সিক্খাসাজীৰপদভাজনীযৰণ্ণনা

ইদানি ‘‘ভিক্খূন’’ন্তি ইদং পদং ৰিসেসত্থাভাৰতো অৰিভজিত্ৰাৰ যং সিক্খঞ্চ সাজীৰঞ্চ সমাপন্নত্তা ভিক্খূনং সিক্খাসাজীৰসমাপন্নো হোতি, তং দস্সেন্তো সিক্খাতিআদিমাহ. তত্থ সিক্খিতব্বাতি সিক্খা. তিস্সোতি গণনপরিচ্ছেদো. অধিসীলসিক্খাতি অধিকং উত্তমং সীলন্তি অধিসীলং; অধিসীলঞ্চ তং সিক্খিতব্বতো সিক্খা চাতি অধিসীলসিক্খা. এস নযো অধিচিত্ত-অধিপঞ্ঞাসিক্খাসু.

কতমং পনেত্থ সীলং, কতমং অধিসীলং, কতমং চিত্তং, কতমং অধিচিত্তং, কতমা পঞ্ঞা, কতমা অধিপঞ্ঞাতি? ৰুচ্চতে – পঞ্চঙ্গদসঙ্গসীলং তাৰ সীলমেৰ. তঞ্হি বুদ্ধে উপ্পন্নেপি অনুপ্পন্নেপি লোকে পৰত্ততি. উপ্পন্নে বুদ্ধে তস্মিং সীলে বুদ্ধাপি সাৰকাপি মহাজনং সমাদপেন্তি. অনুপ্পন্নে বুদ্ধে পচ্চেকবুদ্ধা চ কম্মৰাদিনো চ ধম্মিকা সমণব্রাহ্মণা চক্কৰত্তী চ মহারাজানো মহাবোধিসত্তা চ সমাদপেন্তি. সামম্পি পণ্ডিতা সমণব্রাহ্মণা সমাদিযন্তি. তে তং কুসলং ধম্মং পরিপূরেত্ৰা দেৰেসু চ মনুস্সেসু চ সম্পত্তিং অনুভোন্তি. পাতিমোক্খসংৰরসীলং পন ‘‘অধিসীল’’ন্তি ৰুচ্চতি, তঞ্হি সূরিযো ৰিয পজ্জোতানং সিনেরু ৰিয পব্বতানং সব্বলোকিযসীলানং অধিকঞ্চেৰ উত্তমঞ্চ, বুদ্ধুপ্পাদেযেৰ চ পৰত্ততি, ন ৰিনা বুদ্ধুপ্পাদা. ন হি তং পঞ্ঞত্তিং উদ্ধরিত্ৰা অঞ্ঞো সত্তো ঠপেতুং সক্কোতি, বুদ্ধাযেৰ পন সব্বসো কাযৰচীদ্ৰারঅজ্ঝাচারসোতং ছিন্দিত্ৰা তস্স তস্স ৰীতিক্কমস্স অনুচ্ছৰিকং তং সীলসংৰরং পঞ্ঞপেন্তি. পাতিমোক্খসংৰরতোপি চ মগ্গফলসম্পযুত্তমেৰ সীলং অধিসীলং, তং পন ইধ অনধিপ্পেতং. ন হি তং সমাপন্নো ভিক্খু মেথুনং ধম্মং পটিসেৰতি.

কামাৰচরানি পন অট্ঠ কুসলচিত্তানি, লোকিযঅট্ঠসমাপত্তিচিত্তানি চ একজ্ঝং কত্ৰা চিত্তমেৰাতি ৰেদিতব্বানি. বুদ্ধুপ্পাদানুপ্পাদে চস্স পৰত্তি, সমাদপনং সমাদানঞ্চ সীলে ৰুত্তনযেনেৰ ৰেদিতব্বং. ৰিপস্সনাপাদকং অট্ঠসমাপত্তিচিত্তং পন ‘‘অধিচিত্ত’’ন্তি ৰুচ্চতি. তঞ্হি অধিসীলং ৰিয সীলানং সব্বলোকিযচিত্তানং অধিকঞ্চেৰ উত্তমঞ্চ, বুদ্ধুপ্পাদেযেৰ চ হোতি, ন ৰিনা বুদ্ধুপ্পাদা. ততোপি চ মগ্গফলচিত্তমেৰ অধিচিত্তং, তং পন ইধ অনধিপ্পেতং. ন হি তং সমাপন্নো ভিক্খু মেথুনং ধম্মং পটিসেৰতি.

‘‘অত্থি দিন্নং, অত্থি যিট্ঠ’’ন্তি (ধ. স. ১৩৭১; ৰিভ. ৭৯৩; ম. নি. ৩.৯২) -আদিনযপ্পৰত্তং পন কম্মস্সকতঞাণং পঞ্ঞা, সা হি বুদ্ধে উপ্পন্নেপি অনুপ্পন্নেপি লোকে পৰত্ততি. উপ্পন্নে বুদ্ধে তস্সা পঞ্ঞায বুদ্ধাপি বুদ্ধসাৰকাপি মহাজনং সমাদপেন্তি. অনুপ্পন্নে বুদ্ধে পচ্চেকবুদ্ধা চ কম্মৰাদিনো চ ধম্মিকা সমণব্রাহ্মণা চক্কৰত্তী চ মহারাজানো মহাবোধিসত্তা চ সমাদপেন্তি. সামম্পি পণ্ডিতা সত্তা সমাদিযন্তি. তথা হি অঙ্কুরো দসৰস্সসহস্সানি মহাদানং অদাসি. ৰেলামো, ৰেস্সন্তরো, অঞ্ঞে চ বহূ পণ্ডিতমনুস্সা মহাদানানি অদংসু. তে তং কুসলং ধম্মং পরিপূরেত্ৰা দেৰেসু চ মনুস্সেসু চ সম্পত্তিং অনুভৰিংসু. তিলক্খণাকারপরিচ্ছেদকং পন ৰিপস্সনাঞাণং ‘‘অধিপঞ্ঞা’’তি ৰুচ্চতি. সা হি অধিসীল-অধিচিত্তানি ৰিয সীলচিত্তানং সব্বলোকিযপঞ্ঞানং অধিকা চেৰ উত্তমা চ, ন চ ৰিনা বুদ্ধুপ্পাদা লোকে পৰত্ততি. ততোপি চ মগ্গফলপঞ্ঞাৰ অধিপঞ্ঞা, সা পন ইধ অনধিপ্পেতা. ন হি তং সমাপন্নো ভিক্খু মেথুনং ধম্মং পটিসেৰতীতি.

তত্রাতি তাসু তীসু সিক্খাসু. যাযং অধিসীলসিক্খাতি যা অযং পাতিমোক্খসীলসঙ্খাতা অধিসীলসিক্খা. এতং সাজীৰং নামাতি এতং সব্বম্পি ভগৰতা ৰিনযে ঠপিতং সিক্খাপদং, যস্মা এত্থ নানাদেসজাতিগোত্তাদিভেদভিন্না ভিক্খূ সহ জীৰন্তি একজীৰিকা সভাগজীৰিকা সভাগৰুত্তিনো হোন্তি, তস্মা ‘‘সাজীৰ’’ন্তি ৰুচ্চতি. তস্মিং সিক্খতীতি তং সিক্খাপদং চিত্তস্স অধিকরণং কত্ৰা ‘‘যথাসিক্খাপদং নু খো সিক্খামি ন সিক্খামী’’তি চিত্তেন ওলোকেন্তো সিক্খতি. ন কেৰলঞ্চাযমেতস্মিং সাজীৰসঙ্খাতে সিক্খাপদেযেৰ সিক্খতি, সিক্খাযপি সিক্খতি, ‘‘এতং সাজীৰং নামা’’তি ইমস্স পন অনন্তরস্স পদস্স ৰসেন ‘‘তস্মিং সিক্খতী’’তি ৰুত্তং. কিঞ্চাপি তং এৰং ৰুত্তং, অথ খো অযমেত্থ অত্থো দট্ঠব্বো – তস্সা চ সিক্খায সিক্খং পরিপূরেন্তো সিক্খতি, তস্মিঞ্চ সিক্খাপদে অৰীতিক্কমন্তো সিক্খতীতি. তেন ৰুচ্চতি সাজীৰসমাপন্নোতি ইদম্পি অনন্তরস্স সাজীৰপদস্সেৰ ৰসেন ৰুত্তং. যস্মা পন সো সিক্খম্পি সমাপন্নো, তস্মা সিক্খাসমাপন্নোতিপি অত্থতো ৰেদিতব্বো. এৰঞ্হি সতি ‘‘সিক্খাসাজীৰসমাপন্নো’’তি এতস্স পদস্স পদভাজনম্পি পরিপুণ্ণং হোতি.

সিক্খাসাজীৰপদভাজনীযং নিট্ঠিতং.