৫. চম্মক্খন্ধকং

সোণকোল়িৰিসৰত্থুকথা

২৪২. চম্মক্খন্ধকে – ইস্সরিযাধিপচ্চন্তি ইস্সরভাৰেন চ অধিপতিভাৰেন চ সমন্নাগতং. রজ্জন্তি রাজভাৰং, রঞ্ঞা কত্তব্বকিচ্চং ৰা. সোণো নাম কোল়িৰিসোতি এত্থ সোণোতি তস্স নামং; কোল়িৰিসোতি গোত্তং. পাদতলেসু লোমানীতি রত্তেসু পাদতলেসু সুখুমানি অঞ্জনৰণ্ণানি কম্মচিত্তীকতানি লোমানি জাতানি হোন্তি. সো কির পুব্বে অসীতিসহস্সানং পুরিসানং জেট্ঠপুরিসো হুত্ৰা তেহি সদ্ধিং পচ্চেকবুদ্ধস্স ৰসনট্ঠানে পণ্ণসালং কত্ৰা অত্তনো সস্সিরিকং উণ্ণপাৰারকং পচ্চেকবুদ্ধস্স পাদেহি অক্কমনট্ঠানে পাদপুঞ্ছনিকং কত্ৰা ঠপেসি. তেমাসং পন সব্বেৰ পচ্চেকবুদ্ধং উপট্ঠহিংসু. অযং তস্স চ তেসঞ্চ অসীতিযা গামিকসহস্সানং পুব্বযোগো.

অসীতিগামিকসহস্সানীতি তেসু গামেসু ৰসন্তানং কুলপুত্তানং অসীতিসহস্সানি. কেনচিদেৰ করণীযেনাতি কেনচি করণীযেন ৰিয; ন পনস্স কিঞ্চি করণীযং অত্থি অঞ্ঞত্র তস্স দস্সনা. রাজা কির তানিপি অসীতিকুলপুত্তসহস্সানি সন্নিপাতাপেন্তো ‘‘এৰং অপরিসঙ্কন্তো সোণো আগমিস্সতী’’তি সন্নিপাতাপেসি. দিট্ঠধম্মিকে অত্থেতি ‘‘কসিৰণিজ্জাদীনি ধম্মেন কত্তব্বানি, মাতাপিতরো ধম্মেন পোসিতব্বা’’তি এৰমাদিনা নযেন ইধলোকহিতে অত্থে অনুসাসিত্ৰা. সো নো ভগৰাতি সো অম্হাকং ভগৰা তুম্হে সম্পরাযিকে অত্থে অনুসাসিস্সতীতি অত্থো.

ভগৰন্তং পটিৰেদেমীতি ভগৰন্তং জানাপেমি. পাটিকায নিমুজ্জিত্ৰাতি সোপানস্স হেট্ঠা অড্ঢচন্দপাসাণে নিমুজ্জিত্ৰা. যস্স দানি ভন্তে ভগৰা কালং মঞ্ঞতীতি যস্স তেসং হিতকিরিযত্থস্স ভগৰা কালং জানাতি. ৰিহারপচ্ছাযাযন্তি ৰিহারপচ্চন্তে ছাযাযং. সমন্নাহরন্তীতি পসাদৰসেন পুনপ্পুনং মনসি করোন্তি. ভিয্যোসোমত্তাযাতি ভিয্যোসোমত্তায পুন ৰিসিট্ঠতরং দস্সেহীতি অত্থো. অন্তরধাযতীতি অদস্সনং হোতি.

সোণস্স পব্বজ্জাকথা

২৪৩. লোহিতেন ফুটো হোতীতি লোহিতেন মক্খিতো হোতি. গৰাঘাতনন্তি যত্থ গাৰো হঞ্ঞন্তি, তাদিসোতি অত্থো. কুসলো নাম ৰীণায ৰাদনকুসলো. ৰীণায তন্তিস্সরেতি ৰীণায তন্তিযা সরে. অচ্চাযতাতি অতিআযতা খরমুচ্ছিতা. সরৰতীতি সরসম্পন্না. কম্মঞ্ঞাতি কম্মক্খমা. অতিসিথিলাতি মন্দমুচ্ছনা. সমে গুণে পতিট্ঠিতাতি মজ্ঝিমে সরে ঠপেত্ৰা মুচ্ছিতা. ৰীরিযসমতং অধিট্ঠহাতি ৰীরিযসম্পযুত্তসমতং অধিট্ঠাহি, ৰীরিযং সমথেন যোজেহীতি অত্থো. ইন্দ্রিযানঞ্চ সমতং পটিৰিজ্ঝাতি সদ্ধাদীনং ইন্দ্রিযানং সমতং সমভাৰং. তত্থ সদ্ধং পঞ্ঞায, পঞ্ঞঞ্চ সদ্ধায, ৰীরিযং সমাধিনা, সমাধিঞ্চ ৰীরিযেন যোজযমানো ইন্দ্রিযানং সমতং পটিৰিজ্ঝ. তত্থ চ নিমিত্তং গণ্হাহীতি তস্মিং সমথে সতি, যেন আদাসে মুখবিম্বেনেৰ নিমিত্তেন উপ্পজ্জিতব্বং, তং সমথনিমিত্তং ৰিপস্সনানিমিত্তং মগ্গনিমিত্তং ফলনিমিত্তঞ্চ গণ্হাহি, নিব্বত্তেহীতি অত্থো.

২৪৪. অঞ্ঞং ব্যাকরেয্যন্তি অরহা অহন্তি জানাপেয্যং. ছ ঠানানীতি ছ কারণানি. অধিমুত্তো হোতীতি পটিৰিজ্ঝিত্ৰা পচ্চক্খং কত্ৰা ঠিতো হোতি. নেক্খম্মাধিমুত্তোতিআদি সব্বং অরহত্তৰসেন ৰুত্তং. অরহত্তঞ্হি সব্বকিলেসেহি নিক্খন্তত্তা নেক্খম্মং, তেহেৰ পৰিৰিত্তত্তা পৰিৰেকো, ব্যাপজ্জাভাৰতো অব্যাপজ্জং, উপাদানস্স খযন্তে উপ্পন্নত্তা উপাদানক্খযো, তণ্হাক্খযন্তে উপ্পন্নত্তা তণ্হক্খযো, সম্মোহাভাৰতো অসম্মোহোতি চ ৰুচ্চতি.

কেৰলং সদ্ধামত্তকন্তি পটিৰেধরহিতং কেৰলং পটিৰেধপঞ্ঞায অসম্মিস্সং সদ্ধামত্তকং. পটিচযন্তি পুনপ্পুনং করণেন ৰুড্ঢিং. ৰীতরাগত্তাতি মগ্গপ্পটিৰেধেন রাগস্স ৰিগতত্তাযেৰ নেক্খম্মসঙ্খাতং অরহত্তং পটিৰিজ্ঝিত্ৰা ঠিতো হোতি. ফলসমাপত্তিৰিহারেনেৰ ৰিহরতি, তন্নিন্নমানসোযেৰ হোতীতি অত্থো. সেসপদেসুপি এসেৰ নযো.

লাভসক্কারসিলোকন্তি চতুপচ্চযলাভঞ্চ তেসংযেৰ সুকতভাৰঞ্চ ৰণ্ণভণনঞ্চ. নিকামযমানোতি ইচ্ছমানো পত্থযমানো. পৰিৰেকাধিমুত্তোতি ৰিৰেকে অধিমুত্তো অহন্তি এৰং অরহত্তং ব্যাকরোতীতি অত্থো.

সীলব্বতপরামাসন্তি সীলঞ্চ ৰতঞ্চ পরামসিত্ৰা গহিতগহণমত্তং. সারতো পচ্চাগচ্ছন্তোতি সারভাৰেন জানন্তো. অব্যাপজ্জাধিমুত্তোতি অব্যাপজ্জং অরহত্তং ব্যাকরোতীতি অত্থো. ইমিনাৰ নযেন সব্বৰারেসু অত্থো ৰেদিতব্বো.

ভুসাতি বলৰন্তো. নেৰস্স চিত্তং পরিযাদিযন্তীতি এতস্স খীণাসৰস্স চিত্তং গহেত্ৰা ঠাতুং ন সক্কোন্তি. অমিস্সীকতন্তি অমিস্সকতং. কিলেসাহি আরম্মণেন সদ্ধিং চিত্তং মিস্সং করোন্তি, তেসং অভাৰা অমিস্সীকতং. ঠিতন্তি পতিট্ঠিতং. আনেঞ্জপ্পত্তন্তি অচলনপ্পত্তং. ৰযঞ্চস্সানুপস্সতীতি তস্স চিত্তস্স উপ্পাদম্পি ৰযম্পি পস্সতি.

নেক্খম্মং অধিমুত্তস্সাতি অরহত্তং পটিৰিজ্ঝিত্ৰা ঠিতস্স. সেসপদেহিপি অরহত্তমেৰ কথিতং. উপাদানক্খযস্সাতি উপযোগত্থে সামিৰচনং. অসম্মোহঞ্চ চেতসোতি চিত্তস্স চ অসম্মোহং অধিমুত্তস্স. দিস্ৰা আযতনুপ্পাদন্তি আযতনানং উপ্পাদঞ্চ ৰযঞ্চ দিস্ৰা. সম্মা চিত্তং ৰিমুচ্চতীতি সম্মা হেতুনা নযেন ইমায ৰিপস্সনায পটিপত্তিযা ফলসমাপত্তিৰসেন চিত্তং ৰিমুচ্চতি, নিব্বানারম্মণে অধিমুচ্চতি. সন্তচিত্তস্সাতি নিব্বুতচিত্তস্স. তাদিনোতি ইট্ঠানিট্ঠে অনুনযপটিঘেহি অকম্পিযত্তা তাদী, তস্স তাদিনো.

দিগুণাদিউপাহনপটিক্খেপকথা

২৪৫. অঞ্ঞং ব্যাকরোন্তীতি অরহত্তং ব্যাকরোন্তি. অত্থো চ ৰুত্তোতি যেন অরহাতি ঞাযতি, সো অত্থো ৰুত্তো. সুত্তত্থো পন সুত্তৰণ্ণনতোযেৰ গহেতব্বো. অত্তা চ অনুপনীতোতি অহং অরহাতি এৰং ব্যঞ্জনৰসেন অত্তা ন উপনীতো. অথ চ পনিধেকচ্চে মোঘপুরিসাতি অঞ্ঞে পন তুচ্ছপুরিসা হসমানা ৰিয অসন্তমেৰ অঞ্ঞং ৰচনমত্তেন সন্তং কত্ৰা ব্যাকরোন্তি. একপলাসিকন্তি একপটলং. অসীতিসকটৰাহেতি এত্থ দ্ৰে সকটভারা একো ৰাহোতি ৰেদিতব্বো. সত্তহত্থিকঞ্চ অনীকন্তি এত্থ ছ হত্থিনিযো একো চ হত্থীতি ইদমেকং অনীকং. ঈদিসানি সত্ত অনীকানি সত্তহত্থিকং অনীকং নাম. দিগুণাতি দ্ৰিপটলা. তিগুণাতি তিপটলা. গণঙ্গুণূপাহনাতি চতুপটলতো পট্ঠায ৰুচ্চতি.

সব্বনীলিকাদিপটিক্খেপকথা

২৪৬. সব্বনীলিকাতি সব্বাৰ নীলিকা. এস নযো সব্বপীতিকাদীসুপি. তত্থ চ নীলিকা উমাপুপ্ফৰণ্ণা হোতি, পীতিকা কণিকারপুপ্ফৰণ্ণা, লোহিতিকা জযসুমনপুপ্ফৰণ্ণা, মঞ্জিট্ঠিকা মঞ্জিট্ঠৰণ্ণা এৰ, কণ্হা অদ্দারিট্ঠকৰণ্ণা, মহারঙ্গরত্তা সতপদিপিট্ঠিৰণ্ণা, মহানামরত্তা সম্ভিন্নৰণ্ণা হোতি পণ্ডুপলাসৰণ্ণা. কুরুন্দিযং পন ‘‘পদুমপুপ্ফৰণ্ণা’’তি ৰুত্তা. এতাসু যংকিঞ্চি লভিত্ৰা রজনং চোল়কেন পুঞ্ছিত্ৰা ৰণ্ণং ভিন্দিত্ৰা ধারেতুং ৰট্টতি. অপ্পমত্তকেপি ভিন্নে ৰট্টতিযেৰ.

নীলকৰদ্ধিকাতি যাসং ৰদ্ধাযেৰ নীলা. এসেৰ নযো সব্বত্থ. এতাপি ৰণ্ণভেদং কত্ৰা ধারেতব্বা. খল্লকবদ্ধাতি পণ্হিপিধানত্থং তলে খল্লকং বন্ধিত্ৰা কতা. পুটবদ্ধাতি যোনকউপাহনা ৰুচ্চতি, যা যাৰজঙ্ঘতো সব্বপাদং পটিচ্ছাদেতি. পালিগুণ্ঠিমাতি পলিগুণ্ঠিত্ৰা কতা; যা উপরি পাদমত্তমেৰ পটিচ্ছাদেতি, ন জঙ্ঘং. তূলপুণ্ণিকাতি তূলপিচুনা পূরেত্ৰা কতা. তিত্তিরপত্তিকাতি তিত্তিরপত্তসদিসা ৰিচিত্তবদ্ধা. মেণ্ডৰিসাণৰদ্ধিকাতি কণ্ণিকট্ঠানে মেণ্ডকসিঙ্গসণ্ঠানে ৰদ্ধে যোজেত্ৰা কতা. অজৰিসাণৰদ্ধিকাদীসুপি এসেৰ নযো. ৰিচ্ছিকাল়িকাপি তত্থেৰ ৰিচ্ছিকনঙ্গুট্ঠসণ্ঠানে ৰদ্ধে যোজেত্ৰা কতা. মোরপিঞ্ছপরিসিব্বিতাতি তলেসু ৰা ৰদ্ধেসু ৰা মোরপিঞ্ছেহি সুত্তকসদিসেহি পরিসিব্বিতা. চিত্রাতি ৰিচিত্রা; এতাসু যংকিঞ্চি লভিত্ৰা, সচে তানি খল্লকাদীনি অপনেত্ৰা সক্কা হোন্তি ৰল়ঞ্জিতুং, ৰল়ঞ্জেতব্বা. তেসু পন সতি ৰল়ঞ্জন্তস্স দুক্কটং. সীহচম্মপরিক্খটা নাম পরিযন্তেসু চীৰরে অনুৰাতং ৰিয সীহচম্মং যোজেত্ৰা কতা. লূৰকচম্মপরিক্খটাতি পক্খিবিল়ালচম্মপরিক্খটা. এতাসুপি যা কাচি লভিত্ৰা তং চম্মং অপনেত্ৰা ধারেতব্বা.

২৪৭. ওমুক্কন্তি পটিমুঞ্চিত্ৰা অপনীতং. নৰাতি অপরিভুত্তা.

অজ্ঝারামেউপাহনপটিক্খেপকথা

২৪৮. অভিজীৰনিকস্সাতি যেন সিপ্পেন অভিজীৰন্তি, জীৰিকং কপ্পেন্তি, তস্স কারণাতি অত্থো. ইধ খো তং ভিক্খৰেতি এত্থ তন্তি নিপাতমত্তং, ইধ খো ভিক্খৰে সোভেয্যাথাতি অত্থো. যং তুম্হেতি যে তুম্হে. অথ ৰা যদি তুম্হেতি ৰুত্তং হোতি. যদিসদ্দস্স হি অত্থে অযং নিপাতো. আচরিযেসূতিআদিম্হি পব্বজ্জাচরিযো, উপসম্পদাচরিযো, নিস্সযাচারিযো, উদ্দেসাচরিযোতি ইমে চত্তারোপি ইধ আচরিযা এৰ. অৰস্সিকস্স ছব্বস্সো আচরিযমত্তো. সো হি চতুৰস্সকালে তং নিস্সায ৰচ্ছতি; এৰং একৰস্সস্স সত্তৰস্সো, দুৰস্সস্স অট্ঠৰস্সো, তিৰস্সস্স নৰৰস্সো, চতুৰস্সস্স দসৰস্সো. ইমেপি আচরিযমত্তা এৰ. উপজ্ঝাযস্স সন্দিট্ঠসম্ভত্তা পন সহাযভিক্খূ, যে ৰা পন কেচি দসহি ৰস্সেহি মহন্ততরা তে সব্বেপি উপজ্ঝাযমত্তা নাম. এত্তকেসু ভিক্খূসু অনুপাহনেসু চঙ্কমন্তেসু সউপাহনস্স চঙ্কমতো আপত্তি.

২৪৯. পাদখীলাবাধো নাম পাদতো খীলসদিসং মংসং নিক্খন্তং হোতি.

২৫১. তিণপাদুকাতি যেন কেনচি তিণেন কতপাদুকা. হিন্তালপাদুকাতি খজ্জূরীপত্তেহি কতপাদুকা; হিন্তালপত্তেহিপি ন ৰট্টতিযেৰ. কমলপাদুকাতি কমলতিণং নাম অত্থি, তেন কতপাদুকা; উসীরপাদুকাতিপি ৰদন্তি. কম্বলপাদুকাতি উণ্ণাহি কতপাদুকা. অসঙ্কমনীযাতি ভূমিযং সুপ্পতিট্ঠিতা নিচ্চলা অসংহারিযা.

২৫২. অঙ্গজাতং ছুপন্তীতি অঙ্গজাতেনেৰ অঙ্গজাতং ছুপন্তি. ওগাহেত্ৰা মারেন্তীতি অন্তো উদকে দল়্হং গহেত্ৰা মারেন্তি.

যানাদিপটিক্খেপকথা

২৫৩. ইত্থিযুত্তেনাতি ধেনুযুত্তেন. পুরিসন্তরেনাতি পুরিসসারথিনা. পুরিসযুত্তেনাতি গোণযুত্তেন. ইত্থন্তরেনাতি ইত্থিসারথিনা. গঙ্গামহিযাযাতি গঙ্গামহকীল়িকায. পুরিসযুত্তং হত্থৰট্টকন্তি এত্থ পুরিসযুত্তং ইত্থিসারথি ৰা হোতু, পুরিসসারথি ৰা ৰট্টতি. হত্থৰট্টকং পন ইত্থিযো ৰা ৰট্টেন্তু পুরিসা ৰা, ৰট্টতিযেৰ. যানুগ্ঘাতেনাতি যানং অভিরুহন্তস্স সব্বো কাযো চলতি তপ্পচ্চযা. সিৰিকন্তি পীঠকসিৰিকং. পাটঙ্কিন্তি ৰংসে লগ্গেত্ৰা কতং পটপোতলিকং.

২৫৪. উচ্চাসযনমহাসযননানীতি এত্থ উচ্চাসযনন্তি পমাণাতিক্কন্তং মঞ্চং. মহাসযনন্তি অকপ্পিযত্থরণং, আসন্দীআদীসু আসন্দীতি পমাণাতিক্কন্তাসনং. পল্লঙ্কোতি পাদেসু ৰাল়রূপানি ঠপেত্ৰা কতো. গোনকোতি দীঘলোমকো মহাকোজৰো; চতুরঙ্গুলাধিকানি কির তস্স লোমানি. চিত্তকাতি ৰানচিত্রো উণ্ণামযত্থরণো. পটিকাতি উণ্ণামযো সেতত্থরণো. পটলিকাতি ঘনপুপ্ফকো উণ্ণামযলোহিতত্থরণো; যো আমলকপট্টোতিপি ৰুচ্চতি. তূলিকাতি পকতিতূলিকাযেৰ. ৰিকতিকাতি সীহব্যগ্ঘাদিরূপৰিচিত্রো উণ্ণামযত্থরণো. উদ্দলোমীতি একতো উগ্গতলোমং উণ্ণামযত্থরণং; ‘‘উদ্ধলোমী’’তিপি পাঠো. একন্তলোমীতি উভতো উগ্গতলোমং উণ্ণামযত্থরণং. কট্টিস্সন্তি রতনপরিসিব্বিতং কোসেয্যকট্টিস্সমযং পচ্চত্থরণং. কোসেয্যন্তি রতনপরিসিব্বিতং কোসিযসুত্তমযং পচ্চত্থরণং; সুদ্ধকোসেয্যং পন ৰট্টতি.

কুত্তকন্তি সোল়সন্নং নাটকিত্থীনং ঠত্ৰা নচ্চনযোগ্গং উণ্ণামযঅত্থরণং. হত্থত্থরঅস্সত্থরাতি হত্থিঅস্সপিট্ঠীসু অত্থরণকঅত্থরণা এৰ. রথত্থরেপি এসেৰ নযো. অজিনপ্পৰেণীতি অজিনচম্মেহি মঞ্চপ্পমাণেন সিব্বিত্ৰা কতা পৰেণী. কদলীমিগপৰরপচ্চত্থরণন্তি কদলীমিগচম্মং নাম অত্থি, তেন কতং পৰরপচ্চত্থরণং, উত্তমপচ্চত্থরণন্তি অত্থো. তং কির সেতৰত্থস্স উপরি কদলীমিগচম্মং পত্থরিত্ৰা সিব্বিত্ৰা করোন্তি. সউত্তরচ্ছদন্তি সহ উত্তরচ্ছদনেন; উপরিবদ্ধেন রত্তৰিতানেন সদ্ধিন্তি অত্থো. সেতৰিতানম্পি হেট্ঠা অকপ্পিযপচ্চত্থরণে সতি ন ৰট্টতি, অসতি পন ৰট্টতি. উভতোলোহিতকূপধানন্তি সীসূপধানঞ্চ পাদূপধানঞ্চাতি মঞ্চস্স উভতোলোহিতকূপধানং, এতং ন কপ্পতি. যং পন একমেৰ উপধানং উভোসু পস্সেসু রত্তং ৰা হোতি, পদুমৰণ্ণং ৰা চিত্রং ৰা, সচে পমাণযুত্তং, ৰট্টতি. মহাউপধানং পন পটিক্খিত্তং.

সব্বচম্মপটিক্খেপাদিকথা

২৫৫. দীপিচ্ছাপোতি দীপিপোতকো. ওগুম্ফিযন্তীতি ভিত্তিদণ্ডকাদীসু ৰেঠেত্ৰা বন্ধন্তি.

২৫৬. অভিনিসীদিতুন্তি অভিনিস্সায নিসীদিতুং; অপস্সযং কত্ৰা নিসীদিতুন্তি অত্থো. গিলানেন ভিক্খুনা সউপাহনেনাতি এত্থ গিলানো নাম যো ন সক্কোতি অনুপাহনো গামং পৰিসিতুং.

২৫৭. কুররঘরেতি এৰংনামকে নগরে; এতেনস্স গোচরগামো ৰুত্তো. পপতকে পব্বতেতি পপতনামকে পব্বতে; এতেনস্স নিৰাসনট্ঠানং ৰুত্তং. সোণোতি তস্স নামং. কোটিঅগ্ঘনকং পন কণ্ণপিল়ন্ধনকং ধারেতি, তস্মা ‘‘কুটিকণ্ণো’’তি ৰুচ্চতি; কোটিকণ্ণোতি অত্থো. পাসাদিকন্তি পসাদজনকং. পসাদনীযন্তি ইদং তস্সেৰ অত্থৰেৰচনং. উত্তমদমথসমথন্তি উত্তমং দমথঞ্চ সমথঞ্চ পঞ্ঞঞ্চ সমাধিঞ্চ কাযূপসমঞ্চ চিত্তূপসমঞ্চাতিপি অত্থো. দন্তন্তি সব্বেসং ৰিসূকাযিকৰিপ্ফন্দিতানং উপচ্ছিন্নত্তা দন্তং; খীণকিলেসন্তি অত্থো. গুত্তন্তি সংৰরগুত্তিযা গুত্তং. সন্তিন্দ্রিযন্তি যতিন্দ্রিযং. নাগন্তি আগুৰিরহিতং. তিণ্ণং মে ৰস্সানং অচ্চযেনাতি মম পব্বজ্জাদিৰসতো পট্ঠায তিণ্ণং ৰস্সানং অচ্চযেন. উপসম্পদং অলত্থন্তি অহং উপসম্পদং অলভিং. কণ্হুত্তরাতি কণ্হমত্তিকুত্তরা; উপরি ৰড্ঢিতকণ্হমত্তিকাতি অত্থো. গোকণ্টকহতাতি গুন্নং খুরেহি অক্কন্তভূমিতো সমুট্ঠিতেহি গোকণ্টকেহি উপহতা. তে কির গোকণ্টকে একপটলিকা উপাহনা রক্খিতুং ন সক্কোন্তি; এৰং খরা হোন্তি. এরগূ, মোরগূ, মজ্জারূ, জন্তূতি ইমা চতস্সোপি তিণজাতিযো; এতেহি কটসারকে চ তট্টিকাযো চ করোন্তি. এত্থ এরগূতি এরকতিণং; তং ওল়ারিকং. মোরগূতিণং তম্বসীসং মুদুকং সুখসম্ফস্সং, তেন কততট্টিকা নিপজ্জিত্ৰা ৰুট্ঠিতমত্তে পুন উদ্ধুমাতা হুত্ৰা তিট্ঠতি. মজ্জারুনা সাটকেপি করোন্তি. জন্তুস্স মণিসদিসো ৰণ্ণো হোতি. সেনাসনং পঞ্ঞপেসীতি ভিসিং ৰা কটসারকং ৰা পঞ্ঞপেসি; পঞ্ঞপেত্ৰা চ পন সোণস্স আরোচেতি – ‘‘আৰুসো সত্থা তযা সদ্ধিং একাৰাসে ৰসিতুকামো, গন্ধকুটিযংযেৰ তে সেনাসনং পঞ্ঞত্ত’’ন্তি.

২৫৮. অযং খ্ৰস্স কালোতি অযং খো কালো ভৰেয্য. পরিদস্সীতি পরিদস্সেসি. ‘‘ইদঞ্চিদঞ্চ ৰদেয্যাসীতি যং মে উপজ্ঝাযো জানাপেসি, তস্স অযং কালো ভৰেয্য, হন্দ দানি আরোচেমি তং সাসন’’ন্তি অযমেত্থ অধিপ্পাযো.

২৫৯. ৰিনযধরপঞ্চমেনাতি অনুস্সাৰনাচরিযপঞ্চমেন. অনুজানামি ভিক্খৰে সব্বপচ্চন্তিমেসু জনপদেসু গুণঙ্গুণূপাহনন্তি এত্থ মনুস্সচম্মং ঠপেত্ৰা যেন কেনচি চম্মেন উপাহনা ৰট্টতি. উপাহনকোসকসত্থকোসককুঞ্চিককোসকেসুপি এসেৰ নযো. চম্মানি অত্থরণানীতি এত্থ পন যংকিঞ্চি এল়কচম্মং অজচম্মঞ্চ অত্থরিত্ৰা নিপজ্জিতুং ৰা নিসীদিতুং ৰা ৰট্টতি. মিগচম্মে এণীমিগো ৰাতমিগো পসদমিগো কুরঙ্গমিগো মিগমাতুকো রোহিতমিগোতি এতেসংযেৰ চম্মানি ৰট্টন্তি. অঞ্ঞেসং পন –

মক্কটো কাল়সীহো চ, সরভো কদলীমিগো;

যে চ ৰাল়মিগা কেচি, তেসং চম্মং ন ৰট্টতি.

তত্থ ৰাল়মিগাতি সীহব্যগ্ঘঅচ্ছতরচ্ছা; ন কেৰলঞ্চ এতেসংযেৰ, যেসং পন চম্মং ৰট্টতীতি ৰুত্তং, তে ঠপেত্ৰা অৰসেসা অন্তমসো গোমহিংসসসবিল়ারাদযোপি সব্বে ইমস্মিং অত্থে ৰাল়মিগাত্ৰেৰ ৰেদিতব্বা. এতেসঞ্হি সব্বেসং চম্মং ন ৰট্টতি. ন তাৰ তং গণনূপগং যাৰ ন হত্থং গচ্ছতীতি যাৰ আহরিত্ৰা ৰা ন দিন্নং, তুম্হাকং ভন্তে চীৰরং উপ্পন্নন্তি পহিণিত্ৰা ৰা নারোচিতং, তাৰ গণনং ন উপেতি. সচে অনধিট্ঠিতং, ৰট্টতি; অধিট্ঠিতঞ্চ গণনং ন উপেতীতি অত্থো. যদা পন আনেত্ৰা ৰা দিন্নং হোতি, উপ্পন্নন্তি ৰা সুতং, ততো পট্ঠায দসাহমেৰ পরিহারং লভতীতি.

চম্মক্খন্ধকৰণ্ণনা নিট্ঠিতা.