৩-৯. খদিরৰনিযরেৰতত্থেরঅপদানং

৬২৮. ‘‘গঙ্গা ভাগীরথী নাম, হিমৰন্তা পভাৰিতা;

কুতিত্থে নাৰিকো আসিং, ওরিমে চ তরিং [ওরিমং চ তরে (স্যা.)] অহং.

৬২৯. ‘‘পদুমুত্তরো নাযকো, সম্বুদ্ধো দ্ৰিপদুত্তমো;

ৰসী সতসহস্সেহি, গঙ্গাতীরমুপাগতো [পুব্বে ময্হং সুতং আসি,§‘‘পদুমুত্তরনাযকো; ৰসীসতসহস্সেহি, গঙ্গাসোতং তরিস্সতি‘‘; (সী.)].

৬৩০. ‘‘বহূ নাৰা সমানেত্ৰা, ৰড্ঢকীহি [চম্মকেহি (ক.)] সুসঙ্খতং;

নাৰায [নাৰানং (ক.)] ছদনং কত্ৰা, পটিমানিং নরাসভং.

৬৩১. ‘‘আগন্ত্ৰান চ সম্বুদ্ধো, আরূহি তঞ্চ নাৰকং;

ৰারিমজ্ঝে ঠিতো সত্থা, ইমা গাথা অভাসথ.

৬৩২. ‘‘‘যো সো তারেসি সম্বুদ্ধং, সঙ্ঘঞ্চাপি অনাসৰং;

তেন চিত্তপ্পসাদেন, দেৰলোকে রমিস্সতি.

৬৩৩. ‘‘‘নিব্বত্তিস্সতি তে ব্যম্হং, সুকতং নাৰসণ্ঠিতং;

আকাসে পুপ্ফছদনং, ধারযিস্সতি সব্বদা.

৬৩৪. ‘‘‘অট্ঠপঞ্ঞাসকপ্পম্হি, তারকো [তারণো (স্যা.)] নাম খত্তিযো;

চাতুরন্তো ৰিজিতাৰী, চক্কৰত্তী ভৰিস্সতি.

৬৩৫. ‘‘‘সত্তপঞ্ঞাসকপ্পম্হি, চম্মকো [চম্পকো (সী.), চম্বকো (স্যা.)] নাম খত্তিযো;

উগ্গচ্ছন্তোৰ সূরিযো, জোতিস্সতি মহব্বলো.

৬৩৬. ‘‘‘কপ্পসতসহস্সম্হি, ওক্কাককুলসম্ভৰো;

গোতমো নাম গোত্তেন, সত্থা লোকে ভৰিস্সতি.

৬৩৭. ‘‘‘তিদসা সো চৰিত্ৰান, মনুস্সত্তং গমিস্সতি;

রেৰতো নাম নামেন, ব্রহ্মবন্ধু ভৰিস্সতি.

৬৩৮. ‘‘‘অগারা নিক্খমিত্ৰান, সুক্কমূলেন চোদিতো;

গোতমস্স ভগৰতো, সাসনে পব্বজিস্সতি.

৬৩৯. ‘‘‘সো পচ্ছা পব্বজিত্ৰান, যুত্তযোগো ৰিপস্সকো;

সব্বাসৰে পরিঞ্ঞায, নিব্বাযিস্সতিনাসৰো’.

৬৪০. ‘‘ৰীরিযং [ৰিরিযং (সী. স্যা.)] মে ধুরধোরয্হং, যোগক্খেমাধিৰাহনং;

ধারেমি অন্তিমং দেহং, সম্মাসম্বুদ্ধসাসনে.

৬৪১. ‘‘সতসহস্সে কতং কম্মং, ফলং দস্সেসি মে ইধ;

সুমুত্তো সরৰেগোৰ, কিলেসে ঝাপযী মম.

৬৪২. ‘‘ততো মং ৰননিরতং, দিস্ৰা লোকন্তগূ মুনি;

ৰনৰাসিভিক্খূনগ্গং, পঞ্ঞপেসি মহামতি.

৬৪৩. ‘‘পটিসম্ভিদা চতস্সো, ৰিমোক্খাপি চ অট্ঠিমে;

ছল়ভিঞ্ঞা সচ্ছিকতা, কতং বুদ্ধস্স সাসনং’’.

ইত্থং সুদং আযস্মা খদিরৰনিযো রেৰতো থেরো ইমা গাথাযো অভাসিত্থাতি.

খদিরৰনিযরেৰতত্থেরস্সাপদানং নৰমং.