২. উদোসিতসিক্খাপদৰণ্ণনা

৪৭১. তেন সমযেন বুদ্ধো ভগৰাতি উদোসিতসিক্খাপদং. তত্থ সন্তরুত্তরেনাতি অন্তরন্তি অন্তরৰাসকো ৰুচ্চতি, উত্তরন্তি উত্তরাসঙ্গো, সহ অন্তরেন উত্তরং সন্তরুত্তরং, তেন সন্তরুত্তরেন, সহ অন্তরৰাসকেন উত্তরাসঙ্গেনাতি অত্থো. কণ্ণকিতানীতি সেদেন ফুট্ঠোকাসেসু সঞ্জাতকাল়সেতমণ্ডলানি. অদ্দস খো আযস্মা আনন্দো সেনাসনচারিকং আহিণ্ডন্তোতি থেরো কির ভগৰতি দিৰা পটিসল্লানত্থায গন্ধকুটিং পৰিট্ঠে তং ওকাসং লভিত্ৰা দুন্নিক্খিত্তানি দারুভণ্ডমত্তিকাভণ্ডানি পটিসামেন্তো অসম্মট্ঠট্ঠানং সম্মজ্জন্তো গিলানেহি ভিক্খূহি সদ্ধিং পটিসন্থারং করোন্তো তেসং ভিক্খূনং সেনাসনট্ঠানং সম্পত্তো অদ্দস. তেন ৰুত্তং – ‘‘অদ্দস খো আযস্মা আনন্দো সেনাসনচারিকং আহিণ্ডন্তো’’তি.

৪৭৩. অৰিপ্পৰাসসম্মুতিং দাতুন্তি অৰিপ্পৰাসে সম্মুতি অৰিপ্পৰাসসম্মুতি, অৰিপ্পৰাসায ৰা সম্মুতি অৰিপ্পৰাসসম্মুতি. কো পনেত্থ আনিসংসো? যেন চীৰরেন ৰিপ্পৰসতি, তং নিস্সগ্গিযং ন হোতি, আপত্তিঞ্চ নাপজ্জতি. কিত্তকং কালং? মহাসুমত্থেরো তাৰ আহ – ‘‘যাৰ রোগো ন ৰূপসমতি, ৰূপসন্তে পন রোগে সীঘং চীৰরট্ঠানং আগন্তব্ব’’ন্তি. মহাপদুমত্থেরো আহ – ‘‘সীঘং আগচ্ছতো রোগো পটিকুপ্পেয্য, তস্মা সণিকং আগন্তব্বং. যতো পট্ঠায হি সত্থং ৰা পরিযেসতি, ‘গচ্ছামী’তি আভোগং ৰা করোতি, ততো পট্ঠায ৰট্টতি. ‘ন দানি গমিস্সামী’তি এৰং পন ধুরনিক্খেপং করোন্তেন পচ্চুদ্ধরিতব্বং, অতিরেকচীৰরট্ঠানে ঠস্সতী’’তি. সচে পনস্স রোগো পটিকুপ্পতি, কিং কাতব্বন্তি? ফুস্সদেৰত্থেরো তাৰ আহ – ‘‘সচে সোযেৰ রোগো পটিকুপ্পতি, সা এৰ সম্মুতি, পুন সম্মুতিদানকিচ্চং নত্থি. অথঞ্ঞো কুপ্পতি, পুন দাতব্বা সম্মুতী’’তি. উপতিস্সত্থেরো আহ – ‘‘সো ৰা রোগো হোতু, অঞ্ঞো ৰা পুন সম্মুতিদানকিচ্চং নত্থী’’তি.

৪৭৫-৬. নিট্ঠিতচীৰরস্মিং ভিক্খুনাতি ইধ পন পুরিমসিক্খাপদে ৰিয অত্থং অগ্গহেত্ৰা নিট্ঠিতে চীৰরস্মিং ভিক্খুনোতি এৰং সামিৰসেন করণৰচনস্স অত্থো ৰেদিতব্বো. করণৰসেন হি ভিক্খুনা ইদং নাম কাতব্বন্তি নত্থি. সামিৰসেন পন ভিক্খুনো চীৰরস্মিং নিট্ঠিতে কথিনে চ উব্ভতে এৰং ছিন্নপলিবোধো একরত্তম্পি চে ভিক্খু তিচীৰরেন ৰিপ্পৰসেয্যাতি এৰং অত্থো যুজ্জতি. তত্থ তিচীৰরেনাতি অধিট্ঠিতেসু তীসু চীৰরেসু যেন কেনচি. একেন ৰিপ্পৰুত্থোপি হি তিচীৰরেন ৰিপ্পৰুত্থো হোতি, পটিসিদ্ধপরিযাপন্নেন ৰিপ্পৰুত্থত্তা. তেনেৰস্স পদভাজনে ‘‘সঙ্ঘাটিযা ৰা’’তিআদি ৰুত্তং. ৰিপ্পৰসেয্যাতি ৰিপ্পযুত্তো ৰসেয্য.

৪৭৭-৮. গামো একূপচারোতিআদি অৰিপ্পৰাসলক্খণৰৰত্থাপনত্থং ৰুত্তং. ততো পরং যথাক্কমেন তানেৰ পন্নরস মাতিকাপদানি ৰিত্থারেন্তো ‘‘গামো একূপচারো নামা’’তিআদিমাহ. তত্থ এককুলস্স গামোতি একস্স রঞ্ঞো ৰা ভোজকস্স ৰা গামো. পরিক্খিত্তোতি যেন কেনচি পাকারেন ৰা ৰতিযা ৰা পরিক্খায ৰা পরিক্খিত্তো. এত্তাৰতা এককুলগামস্স একূপচারতা দস্সিতা. অন্তোগামে ৰত্থব্বন্তি এৰরূপে গামে চীৰরং নিক্খিপিত্ৰা গামব্ভন্তরে যথারুচিতে ঠানে অরুণং উট্ঠাপেতুং ৰট্টতি. অপরিক্খিত্তোতি ইমিনা তস্সেৰ গামস্স নানূপচারতা দস্সিতা. এৰরূপে গামে যস্মিং ঘরে চীৰরং নিক্খিত্তং, তত্থ ৰত্থব্বং. হত্থপাসা ৰা ন ৰিজহিতব্বন্তি অথ ৰা তং ঘরং সমন্ততো হত্থপাসা ন ৰিজহিতব্বং, অড্ঢতেয্যরতনপ্পমাণপ্পদেসা উদ্ধং ন ৰিজহিতব্বন্তি ৰুত্তং হোতি. অড্ঢতেয্যরতনব্ভন্তরে পন ৰত্থুং ৰট্টতি. তং পমাণং অতিক্কমিত্ৰা সচেপি ইদ্ধিমা ভিক্খূ আকাসে অরুণং উট্ঠাপেতি, নিস্সগ্গিযমেৰ হোতি. এত্থ চ যস্মিং ঘরেতি ঘরপরিচ্ছেদো ‘‘এককুলস্স নিৰেসনং হোতী’’তিআদিনা (পারা. ৪৮০) লক্খণেন ৰেদিতব্বো.

৪৭৯. নানাকুলস্স গামোতি নানারাজূনং ৰা ভোজকানং ৰা গামো, ৰেসালিকুসিনারাদিসদিসো. পরিক্খিত্তোতি ইমিনা নানাকুলগামস্স একূপচারতা দস্সিতা. সভাযে ৰা দ্ৰারমূলে ৰাতি এত্থ সভাযন্তি লিঙ্গব্যত্তযেন সভা ৰুত্তা. দ্ৰারমূলেতি নগরদ্ৰারস্স সমীপে. ইদং ৰুত্তং হোতি – এৰরূপে গামে যস্মিং ঘরে চীৰরং নিক্খিত্তং, তত্থ ৰা ৰত্থব্বং. তত্থ সদ্দসঙ্ঘট্টনেন ৰা জনসম্বাধেন ৰা ৰসিতুং অসক্কোন্তেন সভাযে ৰা ৰত্থব্বং নগরদ্ৰারমূলে ৰা. তত্রপি ৰসিতুং অসক্কোন্তেন যত্থ কত্থচি ফাসুকট্ঠানে ৰসিত্ৰা অন্তোঅরুণে আগম্ম তেসংযেৰ সভাযদ্ৰারমূলানং হত্থপাসা ৰা ন ৰিজহিতব্বং. ঘরস্স পন চীৰরস্স ৰা হত্থপাসে ৰত্তব্বমেৰ নত্থি.

সভাযং গচ্ছন্তেন হত্থপাসে চীৰরং নিক্খিপিত্ৰাতি সচে ঘরে অট্ঠপেত্ৰা সভাযে ঠপেস্সামীতি সভাযং গচ্ছতি, তেন সভাযং গচ্ছন্তেন হত্থপাসেতি হত্থং পসারেত্ৰা ‘‘হন্দিমং চীৰরং ঠপেমী’’তি এৰং নিক্খেপসুখে হত্থপাসগতে কিস্মিঞ্চি আপণে চীৰরং নিক্খিপিত্ৰা পুরিমনযেনেৰ সভাযে ৰা ৰত্থব্বং দ্ৰারমূলে ৰা, হত্থপাসা ৰা ন ৰিজহিতব্বং.

তত্রাযং ৰিনিচ্ছযো – ফুস্সদেৰত্থেরো তাৰ আহ – ‘‘চীৰরহত্থপাসে ৰসিতব্বং নত্থি, যত্থ কত্থচি ৰীথিহত্থপাসেপি সভাযহত্থপাসেপি দ্ৰারহত্থপাসেপি ৰসিতুং ৰট্টতী’’তি. উপতিস্সত্থেরো পনাহ – ‘‘নগরস্স বহূনিপি দ্ৰারানি হোন্তি বহূনিপি সভাযানি, তস্মা সব্বত্থ ন ৰট্টতি. যস্সা পন ৰীথিযা চীৰরং ঠপিতং যং তস্সা সম্মুখট্ঠানে সভাযঞ্চ দ্ৰারঞ্চ তস্স সভাযস্স চ দ্ৰারস্স চ হত্থপাসা ন ৰিজহিতব্বং. এৰঞ্হি সতি সক্কা চীৰরস্স পৰত্তি জানিতু’’ন্তি. সভাযং পন গচ্ছন্তেন যস্স আপণিকস্স হত্থে নিক্খিত্তং, সচে সো তং চীৰরং অতিহরিত্ৰা ঘরে নিক্খিপতি, ৰীথিহত্থপাসো ন রক্খতি, ঘরস্স হত্থপাসে ৰত্থব্বং. সচে মহন্তং ঘরং হোতি, দ্ৰে ৰীথিযো ফরিত্ৰা ঠিতং পুরতো ৰা পচ্ছতো ৰা হত্থপাসেযেৰ অরুণং উট্ঠাপেতব্বং. সভাযে নিক্খিপিত্ৰা পন সভাযে ৰা তস্স সম্মুখে নগরদ্ৰারমূলে ৰা তেসংযেৰ হত্থপাসে ৰা অরুণং উট্ঠাপেতব্বং.

অপরিক্খিত্তোতিইমিনা তস্সেৰ গামস্স নানূপচারতা দস্সিতা. এতেনেৰুপাযেন সব্বত্থ একূপচারতা চ নানূপচারতা চ ৰেদিতব্বা. পাল়িযং পন ‘‘গামো একূপচারো নামা’’তি এৰং আদিম্হি ‘‘অজ্ঝোকাসো একূপচারো নামা’’তি এৰং অন্তে চ একমেৰ মাতিকাপদং উদ্ধরিত্ৰা পদভাজনং ৰিত্থারিতং. তস্মা তস্সেৰ পদস্সানুসারেন সব্বত্থ পরিক্খেপাদিৰসেন একূপচারতা চ নানূপচারতা চ ৰেদিতব্বা.

৪৮০-১. নিৰেসনাদীসু ওৰরকাতি গব্ভানংযেৰেতং পরিযাযৰচনং. হত্থপাসা ৰাতি গব্ভস্স হত্থপাসা. দ্ৰারমূলে ৰাতি সব্বেসং সাধারণে ঘরদ্ৰারমূলে. হত্থপাসা ৰাতি গব্ভস্স ৰা ঘরদ্ৰারমূলস্স ৰা হত্থপাসা.

৪৮২-৭. উদোসিতোতি যানাদীনং ভণ্ডানং সালা. ইতো পট্ঠায চ নিৰেসনে ৰুত্তনযেনেৰ ৰিনিচ্ছযো ৰেদিতব্বো. অট্টোতি পটিরাজাদিপটিবাহনত্থং ইট্ঠকাহি কতো বহলভিত্তিকো চতুপঞ্চভূমিকো পতিস্সযৰিসেসো. মাল়োতি এককূটসঙ্গহিতো চতুরস্সপাসাদো. পাসাদোতি দীঘপাসাদো. হম্মিযন্তি মুণ্ডচ্ছদনপাসাদো.

৪৮৯. সত্তব্ভন্তরাতিএত্থ একং অব্ভন্তরং অট্ঠৰীসতিহত্থং হোতি. সচে সত্থো গচ্ছন্তো গামং ৰা নদিং ৰা পরিযাদিযিত্ৰা তিট্ঠতি অন্তোপৰিট্ঠেন সদ্ধিং একাবদ্ধো হুত্ৰা ওরঞ্চ পারঞ্চ ফরিত্ৰা ঠিতো হোতি, সত্থপরিহারোৰ লব্ভতি. অথ গামে ৰা নদিযা ৰা পরিযাপন্নো হোতি অন্তোপৰিট্ঠো, গামপরিহারো চেৰ নদীপরিহারো চ লব্ভতি. সচে ৰিহারসীমং অতিক্কমিত্ৰা তিট্ঠতি, অন্তোসীমায চ চীৰরং হোতি, ৰিহারং গন্ত্ৰা ৰসিতব্বং. সচে বহিসীমায চীৰরং হোতি সত্থসমীপেযেৰ ৰসিতব্বং. সচে গচ্ছন্তো সকটে ৰা ভগ্গে গোণে ৰা নট্ঠে অন্তরা ছিজ্জতি, যস্মিং কোট্ঠাসে চীৰরং তত্থ ৰসিতব্বং.

৪৯০. এককুলস্স খেত্তে হত্থপাসো নাম চীৰরহত্থপাসোযেৰ, নানাকুলস্স খেত্তে হত্থপাসো নাম খেত্তদ্ৰারস্স হত্থপাসো. অপরিক্খিত্তে চীৰরস্সেৰ হত্থপাসো.

৪৯১-৪. ধঞ্ঞকরণন্তি খলং ৰুচ্চতি. আরামোতি পুপ্ফারামো ৰা ফলারামো ৰা. দ্ৰীসুপি খেত্তে ৰুত্তসদিসোৰ ৰিনিচ্ছযো. ৰিহারো নিৰেসনসদিসো. রুক্খমূলে অন্তোছাযাযন্তি ছাযায ফুট্ঠোকাসস্স অন্তো এৰ. ৰিরল়সাখস্স পন রুক্খস্স আতপেন ফুট্ঠোকাসে ঠপিতং নিস্সগ্গিযমেৰ হোতি, তস্মা তাদিসস্স সাখাচ্ছাযায ৰা খন্ধচ্ছাযায ৰা ঠপেতব্বং. সচে সাখায ৰা ৰিটপে ৰা ঠপেতি, উপরি অঞ্ঞসাখাচ্ছাযায ফুট্ঠোকাসেযেৰ ঠপেতব্বং. খুজ্জরুক্খস্স ছাযা দূরং গচ্ছতি, ছাযায গতট্ঠানে ঠপেতুং ৰট্টতিযেৰ. ইধাপি হত্থপাসো চীৰরহত্থপাসোযেৰ.

অগামকে অরঞ্ঞেতি অগামকং নাম অরঞ্ঞং ৰিঞ্ঝাটৰীআদীসু ৰা সমুদ্দমজ্ঝে ৰা মচ্ছবন্ধানং অগমনপথে দীপকেসু লব্ভতি. সমন্তা সত্তব্ভন্তরাতি মজ্ঝে ঠিতস্স সমত্তা সব্বদিসাসু সত্তব্ভন্তরা, ৰিনিব্বেধেন চুদ্দস হোন্তি. মজ্ঝে নিসিন্নো পুরত্থিমায ৰা পচ্ছিমায ৰা দিসায পরিযন্তে ঠপিতচীৰরং রক্খতি. সচে পন অরুণুগ্গমনসমযে কেসগ্গমত্তম্পি পুরত্থিমং দিসং গচ্ছতি, পচ্ছিমায দিসায চীৰরং নিস্সগ্গিযং হোতি. এস নযো ইতরস্মিং. উপোসথকালে পন পরিসপরিযন্তে নিসিন্নভিক্খুতো পট্ঠায সত্তব্ভন্তরসীমা সোধেতব্বা. যত্তকং ভিক্খুসঙ্ঘো ৰড্ঢতি, সীমাপি তত্তকং ৰড্ঢতি.

৪৯৫. অনিস্সজ্জিত্ৰা পরিভুঞ্জতি আপত্তি দুক্কটস্সাতি এত্থ সচে পধানিকো ভিক্খু সব্বরত্তিং পধানমনুযুঞ্জিত্ৰা পচ্চুসসমযে ‘‘ন্হাযিস্সামী’’তি তীণিপি চীৰরানি তীরে ঠপেত্ৰা নদিং ওতরতি, ন্হাযন্তস্সেৰ চস্স অরুণং উট্ঠহতি, কিং কাতব্বং. সো হি যদি উত্তরিত্ৰা চীৰরং নিৰাসেতি, নিস্সগ্গিযচীৰরং অনিস্সজ্জিত্ৰা পরিভুঞ্জনপচ্চযা দুক্কটং আপজ্জতি. অথ নগ্গো গচ্ছতি, এৰম্পি দুক্কটং আপজ্জতীতি? ন আপজ্জতি. সো হি যাৰ অঞ্ঞং ভিক্খুং দিস্ৰা ৰিনযকম্মং ন করোতি, তাৰ তেসং চীৰরানং অপরিভোগারহত্তা নট্ঠচীৰরট্ঠানে ঠিতো হোতি. নট্ঠচীৰরস্স চ অকপ্পিযং নাম নত্থি. তস্মা একং নিৰাসেত্ৰা দ্ৰে হত্থেন গহেত্ৰা ৰিহারং গন্ত্ৰা ৰিনযকম্মং কাতব্বং. সচে দূরে ৰিহারো হোতি, অন্তরামগ্গে মনুস্সা সঞ্চরন্তি. একং নিৰাসেত্ৰা একং পারুপিত্ৰা একং অংসকূটে ঠপেত্ৰা গন্তব্বং. সচে ৰিহারে সভাগভিক্খূ ন পস্সতি, ভিক্খাচারং গতা হোন্তি, সঙ্ঘাটিং বহিগামে ঠপেত্ৰা সন্তরুত্তরেন আসনসালং গন্ত্ৰা ৰিনযকম্মং কাতব্বং. সচে বহিগামে চোরভযং হোতি, পারুপিত্ৰা গন্তব্বং. সচে আসনসালা সম্বাধা হোতি জনাকিণ্ণা, ন সক্কা একমন্তে চীৰরং অপনেত্ৰা ৰিনযকম্মং কাতুং, একং ভিক্খুং আদায বহিগামং গন্ত্ৰা ৰিনযকম্মং কত্ৰা চীৰরানি পরিভুঞ্জিতব্বানি.

সচে ভিক্খূ দহরানং হত্থে পত্তচীৰরং দত্ৰা মগ্গং গচ্ছন্তা পচ্ছিমে যামে সযিতুকামা হোন্তি, অত্তনো অত্তনো চীৰরং হত্থপাসে কত্ৰাৰ সযিতব্বং. সচে গচ্ছন্তানংযেৰ অসম্পত্তেসু দহরেসু অরুণং উগ্গচ্ছতি, চীৰরং নিস্সগ্গিযং হোতি, নিস্সযো পন ন পটিপ্পস্সম্ভতি, দহরানম্পি পুরতো গচ্ছন্তানং থেরেসু অসম্পত্তেসু এসেৰ নযো. মগ্গং ৰিরজ্ঝিত্ৰা অরঞ্ঞে অঞ্ঞমঞ্ঞং অপস্সন্তেসুপি এসেৰ নযো. সচে পন দহরা ‘‘মযং, ভন্তে, মুহুত্তং সযিত্ৰা অসুকস্মিং নাম ওকাসে তুম্হে সম্পাপুণিস্সামা’’তি ৰত্ৰা যাৰ অরুণুগ্গমনা সযন্তি, চীৰরঞ্চ নিস্সগ্গিযং হোতি, নিস্সযো চ পটিপ্পস্সম্ভতি, দহরে উয্যোজেত্ৰা থেরেসু সযন্তেসুপি এসেৰ নযো. দ্ৰেধাপথং দিস্ৰা থেরা ‘‘অযং মগ্গো’’ দহরা ‘‘অযং মগ্গো’’তি ৰত্ৰা অঞ্ঞমঞ্ঞস্স ৰচনং অগ্গহেত্ৰা গতা, সহ অরুণুগ্গমনা চীৰরানি চ নিস্সগ্গিযানি হোন্তি, নিস্সযো চ পটিপ্পস্সম্ভতি. সচে দহরা মগ্গতো ওক্কম্ম ‘‘অন্তোঅরুণেযেৰ নিৰত্তিস্সামা’’তি ভেসজ্জত্থায গামং পৰিসিত্ৰা আগচ্ছন্তি. অসম্পত্তানংযেৰ চ তেসং অরুণো উগ্গচ্ছতি, চীৰরানি নিস্সগ্গিযানি হোন্তি, নিস্সযো পন ন পটিপ্পস্সম্ভতি. সচে পন ধেনুভযেন ৰা সুনখভযেন ৰা ‘‘মুহুত্তং ঠত্ৰা গমিস্সামা’’তি ঠত্ৰা ৰা নিসীদিত্ৰা ৰা গচ্ছন্তি, অন্তরা অরুণে উগ্গতে চীৰরানি নিস্সগ্গিযানি হোন্তি, নিস্সযো চ পটিপ্পস্সম্ভতি. সচে ‘‘অন্তোঅরুণেযেৰ আগমিস্সামা’’তি অন্তোসীমাযং গামং পৰিট্ঠানং অন্তরা অরুণো উগ্গচ্ছতি, নেৰ চীৰরানি নিস্সগ্গিযানি হোন্তি, ন নিস্সযো পটিপ্পস্সম্ভতি. সচে পন ‘‘ৰিভাযতু তাৰা’’তি নিসীদন্তি, অরুণে উগ্গতেপি ন চীৰরানি নিস্সগ্গিযানি হোন্তি, নিস্সযো পন পটিপ্পস্সম্ভতি. যেপি ‘‘অন্তোঅরুণেযেৰ আগমিস্সামা’’তি সামন্তৰিহারং ধম্মসৰনত্থায সউস্সাহা গচ্ছন্তি, অন্তরামগ্গেযেৰ চ নেসং অরুণো উগ্গচ্ছতি, চীৰরানি নিস্সগ্গিযানি হোন্তি, নিস্সযো পন ন পটিপ্পস্সম্ভতি. সচে ধম্মগারৰেন ‘‘যাৰ পরিযোসানং সুত্ৰাৰ গমিস্সামা’’তি নিসীদন্তি, সহ অরুণস্সুগ্গমনা চীৰরানিপি নিস্সগ্গিযানি হোন্তি, নিস্সযোপি পটিপ্পস্সম্ভতি. থেরেন দহরং চীৰরধোৰনত্থায গামকং পেসেন্তেন অত্তনো চীৰরং পচ্চুদ্ধরিত্ৰাৰ দাতব্বং. দহরস্সাপি চীৰরং পচ্চুদ্ধরাপেত্ৰা ঠপেতব্বং. সচে অস্সতিযা গচ্ছতি, অত্তনো চীৰরং পচ্চুদ্ধরিত্ৰা দহরস্স চীৰরং ৰিস্সাসেন গহেত্ৰা ঠপেতব্বং. সচে থেরো নস্সরতি, দহরো এৰ সরতি, দহরেন অত্তনো চীৰরং পচ্চুদ্ধরিত্ৰা থেরস্স চীৰরং ৰিস্সাসেন গহেত্ৰা গন্ত্ৰা ৰত্তব্বো ‘‘ভন্তে, তুম্হাকং চীৰরং অধিট্ঠহিত্ৰা পরিভুঞ্জথা’’তি অত্তনোপি চীৰরং অধিট্ঠাতব্বং. এৰং একস্স সতিযাপি আপত্তিমোক্খো হোতীতি. সেসং উত্তানত্থমেৰ.

সমুট্ঠানাদীসু পঠমকথিনসিক্খাপদে অনধিট্ঠানং অৰিকপ্পনঞ্চ অকিরিযং, ইধ অপচ্চুদ্ধরণং অযমেৰ ৰিসেসো. সেসং সব্বত্থ ৰুত্তনযমেৰাতি.

উদোসিতসিক্খাপদৰণ্ণনা নিট্ঠিতা.