৫. চিত্তাগারৰগ্গো

১. পঠমসিক্খাপদৰণ্ণনা

৯৭৮. চিত্তাগারৰগ্গস্স পঠমসিক্খাপদে – রাজাগারন্তি রঞ্ঞো কীল়নঘরং. চিত্তাগারন্তি কীল়নচিত্তসালং. আরামন্তি কীল়নউপৰনং. উয্যানন্তি কীল়নুয্যানং. পোক্খরণীন্তি কীল়নপোক্খরণিং. তস্মাযেৰ পদভাজনে ‘‘যত্থ কত্থচি রঞ্ঞো কীল়িতু’’ন্তিআদি ৰুত্তং. দস্সনায গচ্ছতি আপত্তি দুক্কটস্সাতি এত্থ পদৰারগণনায দুক্কটং. যত্থ ঠিতা পস্সতীতি এত্থ পন সচে একস্মিংযেৰ ঠানে ঠিতা পদং অনুদ্ধরমানা পঞ্চপি পস্সতি, একমেৰ পাচিত্তিযং. তং তং দিসাভাগং ওলোকেত্ৰা পস্সন্তিযা পন পাটেক্কা আপত্তিযো. ভিক্খুস্স পন সব্বত্থ দুক্কটং.

৯৮১. আরামে ঠিতাতি অজ্ঝারামে রাজাগারাদীনি করোন্তি, তানি পস্সন্তিযা অনাপত্তি. গচ্ছন্তী ৰা আগচ্ছন্তী ৰাতি পিণ্ডপাতাদীনং অত্থায গচ্ছন্তিযা মগ্গো হোতি, তানি পস্সতি, অনাপত্তি. সতি করণীযে গন্ত্ৰাতি রঞ্ঞো সন্তিকং কেনচি করণীযেন গন্ত্ৰা পস্সতি, অনাপত্তি. আপদাসূতি কেনচি উপদ্দুতা পৰিসিত্ৰা পস্সতি, অনাপত্তি. সেসং উত্তানমেৰ.

এল়কলোমসমুট্ঠানং – কিরিযং, নোসঞ্ঞাৰিমোক্খং, অচিত্তকং, লোকৰজ্জং, কাযকম্মং, অকুসলচিত্তং, তিৰেদনন্তি.

পঠমসিক্খাপদং.

২. দুতিযসিক্খাপদৰণ্ণনা

৯৮২. দুতিযে – অভিনিসীদনাভিনিপজ্জনেসু পযোগগণনায আপত্তিযো ৰেদিতব্বা. সেসং উত্তানমেৰ.

এল়কলোমসমুট্ঠানং – কিরিযং, নোসঞ্ঞাৰিমোক্খং, অচিত্তকং, পণ্ণত্তিৰজ্জং, কাযকম্মং, তিচিত্তং, তিৰেদনন্তি.

দুতিযসিক্খাপদং.

৩. ততিযসিক্খাপদৰণ্ণনা

৯৮৮. ততিযে – উজ্জৰুজ্জৰেতি যত্তকং হত্থেন অঞ্ছিতং হোতি, তস্মিং তক্কম্হি ৰেঠিতে একা আপত্তি. কন্তনতো পন পুব্বে কপ্পাসৰিচিননং আদিং কত্ৰা সব্বপযোগেসু হত্থৰারগণনায দুক্কটং.

৯৮৯. কন্তিতসুত্তন্তি দসিকসুত্তাদিং সঙ্ঘাটেত্ৰা কন্ততি, দুক্কন্তিতং ৰা পটিকন্ততি. সেসং উত্তানমেৰ. এল়কলোমসমুট্ঠানং – কিরিযং, নোসঞ্ঞাৰিমোক্খং, অচিত্তকং, পণ্ণত্তিৰজ্জং, কাযকম্মং, তিচিত্তং, তিৰেদনন্তি.

ততিযসিক্খাপদং.

৪. চতুত্থসিক্খাপদৰণ্ণনা

৯৯২. চতুত্থে – যাগুং ৰাতিআদীসু তণ্ডুলকোট্টনং আদিং কত্ৰা সব্বেসু পুব্বপযোগেসু পযোগগণনায দুক্কটং. যাগুভত্তেসু ভাজনগণনায, খাদনীযাদীসু রূপগণনায পাচিত্তিযানি.

৯৯৩. যাগুপানেতি মনুস্সেহি সঙ্ঘস্সত্থায করিযমানে যাগুপানে ৰা সঙ্ঘভত্তে ৰা তেসং সহাযিকভাৰেন যংকিঞ্চি পচন্তিযা অনাপত্তি. চেতিযপূজায সহাযিকা হুত্ৰা গন্ধাদীনি পূজেতি, ৰট্টতি. অত্তনো ৰেয্যাৰচ্চকরস্সাতি সচেপি মাতাপিতরো আগচ্ছন্তি, যংকিঞ্চি বীজনিং ৰা সম্মুঞ্জনিদণ্ডকং ৰা কারাপেত্ৰা ৰেয্যাৰচ্চকরট্ঠানে ঠপেত্ৰাৰ যংকিঞ্চি পচিতুং ৰট্টতি. সেসং উত্তানমেৰ. সমুট্ঠানাদীনি ততিযসদিসানেৰাতি.

চতুত্থসিক্খাপদং.

৫. পঞ্চমসিক্খাপদৰণ্ণনা

৯৯৬. পঞ্চমে – অসতি অন্তরাযেতি দসৰিধে অন্তরাযে অসতি. ধুরং নিক্খিপিত্ৰা পচ্ছা ৰিনিচ্ছিনন্তী আপত্তিং আপজ্জিত্ৰাৰ ৰিনিচ্ছিনাতি.

৯৯৮. পরিযেসিত্ৰা ন লভতীতি সহাযিকা ভিক্খুনিযো ন লভতি. সেসং উত্তানমেৰ. ধুরনিক্খেপসমুট্ঠানং – অকিরিযং, সঞ্ঞাৰিমোক্খং, সচিত্তকং, লোকৰজ্জং, কাযকম্মং, ৰচীকম্মং, অকুসলচিত্তং দুক্খৰেদনন্তি.

পঞ্চমসিক্খাপদং.

৬. ছট্ঠসিক্খাপদৰণ্ণনা

৯৯৯. ছট্ঠে – সব্বং নগ্গৰগ্গে আগারিকসিক্খাপদে ৰুত্তনযেনেৰ ৰেদিতব্বং. অযং পন ৰিসেসো, তং ছসমুট্ঠানং. ইদং ‘‘সহত্থা’’তি ৰুত্তত্তা এল়কলোমসমুট্ঠানং, কিরিযং, নোসঞ্ঞাৰিমোক্খং, অচিত্তকং, পণ্ণত্তিৰজ্জং, কাযকম্মং, তিচিত্তং, তিৰেদনন্তি.

ছট্ঠসিক্খাপদং.

৭. সত্তমসিক্খাপদৰণ্ণনা

১০০৭. সত্তমে – পুন পরিযাযেনাতি পুনৰারে. আপদাসূতি মহগ্ঘচীৰরং সরীরতো মোচেত্ৰা সুপটিসামিতম্পি চোরা হরন্তি, এৰরূপাসু আপদাসু অনিস্সজ্জিত্ৰা নিৰাসেন্তিযা অনাপত্তি. সেসং উত্তানমেৰাতি.

কথিনসমুট্ঠানং – কাযৰাচতো কাযৰাচাচিত্ততো চ সমুট্ঠাতি, কিরিযাকিরিযং, নোসঞ্ঞাৰিমোক্খং, অচিত্তকং, পণ্ণত্তিৰজ্জং কাযকম্মং, ৰচীকম্মং, তিচিত্তং, তিৰেদনন্তি.

সত্তমসিক্খাপদং.

৮. অট্ঠমসিক্খাপদৰণ্ণনা

১০০৮. অট্ঠমে – অনিস্সজ্জিত্ৰাতি রক্খণত্থায অদত্ৰা; ‘‘ইমং জগ্গেয্যাসী’’তি এৰং অনাপুচ্ছিত্ৰাতি অত্থো.

১০১২. পরিযেসিত্ৰা ন লভতীতি পটিজগ্গিকং ন লভতি. গিলানাযাতি ৰচীভেদং কাতুং অসমত্থায. আপদাসূতি রট্ঠে ভিজ্জন্তে আৰাসে ছড্ডেত্ৰা গচ্ছন্তি, এৰরূপাসু আপদাসু অনাপত্তি. সেসং উত্তানমেৰ. সমুট্ঠানাদীনি অনন্তরসিক্খাপদসদিসানেৰাতি.

অট্ঠমসিক্খাপদং.

৯. নৰমসিক্খাপদৰণ্ণনা

১০১৫-৬. নৰমে – বাহিরকং অনত্থসংহিতন্তি হত্থিঅস্সরথধনুথরুসিপ্পআথব্বণখীলনৰসীকরণসোসাপনমন্তাগদপ্পযোগাদিভেদং পরূপঘাতকরং. পরিত্তন্তি যক্খপরিত্তনাগমণ্ডলাদিভেদং সব্বম্পি ৰট্টতি. সেসং উত্তানমেৰ.

পদসোধম্মসমুট্ঠানং – ৰাচতো ৰাচাচিত্ততো চ সমুট্ঠাতি, কিরিযং, নোসঞ্ঞাৰিমোক্খং, অচিত্তকং, পণ্ণত্তিৰজ্জং, ৰচীকম্মং, তিচিত্তং, তিৰেদনন্তি.

নৰমসিক্খাপদং.

১০. দসমসিক্খাপদৰণ্ণনা

১০১৮. দসমে ৰাচেয্যাতি পদং ৰিসেসো, সেসং নৰমে ৰুত্তনযেনেৰ ৰেদিতব্বং সদ্ধিং সমুট্ঠানাদীহীতি.

দসমসিক্খাপদং.

চিত্তাগারৰগ্গো পঞ্চমো.