রাজপচ্চত্থিকাদিচতুক্কভেদকথা

৬৫. যস্মা পন ন ভিক্খুপচ্চত্থিকা এৰ এৰং করোন্তি, রাজপচ্চত্থিকাদযোপি করোন্তি. তস্মা তম্পি পভেদং দস্সেন্তো ‘‘রাজপচ্চত্থিকা’’তিআদিমাহ. তত্থ রাজানো এৰ পচ্চত্থিকা রাজপচ্চত্থিকা. তে চ সযং আনেন্তাপি অঞ্ঞেহি আণাপেন্তাপি আনেন্তিযেৰাতি ৰেদিতব্বা. চোরা এৰ পচ্চত্থিকা চোরপচ্চত্থিকা. ধুত্তাতি মেথুনুপসংহিতখিড্ডাপসুতা নাগরিককেরাটিযপুরিসা, ইত্থিধুত্তসুরাধুত্তাদযো ৰা; ধুত্তা এৰ পচ্চত্থিকা ধুত্তপচ্চত্থিকা. গন্ধন্তি হদযং ৰুচ্চতি, তং উপ্পাটেন্তীতি উপ্পলগন্ধা, উপ্পলগন্ধা এৰ পচ্চত্থিকা উপ্পলগন্ধপচ্চত্থিকা. এতে কির ন কসিৰণিজ্জাদীহি জীৰন্তি, পন্থঘাতগামঘাতাদীনি কত্ৰা পুত্তদারং পোসেন্তি. তে কম্মসিদ্ধিং পত্থযমানা দেৰতানং আযাচেত্ৰা তাসং বলিকম্মত্থং মনুস্সানং হদযং উপ্পাটেন্তি. সব্বকালে চ মনুস্সা দুল্লভা. ভিক্খূ পন অরঞ্ঞে ৰিহরন্তা সুলভা হোন্তি. তে সীলৰন্তং ভিক্খুং গহেত্ৰা ‘‘সীলৰতো ৰধো নাম ভারিযো হোতী’’তি মঞ্ঞমানা তস্স সীলৰিনাসনত্থং মনুস্সিত্থিআদিকে ৰা আনেন্তি; তং ৰা তত্থ নেন্তি. অযমেত্থ ৰিসেসো. সেসং ৰুত্তনযেনেৰ ৰেদিতব্বং. ভিক্খুপচ্চত্থিকৰারে ৰুত্তনযেনেৰ চ ইমেসু চতূসুপি ৰারেসু চতুক্কানি ৰেদিতব্বানি. পাল়িযং পন সংখিত্তেন ৰুত্তানি.

সব্বাকারেন চতুক্কভেদকথা নিট্ঠিতা.