৩-১০. আনন্দত্থেরঅপদানং

৬৪৪. ‘‘আরামদ্ৰারা নিক্খম্ম, পদুমুত্তরো মহামুনি;

ৰস্সেন্তো অমতং ৰুট্ঠিং, নিব্বাপেসি মহাজনং.

৬৪৫. ‘‘সতসহস্সং তে ধীরা, ছল়ভিঞ্ঞা মহিদ্ধিকা;

পরিৰারেন্তি সম্বুদ্ধং, ছাযাৰ অনপাযিনী [অনুপাযিনী (স্যা. ক.)].

৬৪৬. ‘‘হত্থিক্খন্ধগতো আসিং, সেতচ্ছত্তং ৰরুত্তমং;

সুচারুরূপং দিস্ৰান, ৰিত্তি মে উদপজ্জথ.

৬৪৭. ‘‘ওরুয্হ হত্থিখন্ধম্হা, উপগচ্ছিং নরাসভং;

রতনামযছত্তং মে, বুদ্ধসেট্ঠস্স ধারযিং.

৬৪৮. ‘‘মম সঙ্কপ্পমঞ্ঞায, পদুমুত্তরো মহাইসি;

তং কথং ঠপযিত্ৰান, ইমা গাথা অভাসথ.

৬৪৯. ‘‘‘যো সো ছত্তমধারেসি, সোণ্ণালঙ্কারভূসিতং;

তমহং কিত্তযিস্সামি, সুণোথ মম ভাসতো.

৬৫০. ‘‘‘ইতো গন্ত্ৰা অযং পোসো, তুসিতং আৰসিস্সতি;

অনুভোস্সতি সম্পত্তিং, অচ্ছরাহি পুরক্খতো.

৬৫১. ‘‘‘চতুত্তিংসতিক্খত্তুঞ্চ, দেৰরজ্জং করিস্সতি;

বলাধিপো অট্ঠসতং, ৰসুধং আৰসিস্সতি.

৬৫২. ‘‘‘অট্ঠপঞ্ঞাসক্খত্তুঞ্চ, চক্কৰত্তী ভৰিস্সতি;

পদেসরজ্জং ৰিপুলং, মহিযা কারযিস্সতি.

৬৫৩. ‘‘‘কপ্পসতসহস্সম্হি, ওক্কাককুলসম্ভৰো;

গোতমো নাম গোত্তেন, সত্থা লোকে ভৰিস্সতি.

৬৫৪. ‘‘‘সক্যানং কুলকেতুস্স, ঞাতিবন্ধু ভৰিস্সতি;

আনন্দো নাম নামেন, উপট্ঠাকো মহেসিনো.

৬৫৫. ‘‘‘আতাপী নিপকো চাপি, বাহুসচ্চে সুকোৰিদো;

নিৰাতৰুত্তি অত্থদ্ধো, সব্বপাঠী ভৰিস্সতি.

৬৫৬. ‘‘‘পধানপহিতত্তো সো, উপসন্তো নিরূপধি;

সব্বাসৰে পরিঞ্ঞায, নিব্বাযিস্সতিনাসৰো.

৬৫৭. ‘‘‘সন্তি আরঞ্ঞকা নাগা, কুঞ্জরা সট্ঠিহাযনা;

তিধাপভিন্না মাতঙ্গা, ঈসাদন্তা উরূল়্হৰা.

৬৫৮. ‘‘‘অনেকসতসহস্সা, পণ্ডিতাপি মহিদ্ধিকা;

সব্বে তে বুদ্ধনাগস্স, ন হোন্তু পণিধিম্হি তে’ [ন হোন্তি পরিৰিম্ভিতা (স্যা.), ন হোন্তি পণিধিম্হি তে (ক.)].

৬৫৯. ‘‘আদিযামে নমস্সামি, মজ্ঝিমে অথ পচ্ছিমে;

পসন্নচিত্তো সুমনো, বুদ্ধসেট্ঠং উপট্ঠহিং.

৬৬০. ‘‘আতাপী নিপকো চাপি, সম্পজানো পতিস্সতো;

সোতাপত্তিফলং পত্তো, সেখভূমীসু কোৰিদো.

৬৬১. ‘‘সতসহস্সিতো কপ্পে, যং কম্মমভিনীহরিং;

তাহং ভূমিমনুপ্পত্তো, ঠিতা সদ্ধম্মমাচলা [ঠিতো সদ্ধম্মমাচলো (সী.), ঠিতা সদ্ধা মহপ্ফলা (স্যা.)].

৬৬২. ‘‘স্ৰাগতং ৰত মে আসি, বুদ্ধসেট্ঠস্স সন্তিকে;

তিস্সো ৰিজ্জা অনুপ্পত্তা, কতং বুদ্ধস্স সাসনং.

৬৬৩. ‘‘পটিসম্ভিদা চতস্সো, ৰিমোক্খাপি চ অট্ঠিমে;

ছল়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা আনন্দো থেরো ইমা গাথাযো অভাসিত্থাতি.

আনন্দত্থেরস্সাপদানং দসমং.

তস্সুদ্দানং –

বুদ্ধো পচ্চেকবুদ্ধো চ, সারিপুত্তো চ কোলিতো;

কস্সপো অনুরুদ্ধো চ, পুণ্ণত্থেরো উপালি চ.

অঞ্ঞাসিকোণ্ডঞ্ঞো পিণ্ডোলো, রেৰতানন্দপণ্ডিতো;

ছসতানি চ পঞ্ঞাস, গাথাযো সব্বপিণ্ডিতা.

অপদানে বুদ্ধৰগ্গো পঠমো.