামুনীনং.

৮৭. ‘‘‘সযমেৰ বুদ্ধানং মহাইসীনং, সাধূনি ৰাক্যানি মধূৰ [মধুংৰ (সী.)] খুদ্দং;

অনুত্তরং ভেসজং পত্থযন্তা, সুণাথ সব্বেসু পসন্নচিত্তা.

৮৮. ‘‘‘পচ্চেকবুদ্ধানং সমাগতানং, পরম্পরং ব্যাকরণানি যানি;

আদীনৰো যঞ্চ ৰিরাগৰত্থুং, যথা চ বোধিং অনুপাপুণিংসু.

৮৯. ‘‘‘সরাগৰত্থূসু ৰিরাগসঞ্ঞী, রত্তম্হি লোকম্হি ৰিরত্তচিত্তা;

হিত্ৰা পপঞ্চে জিতফন্দিতানি [ৰিদিয ফন্দিতানি (সী.) জিতবন্ধিতানি (ক.)], তথেৰ বোধিং অনুপাপুণিংসু.

৯০. ‘‘‘সব্বেসু ভূতেসু নিধায দণ্ডং, অৰিহেঠযং অঞ্ঞতরম্পি তেসং;

মেত্তেন চিত্তেন হিতানুকম্পী, একো চরে খগ্গৰিসাণকপ্পো.

৯১. ‘‘‘সব্বেসু ভূতেসু নিধায দণ্ডং, অৰিহেঠযং অঞ্ঞতরম্পি তেসং;

ন পুত্তমিচ্ছেয্য কুতো সহাযং, একো চরে খগ্গৰিসাণকপ্পো.

৯২. ‘‘‘সংসগ্গজাতস্স ভৰন্তি স্নেহা, স্নেহন্ৰযং দুক্খমিদং পহোতি;

আদীনৰং স্নেহজং পেক্খমানো, একো চরে খগ্গৰিসাণকপ্পো.

৯৩. ‘‘‘মিত্তে সুহজ্জে অনুকম্পমানো, হাপেতি অত্থং পটিবদ্ধচিত্তো;

এতং ভযং সন্থৰে পেক্খমানো, একো চরে খগ্গৰিসাণকপ্পো.

৯৪. ‘‘‘ৰংসো ৰিসালোৰ যথা ৰিসত্তো, পুত্তেসু দারেসু চ যা অপেক্খা;

ৰংসে কল়ীরোৰ অসজ্জমানো, একো চরে খগ্গৰিসাণকপ্পো.

৯৫. ‘‘‘মিগো অরঞ্ঞম্হি যথা অবদ্ধো, যেনিচ্ছকং গচ্ছতি গোচরায;

ৰিঞ্ঞূ নরো সেরিতং পেক্খমানো, একো চরে খগ্গৰিসাণকপ্পো.

৯৬. ‘‘‘আমন্তনা হোতি সহাযমজ্ঝে, ৰাসে চ [ৰাসে (সী. স্যা.) সুত্তনিপাতেপি ‘‘চ‘‘কারো নত্থি] ঠানে গমনে চারিকায;

অনভিজ্ঝিতং সেরিতং পেক্খমানো, একো চরে খগ্গৰিসাণকপ্পো.

৯৭. ‘‘‘খিড্ডা রতী হোতি সহাযমজ্ঝে, পুত্তেসু পেমং ৰিপুলঞ্চ হোতি;

পিযৰিপ্পযোগং ৰিজিগুচ্ছমানো, একো চরে খগ্গৰিসাণকপ্পো.

৯৮. ‘‘‘চাতুদ্দিসো অপ্পটিঘো চ হোতি, সন্তুস্সমানো ইতরীতরেন;

পরিস্সযানং সহিতা অছম্ভী, একো চরে খগ্গৰিসাণকপ্পো.

৯৯. ‘‘‘দুস্সঙ্গহা পব্বজিতাপি একে, অথো গহট্ঠা ঘরমাৰসন্তা;

অপ্পোস্সুক্কো পরপুত্তেসু হুত্ৰা, একো চরে খগ্গৰিসাণকপ্পো.

১০০. ‘‘‘ওরোপযিত্ৰা গিহিব্যঞ্জনানি, সঞ্ছিন্নপত্তো যথা কোৰিল়ারো;

ছেত্ৰান ৰীরো গিহিবন্ধনানি, একো চরে খগ্গৰিসাণকপ্পো.

১০১. ‘‘‘সচে লভেথ নিপকং সহাযং, সদ্ধিং চরং সাধুৰিহারিধীরং;

অভিভুয্য সব্বানি পরিস্সযানি, চরেয্য তেনত্তমনো সতীমা.

১০২. ‘‘‘নো চে লভেথ নিপকং সহাযং, সদ্ধিং চরং সাধুৰিহারিধীরং;

রাজাৰ রট্ঠং ৰিজিতং পহায, একো চরে মাতঙ্গরঞ্ঞেৰ নাগো.

১০৩. ‘‘‘অদ্ধা পসংসাম সহাযসম্পদং, সেট্ঠা সমা সেৰিতব্বা সহাযা;

এতে অলদ্ধা অনৰজ্জভোজী, একো চরে খগ্গৰিসাণকপ্পো.

১০৪. ‘‘‘দিস্ৰা সুৰণ্ণস্স পভস্সরানি, কম্মারপুত্তেন সুনিট্ঠিতানি;

সঙ্ঘট্টমানানি দুৰে ভুজস্মিং, একো চরে খগ্গৰিসাণকপ্পো.

১০৫. ‘‘‘এৰং দুতীযেন সহা মমস্স, ৰাচাভিলাপো অভিসজ্জনা ৰা;

এতং ভযং আযতিং পেক্খমানো, একো চরে খগ্গৰিসাণকপ্পো.

১০৬. ‘‘‘কামা হি চিত্রা মধুরা মনোরমা, ৰিরূপরূপেন মথেন্তি চিত্তং;

আদীনৰং কামগুণেসু দিস্ৰা, একো চরে খগ্গৰিসাণকপ্পো.

১০৭. ‘‘‘ঈতী চ গণ্ডো চ উপদ্দৰো চ, রোগো চ সল্লঞ্চ ভযঞ্চ মেতং;

এতং ভযং কামগুণেসু দিস্ৰা, একো চরে খগ্গৰিসাণকপ্পো.

১০৮. ‘‘‘সীতঞ্চ উণ্হঞ্চ খুদং পিপাসং, ৰাতাতপে ডংসসরীসপে [ডংসসিরিংসপে (সী. স্যা.)] চ;

সব্বানিপেতানি অভিব্ভৰিত্ৰা [অভিসংভৰিত্ৰা (সুত্তনিপাতে)], একো চরে খগ্গৰিসাণকপ্পো.

১০৯. ‘‘‘নাগোৰ যূথানি ৰিৰজ্জযিত্ৰা, সঞ্জাতখন্ধো পদুমী উল়ারো;

যথাভিরন্তং ৰিহরং অরঞ্ঞে, একো চরে খগ্গৰিসাণকপ্পো.

১১০. ‘‘‘অট্ঠানতং সঙ্গণিকারতস্স, যং ফস্সযে [ফুস্সযে (স্যা.)] সামযিকং ৰিমুত্তিং;

আদিচ্চবন্ধুস্স ৰচো নিসম্ম, একো চরে খগ্গৰিসাণকপ্পো.

১১১. ‘‘‘দিট্ঠীৰিসূকানি উপাতিৰত্তো, পত্তো নিযামং পটিলদ্ধমগ্গো;

উপ্পন্নঞাণোম্হি অনঞ্ঞনেয্যো, একো চরে খগ্গৰিসাণকপ্পো.

১১২. ‘‘‘নিল্লোলুপো নিক্কুহো নিপ্পিপাসো, নিম্মক্খ [নিম্মক্খো (স্যা.)] নিদ্ধন্তকসাৰমোহো;

নিরাসযো [নিরাসাসো (ক.)] সব্বলোকে ভৰিত্ৰা, একো চরে খগ্গৰিসাণকপ্পো.

১১৩. ‘‘‘পাপং সহাযং পরিৰজ্জযেথ, অনত্থদস্সিং ৰিসমে নিৰিট্ঠং;

সযং ন সেৰে পসুতং পমত্তং, একো চরে খগ্গৰিসাণকপ্পো.

১১৪. ‘‘‘বহুস্সুতং ধম্মধরং ভজেথ, মিত্তং উল়ারং পটিভানৰন্তং;

অঞ্ঞায অত্থানি ৰিনেয্য কঙ্খং, একো চরে খগ্গৰিসাণকপ্পো.

১১৫. ‘‘‘খিড্ডং রতিং কামসুখঞ্চ লোকে, অনলঙ্করিত্ৰা অনপেক্খমানো;

ৰিভূসট্ঠানা ৰিরতো সচ্চৰাদী, একো চরে খগ্গৰিসাণকপ্পো.

১১৬. ‘‘‘পুত্তঞ্চ দারং পিতরঞ্চ মাতরং, ধনানি ধঞ্ঞানি চ বন্ধৰানি;

হিত্ৰান কামানি যথোধিকানি, একো চরে খগ্গৰিসাণকপ্পো.

১১৭. ‘‘‘সঙ্গো এসো পরিত্তমেত্থ সোখ্যং, অপ্পস্সাদো দুক্খমেৰেত্থ ভিয্যো;

গল়ো [গাহো (সী.) কণ্ডো (স্যা.) গাল়্হো (ক.)] এসো ইতি ঞত্ৰা মতিমা, একো চরে খগ্গৰিসাণকপ্পো.

১১৮. ‘‘‘সন্দালযিত্ৰান সংযোজনানি, জালংৰ ভেত্ৰা সলিলম্বুচারী;

অগ্গীৰ দড্ঢং অনিৰত্তমানো, একো চরে খগ্গৰিসাণকপ্পো.

১১৯. ‘‘‘ওক্খিত্তচক্খূ ন চ পাদলোলো, গুত্তিন্দ্রিযো রক্খিতমানসানো;

অনৰস্সুতো অপরিডয্হমানো, একো চরে খগ্গৰিসাণকপ্পো.

১২০. ‘‘‘ওহারযিত্ৰা গিহিব্যঞ্জনানি, সঞ্ছন্নপত্তো যথা পারিছত্তো;

কাসাযৰত্থো অভিনিক্খমিত্ৰা, একো চরে খগ্গৰিসাণকপ্পো.

১২১. ‘‘‘রসেসু গেধং অকরং অলোলো, অনঞ্ঞপোসী সপদানচারী;

কুলে কুলে অপ্পটিবদ্ধচিত্তো, একো চরে খগ্গৰিসাণকপ্পো.

১২২. ‘‘‘পহায পঞ্চাৰরণানি চেতসো, উপক্কিলেসে ব্যপনুজ্জ সব্বে;

অনিস্সিতো ছেজ্জ সিনেহদোসং, একো চরে খগ্গৰিসাণকপ্পো.

১২৩. ‘‘‘ৰিপিট্ঠিকত্ৰান সুখঞ্চ দুক্খং, পুব্বেৰ সোমনস্সদোমনস্সং;

লদ্ধানুপেক্খং সমথং ৰিসুদ্ধং, একো চরে খগ্গৰিসাণকপ্পো.

১২৪. ‘‘‘আরদ্ধৰীরিযো পরমত্থপত্তিযা, অলীনচিত্তো অকুসীতৰুত্তি;

দল়্হনিক্কমো থামবলূপপন্নো, একো চরে খগ্গৰিসাণকপ্পো.

১২৫. ‘‘‘পটিসল্লানং ঝানমরিঞ্চমানো, ধম্মেসু নিচ্চং অনুধম্মচারী;

আদীনৰং সম্মসিতা ভৰেসু, একো চরে খগ্গৰিসাণকপ্পো.

১২৬. ‘‘‘তণ্হক্খযং পত্থযমপ্পমত্তো, অনেল়মূগো সুতৰা সতীমা;

সঙ্খাতধম্মো নিযতো পধানৰা, একো চরে খগ্গৰিসাণকপ্পো.

১২৭. ‘‘‘সীহোৰ সদ্দেসু অসন্তসন্তো, ৰাতোৰ জালম্হি অসজ্জমানো;

পদুমংৰ তোযেন অলিম্পমানো, একো চরে খগ্গৰিসাণকপ্পো.

১২৮. ‘‘‘সীহো যথা দাঠবলী পসয্হ, রাজা মিগানং অভিভুয্য চারী;

সেৰেথ পন্তানি সেনাসনানি, একো চরে খগ্গৰিসাণকপ্পো.

১২৯. ‘‘‘মেত্তং উপেক্খং করুণং ৰিমুত্তিং, আসেৰমানো মুদিতঞ্চ কালে;

সব্বেন লোকেন অৰিরুজ্ঝমানো, একো চরে খগ্গৰিসাণকপ্পো.

১৩০. ‘‘‘রাগঞ্চ দোসঞ্চ পহায মোহং, সন্দালযিত্ৰান সংযোজনানি;

অসন্তসং জীৰিতসঙ্খযম্হি, একো চরে খগ্গৰিসাণকপ্পো.

১৩১. ‘‘‘ভজন্তি সেৰন্তি চ কারণত্থা, নিক্কারণা দুল্লভা অজ্জ মিত্তা;

অত্তত্থপঞ্ঞা অসুচীমনুস্সা, একো চরে খগ্গৰিসাণকপ্পো.

১৩২. ‘‘‘ৰিসুদ্ধসীলা সুৰিসুদ্ধপঞ্ঞা, সমাহিতা জাগরিযানুযুত্তা;

ৰিপস্সকা ধম্মৰিসেসদস্সী, মগ্গঙ্গবোজ্ঝঙ্গগতে ৰিজঞ্ঞা.

১৩৩. ‘‘‘সুঞ্ঞপ্পণিধিঞ্চ তথানিমিত্তং [সুঞ্ঞতপ্পণীহিতঞ্চানিমিত্তং (সী.)], আসেৰযিত্ৰা জিনসাসনম্হি;

যে সাৰকত্তং ন ৰজন্তি ধীরা, ভৰন্তি পচ্চেকজিনা সযম্ভূ.

১৩৪. ‘‘‘মহন্তধম্মা বহুধম্মকাযা, চিত্তিস্সরা সব্বদুক্খোঘতিণ্ণা;

উদগ্গচিত্তা পরমত্থদস্সী, সীহোপমা খগ্গৰিসাণকপ্পা.

১৩৫. ‘‘‘সন্তিন্দ্রিযা সন্তমনা সমাধী, পচ্চন্তসত্তেসু পতিপ্পচারা [পচ্চত্তগম্ভীরমতপ্পচারা (সী.)];

দীপা পরত্থ ইধ ৰিজ্জলন্তা, পচ্চেকবুদ্ধা সততং হিতামে.

১৩৬. ‘‘‘পহীনসব্বাৰরণা জনিন্দা, লোকপ্পদীপা ঘনকঞ্চনাভা;

নিস্সংসযং লোকসুদক্খিণেয্যা, পচ্চেকবুদ্ধা সততপ্পিতামে.

১৩৭. ‘‘‘পচ্চেকবুদ্ধানং সুভাসিতানি, চরন্তি লোকম্হি সদেৰকম্হি;

সুত্ৰা তথা যে ন করোন্তি বালা, চরন্তি দুক্খেসু পুনপ্পুনং তে.

১৩৮. ‘‘‘পচ্চেকবুদ্ধানং সুভাসিতানি, মধুং যথা খুদ্দমৰস্সৰন্তং;

সুত্ৰা তথা যে পটিপত্তিযুত্তা, ভৰন্তি তে সচ্চদসা সপঞ্ঞা’.

১৩৯. ‘‘পচ্চেকবুদ্ধেহি জিনেহি ভাসিতা, কথা [গাথা (সী. স্যা.)] উল়ারা অভিনিক্খমিত্ৰা;

তা সক্যসীহেন নরুত্তমেন, পকাসিতা ধম্মৰিজাননত্থং.

১৪০. ‘‘লোকানুকম্পায ইমানি তেসং, পচ্চেকবুদ্ধান ৰিকুব্বিতানি;

সংৰেগসঙ্গমতিৰড্ঢনত্থং, সযম্ভুসীহেন পকাসিতানী’’তি.

পচ্চেকবুদ্ধাপদানং সমত্তং.