৪. পৰারণাক্খন্ধকং

অফাসুকৰিহারকথা

২০৯. পৰারণাক্খন্ধকে – নেৰ আলপেয্যাম ন সল্লপেয্যামাতি এত্থ আলাপো নাম পঠমৰচনং; সল্লাপো পচ্ছিমৰচনং. হত্থৰিলঙ্ঘকেনাতি হত্থুক্খেপকেন. পসুসংৰাসন্তি পসূনং ৰিয সংৰাসং. পসৰোপি হি অত্তনো উপ্পন্নং সুখদুক্খং অঞ্ঞমঞ্ঞস্স ন আরোচেন্তি, পটিসন্থারং ন করোন্তি, তথা এতেপি ন অকংসু; তস্মা নেসং সংৰাসো ‘‘পসুসংৰাসো’’তি ৰুচ্চতি. এস নযো সব্বত্থ. ন ভিক্খৰে মূগব্বতং তিত্থিযসমাদানন্তি ‘‘ইমং তেমাসং ন কথেতব্ব’’ন্তি এৰরূপং ৰতসমাদানং ন কাতব্বং; অধম্মকতিকা হেসা. অঞ্ঞমঞ্ঞানুলোমতাতি অঞ্ঞমঞ্ঞং ৰত্তুং অনুলোমভাৰো. ‘‘ৰদন্তু মং আযস্মন্তো’’তি হি ৰদন্তং সক্কা হোতি কিঞ্চি ৰত্তুং; ন ইতরং. আপত্তিৰুট্ঠানতা ৰিনযপুরেক্খারতাতি আপত্তীহি ৰুট্ঠানভাৰো ৰিনযং পুরতো কত্ৰা চরণভাৰো. ‘‘ৰদন্তু মং আযস্মন্তো’’তি হি এৰং ৰদন্তো আপত্তীহি ৰুট্ঠহিস্সতি, ৰিনযঞ্চ পুরক্খত্ৰা ৰিহরিস্সতীতি ৰুচ্চতি.

২১০. সুণাতু মে ভন্তে সঙ্ঘো অজ্জ পৰারণা, যদি সঙ্ঘস্স পত্তকল্লং, সঙ্ঘো পৰারেয্যাতি অযং সব্বসঙ্গাহিকা নাম ঞত্তি; এৰঞ্হি ৰুত্তে তেৰাচিকং দ্ৰেৰাচিকং একৰাচিকঞ্চ পৰারেতুং ৰট্টতি. সমানৰস্সিকং ন ৰট্টতি. ‘‘তেৰাচিকং পৰারেয্যা’’তি ৰুত্তে পন তেৰাচিকমেৰ ৰট্টতি, অঞ্ঞং ন ৰট্টতি. ‘‘দ্ৰেৰাচিকং পৰারেয্যা’’তি ৰুত্তে দ্ৰেৰাচিকঞ্চ তেৰাচিকঞ্চ ৰট্টতি, একৰাচিকঞ্চ সমানৰস্সিকঞ্চ ন ৰট্টতি. ‘‘একৰাচিকং পৰারেয্যা’’তি ৰুত্তে পন একৰাচিক-দ্ৰেৰাচিক-তেৰাচিকানি ৰট্টন্তি, সমানৰস্সিকমেৰ ন ৰট্টতি. ‘‘সমানৰস্সিক’’ন্তি ৰুত্তে সব্বং ৰট্টতি.

২১১. অচ্ছন্তীতি নিসিন্নাৰ হোন্তি, ন উট্ঠহন্তি. তদমন্তরাতি তদন্তরা; তাৰতকং কালন্তি অত্থো.

পৰারণাভেদকথা

২১২. চাতুদ্দসিকা চ পন্নরসিকা চাতি এত্থ চাতুদ্দসিকায ‘‘অজ্জ পৰারণা চাতুদ্দসী’’তি এৰং পুব্বকিচ্চং কাতব্বং, পন্নরসিকায ‘‘অজ্জ পৰারণা পন্নরসী’’তি.

পৰারণকম্মেসু সচে একস্মিং ৰিহারে পঞ্চসু ভিক্খূসু ৰসন্তেসু একস্স পৰারণং আহরিত্ৰা চত্তারো গণঞত্তিং ঠপেত্ৰা পৰারেন্তি, চতূসু তীসু ৰা ৰসন্তেসু একস্স পৰারণং আহরিত্ৰা তযো ৰা দ্ৰে ৰা সঙ্ঘঞত্তিং ঠপেত্ৰা পৰারেন্তি, সব্বমেতং অধম্মেনৰগ্গং পৰারণকম্মং.

সচে পন সব্বেপি পঞ্চ জনা একতো সন্নিপতিত্ৰা গণঞত্তিং ঠপেত্ৰা পৰারেন্তি, চত্তারো তযো ৰা দ্ৰে ৰা ৰসন্তা একতো সন্নিপতিত্ৰা সঙ্ঘঞত্তিং ঠপেত্ৰা পৰারেন্তি, সব্বমেতং অধম্মেনসমগ্গং পৰারণকম্মং.

সচে পঞ্চসু জনেসু একস্স পৰারণং আহরিত্ৰা চত্তারো সঙ্ঘঞত্তিং ঠপেত্ৰা পৰারেন্তি, চতূসু তীসু ৰা একস্স পৰারণং আহরিত্ৰা তযো ৰা দ্ৰে ৰা গণঞত্তিং ঠপেত্ৰা পৰারেন্তি, সব্বমেতং ধম্মেনৰগ্গং পৰারণকম্মং.

সচে পন সব্বেপি পঞ্চ জনা একতো সন্নিপতিত্ৰা সঙ্ঘঞত্তিং ঠপেত্ৰা পৰারেন্তি, চত্তারো ৰা তযো ৰা একতো সন্নিপতিত্ৰা গণঞত্তিং ঠপেত্ৰা পৰারেন্তি, দ্ৰে অঞ্ঞমঞ্ঞং পৰারেন্তি, এককো ৰসন্তো অধিট্ঠানপৰারণং করোতি, সব্বমেতং ধম্মেনসমগ্গং নাম পৰারণকম্মন্তি.

পৰারণাদানানুজাননকথা

২১৩. দিন্না হোতি পৰারণাতি এত্থ এৰং দিন্নায পৰারণায পৰারণাহারকেন সঙ্ঘং উপসঙ্কমিত্ৰা এৰং পৰারেতব্বং – ‘‘তিস্সো ভন্তে ভিক্খু সঙ্ঘং পৰারেতি দিট্ঠেন ৰা সুতেন ৰা পরিসঙ্কায ৰা, ৰদতু তং ভন্তে সঙ্ঘো অনুকম্পং উপাদায, পস্সন্তো পটিকরিস্সতি. দুতিযম্পি…পে… ততিযম্পি ভন্তে তিস্সো ভিক্খু সঙ্ঘং পৰারেতি…পে… পটিকরিস্সতী’’তি. সচে পন ৰুড্ঢতরো হোতি, ‘‘আযস্মা ভন্তে তিস্সো’’তি ৰত্তব্বং; এৰঞ্হি তেন তস্সত্থায পৰারিতং হোতীতি.

পৰারণং দেন্তেন ছন্দম্পি দাতুন্তি এত্থ ছন্দদানং উপোসথক্খন্ধকে ৰুত্তনযেনেৰ ৰেদিতব্বং. ইধাপি চ ছন্দদানং অৰসেসকম্মত্থায. তস্মা সচে পৰারণং দেন্তো ছন্দং দেতি, ৰুত্তনযেন আহটায পৰারণায তেন চ ভিক্খুনা সঙ্ঘেন চ পৰারিতমেৰ হোতি. অথ পৰারণমেৰ দেতি, ন ছন্দং, তস্স চ পৰারণায আরোচিতায সঙ্ঘেন চ পৰারিতে সব্বেসং সুপ্পৰারিতং হোতি, অঞ্ঞং পন কম্মং কুপ্পতি. সচে ছন্দমেৰ দেতি ন পৰারণং, সঙ্ঘস্স পৰারণা চ সেসকম্মানি চ ন কুপ্পন্তি, তেন পন ভিক্খুনা অপ্পৰারিতং হোতি. পৰারণদিৰসে পন বহিসীমাযং পৰারণং অধিট্ঠহিত্ৰা আগতেনপি ছন্দো দাতব্বো, তেন সঙ্ঘস্স পৰারণকম্মং ন কুপ্পতি.

২১৮. অজ্জ মে পৰারণাতি এত্থ সচে চাতুদ্দসিকা হোতি, ‘‘অজ্জ মে পৰারণা চাতুদ্দসী’’তি সচে পন্নরসিকা ‘‘অজ্জ মে পৰারণা পন্নরসী’’তি এৰং অধিট্ঠাতব্বং.

২১৯. তদহুপৰারণায আপত্তিন্তিআদি ৰুত্তনযমেৰ.

অনাপত্তিপন্নরসকাদিকথা

২২২. পুন পৰারেতব্বন্তি পুন পুব্বকিচ্চং কত্ৰা ঞত্তিং ঠপেত্ৰা সঙ্ঘত্থেরতো পট্ঠায পৰারেতব্বং. সেসং উপোসথক্খন্ধকৰণ্ণনাযং ৰুত্তনযেনেৰ ৰেদিতব্বং.

২২৮. আগন্তুকেহি আৰাসিকানং অনুৰত্তিতব্বন্তি ‘‘অজ্জ পৰারণা চাতুদ্দসী’’তি এতদেৰ পুব্বকিচ্চং কাতব্বং. পন্নরসিকৰারেপি এসেৰ নযো. আৰাসিকেহি নিস্সীমং গন্ত্ৰা পৰারেতব্বন্তি অস্সাৰসানে অযং পাল়িমুত্তকৰিনিচ্ছযো – সচে পুরিমিকায পঞ্চ ভিক্খূ ৰস্সং উপগতা, পচ্ছিমিকাযপি পঞ্চ, পুরিমেহি ঞত্তিং ঠপেত্ৰা পৰারিতে পচ্ছিমেহি তেসং সন্তিকে পারিসুদ্ধিউপোসথো কাতব্বো, ন একস্মিং উপোসথগ্গে দ্ৰে ঞত্তিযো ঠপেতব্বা. সচেপি পচ্ছিমিকায উপগতা চত্তারো তযো দ্ৰে একো ৰা হোতি, এসেৰ নযো. অথ পুরিমিকায চত্তারো পচ্ছিমিকাযপি চত্তারো তযো দ্ৰে একো ৰা এসেৰ নযো. অথাপি পুরিমিকায তযো, পচ্ছিমিকাযপি তযো দ্ৰে ৰা, এসেৰ নযো. ইদঞ্হেত্থ লক্খণং – সচে পুরিমিকায উপগতেহি পচ্ছিমিকায উপগতা থোকতরা চেৰ হোন্তি সমসমা চ, সঙ্ঘপৰারণায গণং পূরেন্তি, সঙ্ঘপৰারণাৰসেন ঞত্তি ঠপেতব্বাতি.

সচে পন পুরিমিকায তযো, পচ্ছিমিকায একো হোতি, তেন সদ্ধিং তে চত্তারো হোন্তি, চতুন্নং সঙ্ঘঞত্তিং ঠপেত্ৰা পৰারেতুং ন ৰট্টতি. গণঞত্তিযা পন সো গণপূরকো হোতি, তস্মা গণৰসেন ঞত্তিং ঠপেত্ৰা পুরিমেহি পৰারেতব্বং. ইতরেন তেসং সন্তিকে পারিসুদ্ধিউপোসথো কাতব্বো. সচে পুরিমিকায দ্ৰে পচ্ছিমিকায দ্ৰে ৰা একো ৰা হোতি, এসেৰ নযো. সচে পুরিমিকায একো, পচ্ছিমিকাযপি একো হোতি, একেন একস্স সন্তিকে পৰারেতব্বং, একেন পারিসুদ্ধিউপোসথো কাতব্বো. সচে পন পুরিমৰস্সূপগতেহি পচ্ছিমৰস্সূপগতা একেনপি অধিকতরা হোন্তি, পঠমং পাতিমোক্খং উদ্দিসিত্ৰা পচ্ছা থোকতরেহি তেসং সন্তিকে পৰারেতব্বং.

কত্তিকচাতুমাসিনিযা পৰারণায পন সচে পঠমং ৰস্সূপগতেহি মহাপৰারণায পৰারিতেহি পচ্ছা উপগতা অধিকতরা ৰা সমসমা ৰা হোন্তি, পৰারণাঞত্তিং ঠপেত্ৰা পৰারেতব্বং. তেহি পৰারিতে পচ্ছা ইতরেহি পারিসুদ্ধিউপোসথো কাতব্বো. অথ মহাপৰারণায পৰারিতা বহূ ভিক্খূ হোন্তি, পচ্ছিমৰস্সূপগতা থোকতরা ৰা একো ৰা, পাতিমোক্খে উদ্দিট্ঠে পচ্ছা তেসং সন্তিকে তেন পৰারেতব্বং.

২৩৩. ন চ ভিক্খৰে অপ্পৰারণায পৰারেতব্বং, অঞ্ঞত্র সঙ্ঘসামগ্গিযাতি এত্থ কোসম্বকসামগ্গীসদিসাৰ সামগ্গী ৰেদিতব্বা. ‘‘অজ্জ পৰারণা সামগ্গী’’তি এৰঞ্চেত্থ পুব্বকিচ্চং কাতব্বং. যে পন কিস্মিঞ্চিদেৰ অপ্পমত্তকে পৰারণং ঠপেত্ৰা সমগ্গা হোন্তি, তেহি পৰারণাযমেৰ পৰারণা কাতব্বা. সামগ্গীপৰারণং করোন্তেহি চ পঠমপৰারণং ঠপেত্ৰা পাটিপদতো পট্ঠায যাৰ কত্তিকচাতুমাসিনী পুণ্ণমা, এত্থন্তরে কাতব্বা, ততো পচ্ছা ৰা পুরে ৰা ন ৰট্টতি.

দ্ৰেৰাচিকাদিপৰারণাকথা

২৩৪. দ্ৰেৰাচিকং পৰারেতুন্তি এত্থ ঞত্তিং ঠপেন্তেনাপি ‘‘যদি সঙ্ঘস্স পত্তকল্লং সঙ্ঘো দ্ৰেৰাচিকং পৰারেয্যা’’তি ৰত্তব্বং, একৰাচিকে ‘‘একৰাচিকং পৰারেয্যা’’তি, সমানৰস্সিকেপি ‘‘সমানৰস্সিকং পৰারেয্যা’’তি ৰত্তব্বং, এত্থ চ বহূপি সমানৰস্সা একতো পৰারেতুং লভন্তি.

পৰারণাঠপনকথা

২৩৬. ভাসিতায লপিতায অপরিযোসিতাযাতি এত্থ সব্বসঙ্গাহিকঞ্চ পুগ্গলিকঞ্চাতি দুৰিধং পৰারণাঠপনং. তত্থ সব্বসঙ্গাহিকে ‘‘সুণাতু মে ভন্তে সঙ্ঘো…পে… সঙ্ঘো তেৰাচিকং পৰারে’’ ইতি সুকারতো যাৰ রেকারো, তাৰ ভাসিতা লপিতা অপরিযোসিতাৰ হোতি পৰারণা. এত্থন্তরে একপদেপি ঠপেন্তেন ঠপিতা হোতি পৰারণা. ‘য্য’কারে পন পত্তে পরিযোসিতা হোতি, তস্মা ততো পট্ঠায ঠপেন্তেন ঠপিতাপি অট্ঠপিতা হোতি. পুগ্গলিকঠপনে পন – ‘‘সঙ্ঘং ভন্তে পৰারেমি…পে… ততিযম্পি ভন্তে সঙ্ঘং পৰারেমি দিট্ঠেন ৰা…পে… পস্সন্তো পটী’’তি সঙ্কারতো যাৰ অযং সব্বপচ্ছিমো ‘টি’কারো তাৰ ভাসিতা লপিতা অপরিযোসিতাৰ হোতি পৰারণা, এত্থন্তরে একপদেপি ঠপেন্তেন ঠপিতা হোতি পৰারণা, ‘‘করিস্সামী’’তি ৰুত্তে পন পরিযোসিতা হোতি, তস্মা ‘‘করিস্সামী’’তি এতস্মিং পদে পত্তে ঠপিতাপি অট্ঠপিতা হোতি. এস নযো দ্ৰেৰাচিকএকৰাচিকসমানৰস্সিকাসুপি. এতাসুপি হি টিকারাৰসানংযেৰ ঠপনখেত্তন্তি.

২৩৭. অনুযুঞ্জিযমানোতি ‘‘কিম্হি নং ঠপেসী’’তি পরতো ৰুত্তনযেন পুচ্ছিযমানো. ওমদ্দিত্ৰাতি এতানি ‘‘অলং ভিক্খু মা ভণ্ডন’’ন্তিআদীনি ৰচনানি ৰত্ৰা, ৰচনোমদ্দনা হি ইধ ওমদ্দনাতি অধিপ্পেতা. অনুদ্ধংসিতং পটিজানাতীতি ‘‘অমূলকেন পারাজিকেন অনুদ্ধংসিতো অযং মযা’’তি এৰং পটিজানাতি. যথাধম্মন্তি সঙ্ঘাদিসেসেন অনুদ্ধংসনে পাচিত্তিযং; ইতরেহি দুক্কটং. নাসেত্ৰাতি লিঙ্গনাসনায নাসেত্ৰা.

২৩৮. সাস্স যথাধম্মং পটিকতাতি এত্তকমেৰ ৰত্ৰা পৰারেথাতি ৰত্তব্বা, অসুকা নাম আপত্তীতি ইদং পন ন ৰত্তব্বং, এতঞ্হি কলহস্স মুখং হোতি.

ৰত্থুঠপনাদিকথা

২৩৯. ইদং ৰত্থু পঞ্ঞাযতি ন পুগ্গলোতি এত্থ চোরা কির অরঞ্ঞৰিহারে পোক্খরণিতো মচ্ছে গহেত্ৰা পচিত্ৰা খাদিত্ৰা অগমংসু. সো তং ৰিপ্পকারং দিস্ৰা আরামে ৰা কিঞ্চি ধুত্তেন কতং ৰিপ্পকারং দিস্ৰা ‘‘ভিক্খুস্স ইমিনা কম্মেন ভৰিতব্ব’’ন্তি সল্লক্খেত্ৰা এৰমাহ. ৰত্থুং ঠপেত্ৰা সঙ্ঘো পৰারেয্যাতি ‘‘যদা তং পুগ্গলং জানিস্সাম, তদা নং চোদেস্সাম. ইদানি পন সঙ্ঘো পৰারেতূ’’তি অযমেত্থ অত্থো. ইদানেৰ নং ৰদেহীতি সচে ইমিনা ৰত্থুনা কঞ্চি পুগ্গলং পরিসঙ্কসি, ইদানেৰ নং অপদিসাহীতি অত্থো. সচে অপদিসতি, তং পুগ্গলং অনুৰিজ্জিত্ৰা পৰারেতব্বং; নো চে অপদিসতি, উপপরিক্খিত্ৰা জানিস্সামাতি পৰারেতব্বং.

অযং পুগ্গলো পঞ্ঞাযতি ন ৰত্থূতি এত্থ একো ভিক্খু মালাগন্ধৰিলেপনেহি চেতিযং ৰা পূজেসি, অরিট্ঠং ৰা পিৰি, তস্স তদনুরূপো সরীরগন্ধো অহোসি; সো তং গন্ধং সন্ধায ‘‘ইমস্স ভিক্খুনো এৰরূপো সরীরগন্ধো’’তি ৰত্থুং পকাসেন্তো এৰমাহ. পুগ্গলং ঠপেত্ৰা সঙ্ঘো পৰারেয্যাতি এতং পুগ্গলং ঠপেত্ৰা সঙ্ঘো পৰারেতু. ইদানেৰ নং ৰদেহীতি যং ত্ৰং পুগ্গলং ঠপেসি, তস্স পুগ্গলস্স ইদানেৰ দোসং ৰদ. সচে অযমস্স দোসোতি ৰদতি, তং পুগ্গলং সোধেত্ৰা পৰারেতব্বং. অথ নাহং জানামীতি ৰদতি, উপপরিক্খিত্ৰা জানিস্সামাতি পৰারেতব্বং.

ইদং ৰত্থু চ পুগ্গলো চ পঞ্ঞাযতীতি পুরিমনযেনেৰ চোরেহি মচ্ছে গহেত্ৰা পচিত্ৰা পরিভুত্তট্ঠানঞ্চ গন্ধাদীহি নহানট্ঠানঞ্চ দিস্ৰা ‘‘পব্বজিতস্স কম্ম’’ন্তি মঞ্ঞমানো সো এৰমাহ. ইদানেৰ নং ৰদেহীতি ইদানেৰ তেন ৰত্থুনা পরিসঙ্কিতং পুগ্গলং ৰদেহি; ইদং পন উভযম্পি দিস্ৰা দিট্ঠকালতো পট্ঠায ৰিনিচ্ছিনিত্ৰাৰ পৰারেতব্বং. কল্লং ৰচনাযাতি কল্লং চোদনায; চোদেতুং ৰট্টতীতি অত্থো. কস্মা? পৰারণতো পুব্বে অৰিনিচ্ছিতত্তা পচ্ছা চ দিস্ৰা চোদিতত্তাতি. উক্কোটনকং পাচিত্তিযন্তি ইদঞ্হি উভযং পুব্বে পৰারণায দিস্ৰা ৰিনিচ্ছিনিত্ৰাৰ ভিক্খূ পৰারেন্তি, তস্মা পুন তং উক্কোটেন্তস্স আপত্তি.

ভণ্ডনকারকৰত্থুকথা

২৪০. দ্ৰে তযো উপোসথে চাতুদ্দসিকে কাতুন্তি এত্থ চতুত্থপঞ্চমা দ্ৰে, ততিযো পন পকতিযাপি চতুদ্দসিকোযেৰাতি. তস্মা ততিযচতুত্থা ৰা ততিযচতুত্থপঞ্চমা ৰা দ্ৰে তযো চাতুদ্দসিকা কাতব্বা. অথ চতুত্থে কতে সুণন্তি, পঞ্চমো চাতুদ্দসিকো কাতব্বো. এৰম্পি দ্ৰে চাতুদ্দসিকা হোন্তি. এৰং করোন্তা ভণ্ডনকারকানং তেরসে ৰা চাতুদ্দসে ৰা ইমে পন্নরসীপৰারণং পৰারেস্সন্তি. এৰং পৰারেন্তেহি চ বহিসীমায সামণেরে ঠপেত্ৰা ‘‘তে আগচ্ছন্তী’’তি সুত্ৰা লহুং লহুং সন্নিপতিত্ৰা পৰারেতব্বং. এতমত্থং দস্সেতুং ‘‘তে চে ভিক্খৰে…পে… তথা করোন্তূ’’তি ৰুত্তং.

অসংৰিহিতাতি সংৰিদহনরহিতা আগমনজাননত্থায অকতসংৰিদহিতা; অৰিঞ্ঞাতাৰ হুত্ৰাতি অত্থো. তেসং ৰিক্খিত্ৰাতি ‘‘কিলন্তত্থ মুহুত্তং ৰিস্সমথা’’তিআদিনা নযেন সম্মোহং কত্ৰাতি অত্থো. নো চে লভেথাতি নো চে বহিসীমং গন্তুং লভেয্যুং; ভণ্ডনকারকানং সামণেরেহি চ দহরভিক্খূহি চ নিরন্তরং অনুবদ্ধাৰ হোন্তি. আগমে জুণ্হেতি যং সন্ধায আগমে জুণ্হে পৰারেয্যামাতি ঞত্তিং ঠপেসুং, তস্মিং আগমে জুণ্হে কোমুদিযা চাতুমাসিনিযা অকামা পৰারেতব্বং, অৰস্সং পৰারেতব্বং, ন হি তং অতিক্কমিত্ৰা পৰারেতুং লব্ভতি. তেহি চে ভিক্খৰে ভিক্খূহি পৰারিযমানেতি এৰং চাতুমাসিনিযা পৰারিযমানে.

পৰারণাসঙ্গহকথা

২৪১. অঞ্ঞতরো ফাসুৰিহারোতি তরুণসমথো ৰা তরুণৰিপস্সনা ৰা. পরিবাহিরা ভৰিস্সামাতি অনিবদ্ধরত্তিট্ঠানদিৰাট্ঠানাদিভাৰেন ভাৰনানুযোগং সম্পাদেতুং অসক্কোন্তা বাহিরা ভৰিস্সাম. সব্বেহেৰ একজ্ঝং সন্নিপতিতব্বন্তি ইমিনা ছন্দদানং পটিক্খিপতি. ভিন্নস্স হি সঙ্ঘস্স সমগ্গকরণকালে তিণৰত্থারকসমথে ইমস্মিঞ্চ পৰারণাসঙ্গহেতি ইমেসু তীসু ঠানেসু ছন্দং দাতুং ন ৰট্টতি. পৰারণাসঙ্গহো নামাযং ৰিস্সট্ঠকম্মট্ঠানানং থামগতসমথৰিপস্সনানং সোতাপন্নাদীনঞ্চ ন দাতব্বো. তরুণসমথৰিপস্সনালাভিনো পন সব্বে ৰা হোন্তু, উপড্ঢা ৰা, একপুগ্গলো ৰা একস্সপি ৰসেন দাতব্বোযেৰ. দিন্নে পৰারণাসঙ্গহে অন্তোৰস্সে পরিহারোৰ হোতি, আগন্তুকা তেসং সেনাসনং গহেতুং ন লভন্তি. তেহিপি ছিন্নৰস্সেহি ন ভৰিতব্বং, পৰারেত্ৰা পন অন্তরাপি চারিকং পক্কমিতুং লভন্তীতি দস্সনত্থং ‘‘তেহি চে ভিক্খৰে’’তিআদিমাহ. সেসং সব্বত্থ উত্তানমেৰাতি.

পৰারণাক্খন্ধকৰণ্ণনা নিট্ঠিতা.