আপত্তানাপত্তিৰারৰণ্ণনা

৬৬. ইদানি যং ৰুত্তং ‘‘মনুস্সিত্থিযা তযো মগ্গে মেথুনং ধম্মং পটিসেৰন্তস্সা’’তিআদি, এত্থ অসম্মোহত্থং ‘‘মগ্গেন মগ্গ’’ন্তিআদিমাহ. তত্থ মগ্গেন মগ্গন্তি ইত্থিযা তীসু মগ্গেসু অঞ্ঞতরেন মগ্গেন অত্তনো অঙ্গজাতং পৰেসেতি অথ ৰা সম্ভিন্নেসু দ্ৰীসু মগ্গেসু পস্সাৰমগ্গেন ৰচ্চমগ্গং ৰচ্চমগ্গেন ৰা পস্সাৰমগ্গং পৰেসেতি. মগ্গেন অমগ্গন্তি পস্সাৰাদিমগ্গেন পৰেসেত্ৰা তস্স সামন্তা ৰণেন নীহরতি. অমগ্গেন মগ্গন্তি মগ্গসামন্তেন ৰণেন পৰেসেত্ৰা মগ্গেন নীহরতি. অমগ্গেন অমগ্গন্তি দ্ৰীসু সম্ভিন্নৰণেসু একেন ৰণেন পৰেসেত্ৰা দুতিযেন নীহরতি. ইমস্স সুত্তস্স অনুলোমৰসেন সব্বত্থ ৰণসঙ্খেপে থুল্লচ্চযং ৰেদিতব্বং.

ইদানি যং পরতো ৰক্খতি ‘‘অনাপত্তি অজানন্তস্স অসাদিযন্তস্সা’’তি, তত্থ অসম্মোহত্থং ‘‘ভিক্খু সুত্তভিক্খুম্হী’’তিআদিমাহ. তত্রাযং অধিপ্পাযো – যো পটিবুদ্ধো সাদিযতি সো ‘‘সুত্তম্হি মযি এসো ৰিপ্পটিপজ্জি, নাহং জানামী’’তি ন মুচ্চতি. উভো নাসেতব্বাতি চেত্থ দ্ৰেপি লিঙ্গনাসনেন নাসেতব্বা. তত্র দূসকস্স পটিঞ্ঞাকরণং নত্থি, দূসিতো পুচ্ছিত্ৰা পটিঞ্ঞায নাসেতব্বো. সচে ন সাদিযতি, ন নাসেতব্বো. এস নযো সামণেরৰারেপি.

এৰং তত্থ তত্থ তং তং আপত্তিঞ্চ অনাপত্তিঞ্চ দস্সেত্ৰা ইদানি অনাপত্তিমেৰ দস্সেন্তো ‘‘অনাপত্তি অজানন্তস্সা’’তিআদিমাহ. তত্থ অজানন্তো নাম যো মহানিদ্দং ওক্কন্তো পরেন কতং উপক্কমম্পি ন জানাতি ৰেসালিযং মহাৰনে দিৰাৰিহারগতো ভিক্খু ৰিয. এৰরূপস্স অনাপত্তি. ৰুত্তম্পি চেতং – ‘‘‘নাহং ভগৰা জানামী’তি; ‘অনাপত্তি, ভিক্খু, অজানন্তস্সা’’’তি (পারা. ৭৫). অসাদিযন্তো নাম যো জানিত্ৰাপি ন সাদিযতি, তত্থেৰ সহসা ৰুট্ঠিতভিক্খু ৰিয. ৰুত্তম্পি চেতং – ‘‘‘নাহং ভগৰা সাদিযি’ন্তি. ‘অনাপত্তি, ভিক্খু, অসাদিযন্তস্সা’’তি.

উম্মত্তকো নাম পিত্তুম্মত্তকো. দুৰিধঞ্হি পিত্তং – বদ্ধপিত্তং, অবদ্ধপিত্তঞ্চাতি. তত্থ অবদ্ধপিত্তং লোহিতং ৰিয সব্বঙ্গগতং, তম্হি কুপিতে সত্তানং কণ্ডুকচ্ছুসরীরকম্পাদীনি হোন্তি. তানি ভেসজ্জকিরিযায ৰূপসমন্তি. বদ্ধপিত্তং পন পিত্তকোসকে ঠিতং. তম্হি কুপিতে সত্তা উম্মত্তকা হোন্তি ৰিপল্লত্থসঞ্ঞা হিরোত্তপ্পং ছড্ডেত্ৰা অসারুপ্পাচারং চরন্তি. লহুকগরুকানি সিক্খাপদানি মদ্দন্তাপি ন জানন্তি. ভেসজ্জকিরিযাযপি অতেকিচ্ছা হোন্তি. এৰরূপস্স উম্মত্তকস্স অনাপত্তি.

খিত্তচিত্তো নাম ৰিস্সট্ঠচিত্তো যক্খুম্মত্তকো ৰুচ্চতি. যক্খা কির ভেরৰানি ৰা আরম্মণানি দস্সেত্ৰা মুখেন হত্থং পৰেসেত্ৰা হদযরূপং ৰা মদ্দন্তা সত্তে ৰিক্খিত্তচিত্তে ৰিপল্লত্থসঞ্ঞে করোন্তি. এৰরূপস্স খিত্তচিত্তস্স অনাপত্তি. তেসং পন উভিন্নং অযং ৰিসেসো – পিত্তুম্মত্তকো নিচ্চমেৰ উম্মত্তকো হোতি, পকতিসঞ্ঞং ন লভতি. যক্খুম্মত্তকো অন্তরন্তরা পকতিসঞ্ঞং পটিলভতীতি. ইধ পন পিত্তুম্মত্তকো ৰা হোতু যক্খুম্মত্তকো ৰা, যো সব্বসো মুট্ঠস্সতি কিঞ্চি ন জানাতি, অগ্গিম্পি সুৰণ্ণম্পি গূথম্পি চন্দনম্পি একসদিসং মদ্দন্তোৰ ৰিচরতি, এৰরূপস্স অনাপত্তি. অন্তরন্তরা সঞ্ঞং পটিলভিত্ৰা ঞত্ৰা করোন্তস্স পন আপত্তিযেৰ.

ৰেদনাট্টো নাম যো অধিমত্তায দুক্খৰেদনায আতুরো কিঞ্চি ন জানাতি, এৰরূপস্স অনাপত্তি.

আদিকম্মিকো নাম যো তস্মিং তস্মিং কম্মে আদিভূতো. ইধ পন সুদিন্নত্থেরো আদিকম্মিকো, তস্স অনাপত্তি. অৰসেসানং মক্কটীসমণৰজ্জিপুত্তকাদীনং আপত্তিযেৰাতি.

পদভাজনীযৰণ্ণনা নিট্ঠিতা.