ৰিনীতৰত্থুৰণ্ণনা

১৮০. ৰিনীতৰত্থুকথাসু পঠমৰত্থুস্মিং – কারুঞ্ঞেনাতি তে ভিক্খূ তস্স মহন্তং গেলঞ্ঞদুক্খং দিস্ৰা কারুঞ্ঞং উপ্পাদেত্ৰা ‘‘সীলৰা ত্ৰং কতকুসলো, কস্মা মীযমানো ভাযসি, ননু সীলৰতো সগ্গো নাম মরণমত্তপটিবদ্ধোযেৰা’’তি এৰং মরণত্থিকাৰ হুত্ৰা মরণত্থিকভাৰং অজানন্তা মরণৰণ্ণং সংৰণ্ণেসুং. সোপি ভিক্খু তেসং সংৰণ্ণনায আহারুপচ্ছেদং কত্ৰা অন্তরাৰ কালমকাসি. তস্মা আপত্তিং আপন্না. ৰোহারৰসেন পন ৰুত্তং ‘‘কারুঞ্ঞেন মরণৰণ্ণং সংৰণ্ণেসু’’ন্তি. তস্মা ইদানিপি পণ্ডিতেন ভিক্খুনা গিলানস্স ভিক্খুনো এৰং মরণৰণ্ণো ন সংৰণ্ণেতব্বো. সচে হি তস্স সংৰণ্ণনং সুত্ৰা আহারূপচ্ছেদাদিনা উপক্কমেন একজৰনৰারাৰসেসেপি আযুস্মিং অন্তরা কালংকরোতি, ইমিনাৰ মারিতো হোতি. ইমিনা পন নযেন অনুসিট্ঠি দাতব্বা – ‘‘সীলৰতো নাম অনচ্ছরিযা মগ্গফলুপ্পত্তি, তস্মা ৰিহারাদীসু আসত্তিং অকত্ৰা বুদ্ধগতং ধম্মগতং সঙ্ঘগতং কাযগতঞ্চ সতিং উপট্ঠপেত্ৰা মনসিকারে অপ্পমাদো কাতব্বো’’তি. মরণৰণ্ণে চ সংৰণ্ণিতেপি যো তায সংৰণ্ণনায কঞ্চি উপক্কমং অকত্ৰা অত্তনো ধম্মতায যথাযুনা যথানুসন্ধিনাৰ মরতি, তপ্পচ্চযা সংৰণ্ণকো আপত্তিযা ন কারেতব্বোতি.

দুতিযৰত্থুস্মিং – ন চ ভিক্খৰে অপ্পটিৰেক্খিত্ৰাতি এত্থ কীদিসং আসনং পটিৰেক্খিতব্বং, কীদিসং ন পটিৰেক্খিতব্বং? যং সুদ্ধং আসনমেৰ হোতি অপচ্চত্থরণকং, যঞ্চ আগন্ত্ৰা ঠিতানং পস্সতংযেৰ অত্থরীযতি, তং নপচ্চৰেক্খিতব্বং, নিসীদিতুং ৰট্টতি. যম্পি মনুস্সা সযং হত্থেন অক্কমিত্ৰা ‘‘ইধ ভন্তে নিসীদথা’’তি দেন্তি, তস্মিম্পি ৰট্টতি. সচেপি পঠমমেৰাগন্ত্ৰা নিসিন্না পচ্ছা উদ্ধং ৰা অধো ৰা সঙ্কমন্তি, পচ্চৰেক্খণকিচ্চং নত্থি. যম্পি তনুকেন ৰত্থেন যথা তলং দিস্সতি, এৰং পটিচ্ছন্নং হোতি, তস্মিম্পি পচ্চৰেক্খণকিচ্চং নত্থি. যং পন পটিকচ্চেৰ পাৰারকোজৰাদীহি অত্থতং হোতি, তং হত্থেন পরামসিত্ৰা সল্লক্খেত্ৰা নিসীদিতব্বং. মহাপচ্চরিযং পন ‘‘ঘনসাটকেনাপি অত্থতে যস্মিং ৰলি ন পঞ্ঞাযতি, তং নপ্পটিৰেক্খিতব্বন্তি ৰুত্তং.

মুসলৰত্থুস্মিং – অসঞ্চিচ্চোতি অৰধকচেতনো ৰিরদ্ধপযোগো হি সো. তেনাহ ‘‘অসঞ্চিচ্চো অহ’’ন্তি. উদুক্খলৰত্থু উত্তানমেৰ. ৰুড্ঢপব্বজিতৰত্থূসুপঠমৰত্থুস্মিং ‘‘ভিক্খুসঙ্ঘস্স পটিবন্ধং মা অকাসী’’তি পণামেসি. দুতিযৰত্থুস্মিং – সঙ্ঘমজ্ঝেপি গণমজ্ঝেপি ‘‘মহল্লকত্থেরস্স পুত্তো’’তি ৰুচ্চমানো তেন ৰচনেন অট্টীযমানো ‘‘মরতু অয’’ন্তি পণামেসি. ততিযৰত্থুস্মিং – তস্স দুক্খুপ্পাদনেন থুল্লচ্চযং.

১৮১. ততো পরানি তীণি ৰত্থূনি উত্তানত্থানেৰ. ৰিসগতপিণ্ডপাতৰত্থুস্মিং – সারাণীযধম্মপূরকো সো ভিক্খু অগ্গপিণ্ডং সব্রহ্মচারীনং দত্ৰাৰ ভুঞ্জতি. তেন ৰুত্তং ‘‘অগ্গকারিকং অদাসী’’তি. অগ্গকারিকন্তি অগ্গকিরিযং; পঠমং লদ্ধপিণ্ডপাতং অগ্গগ্গং ৰা পণীতপণীতং পিণ্ডপাতন্তি অত্থো. যা পন তস্স দানসঙ্খাতা অগ্গকিরিযা, সা ন সক্কা দাতুং, পিণ্ডপাতঞ্হি সো থেরাসনতো পট্ঠায অদাসি. তে ভিক্খূতি তে থেরাসনতো পট্ঠায পরিভুত্তপিণ্ডপাতা ভিক্খূ; তে কির সব্বেপি কালমকংসু. সেসমেত্থ উত্তানমেৰ. অস্সদ্ধেসু পন মিচ্ছাদিট্ঠিকেসু কুলেসু সক্কচ্চং পণীতভোজনং লভিত্ৰা অনুপপরিক্খিত্ৰা নেৰ অত্তনা পরিভুঞ্জিতব্বং, ন পরেসং দাতব্বং. যম্পি আভিদোসিকং ভত্তং ৰা খজ্জকং ৰা ততো লভতি, তম্পি ন পরিভুঞ্জিতব্বং. অপিহিতৰত্থুম্পি হি সপ্পৰিচ্ছিকাদীহি অধিসযিতং ছড্ডনীযধম্মং তানি কুলানি দেন্তি. গন্ধহলিদ্দাদিমক্খিতোপি ততো পিণ্ডপাতো ন গহেতব্বো. সরীরে রোগট্ঠানানি পুঞ্ছিত্ৰা ঠপিতভত্তম্পি হি তানি দাতব্বং মঞ্ঞন্তীতি.

ৰীমংসনৰত্থুস্মিং – ৰীমংসমানো দ্ৰে ৰীমংসতি – ‘‘সক্কোতি নু খো ইমং মারেতুং নো’’তি ৰিসং ৰা ৰীমংসতি, ‘‘মরেয্য নু খো অযং ইমং ৰিসং খাদিত্ৰা নো’’তি পুগ্গলং ৰা. উভযথাপি ৰীমংসাধিপ্পাযেন দিন্নে মরতু ৰা মা ৰা থুল্লচ্চযং. ‘‘ইদং ৰিসং এতং মারেতূ’’তি ৰা ‘‘ইদং ৰিসং খাদিত্ৰা অযং মরতূ’’তি ৰা এৰং দিন্নে পন সচে মরতি, পারাজিকং; নো চে, থুল্লচ্চযং.

১৮২-৩. ইতো পরানি তীণি সিলাৰত্থূনি তীণি ইট্ঠকৰাসিগোপানসীৰত্থূনি চ উত্তানত্থানেৰ. ন কেৰলঞ্চ সিলাদীনংযেৰ ৰসেন অযং আপত্তানাপত্তিভেদো হোতি, দণ্ডমুগ্গরনিখাদনৰেমাদীনম্পি ৰসেন হোতিযেৰ, তস্মা পাল়িযং অনাগতম্পি আগতনযেনেৰ ৰেদিতব্বং.

অট্টকৰত্থূসু – অট্টকোতি ৰেহাসমঞ্চো ৰুচ্চতি; যং সেতকম্মমালাকম্মলতাকম্মাদীনং অত্থায বন্ধন্তি. তত্থ আৰুসো অত্রট্ঠিতো বন্ধাহীতি মরণাধিপ্পাযো যত্র ঠিতো পতিত্ৰা খাণুনা ৰা ভিজ্জেয্য, সোব্ভপপাতাদীসু ৰা মরেয্য, তাদিসং ঠানং সন্ধাযাহ. এত্থ চ কোচি উপরিঠানং নিযামেতি ‘‘ইতো পতিত্ৰা মরিস্সতী’’তি, কোচি হেট্ঠা ঠানং ‘‘ইধ পতিত্ৰা মরিস্সতী’’তি, কোচি উভযম্পি ‘‘ইতো ইধ পতিত্ৰা মরিস্সতী’’তি. তত্র যো উপরি নিযমিতট্ঠানা অপতিত্ৰা অঞ্ঞতো পততি, হেট্ঠা নিযমিতট্ঠানে ৰা অপতিত্ৰা অঞ্ঞত্থ পততি, উভযনিযামে ৰা যংকিঞ্চি একং ৰিরাধেত্ৰা পততি, তস্মিং মতে ৰিসঙ্কেতত্তা অনাপত্তি. ৰিহারচ্ছাদনৰত্থুস্মিম্পি এসেৰ নযো.

অনভিরতিৰত্থুস্মিং – সো কির ভিক্খু কামৰিতক্কাদীনং সমুদাচারং দিস্ৰা নিৰারেতুং অসক্কোন্তো সাসনে অনভিরতো গিহিভাৰাভিমুখো জাতো. ততো চিন্তেসি – ‘‘যাৰ সীলভেদং ন পাপুণামি তাৰ মরিস্সামী’’তি. অথ তং পব্বতং অভিরুহিত্ৰা পপাতে পপতন্তো অঞ্ঞতরং ৰিলীৰকারং ওত্থরিত্ৰা মারেসি. ৰিলীৰকারন্তি ৰেণুকারং. ন চ ভিক্খৰে অত্তানং পাতেতব্বন্তি ন অত্তা পাতেতব্বো. ৰিভত্তিব্যত্তযেন পনেতং ৰুত্তং. এত্থ চ ন কেৰলং ন পাতেতব্বং, অঞ্ঞেনপি যেন কেনচি উপক্কমেন অন্তমসো আহারুপচ্ছেদেনপি ন মারেতব্বো. যোপি হি গিলানো ৰিজ্জমানে ভেসজ্জে চ উপট্ঠাকেসু চ মরিতুকামো আহারং উপচ্ছিন্দতি, দুক্কটমেৰ. যস্স পন মহাআবাধো চিরানুবদ্ধো, ভিক্খূ উপট্ঠহন্তা কিলমন্তি জিগুচ্ছন্তি ‘‘কদা নু খো গিলানতো মুচ্চিস্সামা’’তি অট্টীযন্তি. সচে সো ‘‘অযং অত্তভাৰো পটিজগ্গিযমানোপি ন তিট্ঠতি, ভিক্খূ চ কিলমন্তী’’তি আহারং উপচ্ছিন্দতি, ভেসজ্জং ন সেৰতি ৰট্টতি. যো পন ‘‘অযং রোগো খরো, আযুসঙ্খারা ন তিট্ঠন্তি, অযঞ্চ মে ৰিসেসাধিগমো হত্থপ্পত্তো ৰিয দিস্সতী’’তি উপচ্ছিন্দতি ৰট্টতিযেৰ. অগিলানস্সাপি উপ্পন্নসংৰেগস্স ‘‘আহারপরিযেসনং নাম পপঞ্চো, কম্মট্ঠানমেৰ অনুযুঞ্জিস্সামী’’তি কম্মট্ঠানসীসেন উপচ্ছিন্দন্তস্স ৰট্টতি. ৰিসেসাধিগমং ব্যাকরিত্ৰা আহারং উপচ্ছিন্দতি, ন ৰট্টতি. সভাগানঞ্হি লজ্জীভিক্খূনং কথেতুং ৰট্টতি.

সিলাৰত্থুস্মিং – দৰাযাতি দৰেন হস্সেন; খিড্ডাযাতি অত্থো. সিলাতি পাসাণো; ন কেৰলঞ্চ পাসাণো, অঞ্ঞম্পি যংকিঞ্চি দারুখণ্ডং ৰা ইট্ঠকাখণ্ডং ৰা হত্থেন ৰা যন্তেন ৰা পৰিজ্ঝিতুং ন ৰট্টতি. চেতিযাদীনং অত্থায পাসাণাদযো হসন্তা হসন্তা পৰট্টেন্তিপি খিপন্তিপি উক্খিপন্তিপি কম্মসমযোতি ৰট্টতি. অঞ্ঞম্পি ঈদিসং নৰকম্মং ৰা করোন্তা ভণ্ডকং ৰা ধোৰন্তা রুক্খং ৰা ধোৰনদণ্ডকং ৰা উক্খিপিত্ৰা পৰিজ্ঝন্তি, ৰট্টতি. ভত্তৰিস্সগ্গকালাদীসু কাকে ৰা সোণে ৰা কট্ঠং ৰা কথলং ৰা খিপিত্ৰা পলাপেতি, ৰট্টতি.

১৮৪. সেদনাদিৰত্থূনি সব্বানেৰ উত্তানত্থানি. এত্থ চ অহং কুক্কুচ্চকোতি ন গিলানুপট্ঠানং ন কাতব্বং, হিতকামতায সব্বং গিলানস্স বলাবলঞ্চ রুচিঞ্চ সপ্পাযাসপ্পাযঞ্চ উপলক্খেত্ৰা কাতব্বং.

১৮৫. জারগব্ভিনিৰত্থুস্মিং – পৰুত্থপতিকাতি পৰাসং গতপতিকা. গব্ভপাতনন্তি যেন পরিভুত্তেন গব্ভো পততি, তাদিসং ভেসজ্জং. দ্ৰে পজাপতিকৰত্থূনি উত্তানত্থানেৰ. গব্ভমদ্দনৰত্থুস্মিং – ‘‘মদ্দিত্ৰা পাতেহী’’তি ৰুত্তে অঞ্ঞেন মদ্দাপেত্ৰা পাতেতি, ৰিসঙ্কেতং. ‘‘মদ্দাপেত্ৰা পাতাপেহী’’তি ৰুত্তেপি সযং মদ্দিত্ৰা পাতেতি, ৰিসঙ্কেতমেৰ. মনুস্সৰিগ্গহে পরিযাযো নাম নত্থি. তস্মা ‘‘গব্ভো নাম মদ্দিতে পততী’’তি ৰুত্তে সা সযং ৰা মদ্দতু, অঞ্ঞেন ৰা মদ্দাপেত্ৰা পাতেতু, ৰিসঙ্কেতো নত্থি; পারাজিকমেৰ তাপনৰত্থুস্মিম্পি এসেৰ নযো.

ৰঞ্ঝিত্থিৰত্থুস্মিং – ৰঞ্ঝিত্থী নাম যা গব্ভং ন গণ্হাতি. গব্ভং অগণ্হনকইত্থী নাম নত্থি, যস্সা পন গহিতোপি গব্ভো ন সণ্ঠাতি, তংযেৰ সন্ধাযেতং ৰুত্তং. উতুসমযে কির সব্বিত্থিযো গব্ভং গণ্হন্তি. যা পনাযং ‘‘ৰঞ্ঝা’’তি ৰুচ্চতি, তস্সা কুচ্ছিযং নিব্বত্তসত্তানং অকুসলৰিপাকো সম্পাপুণাতি. তে পরিত্তকুসলৰিপাকেন গহিতপটিসন্ধিকা অকুসলৰিপাকেন অধিভূতা ৰিনস্সন্তি. অভিনৰপটিসন্ধিযংযেৰ হি কম্মানুভাৰেন দ্ৰীহাকারেহি গব্ভো ন সণ্ঠাতি – ৰাতেন ৰা পাণকেহি ৰা. ৰাতো সোসেত্ৰা অন্তরধাপেতি, পাণকা খাদিত্ৰা. তস্স পন ৰাতস্স পাণকানং ৰা পটিঘাতায ভেসজ্জে কতে গব্ভো সণ্ঠহেয্য; সো ভিক্খু তং অকত্ৰা অঞ্ঞং খরভেসজ্জং অদাসি. তেন সা কালমকাসি. ভগৰা ভেসজ্জস্স কটত্তা দুক্কটং পঞ্ঞাপেসি.

দুতিযৰত্থুস্মিম্পি এসেৰ নযো. তস্মা আগতাগতস্স পরজনস্স ভেসজ্জং ন কাতব্বং, করোন্তো দুক্কটং আপজ্জতি. পঞ্চন্নং পন সহধম্মিকানং কাতব্বং ভিক্খুস্স ভিক্খুনিযা সিক্খমানায সামণেরস্স সামণেরিযাতি. সমসীলসদ্ধাপঞ্ঞানঞ্হি এতেসং তীসু সিক্খাসু যুত্তানং ভেসজ্জং অকাতুং ন লব্ভতি, করোন্তেন চ সচে তেসং অত্থি, তেসং সন্তকং গহেত্ৰা যোজেত্ৰা দাতব্বং. সচে নত্থি, অত্তনো সন্তকং কাতব্বং. সচে অত্তনোপি নত্থি, ভিক্খাচারৰত্তেন ৰা ঞাতকপৰারিতট্ঠানতো ৰা পরিযেসিতব্বং. অলভন্তেন গিলানস্স অত্থায অকতৰিঞ্ঞত্তিযাপি আহরিত্ৰা কাতব্বং.

অপরেসম্পি পঞ্চন্নং কাতুং ৰট্টতি – মাতু, পিতু, তদুপট্ঠাকানং, অত্তনো ৰেয্যাৰচ্চকরস্স, পণ্ডুপলাসস্সাতি. পণ্ডুপলাসো নাম যো পব্বজ্জাপেক্খো যাৰ পত্তচীৰরং পটিযাদিযতি তাৰ ৰিহারে ৰসতি. তেসু সচে মাতাপিতরো ইস্সরা হোন্তি, ন পচ্চাসীসন্তি, অকাতুং ৰট্টতি. সচে পন রজ্জেপি ঠিতা পচ্চাসীসন্তি, অকাতুং ন ৰট্টতি. ভেসজ্জং পচ্চাসীসন্তানং ভেসজ্জং দাতব্বং, যোজেতুং অজানন্তানং যোজেত্ৰা দাতব্বং. সব্বেসং অত্থায সহধম্মিকেসু ৰুত্তনযেনেৰ পরিযেসিতব্বং. সচে পন মাতরং ৰিহারে আনেত্ৰা জগ্গতি, সব্বং পরিকম্মং অনামসন্তেন কাতব্বং. খাদনীযং ভোজনীযং সহত্থা দাতব্বং. পিতা পন যথা সামণেরো এৰং সহত্থেন ন্হাপনসম্বাহনাদীনি কত্ৰা উপট্ঠাতব্বো. যে চ মাতাপিতরো উপট্ঠহন্তি পটিজগ্গন্তি, তেসম্পি এৰমেৰ কাতব্বং. ৰেয্যাৰচ্চকরো নাম যো ৰেতনং গহেত্ৰা অরঞ্ঞে দারূনি ৰা ছিন্দতি, অঞ্ঞং ৰা কিঞ্চি কম্মং করোতি, তস্স রোগে উপ্পন্নে যাৰ ঞাতকা ন পস্সন্তি তাৰ ভেসজ্জং কাতব্বং. যো পন ভিক্খুনিস্সিতকোৰ হুত্ৰা সব্বকম্মানি করোতি, তস্স ভেসজ্জং কাতব্বমেৰ. পণ্ডুপলাসেপি সামণেরে ৰিয পটিপজ্জিতব্বং.

অপরেসম্পি দসন্নং কাতুং ৰট্টতি – জেট্ঠভাতু, কনিট্ঠভাতু, জেট্ঠভগিনিযা, কনিট্ঠভগিনিযা, চূল়মাতুযা, মহামাতুযা, চূল়পিতুনো, মহাপিতুনো, পিতুচ্ছায, মাতুলস্সাতি. তেসং পন সব্বেসম্পি করোন্তেন তেসংযেৰ সন্তকং ভেসজ্জং গহেত্ৰা কেৰলং যোজেত্ৰা দাতব্বং. সচে পন নপ্পহোন্তি, যাচন্তি চ ‘‘দেথ নো, ভন্তে, তুম্হাকং পটিদস্সামা’’তি তাৰকালিকং দাতব্বং. সচেপি ন যাচন্তি, ‘‘অম্হাকং ভেসজ্জং অত্থি, তাৰকালিকং গণ্হথা’’তি ৰত্ৰা ৰা ‘‘যদা নেসং ভৰিস্সতি তদা দস্সন্তী’’তি আভোগং ৰা কত্ৰা দাতব্বং. সচে পটিদেন্তি, গহেতব্বং, নো চে দেন্তি, ন চোদেতব্বা. এতে দস ঞাতকে ঠপেত্ৰা অঞ্ঞেসং ন কাতব্বং.

এতেসং পুত্তপরম্পরায পন যাৰ সত্তমো কুলপরিৰট্টো তাৰ চত্তারো পচ্চযে আহরাপেন্তস্স অকতৰিঞ্ঞত্তি ৰা ভেসজ্জং করোন্তস্স ৰেজ্জকম্মং ৰা কুলদূসকাপত্তি ৰা ন হোতি. সচে ভাতুজাযা ভগিনিসামিকো ৰা গিলানা হোন্তি, ঞাতকা চে, তেসম্পি ৰট্টতি. অঞ্ঞাতকা চে, ভাতু চ ভগিনিযা চ কত্ৰা দাতব্বং, ‘‘তুম্হাকং জগ্গনট্ঠানে দেথা’’তি. অথ ৰা তেসং পুত্তানং কত্ৰা দাতব্বং, ‘‘তুম্হাকং মাতাপিতূনং দেথা’’তি. এতেনুপাযেন সব্বপদেসুপি ৰিনিচ্ছযো ৰেদিতব্বো.

তেসং অত্থায চ সামণেরেহি অরঞ্ঞতো ভেসজ্জং আহরাপেন্তেন ঞাতিসামণেরেহি ৰা আহরাপেতব্বং. অত্তনো অত্থায ৰা আহরাপেত্ৰা দাতব্বং. তেহিপি ‘‘উপজ্ঝাযস্স আহরামা’’তি ৰত্তসীসেন আহরিতব্বং. উপজ্ঝাযস্স মাতাপিতরো গিলানা ৰিহারং আগচ্ছন্তি, উপজ্ঝাযো চ দিসাপক্কন্তো হোতি, সদ্ধিৰিহারিকেন উপজ্ঝাযস্স সন্তকং ভেসজ্জং দাতব্বং. নো চে অত্থি, অত্তনো ভেসজ্জং উপজ্ঝাযস্স পরিচ্চজিত্ৰা দাতব্বং. অত্তনোপি অসন্তে ৰুত্তনযেন পরিযেসিত্ৰা উপজ্ঝাযস্স সন্তকং কত্ৰা দাতব্বং. উপজ্ঝাযেনপি সদ্ধিৰিহারিকস্স মাতাপিতূসু এৰমেৰ পটিপজ্জিতব্বং. এস নযো আচরিযন্তেৰাসিকেসুপি. অঞ্ঞোপি যো আগন্তুকো ৰা চোরো ৰা যুদ্ধপরাজিতো ইস্সরো ৰা ঞাতকেহি পরিচ্চত্তো কপণো ৰা গমিযমনুস্সো ৰা গিলানো হুত্ৰা ৰিহারং পৰিসতি, সব্বেসং অপচ্চাসীসন্তেন ভেসজ্জং কাতব্বং.

সদ্ধং কুলং হোতি চতূহি পচ্চযেহি উপট্ঠাযকং ভিক্খুসঙ্ঘস্স মাতাপিতুট্ঠানিযং, তত্র চে কোচি গিলানো হোতি, তস্সত্থায ৰিস্সাসেন ‘‘ভেসজ্জং কত্ৰা ভন্তে দেথা’’তি ৰদন্তি, নেৰ দাতব্বং ন কাতব্বং. অথ পন কপ্পিযং ঞত্ৰা এৰং পুচ্ছন্তি – ‘‘ভন্তে, অসুকস্স নাম রোগস্স কিং ভেসজ্জং করোন্তী’’তি? ‘‘ইদঞ্চিদঞ্চ গহেত্ৰা করোন্তী’’তি ৰত্তুং ৰট্টতি. ‘‘ভন্তে, ময্হং মাতা গিলানা, ভেসজ্জং তাৰ আচিক্খথা’’তি এৰং পুচ্ছিতে পন ন আচিক্খিতব্বং. অঞ্ঞমঞ্ঞং পন কথা কাতব্বা – ‘‘আৰুসো, অসুকস্স নাম ভিক্খুনো ইমস্মিং রোগে কিং ভেসজ্জং করিংসূ’’তি? ‘‘ইদঞ্চিদঞ্চ ভন্তে’’তি. তং সুত্ৰা ইতরো মাতু ভেসজ্জং করোতি, ৰট্টতেৰ.

মহাপদুমত্থেরোপি কির ৰসভরঞ্ঞো দেৰিযা রোগে উপ্পন্নে একায ইত্থিযা আগন্ত্ৰা পুচ্ছিতো ‘‘ন জানামী’’তি অৰত্ৰা এৰমেৰ ভিক্খূহি সদ্ধিং সমুল্লপেসি. তং সুত্ৰা তস্সা ভেসজ্জমকংসু. ৰূপসন্তে চ রোগে তিচীৰরেন তীহি চ কহাপণসতেহি সদ্ধিং ভেসজ্জচঙ্কোটকং পূরেত্ৰা আহরিত্ৰা থেরস্স পাদমূলে ঠপেত্ৰা ‘‘ভন্তে, পুপ্ফপূজং করোথা’’তি আহংসু. থেরো ‘‘আচরিযভাগো নামায’’ন্তি কপ্পিযৰসেন গাহাপেত্ৰা পুপ্ফপূজং অকাসি. এৰং তাৰ ভেসজ্জে পটিপজ্জিতব্বং.

পরিত্তে পন ‘‘গিলানস্স পরিত্তং করোথ, ভন্তে’’তি ৰুত্তে ন কাতব্বং, ‘‘ভণথা’’তি ৰুত্তে পন কাতব্বং. সচে পিস্স এৰং হোতি ‘‘মনুস্সা নাম ন জানন্তি, অকযিরমানে ৰিপ্পটিসারিনো ভৰিস্সন্তী’’তি কাতব্বং; ‘‘পরিত্তোদকং পরিত্তসুত্তং কত্ৰা দেথা’’তি ৰুত্তেন পন তেসংযেৰ উদকং হত্থেন চালেত্ৰা সুত্তং পরিমজ্জেত্ৰা দাতব্বং. সচে ৰিহারতো উদকং অত্তনো সন্তকং ৰা সুত্তং দেতি, দুক্কটং. মনুস্সা উদকঞ্চ সুত্তঞ্চ গহেত্ৰা নিসীদিত্ৰা ‘‘পরিত্তং ভণথা’’তি ৰদন্তি, কাতব্বং. নো চে জানন্তি, আচিক্খিতব্বং. ভিক্খূনং নিসিন্নানং পাদেসু উদকং আকিরিত্ৰা সুত্তঞ্চ ঠপেত্ৰা গচ্ছন্তি ‘‘পরিত্তং করোথ, পরিত্তং ভণথা’’তি ন পাদা অপনেতব্বা. মনুস্সা হি ৰিপ্পটিসারিনো হোন্তি. অন্তোগামে গিলানস্সত্থায ৰিহারং পেসেন্তি, ‘‘পরিত্তং ভণন্তূ’’তি ভণিতব্বং. অন্তোগামে রাজগেহাদীসু রোগে ৰা উপদ্দৰে ৰা উপ্পন্নে পক্কোসাপেত্ৰা ভণাপেন্তি, আটানাটিযসুত্তাদীনি ভণিতব্বানি. ‘‘আগন্ত্ৰা গিলানস্স সিক্খাপদানি দেন্তু, ধম্মং কথেন্তু. রাজন্তেপুরে ৰা অমচ্চগেহে ৰা আগন্ত্ৰা সিক্খাপদানি দেন্তু, ধম্মং কথেন্তূ’’তি পেসিতেপি গন্ত্ৰা সিক্খাপদানি দাতব্বানি, ধম্মো কথেতব্বো. ‘‘মতানং পরিৰারত্থং আগচ্ছন্তূ’’তি পক্কোসন্তি, ন গন্তব্বং. সীৰথিকদস্সনে অসুভদস্সনে চ মরণস্সতিং পটিলভিস্সামীতি কম্মট্ঠানসীসেন গন্তুং ৰট্টতি. এৰং পরিত্তে পটিপজ্জিতব্বং.

পিণ্ডপাতে পন – অনামট্ঠপিণ্ডপাতো কস্স দাতব্বো, কস্স ন দাতব্বো? মাতাপিতুনং তাৰ দাতব্বো. সচেপি কহাপণগ্ঘনকো হোতি, সদ্ধাদেয্যৰিনিপাতনং নত্থি. মাতাপিতুউপট্ঠাকানং ৰেয্যাৰচ্চকরস্স পণ্ডুপলাসস্সাতি এতেসম্পি দাতব্বো. তত্থ পণ্ডুপলাসস্স থালকে পক্খিপিত্ৰাপি দাতুং ৰট্টতি. তং ঠপেত্ৰা অঞ্ঞেসং আগারিকানং মাতাপিতুনম্পি ন ৰট্টতি. পব্বজিতপরিভোগো হি আগারিকানং চেতিযট্ঠানিযো. অপিচ অনামট্ঠপিণ্ডপাতো নামেস সম্পত্তস্স দামরিকচোরস্সাপি ইস্সরস্সাপি দাতব্বো. কস্মা? তে হি অদীযমানেপি ‘‘ন দেন্তী’’তি আমসিত্ৰা দীযমানেপি ‘‘উচ্ছিট্ঠকং দেন্তী’’তি কুজ্ঝন্তি. কুদ্ধা জীৰিতাপি ৰোরোপেন্তি, সাসনস্সাপি অন্তরাযং করোন্তি. রজ্জং পত্থযমানস্স ৰিচরতো চোরনাগস্স ৰত্থু চেত্থ কথেতব্বং. এৰং পিণ্ডপাতে পটিপজ্জিতব্বং.

পটিসন্থারো পন কস্স কাতব্বো, কস্স ন কাতব্বো? পটিসন্থারো নাম ৰিহারং সম্পত্তস্স যস্স কস্সচি আগন্তুকস্স ৰা দলিদ্দস্স ৰা চোরস্স ৰা ইস্সরস্স ৰা কাতব্বোযেৰ. কথং? আগন্তুকং তাৰ খীণপরিব্বযং ৰিহারং সম্পত্তং দিস্ৰা পানীযং দাতব্বং, পাদমক্খনতেলং দাতব্বং. কালে আগতস্স যাগুভত্তং, ৰিকালে আগতস্স সচে তণ্ডুলা অত্থি; তণ্ডুলা দাতব্বা. অৰেলাযং সম্পত্তো ‘‘গচ্ছাহী’’তি ন ৰত্তব্বো. সযনট্ঠানং দাতব্বং. সব্বং অপচ্চাসীসন্তেনেৰ কাতব্বং. ‘‘মনুস্সা নাম চতুপচ্চযদাযকা এৰং সঙ্গহে কযিরমানে পুনপ্পুনং পসীদিত্ৰা উপকারং করিস্সন্তী’’তি চিত্তং ন উপ্পাদেতব্বং. চোরানং পন সঙ্ঘিকম্পি দাতব্বং.

পটিসন্থারানিসংসদীপনত্থঞ্চ চোরনাগৰত্থু, ভাতরা সদ্ধিং জম্বুদীপগতস্স মহানাগরঞ্ঞো ৰত্থু, পিতুরাজস্স রজ্জে চতুন্নং অমচ্চানং ৰত্থু, অভযচোরৰত্থূতি এৰমাদীনি বহূনি ৰত্থূনি মহাঅট্ঠকথাযং ৰিত্থারতো ৰুত্তানি.

তত্রাযং একৰত্থুদীপনা – সীহল়দীপে কির অভযো নাম চোরো পঞ্চসতপরিৰারো একস্মিং ঠানে খন্ধাৰারং বন্ধিত্ৰা সমন্তা তিযোজনং উব্বাসেত্ৰা ৰসতি. অনুরাধপুরৰাসিনো কদম্বনদিং ন উত্তরন্তি, চেতিযগিরিমগ্গে জনসঞ্চারো উপচ্ছিন্নো. অথেকদিৰসং চোরো ‘‘চেতিযগিরিং ৰিলুম্পিস্সামী’’তি অগমাসি. আরামিকা দিস্ৰা দীঘভাণকঅভযত্থেরস্স আরোচেসুং. থেরো ‘‘সপ্পিফাণিতাদীনি অত্থী’’তি পুচ্ছি. ‘‘অত্থি, ভন্তে’’তি. ‘‘চোরানং দেথ, তণ্ডুলা অত্থী’’তি? ‘‘অত্থি, ভন্তে, সঙ্ঘস্সত্থায আহটা তণ্ডুলা চ পত্তসাকঞ্চ গোরসো চা’’তি. ‘‘ভত্তং সম্পাদেত্ৰা চোরানং দেথা’’তি. আরামিকা তথা করিংসু. চোরা ভত্তং ভুঞ্জিত্ৰা ‘‘কেনাযং পটিসন্থারো কতো’’তি পুচ্ছিংসু. ‘‘অম্হাকং অয্যেন অভযত্থেরেনা’’তি. চোরা থেরস্স সন্তিকং গন্ত্ৰা ৰন্দিত্ৰা আহংসু – ‘‘মযং সঙ্ঘস্স চ চেতিযস্স চ সন্তকং অচ্ছিন্দিত্ৰা গহেস্সামাতি আগতা, তুম্হাকং পন ইমিনা পটিসন্থারেনম্হ পসন্না, অজ্জ পট্ঠায ৰিহারে ধম্মিকা রক্খা অম্হাকং আযত্তা হোতু, নাগরা আগন্ত্ৰা দানং দেন্তু, চেতিযং ৰন্দন্তূ’’তি. ততো পট্ঠায চ নাগরে দানং দাতুং আগচ্ছন্তে নদীতীরেযেৰ পচ্চুগ্গন্ত্ৰা রক্খন্তা ৰিহারং নেন্তি, ৰিহারেপি দানং দেন্তানং রক্খং কত্ৰা তিট্ঠন্তি. তেপি ভিক্খূনং ভুত্তাৰসেসং চোরানং দেন্তি. গমনকালেপি তে চোরা নদীতীরং পাপেত্ৰা নিৰত্তন্তি.

অথেকদিৰসং ভিক্খুসঙ্ঘে খীযনককথা উপ্পন্না ‘‘থেরো ইস্সরৰতায সঙ্ঘস্স সন্তকং চোরানং অদাসী’’তি. থেরো সন্নিপাতং কারাপেত্ৰা আহ – ‘‘চোরা সঙ্ঘস্স পকতিৰট্টঞ্চ চেতিযসন্তকঞ্চ অচ্ছিন্দিত্ৰা গণ্হিস্সামা’’তি আগমিংসু. অথ নেসং মযা এৰং ন হরিস্সন্তীতি এত্তকো নাম পটিসন্থারো কতো, তং সব্বম্পি একতো সম্পিণ্ডেত্ৰা অগ্ঘাপেথ. তেন কারণেন অৰিলুত্তং ভণ্ডং একতো সম্পিণ্ডেত্ৰা অগ্ঘাপেথাতি. ততো সব্বম্পি থেরেন দিন্নকং চেতিযঘরে একং ৰরপোত্থকচিত্তত্থরণং ন অগ্ঘতি. ততো আহংসু – ‘‘থেরেন কতপটিসন্থারো সুকতো চোদেতুং ৰা সারেতুং ৰা ন লব্ভা, গীৰা ৰা অৰহারো ৰা নত্থী’’তি. এৰং মহানিসংসো পটিসন্থারোতি সল্লক্খেত্ৰা কত্তব্বো পণ্ডিতেন ভিক্খুনাতি.

১৮৭. অঙ্গুলিপতোদকৰত্থুস্মিং – উত্তন্তোতি কিলমন্তো. অনস্সাসকোতি নিরস্সাসো. ইমস্মিং পন ৰত্থুস্মিং যায আপত্তিযা ভৰিতব্বং সা ‘‘খুদ্দকেসু নিদিট্ঠা’’তি ইধ ন ৰুত্তা.

তদনন্তরে ৰত্থুস্মিং – ওত্থরিত্ৰাতি অক্কমিত্ৰা. সো কির তেহি আকড্ঢিযমানো পতিতো. একো তস্স উদরং অভিরুহিত্ৰা নিসীদি. সেসাপি পন্নরস জনা পথৰিযং অজ্ঝোত্থরিত্ৰা অদূহলপাসাণা ৰিয মিগং মারেসুং. যস্মা পন তে কম্মাধিপ্পাযা, ন মরণাধিপ্পাযা; তস্মা পারাজিকং ন ৰুত্তং.

ভূতৰেজ্জকৰত্থুস্মিং – যক্খং মারেসীতি ভূতৰিজ্জাকপাঠকা যক্খগহিতং মোচেতুকামা যক্খং আৰাহেত্ৰা মুঞ্চাতি ৰদন্তি. নো চে মুঞ্চতি, পিট্ঠেন ৰা মত্তিকায ৰা রূপং কত্ৰা হত্থপাদাদীনি ছিন্দন্তি, যং যং তস্স ছিজ্জতি তং তং যক্খস্স ছিন্নমেৰ হোতি. সীসে ছিন্নে যক্খোপি মরতি. এৰং সোপি মারেসি; তস্মা থুল্লচ্চযং ৰুত্তং. ন কেৰলঞ্চ যক্খমেৰ, যোপি হি সক্কং দেৰরাজং মারেয্য, সোপি থুল্লচ্চযমেৰ আপজ্জতি.

ৰাল়যক্খৰত্থুস্মিং – ৰাল়যক্খৰিহারন্তি যস্মিং ৰিহারে ৰাল়ো চণ্ডো যক্খো ৰসতি, তং ৰিহারং. যো হি এৰরূপং ৰিহারং অজানন্তো কেৰলং ৰসনত্থায পেসেতি, অনাপত্তি. যো মরণাধিপ্পাযো পেসেতি, সো ইতরস্স মরণেন পারাজিকং, অমরণেন থুল্লচ্চযং আপজ্জতি. যথা চ ৰাল়যক্খৰিহারং; এৰং যত্থ ৰাল়সীহব্যগ্ঘাদিমিগা ৰা অজগরকণ্হসপ্পাদযো দীঘজাতিকা ৰা ৰসন্তি, তং ৰাল়ৰিহারং পেসেন্তস্সাপি আপত্তানাপত্তিভেদো ৰেদিতব্বো. অযং পাল়িমুত্তকনযো. যথা চ ভিক্খুং ৰাল়যক্খৰিহারং পেসেন্তস্স; এৰং ৰাল়যক্খম্পি ভিক্খুসন্তিকং পেসেন্তস্স আপত্তানাপত্তিভেদো ৰেদিতব্বো. এসেৰ নযো ৰাল়কন্তারাদিৰত্থূসুপি. কেৰলঞ্হেত্থ যস্মিং কন্তারে ৰাল়মিগা ৰা দীঘজাতিকা ৰা অত্থি, সো ৰাল়কন্তারো. যস্মিং চোরা অত্থি, সো চোরকন্তারোতি এৰং পদত্থমত্তমেৰ নানং. মনুস্সৰিগ্গহপারাজিকঞ্চ নামেতং সণ্হং, পরিযাযকথায ন মুচ্চতি; তস্মা যো ৰদেয্য ‘‘অসুকস্মিং নাম ওকাসে চোরো নিসিন্নো, যো তস্স সীসং ছিন্দিত্ৰা আহরতি, সো রাজতো সক্কারৰিসেসং লভতী’’তি. তস্স চেতং ৰচনং সুত্ৰা কোচি নং গন্ত্ৰা মারেতি, অযং পারাজিকো হোতীতি.

১৮৮. তং মঞ্ঞমানোতি আদীসু সো কির ভিক্খু অত্তনো ৰেরিভিক্খুং মারেতুকামো চিন্তেসি – ‘‘ইমং মে দিৰা মারেন্তস্স ন সুকরং ভৰেয্য সোত্থিনা গন্তুং, রত্তিং নং মারেস্সামী’’তি সল্লক্খেত্ৰা রত্তিং আগম্ম বহূনং সযিতট্ঠানে তং মঞ্ঞমানো তমেৰ জীৰিতা ৰোরোপেসি. অপরো তং মঞ্ঞমানো অঞ্ঞং, অপরো অঞ্ঞং তস্সেৰ সহাযং মঞ্ঞমানো তং, অপরো অঞ্ঞং তস্সেৰ সহাযং মঞ্ঞমানো অঞ্ঞং তস্স সহাযমেৰ জীৰিতা ৰোরোপেসি. সব্বেসম্পি পারাজিকমেৰ.

অমনুস্সগহিতৰত্থূসু পঠমে ৰত্থুস্মিং ‘‘যক্খং পলাপেস্সামী’’তি পহারং অদাসি, ইতরো ‘‘ন দানাযং ৰিরজ্ঝিতুং সমত্থো, মারেস্সামি ন’’ন্তি. এত্থ চ নমরণাধিপ্পাযস্স অনাপত্তি ৰুত্তাতি. ন এত্তকেনেৰ অমনুস্সগহিতস্স পহারো দাতব্বো, তালপণ্ণং পন পরিত্তসুত্তং ৰা হত্থে ৰা পাদে ৰা বন্ধিতব্বং, রতনসুত্তাদীনি পরিত্তানি ভণিতব্বানি, ‘‘মা সীলৰন্তং ভিক্খুং ৰিহেঠেহী’’তি ধম্মকথা কাতব্বাতি. সগ্গকথাদীনি উত্তানত্থানি. যঞ্হেত্থ ৰত্তব্বং তং ৰুত্তমেৰ.

১৮৯. রুক্খচ্ছেদনৰত্থু অট্টবন্ধনৰত্থুসদিসং. অযং পন ৰিসেসো – যো রুক্খেন ওত্থতোপি ন মরতি, সক্কা চ হোতি একেন পস্সেন রুক্খং ছেত্ৰা পথৰিং ৰা খনিত্ৰা নিক্খমিতুং, হত্থে চস্স ৰাসি ৰা কুঠারী ৰা অত্থি, তেন অপি জীৰিতং পরিচ্চজিতব্বং, ন চ রুক্খো ৰা ছিন্দিতব্বো, ন পথৰী ৰা খণিতব্বা. কস্মা? এৰং করোন্তো হি পাচিত্তিযং আপজ্জতি, বুদ্ধস্স আণং ভঞ্জতি, ন জীৰিতপরিযন্তং সীলং করোতি. তস্মা অপি জীৰিতং পরিচ্চজিতব্বং, ন চ সীলন্তি পরিগ্গহেত্ৰা ন এৰং কাতব্বং. অঞ্ঞস্স পন ভিক্খুনো রুক্খং ৰা ছিন্দিত্ৰা পথৰিং ৰা খনিত্ৰা তং নীহরিতুং ৰট্টতি. সচে উদুক্খলযন্তকেন রুক্খং পৰট্টেত্ৰা নীহরিতব্বো হোতি, তংযেৰ রুক্খং ছিন্দিত্ৰা উদুক্খলং গহেতব্বন্তি মহাসুমত্থেরো আহ. অঞ্ঞম্পি ছিন্দিত্ৰা গহেতুং ৰট্টতীতি মহাপদুমত্থেরো. সোব্ভাদীসু পতিতস্সাপি নিস্সেণিং বন্ধিত্ৰা উত্তারণে এসেৰ নযো. অত্তনা ভূতগামং ছিন্দিত্ৰা নিস্সেণী ন কাতব্বা, অঞ্ঞেসং কত্ৰা উদ্ধরিতুং ৰট্টতীতি.

১৯০. দাযালিম্পনৰত্থূসু – দাযং আলিম্পেসুন্তি ৰনে অগ্গিং অদংসু. এত্থ পন উদ্দিস্সানুদ্দিস্সৰসেন পারাজিকানন্তরিযথুল্লচ্চযপাচিত্তিৰত্থূনং অনুরূপতো পারাজিকাদীনি অকুসলরাসিভাৰো চ পুব্বে ৰুত্তনযেনেৰ ৰেদিতব্বো. ‘‘অল্লতিণৰনপ্পগুম্বাদযো ডয্হন্তূ’’তি আলিম্পেন্তস্স চ পাচিত্তিযং. ‘‘দব্বূপকরণানি ৰিনস্সন্তূ’’তি আলিম্পেন্তস্স দুক্কটং. খিড্ডাধিপ্পাযেনাপি দুক্কটন্তি সঙ্খেপট্ঠকথাযং ৰুত্তং. ‘‘যংকিঞ্চি অল্লসুক্খং সইন্দ্রিযানিন্দ্রিযং ডয্হতূ’’তি আলিম্পেন্তস্স ৰত্থুৰসেন পারাজিকথুল্লচ্চযপাচিত্তিযদুক্কটানি ৰেদিতব্বানি.

পটগ্গিদানং পন পরিত্তকরণঞ্চ ভগৰতা অনুঞ্ঞাতং, তস্মা অরঞ্ঞে ৰনকম্মিকেহি ৰা দিন্নং সযং ৰা উট্ঠিতং অগ্গিং আগচ্ছন্তং দিস্ৰা ‘‘তিণকুটিযো মা ৰিনস্সন্তূ’’তি তস্স অগ্গিনো পটিঅগ্গিং দাতুং ৰট্টতি, যেন সদ্ধিং আগচ্ছন্তো অগ্গি একতো হুত্ৰা নিরুপাদানো নিব্বাতি. পরিত্তম্পি কাতুং ৰট্টতি তিণকুটিকানং সমন্তা ভূমিতচ্ছনং পরিখাখণনং ৰা, যথা আগতো অগ্গি উপাদানং অলভিত্ৰা নিব্বাতি. এতঞ্চ সব্বং উট্ঠিতেযেৰ অগ্গিস্মিং কাতুং ৰট্টতি. অনুট্ঠিতে অনুপসম্পন্নেহি কপ্পিযৰোহারেন কারেতব্বং. উদকেন পন নিব্বাপেন্তেহি অপ্পাণকমেৰ উদকং আসিঞ্চিতব্বং.

১৯১. আঘাতনৰত্থুস্মিং – যথা একপ্পহারৰচনে; এৰং ‘‘দ্ৰীহি পহারেহী’’তি আদিৰচনেসুপি পারাজিকং ৰেদিতব্বং. ‘‘দ্ৰীহী’’তি ৰুত্তে চ একেন পহারেন মারিতেপি খেত্তমেৰ ওতিণ্ণত্তা পারাজিকং, তীহি মারিতে পন ৰিসঙ্কেতং. ইতি যথাপরিচ্ছেদে ৰা পরিচ্ছেদব্ভন্তরে ৰা অৰিসঙ্কেতং, পরিচ্ছেদাতিক্কমে পন সব্বত্থ ৰিসঙ্কেতং হোতি, আণাপকো মুচ্চতি, ৰধকস্সেৰ দোসো. যথা চ পহারেসু; এৰং পুরিসেসুপি ‘‘একো মারেতূ’’তি ৰুত্তে একেনেৰ মারিতে পারাজিকং, দ্ৰীহি মারিতে ৰিসঙ্কেতং. ‘‘দ্ৰে মারেন্তূ’’তি ৰুত্তে একেন ৰা দ্ৰীহি ৰা মারিতে পারাজিকং, তীহি মারিতে ৰিসঙ্কেতন্তি ৰেদিতব্বং. একো সঙ্গামে ৰেগেন ধাৰতো পুরিসস্স সীসং অসিনা ছিন্দতি, অসীসকং কবন্ধং ধাৰতি, তমঞ্ঞো পহরিত্ৰা পাতেসি, কস্স পারাজিকন্তি ৰুত্তে উপড্ঢা থেরা ‘‘গমনূপচ্ছেদকস্সা’’তি আহংসু. আভিধম্মিকগোদত্তত্থেরো ‘‘সীসচ্ছেদকস্সা’’তি. এৰরূপানিপি ৰত্থূনি ইমস্স ৰত্থুস্স অত্থদীপনে ৰত্তব্বানীতি.

১৯২. তক্কৰত্থুস্মিং – অনিযমেত্ৰা ‘‘তক্কং পাযেথা’’তি ৰুত্তে যং ৰা তং ৰা তক্কং পাযেত্ৰা মারিতে পারাজিকং. নিযমেত্ৰা পন ‘‘গোতক্কং মহিংসতক্কং অজিকাতক্ক’’ন্তি ৰা, ‘‘সীতং উণ্হং ধূপিতং অধূপিত’’ন্তি ৰা ৰুত্তে যং ৰুত্তং, ততো অঞ্ঞং পাযেত্ৰা মারিতে ৰিসঙ্কেতং.

লোণসোৰীরকৰত্থুস্মিং – লোণসোৰীরকং নাম সব্বরসাভিসঙ্খতং একং ভেসজ্জং. তং কির করোন্তা হরীতকামলকৰিভীতককসাৰে সব্বধঞ্ঞানি সব্বঅপরণ্ণানি সত্তন্নম্পি ধঞ্ঞানং ওদনং কদলিফলাদীনি সব্বফলানি ৰেত্তকেতকখজ্জূরিকল়ীরাদযো সব্বকল়ীরে মচ্ছমংসখণ্ডানি অনেকানি চ মধুফাণিতসিন্ধৰলোণনিকটুকাদীনি ভেসজ্জানি পক্খিপিত্ৰা কুম্ভিমুখং লিম্পিত্ৰা একং ৰা দ্ৰে ৰা তীণি ৰা সংৰচ্ছরানি ঠপেন্তি, তং পরিপচ্চিত্ৰা জম্বুরসৰণ্ণং হোতি. ৰাতকাসকুট্ঠপণ্ডুভগন্দরাদীনং সিনিদ্ধভোজনং ভুত্তানঞ্চ উত্তরপানং ভত্তজীরণকভেসজ্জং তাদিসং নত্থি. তং পনেতং ভিক্খূনং পচ্ছাভত্তম্পি ৰট্টতি, গিলানানং পাকতিকমেৰ, অগিলানানং পন উদকসম্ভিন্নং পানপরিভোগেনাতি.

সমন্তপাসাদিকায ৰিনযসংৰণ্ণনায

ততিযপারাজিকৰণ্ণনা নিট্ঠিতা.