৩. নিস্সগ্গিযকণ্ডং (ভিক্খুনীৰিভঙ্গৰণ্ণনা)

পঠমনিস্সগ্গিযপাচিত্তিযসিক্খাপদৰণ্ণনা

তিংস নিস্সগ্গিযা ধম্মা, ভিক্খুনীনং পকাসিতা;

যে তেসং দানি ভৰতি, অযং সংৰণ্ণনাক্কমো.

৭৩৩. আমত্তিকাপণন্তি অমত্তানি ৰুচ্চন্তি ভাজনানি; তানি যে ৰিক্কিণন্তি, তে ৰুচ্চন্তি আমত্তিকা; তেসং আপণো আমত্তিকাপণো; তং ৰা পসারেস্সন্তীতি অত্থো.

৭৩৪. পত্তসন্নিচযং করেয্যাতি পত্তসন্নিধিং করেয্য; একাহং অনধিট্ঠহিত্ৰা ৰা অৰিকপ্পেত্ৰা ৰা পত্তং ঠপেয্যাতি অত্থো. সেসং মহাৰিভঙ্গে ৰুত্তনযেনেৰ ৰেদিতব্বং. অযমেৰ হি ৰিসেসো – তত্থ দসাহং পরিহারো, ইধ একাহম্পি নত্থি. সেসং তাদিসমেৰ.

ইদম্পি কথিনসমুট্ঠানং – কাযৰাচতো কাযৰাচাচিত্ততো চ সমুট্ঠাতি, অকিরিযং, নোসঞ্ঞাৰিমোক্খং, অচিত্তকং, পণ্ণত্তিৰজ্জং, কাযকম্মং, ৰচীকম্মং, তিচিত্তং, তিৰেদনন্তি.

পঠমসিক্খাপদং.

দুতিযনিস্সগ্গিযপাচিত্তিযসিক্খাপদৰণ্ণনা

৭৩৮. দুতিযে – দুচ্চোল়াতি ৰিরূপচোল়া; জিণ্ণচোল়াতি অত্থো. অপয্যাহীতি অপি অয্যাহি.

৭৪০. আদিস্স দিন্নন্তি সম্পত্তা ভাজেন্তূতি ৰত্ৰাপি ইদং গণস্স ইদং তুম্হাকং দম্মীতি ৰত্ৰা ৰা দাতুকম্যতায পাদমূলে ঠপেত্ৰা ৰা দিন্নম্পি আদিস্স দিন্নং নাম হোতি. এতং সব্বম্পি অকালচীৰরং. অয্যায দম্মীতি এৰং পটিলদ্ধং পন যথাদানেযেৰ উপনেতব্বং. সেসং উত্তানমেৰ.

তিসমুট্ঠানং – কিরিযং, সঞ্ঞাৰিমোক্খং, সচিত্তকং, লোকৰজ্জং, কাযকম্মং, ৰচীকম্মং, অকুসলচিত্তং, তিৰেদনন্তি.

দুতিযসিক্খাপদং.

ততিযনিস্সগ্গিযপাচিত্তিযসিক্খাপদৰণ্ণনা

৭৪৩-৫. ততিযে – হন্দাতি গণ্হ. সযং অচ্ছিন্দতীতি একং দত্ৰা একং অচ্ছিন্দন্তিযা একং নিস্সগ্গিযং, বহূসু বহূনি. সচে সংহরিত্ৰা ঠপিতানি একতো অচ্ছিন্দতি, ৰত্থুগণনায আপত্তিযো. বন্ধিত্ৰা ঠপিতেসু পন একাৰ আপত্তি. সেসং উত্তানমেৰ.

তিসমুট্ঠানং – কিরিযং, সঞ্ঞাৰিমোক্খং, সচিত্তকং, লোকৰজ্জং, কাযকম্মং, ৰচীকম্মং, অকুসলচিত্তং, দুক্খৰেদনন্তি.

ততিযসিক্খাপদং.

চতুত্থনিস্সগ্গিযপাচিত্তিযসিক্খাপদৰণ্ণনা

৭৪৮. চতুত্থে – কযেনাতি মূলেন. ন মে আৰুসো সপ্পিনা অত্থো; তেলেন মে অত্থোতি ইদং কির সা আহটসপ্পিং দত্ৰা তেলম্পি আহরিস্সতীতি মঞ্ঞমানা আহ. ৰিঞ্ঞাপেত্ৰাতি জানাপেত্ৰা; ইদং নাম আহরাতি যাচিত্ৰা ৰা.

৭৫২. তঞ্ঞেৰ ৰিঞ্ঞাপেতীতি যং পঠমং ৰিঞ্ঞত্তং তং থোকং নপ্পহোতি, তস্মা পুন তঞ্ঞেৰ ৰিঞ্ঞাপেতীতি অত্থো. অঞ্ঞঞ্চ ৰিঞ্ঞাপেতীতি সচে পঠমং সপ্পিৰিঞ্ঞত্তং, যমকং পচিতব্বন্তি চ ৰেজ্জেন ৰুত্তত্তা তেলেন অত্থো হোতি, ততো তেলেনাপি মে অত্থোতি এৰং অঞ্ঞঞ্চ ৰিঞ্ঞাপেতি. আনিসংসং দস্সেত্ৰাতি সচে কহাপণস্স সপ্পি আভতং হোতি, ইমিনা মূলেন দিগুণং তেলং লব্ভতি, তেনাপি চ ইদং কিচ্চং নিপ্ফজ্জতি, তস্মা তেলং আহরাতি এৰং আনিসংসং দস্সেত্ৰা ৰিঞ্ঞাপেতীতি. সেসং উত্তানমেৰ.

ছসমুট্ঠানং – কিরিযং, নোসঞ্ঞাৰিমোক্খং, অচিত্তকং, পণ্ণত্তিৰজ্জং, কাযকম্মং, ৰচীকম্মং, তিচিত্তং, তিৰেদনন্তি.

চতুত্থসিক্খাপদং.

পঞ্চমনিস্সগ্গিযপাচিত্তিযসিক্খাপদৰণ্ণনা

৭৫৩. পঞ্চমে – ন মে সিক্খমানেতি ইদং কির সা কুলধীতা ‘‘অযং অদ্ধা এৰং ৰুত্তা ইদং তেলং ঠপেত্ৰা সপ্পিম্পি মে অত্তনো কুলঘরা আহরিস্সতী’’তি মঞ্ঞমানা আহ. চেতাপেত্ৰাতি জানাপেত্ৰা ইচ্চেৰ অত্থো. সেসং সব্বত্থ চতুত্থসদিসমেৰাতি.

পঞ্চমসিক্খাপদং.

ছট্ঠনিস্সগ্গিযপাচিত্তিযসিক্খাপদৰণ্ণনা

৭৫৮. ছট্ঠে – ছন্দকন্তি ‘‘ইদং নাম ধম্মকিচ্চং করিস্সাম, যং সক্কোথ; তং দেথা’’তি এৰং পরেসং ছন্দঞ্চ রুচিঞ্চ উপ্পাদেত্ৰা গহিতপরিক্খারস্সেতং অধিৰচনং. অঞ্ঞদত্থিকেনাতি অঞ্ঞস্সত্থায দিন্নেন. অঞ্ঞুদ্দিসিকেনাতি অঞ্ঞং উদ্দিসিত্ৰা দিন্নেন. সঙ্ঘিকেনাতি সঙ্ঘস্স পরিচ্চত্তেন.

৭৬২. সেসকং উপনেতীতি যদত্থায দিন্নো, তং চেতাপেত্ৰা অৰসেসং অঞ্ঞস্সত্থায উপনেতি. সামিকে অপলোকেত্ৰাতি ‘‘তুম্হেহি চীৰরত্থায দিন্নো, অম্হাকঞ্চ চীৰরং অত্থি, তেলাদীহি পন অত্থো’’তি এৰং আপুচ্ছিত্ৰা উপনেতি. আপদাসূতি তথারূপেসু উপদ্দৰেসু; ভিক্খুনিযো ৰিহারং ছড্ডেত্ৰা পক্কমন্তি, এৰরূপাসু আপদাসু যং ৰা তং ৰা চেতাপেতুং ৰট্টতি. সেসং উত্তানমেৰ.

ছসমুট্ঠানং – কিরিযাকিরিযং, নোসঞ্ঞাৰিমোক্খং, অচিত্তকং, পণ্ণত্তিৰজ্জং, কাযকম্মং, ৰচীকম্মং, তিচিত্তং, তিৰেদনন্তি.

ছট্ঠসিক্খাপদং.

সত্তমনিস্সগ্গিযপাচিত্তিযসিক্খাপদৰণ্ণনা

৭৬৪. সত্তমে – সঞ্ঞাচিকেনাতি সযং যাচিতকেন. এতদেৰেত্থ নানাকরণং. সেসং ছট্ঠসদিসমেৰাতি.

সত্তমসিক্খাপদং.

অট্ঠমনিস্সগ্গিযপাচিত্তিযসিক্খাপদৰণ্ণনা

৭৬৯. অট্ঠমে – মহাজনিকেনাতি গণস্স পরিচ্চত্তেন. এতদেৰেত্থ নানাকরণং.

অট্ঠমসিক্খাপদং.

নৰমনিস্সগ্গিযপাচিত্তিযসিক্খাপদৰণ্ণনা

৭৭৪. নৰমসিক্খাপদে – সঞ্ঞাচিকেনাতি ইদং পদং ইতো অধিকতরং.

নৰমসিক্খাপদং.

দসমনিস্সগ্গিযপাচিত্তিযসিক্খাপদৰণ্ণনা

৭৭৮. দসমে – পরিৰেণং উন্দ্রিযতীতি পরিৰেণং ৰিনস্সতি; পরিপততীতি অত্থো. ইদঞ্চ পদং পুগ্গলিকেন সঞ্ঞাচিকেনাতি ইদঞ্চ এত্তকমেৰ নানাকরণং. সেসং পুব্বসদিসমেৰাতি.

দসমসিক্খাপদং.

একাদসমনিস্সগ্গিযপাচিত্তিযসিক্খাপদৰণ্ণনা

৭৮৪. একাদসমে – গরুপাৰুরণন্তি সীতকালে পাৰুরণং. চতুক্কংসপরমন্তি এত্থ কংসো নাম চতুক্কহাপণিকো হোতি; তস্মা পদভাজনে ‘‘সোল়সকহাপণগ্ঘনক’’ন্তি ৰুত্তং.

একাদসমসিক্খাপদং.

দ্ৰাদসমনিস্সগ্গিযপাচিত্তিযসিক্খাপদৰণ্ণনা

৭৮৯. দ্ৰাদসমে – লহুপাৰুরণন্তি উণ্হকালে পাৰুরণং. সেসং সিক্খাপদদ্ৰযেপি উত্তানমেৰ.

ছসমুট্ঠানং – কিরিযং, নোসঞ্ঞাৰিমোক্খং, অচিত্তকং, পণ্ণত্তিৰজ্জং, কাযকম্মং, ৰচীকম্মং, তিচিত্তং, তিৰেদনন্তি.

দ্ৰাদসমসিক্খাপদং.

উদ্দিট্ঠা খো অয্যাযো তিংস নিস্সগ্গিযা পাচিত্তিযা ধম্মাতি এত্থ মহাৰিভঙ্গে চীৰরৰগ্গতো ধোৰনঞ্চ পটিগ্গহণঞ্চাতি দ্ৰে সিক্খাপদানি অপনেত্ৰা অকালচীৰরং কালচীৰরন্তি অধিট্ঠহিত্ৰা ভাজিতসিক্খাপদেন চ পরিৰত্তেত্ৰা অচ্ছিন্নচীৰরেন চ পঠমৰগ্গো পূরেতব্বো. পুন এল়কলোমৰগ্গস্স আদিতো সত্ত সিক্খাপদানি অপনেত্ৰা সত্ত অঞ্ঞদত্থিকানি পক্খিপিত্ৰা দুতিযৰগ্গো পূরেতব্বো. ততিযৰগ্গতো পঠমপত্তং ৰস্সিকসাটিকং আরঞ্ঞকসিক্খাপদন্তি ইমানি তীণি অপনেত্ৰা পত্তসন্নিচযগরুপাৰুরণলহুপাৰুরণসিক্খাপদেহি ততিযৰগ্গো পূরেতব্বো. ইতি ভিক্খুনীনং দ্ৰাদস সিক্খাপদানি একতোপঞ্ঞত্তানি, অট্ঠারস উভতোপঞ্ঞত্তানীতি এৰং সব্বেপি পাতিমোক্খুদ্দেসমগ্গেন ‘‘উদ্দিট্ঠা খো অয্যাযো তিংস নিস্সগ্গিযা পাচিত্তিযা ধম্মা’’তি এৰমেত্থ অত্থো দট্ঠব্বো. সেসং ৰুত্তনযমেৰাতি.

সমন্তপাসাদিকায ৰিনযসংৰণ্ণনায ভিক্খুনীৰিভঙ্গে

তিংসকৰণ্ণনা নিট্ঠিতা.

নিস্সগ্গিযকণ্ডং নিট্ঠিতং.