২. উয্যোজনসিক্খাপদৰণ্ণনা

২৭৪. দুতিযসিক্খাপদে – পটিক্কমনেপীতি আসনসালাযম্পি. ভত্তৰিস্সগ্গন্তি ভত্তকিচ্চং. ন সম্ভাৰেসীতি ন পাপুণি.

২৭৬. অনাচারন্তি ৰুত্তাৰসেসং কাযৰচীদ্ৰারৰীতিক্কমং. দস্সনূপচারং ৰা সৰনূপচারং ৰা ৰিজহন্তস্সাতি এত্থ যদি ঠিতো ৰা নিসিন্নো ৰা উয্যোজেতি; যো উয্যোজিতো, সো ৰিজহতি, তস্স চ আপত্তি নাম নত্থি. তস্মিং পন ৰিজহন্তেপি অত্থতো ইতরেন ৰিজহিতমেৰ হোতি. তস্মা যো উয্যোজেতি, তস্সেৰাযং আপত্তি. তত্থ সচে উপচারব্ভন্তরে একো পাদো হোতি, দুক্কটং. সীমাতিক্কমে পাচিত্তিযং. এত্থ চ দস্সনূপচারস্স অব্ভোকাসে দ্ৰাদসহত্থপ্পমাণং, তথা সৰনূপচারস্স. সচে পন অন্তরা কুট্টদ্ৰারপাকারাদযো হোন্তি, তেহি অন্তরিতভাৰো দস্সনূপচারাতিক্কমো, তস্স ৰসেন আপত্তি ৰেদিতব্বা. ন অঞ্ঞো কোচি পচ্চযো হোতীতি ঠপেত্ৰা ৰুত্তপ্পকারমনাচারং অঞ্ঞং কিঞ্চি কারণং ন হোতি.

২৭৭. কলিসাসনং আরোপেতীতি ‘‘কলী’’তি কোধো; তস্স সাসনং আরোপেতি; কোধস্স আণং আরোপেতি; কোধৰসেন ঠাননিসজ্জাদীসু দোসং দস্সেত্ৰা ‘‘পস্সথ ভো ইমস্স ঠানং, নিসজ্জং আলোকিতং ৰিলোকিতং খাণুকো ৰিয তিট্ঠতি, সুনখো ৰিয নিসীদতি, মক্কটো ৰিয ইতো চিতো চ ৰিলোকেতী’’তি এৰং অমনাপৰচনং ৰদতি ‘‘অপ্পেৰ নাম ইমিনাপি উব্বাল়্হো পক্কমেয্যা’’তি. সেসং উত্তানমেৰ.

তিসমুট্ঠানং – কাযচিত্ততো ৰাচাচিত্ততো কাযৰাচাচিত্ততো চ সমুট্ঠাতি, কিরিযং, সঞ্ঞাৰিমোক্খং, সচিত্তকং, লোকৰজ্জং, কাযকম্মং, ৰচীকম্মং, অকুসলচিত্তং, তিৰেদনন্তি.

উয্যোজনসিক্খাপদং দুতিযং.