৩. হসধম্মসিক্খাপদৰণ্ণনা

৩৩৫. ততিযে – অপ্পকতঞ্ঞুনোতি যং ভগৰতা পকতং পঞ্ঞত্তং, তং ন জানন্তীতি অত্থো.

৩৩৬. উদকে হসধম্মেতি উদককীল়িকা ৰুচ্চতি. উপরিগোপ্ফকেতি গোপ্ফকানং উপরিভাগপ্পমাণে. হসাধিপ্পাযোতি কীল়াধিপ্পাযো. নিমুজ্জতি ৰাতিআদীসু নিমুজ্জনত্থায ওরোহন্তস্স পদৰারে পদৰারে দুক্কটং. নিমুজ্জনুম্মুজ্জনেসু পযোগে পযোগে পাচিত্তিযং. নিমুজ্জিত্ৰা অন্তোউদকেযেৰ গচ্ছন্তস্স হত্থৰারপদৰারেসু সব্বত্থ পাচিত্তিযং. পলৰতীতি তরতি. হত্থেহি তরন্তস্স হত্থৰারে হত্থৰারে পাচিত্তিযং. পাদেসুপি এসেৰ নযো. যেন যেন অঙ্গেন তরতি, তস্স তস্স পযোগে পযোগে পাচিত্তিযং. তীরতো ৰা রুক্খতো ৰা উদকে পততি, পাচিত্তিযমেৰ. নাৰায কীল়তীতি ফিযারিত্তাদীহি নাৰং পাজেন্তো ৰা তীরে উস্সারেন্তো ৰা নাৰায কীল়তি, দুক্কটং.

হত্থেন ৰাতিআদীসুপি পযোগে পযোগে দুক্কটং. কেচি হত্থেন উদকে খিত্তায কথলায পতনুপ্পতনৰারেসু দুক্কটং ৰদন্তি, তং ন গহেতব্বং. তত্থ হি একপযোগত্তা একমেৰ দুক্কটং, অপিচ উপরিগোপ্ফকে ৰুত্তানি উম্মুজ্জনাদীনি ঠপেত্ৰা অঞ্ঞেন যেন কেনচি আকারেন উদকং ওতরিত্ৰা ৰা অনোতরিত্ৰা ৰা যত্থ কত্থচি ঠিতং উদকং অন্তমসো বিন্দুং গহেত্ৰা খিপনকীল়াযপি কীল়ন্তস্স দুক্কটমেৰ, অত্থজোতকং পন অক্খরং লিখিতুং ৰট্টতি, অযমেত্থ ৰিনিচ্ছযো. সেসমেত্থ উত্তানমেৰ.

পঠমপারাজিকসমুট্ঠানং – কিরিযং, সঞ্ঞাৰিমোক্খং, সচিত্তকং, লোকৰজ্জং, কাযকম্মং, অকুসলচিত্তং, তিৰেদনন্তি.

হসধম্মসিক্খাপদং ততিযং.