৮. দুব্বণ্ণকরণসিক্খাপদৰণ্ণনা

৩৬৮-৯. অট্ঠমে – নৰং পন ভিক্খুনা চীৰরলাভেনাতি এত্থ অলভীতি লভো; লভোযেৰ লাভো. কিং অলভি? চীৰরং. কীদিসং? নৰং. ইতি ‘‘নৰচীৰরলাভেনা’’তি ৰত্তব্বে অনুনাসিকলোপং অকত্ৰা ‘‘নৰচীৰরলাভেনা’’তি ৰুত্তং; পটিলদ্ধনৰচীৰরেনাতি অত্থো. মজ্ঝে ঠিতপদদ্ৰযে পনাতি নিপাতো. ভিক্খুনাতি যেন লদ্ধং তস্স নিদস্সনং. পদভাজনে পন ব্যঞ্জনং অনাদিযিত্ৰা যং লদ্ধং তং দস্সেতুং ‘‘চীৰরং নাম ছন্নং চীৰরান’’ন্তিআদি ৰুত্তং. চীৰরন্তি এত্থ যং নিৰাসেতুং ৰা পারুপিতুং ৰা সক্কা হোতি, তদেৰ ৰেদিতব্বং. তেনেৰ ‘‘ৰিকপ্পনুপগপচ্ছিম’’ন্তি ন ৰুত্তং. কংসনীলন্তি চম্মকারনীলং. মহাপচ্চরিযং পন ‘‘অযোমলং লোহমলং এতং কংসনীলং নামা’’তি ৰুত্তং. পলাসনীলন্তি যো কোচি নীলৰণ্ণো পণ্ণরসো. দুব্বণ্ণকরণং আদাতব্বন্তি এতং কপ্পবিন্দুং সন্ধায ৰুত্তং; ন নীলাদীহি সকলচীৰরস্স দুব্বণ্ণকরণং. তঞ্চ পন কপ্পং আদিযন্তেন চীৰরং রজিত্ৰা চতূসু ৰা কোণেসু তীসু ৰা দ্ৰীসু ৰা একস্মিং ৰা কোণে মোরস্স অক্খিমণ্ডলমত্তং ৰা মঙ্কুলপিট্ঠিমত্তং ৰা আদাতব্বং. মহাপচ্চরিযং ‘‘পত্তে ৰা গণ্ঠিযং ৰা ন ৰট্টতী’’তি ৰুত্তং. মহাঅট্ঠকথাযং পন ‘‘ৰট্টতিযেৰা’’তি ৰুত্তং. পাল়িকপ্পকণ্ণিককপ্পাদযো পন সব্বত্থ পটিসিদ্ধা, তস্মা ঠপেত্ৰা একং ৰট্টবিন্দুং অঞ্ঞেন কেনচিপি ৰিকারেন কপ্পো ন কাতব্বো.

৩৭১. অগ্গল়েতিআদীসু এতানি অগ্গল়াদীনি কপ্পকতচীৰরে পচ্ছা আরোপেত্ৰা কপ্পকরণকিচ্চং নত্থি. সেসং উত্তানমেৰ. এল়কলোমসমুট্ঠানং – কিরিযাকিরিযং, নোসঞ্ঞাৰিমোক্খং, অচিত্তকং, পণ্ণত্তিৰজ্জং; কাযকম্মং, তিচিত্তং, তিৰেদনন্তি.

দুব্বণ্ণকরণসিক্খাপদং অট্ঠমং.