৬. ভেসজ্জক্খন্ধকং

পঞ্চভেসজ্জাদিকথা

২৬০. ভেসজ্জক্খন্ধকে – সারদিকেন আবাধেনাতি সরদকালে উপ্পন্নেন পিত্তাবাধেন, তস্মিঞ্হি কালে ৰস্সোদকেনপি তেমেন্তি, কদ্দমম্পি মদ্দন্তি, অন্তরন্তরা আতপোপি খরো হোতি, তেন তেসং পিত্তং কোট্ঠব্ভন্তরগতং হোতি. আহারত্থঞ্চ ফরেয্যাতি আহারত্থং সাধেয্য.

২৬১. নচ্ছাদেন্তীতি ন জিরন্তি, ন ৰাতরোগং পটিপ্পস্সম্ভেতুং সক্কোন্তি. সেনেসিতানীতি সিনিদ্ধানি. ভত্তাচ্ছাদকেনাতি ভত্তং অরোচিকেন.

২৬২. অচ্ছৰসন্তিআদীসু নিস্সগ্গিযৰণ্ণনাযং ৰুত্তনযেনেৰ ৰিনিচ্ছযো ৰেদিতব্বো. কালে পটিগ্গহিতন্তিআদীসু মজ্ঝন্হিকে অৰীতিৰত্তে পটিগ্গহেত্ৰা পচিত্ৰা পরিস্সাৰেত্ৰা চাতি অত্থো. তেলপরিভোগেন পরিভুঞ্জিতুন্তি সত্তাহকালিকতেলপরিভোগেন পরিভুঞ্জিতুং.

২৬৩. মূলভেসজ্জাদি ৰিনিচ্ছযোপি খুদ্দকৰণ্ণনাযং ৰুত্তোযেৰ. তস্মা ইধ যং যং পুব্বে অৰুত্তং তং তদেৰ ৰণ্ণযিস্সাম. ৰচত্তন্তি সেতৰচং. নিসদং নিসদপোতকন্তি পিসনসিলা চ পিসনপোতো চ. ফগ্গৰন্তি লতাজাতি. নত্তমালন্তি করঞ্জং. হিঙ্গুহিঙ্গুজতুহিঙ্গুসিপাটিকা হিঙ্গুজাতিযোযেৰ. তকতকপত্তিতকপণ্ণিযো লাখাজাতিযো.

সামুদ্দন্তি সমুদ্দতীরে ৰালুকা ৰিয সন্তিট্ঠতি. কাল়লোণন্তি পকতিলোণং. সিন্ধৰন্তি সেতৰণ্ণং পব্বতে উট্ঠহতি. উব্ভিদন্তি ভূমিতো অঙ্কুরং উট্ঠহতি. বিলন্তি দব্বসম্ভারেহি সদ্ধিং পচিতং, তং রত্তৰণ্ণং.

২৬৪-৬. কাযো ৰা দুগ্গন্ধোতি কস্সচি অস্সাদীনং ৰিয কাযগন্ধো হোতি, তস্সাপি সিরীসকোসুম্বাদিচুণ্ণানি ৰা গন্ধচুণ্ণানি ৰা সব্বানি ৰট্টন্তি. ছকণন্তি গোমযং. রজননিপ্পক্কন্তি রজনকসটং. পাকতিকচুণ্ণম্পি কোট্টেত্ৰা উদকেন তেমেত্ৰা ন্হাযিতুং ৰট্টতি; এতম্পি রজননিপ্পক্কসঙ্খেপমেৰ গচ্ছতি.

আমকমংসঞ্চ খাদি আমকলোহিতঞ্চ পিৰীতি ন তং ভিক্খু খাদি ন পিৰি, অমনুস্সো খাদিত্ৰা চ পিৰিত্ৰা চ পক্কন্তো, তেন ৰুত্তং – ‘‘তস্স সো অমনুস্সিকাবাধো পটিপ্পস্সম্ভী’’তি.

অঞ্জনন্তি সব্বসঙ্গাহিকৰচনমেতং. কাল়ঞ্জনন্তি একা অঞ্জনজাতি. রসঞ্জনং নানাসম্ভারেহি কতং. সোতঞ্জনন্তি নদীসোতাদীসু উপ্পজ্জনকং অঞ্জনং. গেরুকো নাম সুৰণ্ণগেরুকো. কপল্লন্তি দীপসিখতো গহিতমসি. অঞ্জনূপপিংসনেহীতি অঞ্জনেন সদ্ধিং একতো পিংসিতব্বেহি, ন হি কিঞ্চি অঞ্ঞনূপপিংসনং ন ৰট্টতি. চন্দনন্তি লোহিতচন্দনাদিকং যংকিঞ্চি. তগরাদীনি পাকটানি, অঞ্ঞানিপি নীলুপ্পলাদীনি ৰট্টন্তিযেৰ.

অট্ঠিমযন্তি মনুস্সট্ঠিং ঠপেত্ৰা অৰসেসঅট্ঠিমযং. দন্তমযন্তি হত্থিদন্তাদিসব্বদন্তমযং. ৰিসাণমযেপি অকপ্পিযং নাম নত্থি, নল়মযাদযো একন্তকপ্পিযাযেৰ. সলাকট্ঠানিযন্তি যত্থ সলাকং ওদহন্তি, তং সুসিরদণ্ডকং ৰা থৰিকং ৰা অনুজানামীতি অত্থো. অংসবদ্ধকোতি অঞ্জনিত্থৰিকায অংসবদ্ধকো. যমকনত্থুকরণিন্তি সমসোতাহি দ্ৰীহি পনাল়িকাহি একং নত্থুকরণিং.

২৬৭. অনুজানামি ভিক্খৰে তেলপাকন্তি যংকিঞ্চি ভেসজ্জপক্খিত্তং সব্বং অনুঞ্ঞাতমেৰ হোতি. অতিপক্খিত্তমজ্জানীতি অতিৰিয খিত্তমজ্জানি; বহুং মজ্জং পক্খিপিত্ৰা যোজিতানীতি অত্থো.

অঙ্গৰাতোতি হত্থপাদে ৰাতো. সম্ভারসেদন্তি নানাৰিধপণ্ণভঙ্গসেদং. মহাসেদন্তি মহন্তং সেদং; পোরিসপ্পমাণং আৰাটং অঙ্গারানং পূরেত্ৰা পংসুৰালিকাদীহি পিদহিত্ৰা তত্থ নানাৰিধানি ৰাতহরণপণ্ণানি সন্থরিত্ৰা তেলমক্খিতেন গত্তেন তত্থ নিপজ্জিত্ৰা সম্পরিৰত্তন্তেন সরীরং সেদেতুং অনুজানামীতি অত্থো. ভঙ্গোদকন্তি নানাপণ্ণভঙ্গকুথিতং উদকং; তেহি পণ্ণেহি চ উদকেন চ সিঞ্চিত্ৰা সিঞ্চিত্ৰা সেদেতব্বো. উদককোট্ঠকন্তি উদককোট্ঠে চাটিং ৰা দোণিং ৰা উণ্হোদকস্স পূরেত্ৰা তত্থ পৰিসিত্ৰা সেদকম্মকরণং অনুজানামীতি অত্থো.

পব্বৰাতো হোতীতি পব্বে পব্বে ৰাতো ৰিজ্ঝতি. লোহিতং মোচেতুন্তি সত্থকেন লোহিতং মোচেতুং. পজ্জং অভিসঙ্খরিতুন্তি যেন ফালিতপাদা পাকতিকা হোন্তি; তং নাল়িকেরাদীসু নানাভেসজ্জানি পক্খিপিত্ৰা পজ্জং অভিসঙ্খরিতুং; পাদানং সপ্পাযভেসজ্জং পচিতুন্তি অত্থো. তিলকক্কেন অত্থোতি পিট্ঠেহি তিলেহি অত্থো. কবল়িকন্তি ৰণমুখে সত্তুপিণ্ডং পক্খিপিতুং. সাসপকুড্ডেনাতি সাসপপিট্ঠেন. ৰড্ঢমংসন্তি অধিকমংসং আণি ৰিয উট্ঠহতি. লোণসক্খরিকায ছিন্দিতুন্তি খুরেন ছিন্দিতুং. ৰিকাসিকন্তি তেলরুন্ধনপিলোতিকং. সব্বং ৰণপটিকম্মন্তি যংকিঞ্চি ৰণপরিকম্মং নাম অত্থি; সব্বং অনুজানামীতি অত্থো.

২৬৮. সামং গহেত্ৰাতি ইদং ন কেৰলং সপ্পদট্ঠস্সেৰ, অঞ্ঞস্মিম্পি দট্ঠৰিসে সতি সামং গহেত্ৰা পরিভুঞ্জিতব্বং; অঞ্ঞেসু পন কারণেসু পটিগ্গহিতমেৰ ৰট্টতি. কতো ন পুন পটিগ্গহেতব্বোতি সচে ভূমিপ্পত্তো, পটিগ্গহেতব্বো; অপ্পত্তং পন গহেতুং ৰট্টতি.

২৬৯. ঘরদিন্নকাবাধোতি ৰসীকরণপানকসমুট্ঠিতরোগো. সীতালোল়িন্তি নঙ্গলেন কসন্তস্স ফালে লগ্গমত্তিকং উদকেন আলোল়েত্ৰা পাযেতুং অনুজানামীতি অত্থো.

দুট্ঠগহণিকোতি ৰিপন্নগহণিকো; কিচ্ছেন উচ্চারো নিক্খমতীতি অত্থো. আমিসখারন্তি সুক্খোদনং ঝাপেত্ৰা তায ছারিকায পগ্ঘরিতং খারোদকং. মুত্তহরীতকন্তি গোমুত্তপরিভাৰিতং হরীতকং. অভিসন্নকাযোতি উস্সন্নদোসকাযো. অচ্ছকঞ্জিযন্তি তণ্ডুলোদকমণ্ডো. অকটযুসন্তি অসিনিদ্ধো মুগ্গপচিতপানীযো. কটাকটন্তি সোৰ ধোতসিনিদ্ধো. পটিচ্ছাদনীযেনাতি মংসরসেন.

গুল়াদিঅনুজাননকথা

২৭২. সচে ভিক্খৰে পক্কাপি মুগ্গা জাযন্তীতি পক্কা মুগ্গা সচেপি জাযন্তি, যথাসুখং পরিভুঞ্জিতব্বা. পক্কত্তা হি তে কপ্পিযা এৰ.

২৭৪. অন্তোৰুত্থন্তি অকপ্পিযকুটিযং ৰুত্থং. সামং পক্কন্তি এত্থ যংকিঞ্চি আমিসং ভিক্খুনো পচিতুং ন ৰট্টতি. সচেপিস্স উণ্হযাগুযা সুলসিপণ্ণানি ৰা সিঙ্গিৰেরং ৰা লোণং ৰা পক্খিপন্তি, তম্পি চালেতুং ন ৰট্টতি, ‘‘যাগুং নিব্বাপেমী’’তি পন চালেতুং ৰট্টতি. উত্তণ্ডুলভত্তং লভিত্ৰাপি পিদহিতুং ন ৰট্টতি. সচে পন মনুস্সা পিদহিত্ৰাৰ দেন্তি, ৰট্টতি; ‘‘ভত্তং ৰা মা নিব্বাযতূ’’তি পিদহিতুং ৰট্টতি. খীরতক্কাদীসু পন সকিং কুথিতেসু অগ্গিং দাতুং ৰট্টতি, পুনপাকস্স অনুঞ্ঞাতত্তা. উক্কপিণ্ডকাপি খাদন্তীতি বিল়ামূসিকগোধামঙ্গুসা খাদন্তি. দমকাতি ৰিঘাসাদা.

২৭৬. ততো নীহটন্তি যত্থ নিমন্তিতা ভুঞ্জন্তি, ততো নীহটং.

২৭৮. ৰনট্ঠং পোক্খরট্ঠন্তি ৰনে চেৰ পদুমিনিগচ্ছে চ জাতং. অবীজন্তি তরুণফলং, যস্স বীজং ন অঙ্কুরং জনেতি. নিব্বট্টবীজন্তি বীজং নিব্বট্টেত্ৰা অপনেত্ৰা পরিভুঞ্জিতব্বকং অম্বপনসাদি.

২৭৯. দুরোপযো ৰণোতি দুক্খেন রুহতি, দুক্খেন পাকতিকো হোতীতি অত্থো. দুপ্পরিহারং সত্থন্তি সম্বাধে দুক্খেন সত্থং পরিহরেয্যং. সত্থকম্মং ৰা ৰত্থিকম্মং ৰাতি যথাপরিচ্ছিন্নে ওকাসে যেন কেনচি সত্থেন ৰা সূচিযা ৰা কণ্টকেন ৰা সত্তিকায ৰা পাসাণসক্খলিকায ৰা নখেন ৰা ছিন্দনং ৰা ফালনং ৰা ৰিজ্ঝনং ৰা লেখনং ৰা ন কাতব্বং; সব্বঞ্হেতং সত্থকম্মমেৰ হোতি. যেন কেনচি পন চম্মেন ৰা ৰত্থেন ৰা ৰত্থিপীল়নম্পি ন কাতব্বং; সব্বঞ্হেতং ৰত্থিকম্মমেৰ হোতি. এত্থ চ সম্বাধস্স সামন্তা দ্ৰঙ্গুলাতি ইদং সত্থকম্মংযেৰ সন্ধায ৰুত্তং. ৰত্থিকম্মং পন সম্বাধেযেৰ পটিক্খিত্তং. তত্থ পন খারং আদাতুং যেন কেনচি রজ্জুকেন ৰা বন্ধিতুং ৰট্টতি. যদি তেন ছিজ্জতি, সুচ্ছিন্নং. অণ্ডৰুড্ঢিরোগেপি সত্থকম্মং ন ৰট্টতি, তস্মা অণ্ডং ফালেত্ৰা বীজানি উদ্ধরিত্ৰা ‘‘অরোগং করিস্সামী’’তি ন কত্তব্বং. অগ্গিতাপনভেসজ্জালিম্পনেসু পন পটিক্খেপো নত্থি. ৰচ্চমগ্গে ভেসজ্জমক্খিতা আদানৰট্টি ৰা ৰেল়ুনাল়িকা ৰা ৰট্টতি, যায খারকম্মং ৰা করোন্তি, তেলং ৰা পৰেসেন্তি.

২৮০. পৰত্তমংসন্তি মতস্স মংসং. মাঘাতোতি তং দিৰসং ন লব্ভা কেনচি কিঞ্চি জীৰিতা ৰোরোপেতুং. পোত্থনিকন্তি মংসচ্ছেদনসত্থকং ৰুচ্চতি. কিম্পিমাযাতি কিম্পি ইমায. ন ভগৰা উস্সহতীতি ন ভগৰা সক্কোতি. যত্র হি নামাতি যস্মা নাম. পটিৰেক্খীতি ৰীমংসি; পটিপুচ্ছীতি ৰুত্তং হোতি. অপ্পটিৰেক্খিত্ৰাতি অপ্পটিপুচ্ছিত্ৰা. সচে পন অসুকমংসন্তি জানাতি, পটিপুচ্ছনকিচ্চং নত্থি, অজানন্তেন পন পুচ্ছিত্ৰাৰ খাদিতব্বং.

হত্থিমংসাদিপটিক্খেপকথা

২৮১. সুনখমংসন্তি এত্থ অরঞ্ঞকোকা নাম সুনখসদিসা হোন্তি, তেসং মংসং ৰট্টতি. যো পন গামসুনখিযা ৰা কোকেন কোকসুনখিযা ৰা গামসুনখেন সংযোগা উপ্পন্নো, তস্স মংসং ন ৰট্টতি, সো হি উভযং ভজতীতি. অহিমংসন্তি কস্সচি অপাদকস্স দীঘজাতিকস্স মংসং ন ৰট্টতি. সীহমংসাদীনি পাকটানেৰ.

এত্থ চ মনুস্সমংসং সজাতিতায পটিক্খিত্তং, হত্থিঅস্সমংসং রাজঙ্গতায, সুনখমংসঞ্চ অহিমংসঞ্চ পটিকূলতায, সীহমংসাদীনি পঞ্চ অত্তনো অনুপদ্দৰত্থাযাতি. ইমেসং মনুস্সাদীনং দসন্নং মংসম্পি অট্ঠিপি লোহিতম্পি চম্মম্পি লোমম্পি সব্বং ন ৰট্টতি, যংকিঞ্চি ঞত্ৰা ৰা অঞত্ৰা ৰা খাদন্তস্স আপত্তিযেৰ. যদা জানাতি, তদা দেসেতব্বা. ‘‘অপুচ্ছিত্ৰা খাদিস্সামী’’তি গণ্হতো পটিগ্গহণে দুক্কটং, ‘‘পুচ্ছিত্ৰা খাদিস্সামী’’তি গণ্হতো অনাপত্তি. উদ্দিস্স কতং পন জানিত্ৰা খাদন্তস্সেৰ আপত্তি, পচ্ছা জানন্তো আপত্তিযা ন কারেতব্বোতি.

যাগুমধুগোল়কাদিকথা

২৮২. একত্তকোতি এককো, নত্থি মে দুতিযোতি অত্থো. পহূতং যাগুঞ্চ মধুগোল়কঞ্চ পটিযাদাপেত্ৰাতি সো কির সতসহস্সং ৰযং কত্ৰা পটিযাদাপেসি. অনুমোদনাগাথাপরিযোসানে ‘‘পত্থযতং ইচ্ছত’’ন্তি পদানং ‘‘অলমেৰ দাতু’’ন্তি ইমিনা সম্বন্ধো. সচে পন ‘‘পত্থযতা ইচ্ছতা’’তি পাঠো অত্থি, সোযেৰ গহেতব্বো.

২৮৩. ভোজ্জযাগুন্তি যা পৰারণং জনেতি. যদগ্গেনাতি যং আদিং কত্ৰা. সগ্গা তে আরদ্ধাতি সগ্গনিব্বত্তকপুঞ্ঞং উপচিতন্তি অত্থো. যথাধম্মো কারেতব্বোতি পরম্পরভোজনেন কারেতব্বো, ভোজ্জযাগুযা হি পৰারণা হোতীতি.

২৮৪. নাহং তং কচ্চানাতি তস্মিং কির অৰসিট্ঠগুল়ে দেৰতা সুখুমোজং পক্খিপিংসু, সা অঞ্ঞেসং পরিণামং ন গচ্ছতি, তস্মা এৰমাহ. গিলানস্স গুল়ন্তি তথারূপেন ব্যাধিনা গিলানস্স পচ্ছাভত্তং গুল়ং অনুজানামীতি অত্থো.

পাটলিগামৰত্থুকথা

২৮৫. সব্বসন্থরিন্তি যথা সব্বং সন্থতং হোতি, এৰং.

২৮৬. সুনিধৰস্সকারাতি সুনিধো চ ৰস্সকারো চ দ্ৰে ব্রাহ্মণা মগধরঞ্ঞো মহামত্তা মহামচ্চা. ৰজ্জীনং পটিবাহাযাতি ৰজ্জিরাজকুলানং আযমুখপচ্ছিন্দনত্থং. ৰত্থূনীতি ঘরৰত্থূনি. চিত্তানি নমন্তি নিৰেসনানি মাপেতুন্তি তা কির দেৰতা ৰত্থুৰিজ্জাপাঠকানং সরীরে অধিমুচ্চিত্ৰা এৰং চিত্তানি নামেন্তি. কস্মা? অম্হাকং যথানুরূপং সক্কারং করিস্সন্তীতি অত্থো. তাৰতিংসেহীতি লোকে কির সক্কং দেৰরাজানং ৰিস্সকম্মঞ্চ উপাদায তাৰতিংসা পণ্ডিতাতি সদ্দো অব্ভুগ্গতো, তেনেৰাহ তাৰতিংসেহীতি, তাৰতিংসেহি সদ্ধিং মন্তেত্ৰা ৰিয মাপেন্তীতি অত্থো. যাৰতা অরিযং আযতনন্তি যত্তকং অরিযমনুস্সানং ওসরণট্ঠানং নাম অত্থি. যাৰতা ৰণিপ্পথোতি যত্তকং ৰাণিজানং আভতভণ্ডস্স রাসিৰসেনেৰ কযৰিক্কযট্ঠানং নাম অত্থি. ইদং অগ্গনগরন্তি তেসং অরিযাযতনৰণিপ্পথানং ইদং অগ্গনগরং ভৰিস্সতি. পুটভেদনন্তি পুটভেদনট্ঠানং মোচনট্ঠানন্তি ৰুত্তং হোতি. অগ্গিতো ৰাতিআদীসু সমুচ্চযত্থো ৰা সদ্দো. তত্র হি একস্স কোট্ঠাসস্স অগ্গিতো, একস্স উদকতো, একস্স অব্ভন্তরতো, অঞ্ঞমঞ্ঞভেদা অন্তরাযো ভৰিস্সতি. উল়ুম্পন্তি পারগমনত্থায আণিযো আকোটেত্ৰা কতং. কুল্লন্তি ৰল্লিআদীহি বন্ধিত্ৰা কতং.

অণ্ণৰন্তি সব্বন্তিমেন পরিচ্ছেদেন যোজনমত্তং গম্ভীরস্স চ পুথুল্লস্স চ উদকট্ঠানস্সেতং অধিৰচনং. সরন্তি ইধ নদী অধিপ্পেতা. ইদং ৰুত্তং হোতি – যে গম্ভীরং ৰিত্থতং তণ্হাসরং তরন্তি, তে অরিযমগ্গসঙ্খাতং সেতুং কত্ৰান ৰিসজ্জ পল্ললানি অনামসিত্ৰাৰ উদকভরিতানি নিন্নট্ঠানানি; অযং পন ইদং অপ্পমত্তকং উদকং উত্তরিতুকামোপি কুল্লঞ্হি পরিজনো বন্ধতি, বুদ্ধা পন বুদ্ধসাৰকা চ ৰিনা এৰ কুল্লেন তিণ্ণা মেধাৰিনো জনাতি.

২৮৭. অননুবোধাতি অবুজ্ঝনেন. সন্ধাৰিতন্তি ভৰতো ভৰং গমনৰসেন সন্ধাৰিতং. সংসরিতন্তি পুনপ্পুনং গমনৰসেন সংসরিতং. মমঞ্চেৰ তুম্হাকঞ্চাতি মযা চ তুম্হেহি চ. অথ ৰা সন্ধাৰিতং সংসরিতন্তি সন্ধাৰনং সংসরণং মমঞ্চেৰ তুম্হাকঞ্চ অহোসীতি এৰমেত্থ অত্থো দট্ঠব্বো. সংসিতন্তি সংসরিতং. ভৰনেত্তি সমূহতাতি ভৰতো ভৰগমনা সন্ধাৰনা তণ্হারজ্জু সুট্ঠু হতা ছিন্না অপ্পৰত্তিকতা.

২৮৯. নীলাতি ইদং সব্বসঙ্গাহকং. নীলৰণ্ণাতিআদি তস্সেৰ ৰিভাগদস্সনত্থং. তত্থ ন তেসং পকতিৰণ্ণা নীলা, নীলৰিলেপনানং ৰিচিত্ততাৰসেনেতং ৰুত্তং. পটিৰট্টেসীতি পহারেসি. সাহারং দজ্জেয্যাথাতি সজনপদং দদেয্যাথ. অঙ্গুলিং ফোটেসুন্তি অঙ্গুলিং চালেসুং. অম্বকাযাতি ইত্থিকায. ওলোকেথাতি পস্সথ. অপলোকেথাতি পুনপ্পুনং পস্সথ. উপসংহরথাতি উপনেথ. ইমং লিচ্ছৰিপরিসং তুম্হাকং চিত্তেন তাৰতিংসপরিসং হরথ, তাৰতিংসস্স সমকং কত্ৰা পস্সথাতি অত্থো.

সীহসেনাপতিৰত্থুআদিকথা

২৯০. ধম্মস্স চ অনুধম্মং ব্যাকরোন্তীতি ভগৰতা ৰুত্তকারণস্স অনুকারণং কথেন্তি. সহধম্মিকো ৰাদানুৰাদোতি অপরেহি ৰুত্তকারণেন সকারণো হুত্ৰা তুম্হাকং ৰাদো ৰিঞ্ঞুগরহিতব্বং কারণং কোচি অপ্পমত্তকোপি কিং ন আগচ্ছতি. ইদং ৰুত্তং হোতি ‘‘কিং সব্বকারেনাপি তুম্হাকং ৰাদে গারয্হকারণং নত্থী’’তি. অনব্ভক্খাতুকামাতি অভিভৰিত্ৰা ন আচিক্খিতুকামা.

২৯৩. অনুৰিচ্চকারন্তি অনুৰিদিত্ৰা চিন্তেত্ৰা তুলযিত্ৰা কাতব্বং করোহীতি ৰুত্তং হোতি. ঞাতমনুস্সানন্তি লোকে পাকটানং. সাধু হোতীতি সুন্দরং হোতি. পটাকং পরিহরেয্যুন্তি পটাকং উক্খিপিত্ৰা নগরে ঘোসন্তা আহিণ্ডেয্যুং. কস্মা? ‘‘এৰং নো অম্হাকং মহন্তভাৰো ভৰিস্সতী’’তি. ওপানভূতন্তি পটিযত্তউদপানো ৰিয ঠিতং. কুলন্তি নিৰেসনং. দাতব্বং মঞ্ঞেয্যাসীতি মা ইমেসং দেয্যধম্মং উপচ্ছিন্দিত্থ, সম্পত্তানঞ্হি দাতব্বমেৰাতি ওৰদতি. ওকারোতি অৰকারো লামকভাৰো. সামুক্কংসিকাতি অত্তনাযেৰ উদ্ধরিত্ৰা গহিতা; অসাধারণং অঞ্ঞেসন্তি অত্থো. উদ্দিস্স কতন্তি উদ্দিসিত্ৰা কতং.

২৯৪. পটিচ্চকম্মন্তি অত্তানং পটিচ্চ কতন্তি অত্থো. অথ ৰা পটিচ্চকম্মন্তি নিমিত্তকম্মস্সেতং অধিৰচনং, তং পটিচ্চকম্মং এত্থ অত্থীতি মংসম্পি পটিচ্চকম্মন্তি ৰুত্তং. যো হি এৰরূপং মংসং পরিভুঞ্জতি, সোপি তস্স কম্মস্স দাযাদো হোতি, ৰধকস্স ৰিয তস্সাপি পাণঘাতকম্মং হোতীতি অধিপ্পাযো. জিরিদন্তিতি জিরন্তি অব্ভাচিক্খন্তা ন জিরন্তি, অব্ভক্খানস্স অন্তং ন গচ্ছন্তীতি অত্থো. তিকোটিপরিসুদ্ধকথা সঙ্ঘভেদসিক্খাপদৰণ্ণনাযং ৰুত্তা.

কপ্পিযভূমিঅনুজাননকথা

২৯৫. সকটপরিৰট্টন্তি সকটেহি পরিক্খেপং ৰিয কত্ৰা অচ্ছন্তি. পচ্চন্তিমন্তি অভিলাপমত্তমেতং ‘‘যং সঙ্ঘো আকঙ্খতী’’তি ৰুত্তত্তা পন ধুরৰিহারোপি সম্মন্নিতুং ৰট্টতি, কম্মৰাচং অৰত্ৰা অপলোকনেনাপি ৰট্টতিযেৰ. কাকোরৰসদ্দন্তি তত্থ তত্থ পৰিট্ঠানং আমিসখাদনত্থায অনুপ্পগেযেৰ সন্নিপতিতানং কাকানং ওরৰসদ্দং. যসোজো নাম কপিলসুত্তপরিযোসানে পব্বজিতানং পঞ্চন্নং সতানং অগ্গপুরিসো.

উস্সাৰনন্তিকন্তিআদীসু উস্সাৰনন্তিকা তাৰ এৰং কত্তব্বা. যো থম্ভানং ৰা উপরি ভিত্তিপাদে ৰা নিখনিত্ৰা ৰিহারো করিযতি, তস্স হেট্ঠা থম্ভপটিচ্ছকা পাসাণা ভূমিগতিকা এৰ. পঠমথম্ভং পন পঠমভিত্তিপাদং ৰা পতিট্ঠাপেন্তেহি বহূহি সম্পরিৰারেত্ৰা ‘‘কপ্পিযকুটিং করোম, কপ্পিযকুটিং করোমা’’তি ৰাচং নিচ্ছারেন্তেহি মনুস্সেসু উক্খিপিত্ৰা পতিট্ঠাপেন্তেসু আমসিত্ৰা ৰা সযং উক্খিপিত্ৰা ৰা থম্ভে ৰা ভিত্তিপাদো ৰা পতিট্ঠাপেতব্বো. কুরুন্দিমহাপচ্চরীসু পন ‘‘কপ্পিযকুটি কপ্পিযকুটী’’তি ৰত্ৰা পতিট্ঠাপেতব্বন্তি ৰুত্তং. অন্ধকট্ঠকথাযং ‘‘সঙ্ঘস্স কপ্পিযকুটিং অধিট্ঠামী’’তি ৰুত্তং. তং পন অৰত্ৰাপি অট্ঠকথাসু ৰুত্তনযেন ৰুত্তে দোসো নত্থি. ইদং পনেত্থ সাধারণলক্খণং, থম্ভপতিট্ঠানঞ্চ ৰচনপরিযোসানঞ্চ সমকালং ৰট্টতি. সচে হি অনিট্ঠিতে ৰচনে থম্ভো পতিট্ঠাতি, অপ্পতিট্ঠিতে ৰা তস্মিং ৰচনং নিট্ঠাতি, অকতা হোতি কপ্পিযকুটি. তেনেৰ মহাপচ্চরিযং ৰুত্তং – ‘‘বহূহি সম্পরিৰারেত্ৰা ৰত্তব্বং, অৰস্সঞ্হি এত্থ একস্সপি ৰচননিট্ঠানঞ্চ থম্ভপতিট্ঠানঞ্চ একতো ভৰিস্সতী’’তি.

ইট্ঠকসিলামত্তিকাকুট্টিকাসু পন কুটীসু হেট্ঠা চযং বন্ধিত্ৰা ৰা অবন্ধিত্ৰা ৰা করোন্তু, যতো পট্ঠায ভিত্তিং উট্ঠাপেতুকামা হোন্তি, তং সব্বপঠমং ইট্ঠকং ৰা সিলং ৰা মত্তিকাপিণ্ডং ৰা গহেত্ৰা ৰুত্তনযেনেৰ কপ্পিযকুটি কাতব্বা. ইট্ঠকাদযো হি ভিত্তিযা পঠমিট্ঠকাদীনং হেট্ঠা ন ৰট্টন্তি, থম্ভা পন উপরি উগ্গচ্ছন্তি, তস্মা ৰট্টন্তি. অন্ধকট্ঠকথাযং ‘‘থম্ভেহি করিযমানে চতূসু কোণেসু চত্তারো থম্ভা ইট্ঠকাদিকুট্টে চতূসু কোণেসু দ্ৰে তিস্সো ইট্ঠকা অধিট্ঠাতব্বা’’তি ৰুত্তং. তথা পন অকতাযপি দোসো নত্থি, অট্ঠকথাসু হি ৰুত্তমেৰ পমাণং.

গোনিসাদিকা দুৰিধা – আরামগোনিসাদিকা, ৰিহারগোনিসাদিকাতি. তাসু যত্থ নেৰ আরামো ন সেনাসনানি পরিক্খিত্তানি হোন্তি, অযং ‘‘আরামগোনিসাদিকা’’ নাম. যত্থ সেনাসনানি সব্বানি ৰা একচ্চানি ৰা পরিক্খিত্তানি, আরামো অপরিক্খিত্তো, অযং ‘‘ৰিহারগোনিসাদিকা’’ নাম. ইতি উভযত্রাপি আরামস্স অপরিক্খিত্তভাৰোযেৰ পমাণং. আরামো পন উপড্ঢপরিক্খিত্তোপি বহুতরং পরিক্খিত্তোপি পরিক্খিত্তোযেৰ নামাতি কুরুন্দিমহআপচ্চরিযাদীসু ৰুত্তং. এত্থ কপ্পিযকুটিং লদ্ধুং ৰট্টতি.

গহপতীতি মনুস্সা আৰাসং কত্ৰা ‘‘কপ্পিযকুটিং দেম, পরিভুঞ্জথা’’তি ৰদন্তি, এসা গহপতি নাম. ‘‘কপ্পিযকুটিং কাতুং দেমা’’তি ৰুত্তেপি ৰট্টতিযেৰ. অন্ধকট্ঠকথাযং পন ‘‘যস্মা ভিক্খুং ঠপেত্ৰা সেসসহধম্মিকানং সব্বেসঞ্চ দেৰমনুস্সানং হত্থতো পটিগ্গহো চ সন্নিধি চ অন্তোৰুত্থঞ্চ তেসং সন্তকং ভিক্খুস্স ৰট্টতি, তস্মা তেসং গেহানি ৰা তেহি দিন্না কপ্পিযকুটি ৰা গহপতীতি ৰুচ্চতী’’তি ৰুত্তং. পুনপি ৰুত্তং – ‘‘ভিক্খুসঙ্ঘস্স ৰিহারং ঠপেত্ৰা ভিক্খুনুপস্সযো ৰা আরামিকানং ৰা তিত্থিযানং ৰা দেৰতানং ৰা নাগানং ৰা অপি ব্রহ্মানং ৰিমানং কপ্পিযকুটি হোতী’’তি, তং সুৰুত্তং; সঙ্ঘসন্তকমেৰ হি ভিক্খুসন্তকং ৰা গেহং গহপতিকুটিকা ন হোতি. সম্মুতিকা নাম কম্মৰাচং সাৰেত্ৰা কতাতি.

যং ইমাসু চতূসু কপ্পিযভূমীসু ৰুত্থং আমিসং, তং সব্বং অন্তোৰুত্থসঙ্খ্যং ন গচ্ছতি. ভিক্খূনঞ্চ ভিক্খুনীনঞ্চ অন্তোৰুত্থঅন্তোপক্কমোচনত্থঞ্হি কপ্পিযকুটিযো অনুঞ্ঞাতা. যং পন অকপ্পিযভূমিযং সহসেয্যপ্পহোনকে গেহে ৰুত্থং সঙ্ঘিকং ৰা পুগ্গলিকং ৰা ভিক্খুস্স ভিক্খুনিযা ৰা সন্তকং একরত্তম্পি ঠপিতং, তং অন্তোৰুত্থং; তত্থ পক্কঞ্চ অন্তোপক্কং নাম হোতি, এতং ন কপ্পতি. সত্তাহকালিকং পন যাৰজীৰিকঞ্চ ৰট্টতি.

তত্রাযং ৰিনিচ্ছযো – সামণেরো ভিক্খুস্স তণ্ডুলাদিকং আমিসং আহরিত্ৰা কপ্পিযকুটিযং নিক্খিপিত্ৰা পুনদিৰসে পচিত্ৰা দেতি, অন্তোৰুত্থং ন হোতি. তত্থ অকপ্পিযকুটিযং নিক্খিত্তসপ্পিআদীসু যংকিঞ্চি পক্খিপিত্ৰা দেতি, মুখসন্নিধি নাম হোতি. মহাপচ্চরিযং পন ‘‘অন্তোৰুত্থং হোতী’’তি ৰুত্তং. তত্থ নামমত্তমেৰ নানাকরণং. ভিক্খু অকপ্পিযকুটিযং ঠপিতসপ্পিঞ্চ যাৰজীৰিকপণ্ণঞ্চ একতো পচিত্ৰা পরিভুঞ্জতি, সত্তাহং নিরামিসং ৰট্টতি. সচে আমিসসংসট্ঠং কত্ৰা পরিভুঞ্জতি, অন্তোৰুত্থঞ্চেৰ সামংপাকঞ্চ হোতি. এতেনুপাযেন সব্বসংসগ্গা ৰেদিতব্বা.

ইমা পন কপ্পিযকুটিযো কদা জহিতৰত্থুকা হোন্তি? উস্সাৰনন্তিকা তাৰ যা থম্ভানং উপরি ভিত্তিপাদে ৰা নিখণিত্ৰা কতা, সা সব্বেসু থম্ভেসু চ ভিত্তিপাদেসু চ অপনীতেসু জহিতৰত্থুকা হোতি. সচে পন থম্ভে ৰা ভিত্তিপাদে ৰা পরিৰত্তেন্তি, যো যো ঠিতো তত্থ তত্থ পতিট্ঠাতি, সব্বেসুপি পরিৰত্তিতেসু অজহিতৰত্থুকাৰ হোতি. ইট্ঠকাদীহি কতা চযস্স উপরি ভিত্তিঅত্থায ঠপিতং ইট্ঠকং ৰা সিলং ৰা মত্তিকাপিণ্ডং ৰা আদিংকত্ৰা ৰিনাসিতকালে জহিতৰত্থুকা হোতি. যেহি পন ইট্ঠকাদীহি অধিট্ঠিতা, তেসু অপনীতেসুপি তদঞ্ঞাসু পতিট্ঠিতাসু অজহিতৰত্থুকাৰ হোতি.

গোনিসাদিকা পাকারাদীহি পরিক্খেপে কতে জহিতৰত্থুকা হোতি. পুন তস্মিং আরামে কপ্পিযকুটি লদ্ধুং ৰট্টতি. সচে পন পুনপি পাকারাদযো তত্থ তত্থ খণ্ডা হোন্তি, ততো ততো গাৰো পৰিসন্তি, পুন কপ্পিযকুটি হোতি. ইতরা পন দ্ৰে গোপানসীমত্তং ঠপেত্ৰা সব্বস্মিং ছদনে ৰিনট্ঠে জহিতৰত্থুকা হোন্তি. সচে গোপানসীনং উপরি একম্পি পক্খপাসকমণ্ডলং অত্থি, রক্খতি.

যত্র পনিমা চতস্সোপি কপ্পিযভূমিযো নত্থি, তত্থ কিং কাতব্বং? অনুপসম্পন্নস্স দত্ৰা তস্স সন্তকং কত্ৰা পরিভুঞ্জিতব্বং. তত্রিদং ৰত্থু – করৰিকতিস্সত্থেরো কির ৰিনযধরপামোক্খো মহাসীৰত্থেরস্স সন্তিকং অগমাসি. সো দীপালোকেন সপ্পিকুম্ভং পস্সিত্ৰা ‘‘ভন্তে কিমেত’’ন্তি পুচ্ছি. থেরো ‘‘আৰুসো গামতো সপ্পিকুম্ভো আভতো, লূখদিৰসে সপ্পিনা ভুঞ্জনত্থাযা’’তি আহ. ততো নং তিস্সত্থেরো ‘‘ন ৰট্টতি ভন্তে’’তি আহ. থেরো পুনদিৰসে পমুখে নিক্খিপাপেসি. তিস্সত্থেরো পুন একদিৰসে আগতো তং দিস্ৰা তথেৰ পুচ্ছিত্ৰা ‘‘ভন্তে সহসেয্যপ্পহোনকট্ঠানে ঠপেতুং ন ৰট্টতী’’তি আহ. থেরো পুনদিৰসে বহি নীহরাপেত্ৰা নিক্খিপাপেসি, তং চোরা হরিংসু. সো পুন একদিৰসং আগতং তিস্সত্থেরং আহ – ‘‘আৰুসো তযা ‘ন ৰট্টতী’তি ৰুত্তো সো কুম্ভো বহি নিক্খিত্তো চোরেহি অৰহতো’’তি. ততো নং তিস্সত্থেরো আহ – ‘‘ননু ভন্তে অনুপসম্পন্নস্স দাতব্বো অস্স, অনুপসম্পন্নস্স হি দত্ৰা তস্স সন্তকং কত্ৰা পরিভুঞ্জিতুং ৰট্টতী’’তি.

২৯৬-৯. মেণ্ডকৰত্থু উত্তানমেৰ. অপি চেত্থ অনুজানামি ভিক্খৰে পঞ্চ গোরসেতি ইমে পঞ্চ গোরসে ৰিসুং পরিভোগেন পরিভুঞ্জিতুম্পি অনুজানামীতি অত্থো. পাথেয্যং পরিযেসিতুন্তি এত্থ সচে কেচি সযমেৰ ঞত্ৰা দেন্তি, ইচ্চেতং কুসলং; নো চে দেন্তি, ঞাতিপৰারিতট্ঠানতো ৰা ভিক্খাচারৰত্তেন ৰা পরিযেসিতব্বং. তথা অলভন্তেন অঞ্ঞাতিকঅপৰারিতট্ঠানতো যাচিত্ৰাপি গহেতব্বং. একদিৰসেন গমনীযে মগ্গে একভত্তত্থায পরিযেসিতব্বং. দীঘে অদ্ধানে যত্তকেন কন্তারং নিত্থরতি, তত্তকং পরিযেসিতব্বং.

কেণিযজটিলৰত্থুকথা

৩০০. কাজেহি গাহাপেত্ৰাতি পঞ্চহি কাজসতেহি সুসঙ্খতস্স বদরপানস্স কুটসহস্সং গাহাপেত্ৰা. এতস্মিং নিদানে এতস্মিং পকরণে ধম্মিং কথং কত্ৰাতি ‘‘সাধু ভিক্খৰে পানং অপিৰন্তা সমণস্স গোতমস্স সাৰকা পচ্চযবাহুল্লিকাতি ৰাদং ন উপ্পাদযিত্থ, মযি চ গারৰং অকত্থ, মম চ তুম্হেসু গারৰং জনযিত্থ, ইতি ৰো অহং ইমিনা কারণেন সুট্ঠু পসন্নো’’তিআদিনা নযেন ধম্মিং কথং কত্ৰা অনুজানামি ভিক্খৰে অট্ঠ পানানীতিআদিমাহ.

তত্থ অম্বপানন্তি আমেহি ৰা পক্কেহি ৰা অম্বেহি কতপানং. তত্থ আমেহি করোন্তেন অম্বতরুণানি ভিন্দিত্ৰা উদকে পক্খিপিত্ৰা আতপে আদিচ্চপাকেন পচিত্ৰা পরিস্সাৰেত্ৰা তদহুপটিগ্গহিতেহি মধুসক্করকপ্পূরাদীহি যোজেত্ৰা কাতব্বং. এৰং কতং পুরেভত্তমেৰ কপ্পতি. অনুপসম্পন্নেহি কতং লভিত্ৰা পন পুরেভত্তং পটিগ্গহিতং পুরেভত্তং সামিসপরিভোগেনাপি ৰট্টতি, পচ্ছাভত্তং নিরামিসপরিভোগেন যাৰ অরুণুগ্গমনা ৰট্টতিযেৰ. এস নযো সব্বপানেসু.

তেসু পন জম্বুপানন্তি জম্বুফলেহি কতপানং. চোচপানন্তি অট্ঠিকেহি কদলিফলেহি কতপানং. মোচপানন্তি অনট্ঠিকেহি কদলিফলেহি কতপানং. মধুকপানন্তি মধুকানং জাতিরসেন কতপানং; তং পন উদকসম্ভিন্নং ৰট্টতি, সুদ্ধং ন ৰট্টতি. মুদ্দিকপানন্তি মুদ্দিকা উদকে মদ্দিত্ৰা অম্বপানং ৰিয কতপানং. সালূকপানন্তি রত্তুপ্পলনীলুপ্পলাদীনং সালূকে মদ্দিত্ৰা কতপানং. ফারুসকপানন্তি ফারুসকফলেহি অম্বপানং ৰিয কতপানং. ইমানি অট্ঠ পানানি সীতানিপি আদিচ্চপাকানিপি ৰট্টন্তি, অগ্গিপাকানি ন ৰট্টন্তি. ধঞ্ঞফলরসন্তি সত্তন্নং ধঞ্ঞানং ফলরসং. ডাকরসন্তি পক্কডাকরসং. যাৰকালিকপত্তানঞ্হি পুরেভত্তংযেৰ রসো কপ্পতি. যাৰজীৰিকানং পটিগ্গহেত্ৰা ঠপিতসপ্পিআদীহি সদ্ধিং পক্কানং সত্তাহং কপ্পতি. সচে পন সুদ্ধউদকেন পচতি, যাৰজীৰম্পি ৰট্টতি. খীরাদীহি পন সদ্ধিং পচিতুং ন ৰট্টতি. অঞ্ঞেহি পক্কম্পি ডাকরসসঙ্খ্যমেৰ গচ্ছতি. কুরুন্দিযং পন ‘‘যাৰকালিকপত্তানম্পি সীতোদকেন মদ্দিত্ৰা কতরসো ৰা আদিচ্চপাকো ৰা ৰট্টতী’’তি ৰুত্তং. ঠপেত্ৰা মধুকপুপ্ফরসন্তি এত্থ মধুকপুপ্ফরসো অগ্গিপাকো ৰা হোতু আদিচ্চপাকো ৰা, পচ্ছাভত্তং ন ৰট্টতি. পুরেভত্তম্পি যং পানং গহেত্ৰা মজ্জং করোন্তি, সো আদিতো পট্ঠায ন ৰট্টতি. মধুকপুপ্ফং পন অল্লং ৰা সুক্খং ৰা ভজ্জিতং ৰা তেন কতফাণিতং ৰা যতো পট্ঠায মজ্জং ন করোন্তি, তং সব্বং পুরেভত্তং ৰট্টতি. উচ্ছুরসো নিকসটো পচ্ছাভত্তং ৰট্টতি. ইতি পানানি অনুজানন্তেন ইমেপি চত্তারো রসা অনুঞ্ঞাতাতি. অগ্গিহুত্তমুখা যঞ্ঞাতিআদীসু অগ্গিহুতং সেট্ঠং, অগ্গিহুতং মুখন্তি ৰুত্তং হোতি.

রোজমল্লাদিৰত্থুকথা

৩০১-২. রোজৰত্থু উত্তানত্থমেৰ. তত্থ সঙ্করং অকংসূতি কতিকং অকংসু. উল়ারং খো তে ইদন্তি সুন্দরং খো তে ইদং. নাহং ভন্তে আনন্দ বহুকতোতি নাহং বুদ্ধাদিগতপসাদবহুমানেন ইধাগতোতি দস্সেতি. সব্বঞ্চ ডাকন্তি সপ্পিআদীহি পক্কং ৰা অপক্কং ৰা যংকিঞ্চি ডাকং. পিট্ঠখাদনীযন্তি পিট্ঠমযং খাদনীযং; রোজো কির ইদং উভযম্পি সতসহস্সং ৰযং কত্ৰা পটিযাদাপেসি.

৩০৩. মঞ্জুকাতি মধুরৰচনা. পটিভানেয্যকাতি সকে সিপ্পে পটিভানসম্পন্না. দক্খাতি ছেকা, অনলসা ৰা. পরিযোদাতসিপ্পাতি নিদ্দোসসিপ্পা. নাল়িযাৰাপকেনাতি নাল়িযা চ আৰাপকেন চ. আৰাপকো নাম যত্থ লদ্ধং লদ্ধং আৰপন্তি, পক্খিপন্তীতি ৰুত্তং হোতি. ন চ ভিক্খৰে নহাপিতপুব্বেন খুরভণ্ডন্তি এত্থ গহেত্ৰা পরিহরিতুমেৰ ন ৰট্টতি, অঞ্ঞস্স সন্তকেন কেসে ছেদেতুং ৰট্টতি. সচে ৰেতনং গহেত্ৰা ছিন্দতি, ন ৰট্টতি. যো অনহাপিতপুব্বো তস্স পরিহরিতুম্পি ৰট্টতি, তং ৰা অঞ্ঞং ৰা গহেত্ৰা কেসে ছেদেতুম্পি ৰট্টতি.

৩০৪. ভাগং দত্ৰাতি দসমভাগং দত্ৰা; ইদং কির জম্বুদীপে পোরাণকচারিত্তং, তস্মা দসকোট্ঠাসে কত্ৰা একো কোট্ঠাসো ভূমিসামিকানং দাতব্বো.

চতুমহাপদেসকথা

৩০৫. যং ভিক্খৰে মযা ইদং ন কপ্পতীতি ইমে চত্তারো মহাপদেসে ভগৰা ভিক্খূনং নযগ্গহণত্থায আহ. তত্থ ধম্মসঙ্গাহকত্থেরা সুত্তং গহেত্ৰা পরিমদ্দন্তা ইদং অদ্দসংসু. ঠপেত্ৰা ধঞ্ঞফলরসন্তি সত্তধঞ্ঞরসানি পচ্ছাভত্তং ন কপ্পন্তীতি পটিক্খিত্তানি. তালনাল়িকেরপনসলবুজঅলাবুকুম্ভণ্ডপুস্সফলতিপুসফলএল়ালুকানি, নৰ মহাফলানি সব্বঞ্চ অপরণ্ণং, ধঞ্ঞগতিকমেৰ. তং কিঞ্চাপি ন পটিক্খিত্তং, অথ খো অকপ্পিযং অনুলোমেতি, তস্মা পচ্ছাভত্তং ন কপ্পতি. অট্ঠ পানানি অনুঞ্ঞাতানি. অৰসেসানি ৰেত্ততিন্তিণিকমাতুলুঙ্গকপিত্থকোসম্বকরমন্দাদিখুদ্দকফলপানানি অট্ঠপানগতিকানেৰ, তানি কিঞ্চাপি ন অনুঞ্ঞাতানি, অথ খো কপ্পিযং অনুলোমেন্তি, তস্মা কপ্পন্তি. ঠপেত্ৰা হি সানুলোমং ধঞ্ঞফলরসং অঞ্ঞং ফলপানং নাম অকপ্পিযং নত্থি, সব্বং যামকালিকংযেৰাতি কুরুন্দিযং ৰুত্তং.

ভগৰতা ছ চীৰরানি অনুঞ্ঞাতানি. ধম্মসঙ্গাহকত্থেরেহি তেসং অনুলোমানি দুকূলং, পত্তুণ্ণং, চীনপট্টং, সোমারপট্টং, ইদ্ধিমযিকং, দেৰদত্তিযন্তি অপরানি ছ অনুঞ্ঞাতানি. তত্থ ‘‘পত্তুণ্ণ’’ন্তি পত্তুণ্ণদেসে পাণকেহি সঞ্জাতৰত্থং. দ্ৰে পটা দেসনামেনেৰ ৰুত্তা. তানি তীণি কোসেয্যস্সানুলোমানি. দুকূলং সাণস্স, ইতরানি দ্ৰে কপ্পাসিকস্স ৰা সব্বেসং ৰা.

ভগৰতা একাদস পত্তে পটিক্খিপিত্ৰা দ্ৰে পত্তা অনুঞ্ঞাতা – লোহপত্তো চেৰ মত্তিকাপত্তো চ. লোহথালকং, মত্তিকাথালকং, তম্বলোহথালকন্তি তেসংযেৰ অনুলোমানি. ভগৰতা তযো তুম্বা অনুঞ্ঞাতা – লোহতুম্বো, কট্ঠতুম্বো, ফলতুম্বোতি. কুণ্ডিকা, কঞ্চনকো, উদকতুম্বোতি তেসংযেৰ অনুলোমানি. কুরুন্দিযং পন ‘‘পানীযসঙ্খপানীযসরাৰকানি এতেসং অনুলোমানী’’তি ৰুত্তং. পট্টিকা, সূকরন্তন্তি দ্ৰে কাযবন্ধনানি অনুঞ্ঞাতানি, দুস্সপট্টেন রজ্জুকেন চ কতকাযবন্ধনানি তেসং অনুলোমানি. সেতচ্ছত্তং, কিলঞ্জচ্ছত্তং, পণ্ণচ্ছত্তন্তি তীণি ছত্তানি অনুঞ্ঞাতানি. একপণ্ণচ্ছত্তং তেসংযেৰ অনুলোমন্তি ইমিনা নযেন পাল়িঞ্চ অট্ঠকথঞ্চ অনুপেক্খিত্ৰা অঞ্ঞানিপি কপ্পিযাকপ্পিযানং অনুলোমানি ৰেদিতব্বানি.

তদহুপটিগ্গহিতং কালে কপ্পতীতিআদি সব্বং সম্ভিন্নরসং সন্ধায ৰুত্তং. সচে হি ছল্লিম্পি অনপনেত্ৰা সকলেনেৰ নাল়িকেরফলেন সদ্ধিং পানকং পটিগ্গহিতং হোতি, নাল়িকেরং অপনেত্ৰা তং ৰিকালেপি কপ্পতি. উপরি সপ্পিপিণ্ডং ঠপেত্ৰা সীতলপাযাসং দেন্তি, যং পাযাসেন অসংসট্ঠং সপ্পি, তং অপনেত্ৰা সত্তাহং পরিভুঞ্জিতুং ৰট্টতি. বদ্ধমধুফাণিতাদীসুপি এসেৰ নযো. তক্কোলজাতিফলাদীহি অলঙ্করিত্ৰা পিণ্ডপাতং দেন্তি, তানি উদ্ধরিত্ৰা ধোৰিত্ৰা যাৰজীৰং পরিভুঞ্জিতব্বানি. যাগুযং পক্খিপিত্ৰা দিন্নসিঙ্গিৰেরাদীসুপি তেলাদীসু পক্খিপিত্ৰা দিন্নলট্ঠিমধুকাদীসুপি এসেৰ নযো. এৰং যং যং অসম্ভিন্নরসং হোতি, তং তং একতো পটিগ্গহিতম্পি যথা সুদ্ধং হোতি, তথা ধোৰিত্ৰা ৰা তচ্ছেত্ৰা ৰা তস্স তস্স কালৰসেন পরিভুঞ্জিতুং ৰট্টতি.

সচে পন সম্ভিন্নরসং হোতি সংসট্ঠং, ন ৰট্টতি. যাৰকালিকঞ্হি অত্তনা সদ্ধিং সম্ভিন্নরসানি তীণিপি যামকালিকাদীনি অত্তনো সভাৰং উপনেতি, যামকালিকং দ্ৰেপি সত্তাহকালিকাদীনি অত্তনো সভাৰং উপনেতি, সত্তাহকালিকম্পি অত্তনা সদ্ধিং সংসট্ঠং যাৰজীৰিকং অত্তনো সভাৰঞ্ঞেৰ উপনেতি; তস্মা তেন তদহুপটিগ্গহিতেন সদ্ধিং তদহুপটিগ্গহিতং ৰা পুরেপটিগ্গহিতং ৰা যাৰজীৰিকং সত্তাহং কপ্পতি দ্ৰীহপটিগ্গহিতেন ছাহং, তীহপটিগ্গহিতেন পঞ্চাহং…পে… সত্তাহপটিগ্গহিতেন তদহেৰ কপ্পতীতি ৰেদিতব্বং. তস্মাযেৰ হি ‘‘সত্তাহকালিকেন ভিক্খৰে যাৰজীৰিকং তদহুপটিগ্গহিত’’ন্তি অৰত্ৰা ‘‘পটিগ্গহিতং সত্তাহং কপ্পতী’’তি ৰুত্তং.

কালযামসত্তাহাতিক্কমেসু চেত্থ ৰিকালভোজনসন্নিধিভেসজ্জসিক্খাপদানং ৰসেন আপত্তিযো ৰেদিতব্বা. ইমেসু চ পন চতূসু কালিকেসু যাৰকালিকং যামকালিকন্তি ইদমেৰ দ্ৰযং অন্তোৰুত্থকঞ্চেৰ সন্নিধিকারকঞ্চ হোতি, সত্তাহকালিকঞ্চ যাৰজীৰিকঞ্চ অকপ্পিযকুটিযং নিক্খিপিতুম্পি ৰট্টতি, সন্নিধিম্পি ন জনেতীতি. সেসং সব্বত্থ উত্তানমেৰাতি.

ভেসজ্জক্খন্ধকৰণ্ণনা নিট্ঠিতা.