২. পারিৰাসিকক্খন্ধকং

পারিৰাসিকৰত্তকথা

৭৫. পারিৰাসিকক্খন্ধকে – পারিৰাসিকাতি পরিৰাসং পরিৰসন্তা. তত্থ চতুব্বিধো পরিৰাসো – অপ্পটিচ্ছন্নপরিৰাসো, পটিচ্ছন্নপরিৰাসো, সুদ্ধন্তপরিৰাসো, সমোধানপরিৰাসোতি. তেসু ‘‘যো, ভিক্খৰে, অঞ্ঞোপি অঞ্ঞতিত্থিযপুব্বো ইমস্মিং ধম্মৰিনযে আকঙ্খতি পব্বজ্জং, আকঙ্খতি উপসম্পদং, তস্স চত্তারো মাসে পরিৰাসো দাতব্বো’’তি (মহাৰ. ৮৬) এৰং মহাখন্ধকে ৰুত্তো তিত্থিযপরিৰাসো অপ্পটিচ্ছন্নপরিৰাসো নাম. তত্থ যং ৰত্তব্বং তং ৰুত্তমেৰ. অযং পন ইধ অনধিপ্পেতো. সেসা তযো যেন সঙ্ঘাদিসেসাপত্তি আপন্না চেৰ হোতি পটিচ্ছাদিতা চ, তস্স দাতব্বা. তেসু যং ৰত্তব্বং তং সমুচ্চযক্খন্ধকে ৰক্খাম. এতে পন ইধ অধিপ্পেতা. তস্মা এতেসু যংকিঞ্চি পরিৰাসং পরিৰসন্তা ‘‘পারিৰাসিকা’’তি ৰেদিতব্বা.

পকতত্তানং ভিক্খূনন্তি ঠপেত্ৰা নৰকতরং পারিৰাসিকং অৰসেসানং অন্তমসো মূলাযপটিকস্সনারহাদীনম্পি. অভিৰাদনপচ্চুট্ঠানন্তি যং তে অভিৰাদনাদিং করোন্তি, তং সাদিযন্তি, সম্পটিচ্ছন্তি; ন পটিক্খিপন্তীতি অত্থো. তত্থ সামীচিকম্মন্তি ঠপেত্ৰা অভিৰাদনাদীনি অঞ্ঞস্স অনুচ্ছৰিকস্স বীজনৰাতদানাদিনো আভিসমাচারিকস্সেতং অধিৰচনং. আসনাভিহারন্তি আসনস্স অভিহরণং, আসনং গহেত্ৰা অভিগমনং পঞ্ঞাপনমেৰ ৰা. সেয্যাভিহারেপি এসেৰ নযো. পাদোদকন্তি পাদধোৰনউদকং. পাদপীঠন্তি ধোতপাদট্ঠপনকং. পাদকথলিকন্তি অধোতপাদট্ঠপনকং পাদঘংসনং ৰা. আপত্তি দুক্কটস্সাতি সদ্ধিৰিহারিকানম্পি সাদিযন্তস্স দুক্কটমেৰ, তস্মা তে ৰত্তব্বা – ‘‘অহং ৰিনযকম্মং করোমি, ময্হং ৰত্তং মা করোথ, মা মং গামপ্পৰেসনং আপুচ্ছথা’’তি. সচে সদ্ধাপব্বজিতা কুলপুত্তা ‘‘তুম্হে, ভন্তে, তুম্হাকং ৰিনযকম্মং করোথা’’তি ৰত্ৰা ৰত্তং করোন্তি, গামপ্পৰেসনম্পি আপুচ্ছন্তিযেৰ, ৰারিতকালতো পট্ঠায অনাপত্তি. মিথু যথাৰুড্ঢন্তি পারিৰাসিকভিক্খূনং অঞ্ঞমঞ্ঞং যো যো ৰুড্ঢো তেন তেন নৰকতরস্স সাদিতুং.

পঞ্চ যথাৰুড্ঢন্তি পকতত্তেহিপি সদ্ধিং ৰুড্ঢপটিপাটিযা এৰ. তস্মা পাতিমোক্খে উদ্দিস্সমানে হত্থপাসে নিসীদিতুং ৰট্টতি. মহাপচ্চরিযং পন ‘‘পাল়িযা অনিসীদিত্ৰা পাল়িং ৰিহায হত্থপাসং অমুঞ্চন্তেন নিসীদিতব্ব’’ন্তি ৰুত্তং. পারিসুদ্ধিউপোসথে করীযমানে সঙ্ঘনৰকট্ঠানে নিসীদিত্ৰা তত্থেৰ নিসিন্নেন অত্তনো পাল়িযা পারিসুদ্ধিউপোসথো কাতব্বো. পৰারণাযপি সঙ্ঘনৰকট্ঠানে নিসীদিত্ৰা তত্থেৰ নিসিন্নেন অত্তনো পাল়িযা পৰারেতব্বং. সঙ্ঘেন ঘণ্টিং পহরিত্ৰা ভাজীযমানং ৰস্সিকসাটিকম্পি অত্তনো পত্তট্ঠানে গহেতুং ৰট্টতি.

ওণোজনন্তি ৰিস্সজ্জনং ৰুচ্চতি. সচে হি পারিৰাসিকস্স দ্ৰে তীণি উদ্দেসভত্তাদীনি পাপুণন্তি, অঞ্ঞা চস্স পুগ্গলিকভত্তপচ্চাসা হোতি, তানি পটিপাটিযা গহেত্ৰা ‘‘ভন্তে, হেট্ঠা গাহেথ, অজ্জ ময্হং ভত্তপচ্চাসা অত্থি, স্ৰে গণ্হিস্সামী’’তি ৰত্ৰা ৰিস্সজ্জেতব্বানি. এৰং তানি পুনদিৰসেসু গণ্হিতুং লভতি. পুনদিৰসে সব্বপঠমং এতস্স দাতব্বন্তি কুরুন্দিযং ৰুত্তং. যদি পন ন গণ্হাতি ন ৰিস্সজ্জেতি, পুনদিৰসে ন লভতি, ইদং ওণোজনং নাম পারিৰাসিকস্সেৰ ওদিস্স অনুঞ্ঞাতং. কস্মা? তস্স হি সঙ্ঘনৰকট্ঠানে নিসিন্নস্স ভত্তগ্গে যাগুখজ্জকাদীনি পাপুণন্তি ৰা ন ৰা, তস্মা সো ‘‘ভিক্খাহারেন মা কিলমিত্থা’’তি ইদমস্স সঙ্গহকরণত্থায ওদিস্স অনুঞ্ঞাতং.

ভত্তন্তি আগতাগতেহি ৰুড্ঢপটিপাটিযা গহেত্ৰা গন্তব্বং ৰিহারে সঙ্ঘস্স চতুস্সালভত্তং, এতং যথাৰুড্ঢং লভতি. পাল়িযা পন গন্তুং ৰা ঠাতুং ৰা ন লভতি, তস্মা পাল়িতো ওসক্কিত্ৰা হত্থপাসে ঠিতেন হত্থং পসারেত্ৰা যথা সেনো নিপতিত্ৰা গণ্হাতি, এৰং গণ্হিতব্বং. আরামিকসমণুদ্দেসেহি আহরাপেতুং ন লভতি. সচে সযমেৰ আহরন্তি, ৰট্টতি. রঞ্ঞো মহাপেল়ভত্তেপি এসেৰ নযো. চতুস্সালভত্তে পন সচে ওণোজনং কত্তুকামো হোতি, অত্তনো অত্থায উক্খিত্তে পিণ্ডে ‘‘অজ্জ মে ভত্তং অত্থি, স্ৰে গণ্হিস্সামী’’তি ৰত্তব্বং. পুনদিৰসে দ্ৰে পিণ্ডে লভতীতি মহাপচ্চরিযং ৰুত্তং. উদ্দেসভত্তাদীনিপি পাল়িতো ওসক্কিত্ৰাৰ গহেতব্বানি. যত্থ পন নিসীদাপেত্ৰা পরিৰিসন্তি, তত্থ সামণেরানং জেট্ঠকেন ভিক্খূনং সঙ্ঘনৰকেন হুত্ৰা নিসীদিতব্বং.

৭৬. ইদানি যা অযং সম্মাৰত্তনা ৰুত্তা, তত্থ ন উপসম্পাদেতব্বন্তি উপজ্ঝাযেন হুত্ৰা ন উপসম্পাদেতব্বং; ৰত্তং নিক্খিপিত্ৰা পন উপসম্পাদেতুং ৰট্টতি. আচরিযেন হুত্ৰাপি কম্মৰাচা ন সাৰেতব্বা, অঞ্ঞস্মিং অসতি ৰত্তং নিক্খিপিত্ৰা সাৰেতুং ৰট্টতি. ন নিস্সযোতি আগন্তুকানং নিস্সযো ন দাতব্বো. যেহিপি পকতিযাৰ নিস্সযো গহিতো, তে ৰত্তব্বা – ‘‘অহং ৰিনযকম্মং করোমি, অসুকত্থেরস্স নাম সন্তিকে নিস্সযং গণ্হথ, ময্হং ৰত্তং মা করোথ, মা মং গামপ্পৰেসনং আপুচ্ছথা’’তি. সচে এৰং ৰুত্তেপি করোন্তিযেৰ, ৰারিতকালতো পট্ঠায করোন্তেসুপি অনাপত্তি.

ন সামণেরোতি অঞ্ঞো সামণেরো ন গহেতব্বো. উপজ্ঝং দত্ৰা গহিতসামণেরাপি ৰত্তব্বা – ‘‘অহং ৰিনযকম্মং করোমি, ময্হং ৰত্তং মা করোথ, মা মং গামপ্পৰেসনং আপুচ্ছথা’’তি. সচে এৰং ৰুত্তেপি করোন্তিযেৰ, ৰারিতকালতো পট্ঠায করোন্তেসুপি অনাপত্তি. ভিক্খুনোৰাদকসম্মুতি নাম আধিপচ্চট্ঠানভূতাতি পটিক্খিত্তা, তস্মা ভিক্খুসঙ্ঘস্স ৰত্তব্বং – ‘‘ভন্তে, অহং ৰিনযকম্মং করোমি, ভিক্খুনোৰাদকং জানাথা’’তি, পটিবলস্স ৰা ভিক্খুস্স ভারো কাতব্বো. আগতা ভিক্খুনিযো ‘‘সঙ্ঘসন্তিকং গচ্ছথ, সঙ্ঘো ৰো ওৰাদদাযকং জানিস্সতী’’তি ৰা ‘‘অহং ৰিনযকম্মং করোমি, অসুকভিক্খুস্স নাম সন্তিকং গচ্ছথ, সো ৰো ওৰাদং দস্সতী’’তি ৰা ৰত্তব্বা.

সা আপত্তীতি সুক্কৰিস্সট্ঠিযা পরিৰাসে দিন্নে সুক্কৰিস্সট্ঠি নাপজ্জিতব্বা. অঞ্ঞা ৰা তাদিসিকাতি কাযসংসগ্গাদিগরুকাপত্তি. ততো ৰা পাপিট্ঠতরাতি পারাজিকাপত্তি; সত্তসু হি আপত্তীসু দুব্ভাসিতাপত্তি পাপিট্ঠা; দুক্কটাপত্তি পাপিট্ঠতরা; দুক্কটাপত্তি পাপিট্ঠা, পাটিদেসনীযাপত্তি পাপিট্ঠতরাতি এৰং পাচিত্তিযথুল্লচ্চযসঙ্ঘাদিসেসপারাজিকাপত্তীসু নযো নেতব্বো. তাসং ৰত্থূসুপি দুব্ভাসিতৰত্থু পাপিট্ঠং, দুক্কটৰত্থু পাপিট্ঠতরন্তি পুরিমনযেনেৰ ভেদো ৰেদিতব্বো. পণ্ণত্তিৰজ্জসিক্খাপদে পন ৰত্থুপি আপত্তিপি পাপিট্ঠা. লোকৰজ্জে উভযম্পি পাপিট্ঠতরং.

কম্মন্তি পরিৰাসকম্মৰাচা ৰুচ্চতি. তং কম্মং ‘‘অকতং দুক্কট’’ন্তিআদীহি ৰা ‘‘কিং ইদং কম্মং নাম কসিকম্মং গোরক্খকম্ম’’ন্তিআদীহি ৰা ৰচনেহি ন গরহিতব্বং. কম্মিকাতি যেহি ভিক্খূহি কম্মং কতং, তে ৰুচ্চন্তি, তে ‘‘বালা অব্যত্তা’’তিআদীহি ৰচনেহি ন গরহিতব্বা. ন সৰচনীযং কাতব্বন্তি পলিবোধত্থায ৰা পক্কোসনত্থায ৰা সৰচনীযং ন কাতব্বং, পলিবোধত্থায হি করোন্তো ‘‘অহং আযস্মন্তং ইমস্মিং ৰত্থুস্মিং সৰচনীযং করোমি, ইমম্হা আৰাসা একপদম্পি মা পক্কামি, যাৰ ন তং অধিকরণং ৰূপসন্তং হোতী’’তি এৰং করোতি. পক্কোসনত্থায করোন্তো ‘‘অহং তে সৰচনীযং করোমি, এহি মযা সদ্ধিং ৰিনযধরানং সম্মুখীভাৰং গচ্ছামা’’তি এৰং করোতি; তদুভযম্পি ন কাতব্বং.

ন অনুৰাদোতি ৰিহারে জেট্ঠকট্ঠানং ন কাতব্বং. পাতিমোক্খুদ্দেসকেন ৰা ধম্মজ্ঝেসকেন ৰা ন ভৰিতব্বং. নাপি তেরসসু সম্মুতীসু একসম্মুতিৰসেনাপি ইস্সরিযকম্মং কাতব্বং. ন ওকাসোতি ‘‘করোতু মে আযস্মা ওকাসং, অহং তং ৰত্তুকামো’’তি এৰং পকতত্তস্স ওকাসো ন কারেতব্বো, ৰত্থুনা ৰা আপত্তিযা ৰা ন চোদেতব্বো, ‘‘অযং পুব্বে তে দোসো’’তি ন সারেতব্বো. ন ভিক্খূহি সম্পযোজেতব্বন্তি অঞ্ঞমঞ্ঞং যোজেত্ৰা কলহো ন কারেতব্বো.

পুরতোতি সঙ্ঘত্থেরেন হুত্ৰা পুরতো ন গন্তব্বং, দ্ৰাদসহত্থং উপচারং মুঞ্চিত্ৰা এককেন গন্তব্বং. নিসীদনেপি এসেৰ নযো. আসনপরিযন্তোতি ভত্তগ্গাদীসু সঙ্ঘনৰকাসনং ৰুচ্চতি; স্ৰাস্স দাতব্বো, তত্থ নিসীদিতব্বং. সেয্যাপরিযন্তোতি সেয্যানং পরিযন্তো, সব্বলামকং মঞ্চপীঠং. অযঞ্হি ৰস্সগ্গেন অত্তনো পত্তট্ঠানে সেয্যং গহেতুং ন লভতি. সব্বভিক্খূহি ৰিচিনিত্ৰা গহিতাৰসেসা মঙ্কুলগূথভরিতা ৰেত্তলতাদিৰিনদ্ধা লামকসেয্যা অস্স দাতব্বা. ৰিহারপরিযন্তোতি যথা চ সেয্যা, এৰং ৰসনআৰাসোপি ৰস্সগ্গেন অত্তনো পত্তট্ঠানে তস্স ন ৰট্টতি. সব্বভিক্খূহি ৰিচিনিত্ৰা গহিতাৰসেসা পন রজোহতভূমি জতুকমূসিকভরিতা পণ্ণসালা অস্স দাতব্বা. সচে পকতত্তা সব্বে রুক্খমূলিকা অব্ভোকাসিকা চ হোন্তি, ছন্নং ন উপেন্তি, সব্বেপি এতেহি ৰিস্সট্ঠাৰাসা নাম হোন্তি. তেসু যং ইচ্ছতি, তং লভতি. ৰস্সূপনাযিকদিৰসে পচ্চযং একপস্সে ঠত্ৰা ৰস্সগ্গেন গণ্হিতুং লভতি. সেনাসনং ন লভতি, নিবদ্ধৰস্সাৰাসিকং সেনাসনং গণ্হিতুকামেন ৰত্তং নিক্খিপিত্ৰা গহেতব্বং.

তেন চ সো সাদিতব্বোতি যং অস্স আসনাদিপরিযন্তং ভিক্খূ দেন্তি, সো এৰ সাদিতব্বো. পুরেসমণেন ৰা পচ্ছাসমণেন ৰাতি ঞাতিপৰারিতট্ঠানে ‘‘এত্তকে ভিক্খূ গহেত্ৰা আগচ্ছথা’’তি নিমন্তিতেন ‘‘ভন্তে, অসুকং নাম কুলং ভিক্খূ নিমন্তেসি, এথ তত্থ গচ্ছামা’’তি এৰং সংৰিধায ভিক্খূ পুরেসমণে ৰা পচ্ছাসমণে ৰা কত্ৰা ন গন্তব্বং. ‘‘ভন্তে, অসুকস্মিং নাম গামে মনুস্সা ভিক্খূনং আগমনং ইচ্ছন্তি, সাধু ৰতস্স সচে তেসং সঙ্গহং করেয্যাথা’’তি এৰং পন পরিযাযেন কথেতুং ৰট্টতি.

ন আরঞ্ঞিকঙ্গন্তি আগতাগতানং আরোচেতুং হরাযমানেন আরঞ্ঞিকধুতঙ্গং ন সমাদাতব্বং. যেনাপি পকতিযা সমাদিন্নং, তেন দুতিযং ভিক্খুং গহেত্ৰা অরঞ্ঞে অরুণং উট্ঠাপেতব্বং, ন চ এককেন ৰত্থব্বং. তথা ভত্তগ্গাদীসু আসনপরিযন্তে নিসজ্জায হরাযমানেন পিণ্ডপাতিকধুতঙ্গম্পি ন সমাদাতব্বং. যো পন পকতিযাৰ পিণ্ডপাতিকো তস্স পটিসেধো নত্থি.

ন চ তপ্পচ্চযাতি ‘‘নীহটভত্তো হুত্ৰা ৰিহারেযেৰ নিসীদিত্ৰা ভুঞ্জন্তো রত্তিযো গণযিস্সামি, গচ্ছতো মে ভিক্খুং দিস্ৰা অনারোচেন্তস্স রত্তিচ্ছেদো সিযা’’তি ইমিনা কারণেন পিণ্ডপাতো ন নীহরাপেতব্বো. মা মং জানিংসূতি ‘‘মা মং একভিক্খুপি জানাতূ’’তি চ ইমিনা অজ্ঝাসযেন ৰিহারে সামণেরেহি পচাপেত্ৰা ভুঞ্জিতুম্পি ন লভতি. গামং পিণ্ডায পৰিসিতব্বমেৰ. গিলানস্স পন নৰকম্মআচরিযুপজ্ঝাযকিচ্চাদিপসুতস্স ৰা ৰিহারেযেৰ অচ্ছিতুং ৰট্টতি. সচেপি গামে অনেকসতা ভিক্খূ ৰিচরন্তি, ন সক্কা হোতি আরোচেতুং, গামকাৰাসং গন্ত্ৰা সভাগট্ঠানে ৰসিতুং ৰট্টতি.

আগন্তুকেনাতি কঞ্চি ৰিহারং গতেন তত্থ ভিক্খূনং আরোচেতব্বং. সচে সব্বে একট্ঠানে ঠিতে পস্সতি, একট্ঠানে ঠিতেনেৰ আরোচেতব্বং. অথ রুক্খমূলাদীসু ৰিসুং ৰিসুং ঠিতা হোন্তি, তত্থ তত্থ গন্ত্ৰা আরোচেতব্বং. সঞ্চিচ্চ অনারোচেন্তস্স রত্তিচ্ছেদো চ হোতি, ৰত্তভেদে চ দুক্কটং. অথ ৰিচিনন্তো একচ্চে ন পস্সতি, রত্তিচ্ছেদোৰ হোতি, ন ৰত্তভেদদুক্কটং.

আগন্তুকস্সাতি অত্তনো ৰসনৰিহারং আগতস্সাপি একস্স ৰা বহূনং ৰা ৰুত্তনযেনেৰ আরোচেতব্বং. রত্তিচ্ছেদৰত্তভেদাপি চেত্থ ৰুত্তনযেনেৰ ৰেদিতব্বা. সচে আগন্তুকা মুহুত্তং ৰিস্সমিত্ৰা ৰা অৰিস্সমিত্ৰা এৰ ৰা ৰিহারমজ্ঝেন গচ্ছন্তি, তেসম্পি আরোচেতব্বং. সচে তস্স অজানন্তস্সেৰ গচ্ছন্তি, অযঞ্চ পন গতকালে জানাতি, গন্ত্ৰা আরোচেতব্বং. সম্পাপুণিতুং অসক্কোন্তস্স রত্তিচ্ছেদোৰ হোতি, ন ৰত্তভেদদুক্কটং. যেপি অন্তোৰিহারং অপ্পৰিসিত্ৰা উপচারসীমং ওক্কমিত্ৰা গচ্ছন্তি, অযঞ্চ নেসং ছত্তসদ্দং ৰা উক্কাসিতসদ্দং ৰা খিপিতসদ্দং ৰা সুত্ৰাৰ আগন্তুকভাৰং জানাতি, গন্ত্ৰা আরোচেতব্বং. গতকালে জানন্তেনপি অনুবন্ধিত্ৰা আরোচেতব্বমেৰ. সম্পাপুণিতুং অসক্কোন্তস্স রত্তিচ্ছেদোৰ হোতি, ন ৰত্তভেদদুক্কটং. যোপি রত্তিংযেৰ আগন্ত্ৰা রত্তিংযেৰ গচ্ছতি, সোপিস্স রত্তিচ্ছেদং করোতি, অঞ্ঞাতত্তা পন ৰত্তভেদদুক্কটং নত্থি. সচে অজানিত্ৰাৰ অব্ভানং করোতি, অকতমেৰ হোতীতি কুরুন্দিযং ৰুত্তং. তস্মা অধিকা রত্তিযো গহেত্ৰা কাতব্বং, অযং অপণ্ণকপটিপদা.

নদীআদীসু নাৰায গচ্ছন্তম্পি পরতীরে ঠিতম্পি আকাসেন গচ্ছন্তম্পি পব্বততলঅরঞ্ঞাদীসু দূরে ঠিতম্পি ভিক্খুং দিস্ৰা সচে ‘‘ভিক্খূ’’তি ৰৰত্থানং অত্থি, নাৰাদীহি ৰা গন্ত্ৰা মহাসদ্দং কত্ৰা ৰা ৰেগেন অনুবন্ধিত্ৰা ৰা আরোচেতব্বং, অনারোচেন্তস্স রত্তিচ্ছেদো চেৰ ৰত্তভেদদুক্কটঞ্চ. সচে ৰাযমন্তোপি সম্পাপুণিতুং ৰা সাৰেতুং ৰা ন সক্কোতি, রত্তিচ্ছেদোৰ হোতি, ন ৰত্তভেদদুক্কটং. সঙ্ঘসেনাভযত্থেরো পন ৰিসযাৰিসযেন কথেতি – ‘‘ৰিসযে কির অনারোচেন্তস্স রত্তিচ্ছেদো চেৰ ৰত্তভেদদুক্কটঞ্চ হোতি, অৰিসযে পন উভযম্পি নত্থী’’তি. করৰীকতিস্সত্থেরো ‘‘সমণো অযন্তি ৰৰত্থানমেৰ পমাণং, সচেপি অৰিসযো হোতি, ৰত্তভেদদুক্কটমেৰ নত্থি, রত্তিচ্ছেদো পন হোতিযেৰা’’তি আহ.

উপোসথেতি ‘‘উপোসথং সম্পাপুণিস্সামা’’তি আগন্তুকা ভিক্খূ আগচ্ছন্তি, ইদ্ধিযা গচ্ছন্তাপি উপোসথভাৰং ঞত্ৰা ওতরিত্ৰা উপোসথং করোন্তি, তস্মা আগন্তুকসোধনত্থং উপোসথদিৰসে আরোচেতব্বং. পৰারণাযপি এসেৰ নযো. গিলানোতি গন্তুং অসমত্থো. দূতেনাতি এত্থ অনুপসম্পন্নং পেসেতুং ন ৰট্টতি, ভিক্খুং পেসেত্ৰা আরোচাপেতব্বং.

অভিক্খুকো আৰাসোতি সুঞ্ঞৰিহারো; যত্থ একোপি ভিক্খু নত্থি, তত্থ ৰাসত্থায ন গন্তব্বং. ন হি তত্থ ৰুত্থরত্তিযো গণনূপিকা হোন্তি, পকতত্তেন পন সদ্ধিং ৰট্টতি. দসৰিধন্তরাযে পন সচেপি রত্তিযো গণনূপিকা ন হোন্তি, অন্তরাযতো পরিমুচ্চনত্থায গন্তব্বমেৰ. তেন ৰুত্তং – ‘‘অঞ্ঞত্র অন্তরাযা’’তি. নানাসংৰাসকেহি সদ্ধিং ৰিনযকম্মং কাতুং ন ৰট্টতি. তেসং অনারোচনেপি রত্তিচ্ছেদো নত্থি, অভিক্খুকাৰাসসদিসমেৰ হোতি. তেন ৰুত্তং – ‘‘যত্থস্সু ভিক্খূ নানাসংৰাসকা’’তি. সেসং উপোসথক্খন্ধকে ৰুত্তনযমেৰ.

৮১. একচ্ছন্নে আৰাসেতিআদীসু আৰাসো নাম ৰসনত্থায কতসেনাসনং. অনাৰাসো নাম চেতিযঘরং বোধিঘরং সম্মুঞ্জনিঅট্টকো দারুঅট্টকো পানীযমাল়ো ৰচ্চকুটি দ্ৰারকোট্ঠকোতি এৰমাদি. ততিযপদেন তদুভযম্পি গহিতং. এতেসু যত্থ কত্থচি একচ্ছন্নে ছদনতো উদকপতনট্ঠানপরিচ্ছিন্নে ওকাসে উক্খিত্তকো ৰসিতুং ন লভতি. ‘‘পারিৰাসিকো পন অন্তোআৰাসেযেৰ ন লভতী’’তি মহাপচ্চরিযং ৰুত্তং. মহাঅট্ঠকথাযং পন ‘‘অৰিসেসেন উদকপাতেন ৰারিত’’ন্তি ৰুত্তং. কুরুন্দিযং ‘‘এতেসু এত্তকেসু পঞ্চৰণ্ণচ্ছদনবদ্ধট্ঠানেসু পারিৰাসিকস্স চ উক্খিত্তকস্স চ পকতত্তেন সদ্ধিং উদকপাতেন ৰারিত’’ন্তি ৰুত্তং. তস্মা নানূপচারেপি একচ্ছন্নে ন ৰট্টতি. সচে পনেত্থ তদহুপসম্পন্নেপি পকতত্তে পঠমং পৰিসিত্ৰা নিপন্নে সট্ঠিৰস্সোপি পারিৰাসিকো পচ্ছা পৰিসিত্ৰা জানন্তো নিপজ্জতি, রত্তিচ্ছেদো চেৰ ৰত্তভেদদুক্কটঞ্চ. অজানন্তস্স রত্তিচ্ছেদোৰ ন ৰত্তভেদদুক্কটং. সচে পন তস্মিং পঠমং নিপন্নে পচ্ছা পকতত্তো পৰিসিত্ৰা নিপজ্জতি, পারিৰাসিকো চ জানাতি, রত্তিচ্ছেদো চেৰ ৰত্তভেদদুক্কটঞ্চ. নো চে জানাতি, রত্তিচ্ছেদোৰ ন ৰত্তভেদদুক্কটং.

ৰুট্ঠাতব্বং নিমন্তেতব্বোতি তদহুপসম্পন্নম্পি দিস্ৰা ৰুট্ঠাতব্বমেৰ; ৰুট্ঠায চ ‘‘অহং ইমিনা সুখনিসিন্নো ৰুট্ঠাপিতো’’তি পরম্মুখেন ন গন্তব্বং, ‘‘ইদং আচরিয-আসনং, এত্থ নিসীদথা’’তি এৰং নিমন্তেতব্বোযেৰ. নৰকেন পন ‘‘মহাথেরং ওবদ্ধং করোমী’’তি পারিৰাসিকত্থেরস্স সন্তিকং ন গন্তব্বং. একাসনেতি সমানৰস্সিকাসনে মঞ্চে ৰা পীঠে ৰা. ন ছমাযং নিসিন্নেতি পকতত্তে ভূমিযং নিসিন্নে ইতরেন অন্তমসো তিণসন্থারেপি উচ্চতরে ৰালিকাতলেপি ৰা ন নিসীদিতব্বং, দ্ৰাদসহত্থং পন উপচারং মুঞ্চিত্ৰা নিসীদিতুং ৰট্টতি. একচঙ্কমেতি সহাযেন ৰিয সদ্ধিং চঙ্কমন্তো একস্মিং চঙ্কমে.

ছমাযং চঙ্কমন্তন্তি ছমাযং চঙ্কমন্তে, অযমেৰ ৰা পাঠো. অযং পনেত্থ অত্থো – অকতপরিচ্ছেদায ভূমিযা চঙ্কমন্তে পরিচ্ছেদং কত্ৰা ৰালিকং আকিরিত্ৰা আলম্বনং যোজেত্ৰা কতচঙ্কমে নীচেপি ন চঙ্কমিতব্বং, কো পন ৰাদো ইট্ঠকাচযসম্পন্নে ৰেদিকাপরিক্খিত্তেতি! সচে পন পাকারপরিক্খিত্তো হোতি দ্ৰারকোট্ঠকযুত্তো পব্বতন্তরৰনন্তরগুম্বন্তরেসু ৰা সুপ্পটিচ্ছন্নো, তাদিসে চঙ্কমে চঙ্কমিতুং ৰট্টতি. অপ্পটিচ্ছন্নেপি উপচারং মুঞ্চিত্ৰা ৰট্টতি.

ৰুড্ঢতরেনাতি এত্থ সচে ৰুড্ঢতরে পারিৰাসিকে পঠমং নিপন্নে ইতরো জানন্তো পচ্ছা নিপজ্জতি, রত্তিচ্ছেদো চস্স হোতি ৰত্তভেদে চ দুক্কটং. ৰুড্ঢতরস্স পন রত্তিচ্ছেদোৰ ন ৰত্তভেদদুক্কটং. অজানিত্ৰা নিপজ্জতি, দ্ৰিন্নম্পি ৰত্তভেদো নত্থি, রত্তিচ্ছেদো পন হোতি. অথ নৰকপারিৰাসিকে পঠমং নিপন্নে ৰুড্ঢতরো পচ্ছা নিপজ্জতি, নৰকো চ জানাতি, রত্তি চস্স ছিজ্জতি, ৰত্তভেদে চ দুক্কটং হোতি. ৰুড্ঢতরস্স রত্তিচ্ছেদোৰ ন ৰত্তভেদো. নো চে জানাতি, দ্ৰিন্নম্পি ৰত্তভেদো নত্থি, রত্তিচ্ছেদো পন হোতি. সচে দ্ৰেপি অপচ্ছাপুরিমং নিপজ্জন্তি, ৰুড্ঢতরস্স রত্তিচ্ছেদোৰ ইতরস্স ৰত্তভেদোপীতি কুরুন্দিযং ৰুত্তং. দ্ৰে পারিৰাসিকা সমৰস্সা, একো পঠমং নিপন্নো, একো জানন্তোৰ পচ্ছা নিপজ্জতি, রত্তি চ ছিজ্জতি, ৰত্তভেদে চ দুক্কটং. পঠমং নিপন্নস্স রত্তিচ্ছেদোৰ ন ৰত্তভেদো. সচে পচ্ছা নিপজ্জন্তোপি ন জানাতি, দ্ৰিন্নম্পি ৰত্তভেদো নত্থি, রত্তিচ্ছেদো পন হোতি. সচে দ্ৰেপি অপচ্ছাপুরিমং নিপজ্জন্তি, দ্ৰিন্নম্পি রত্তিচ্ছেদোযেৰ, ন ৰত্তভেদো. সচে হি দ্ৰে পারিৰাসিকা একতো ৰসেয্যুং, তে অঞ্ঞমঞ্ঞস্স অজ্ঝাচারং ঞত্ৰা অগারৰা ৰা ৰিপ্পটিসারিনো ৰা হুত্ৰা পাপিট্ঠতরং ৰা আপত্তিং আপজ্জেয্যুং ৰিব্ভমেয্যুং ৰা, তস্মা নেসং সহসেয্যা সব্বপ্পকারেন পটিক্খিত্তা. সেসং ৰুত্তনযেনেৰ ৰেদিতব্বং. মূলাযপটিকস্সনারহাদযো চেত্থ পারিৰাসিকানং পকতত্তট্ঠানে ঠিতাতি ৰেদিতব্বা.

পারিৰাসিকচতুত্থো চে, ভিক্খৰে, পরিৰাসন্তি এত্থ পারিৰাসিকং চতুত্থং কত্ৰা অঞ্ঞস্স পরিৰাসদানাদীনি কাতুং ন ৰট্টতি. এতেস্ৰেৰাযং গণপূরকো ন হোতি, সেসসঙ্ঘকম্মেসু হোতি. গণে পন অপ্পহোন্তে ৰত্তং নিক্খিপাপেত্ৰা গণপূরকো কাতব্বোতি.

৮৩. ইমং পন ৰত্তকথং সুত্ৰা ৰিনযধরউপালিত্থেরস্স রহোগতস্স এৰং পরিৰিতক্কো উদপাদি – ‘‘ভগৰতা বহু পারিৰাসিকৰত্তং পঞ্ঞত্তং, কতিহি নু খো এত্থ কারণেহি রত্তিচ্ছেদো হোতী’’তি! সো ভগৰন্তং উপসঙ্কমিত্ৰা তমত্থং পুচ্ছি. ভগৰা চস্স ব্যাকাসি. তেন ৰুত্তং – ‘‘অথ খো আযস্মা উপালি…পে… রত্তিচ্ছেদা’’তি. তত্থ সহৰাসোতি য্ৰাযং পকতত্তেন ভিক্খুনা সদ্ধিং একচ্ছন্নেতিআদিনা নযেন ৰুত্তো একতো ৰাসো. ৰিপ্পৰাসোতি এককস্সেৰ ৰাসো. অনারোচনাতি আগন্তুকাদীনং অনারোচনা. এতেসু তীসু একেকেন কারণেন রত্তিচ্ছেদো হোতি.

৮৪. ন সক্কোন্তীতি সঙ্ঘস্স মহন্ততায তত্থ তত্থ গন্ত্ৰা সব্বেসং আরোচেতুং অসক্কোন্তা সোধেতুং ন সক্কোন্তি. পরিৰাসং নিক্খিপামি, ৰত্তং নিক্খিপামীতি ইমেসু দ্ৰীসু পদেসু একেনাপি নিক্খিত্তোৰ হোতি পরিৰাসো; দ্ৰীহি সুনিক্খিত্তোযেৰ. সমাদানেপি এসেৰ নযো. এৰং ৰত্তং সমাদিযিত্ৰা পরিৰুত্থপরিৰাসস্স মানত্তং গণ্হতো পুন ৰত্তসমাদানকিচ্চং নত্থি, সমাদিন্নৰত্তোযেৰ হেস তস্মাস্স ছারত্তং মানত্তং দাতব্বং, চিণ্ণমানত্তো অব্ভেতব্বো. এৰং অনাপত্তিকো হুত্ৰা সুদ্ধন্তে পতিট্ঠিতো তিস্সো সিক্খা পূরেত্ৰা দুক্খস্সন্তং করিস্সতীতি.

পারিৰাসিকৰত্তকথা নিট্ঠিতা.

মূলাযপটিকস্সনারহৰত্তকথা

৮৬. মূলাযপটিকস্সনারহা ভিক্খূ সাদিযন্তি পকতত্তানন্তি ঠপেত্ৰা নৰকতরং মূলাযপটিকস্সনারহং অৰসেসানং অন্তমসো পারিৰাসিকাদীনম্পি. ইমেসঞ্হি পারিৰাসিকমূলাযপটিকস্সনারহমানত্তারহমানত্তাচারিকব্ভানারহানং পঞ্চন্নং ঠপেত্ৰা অত্তনো অত্তনো নৰকতরং, সেসা সব্বে পকতত্তা এৰ. কস্মা? মিথু যথাৰুড্ঢং অভিৰাদনাদীনং অনুঞ্ঞাতত্তা. তেন ৰুত্তং – ‘‘অৰসেসানং অন্তমসো পারিৰাসিকাদীনম্পী’’তি. মূলাযপটিকস্সনারহাদিলক্খণং পন নেসং পরতো আৰিভৰিস্সতি. সেসমেত্থ ইতো পরেসু চ মানত্তারহাদিৰত্তেসু পারিৰাসিকৰত্তে ৰুত্তনযেনেৰ ৰেদিতব্বং.

৮৭. মূলাযপটিকস্সনারহচতুত্থো চেতিআদীসুপি যথেৰ পারিৰাসিকো; এৰং এতেপি এতেসু ৰিনযকম্মেসু গণপূরকা ন হোন্তি, সেসসঙ্ঘকম্মেসু হোন্তি.

মূলাযপটিকস্সনারহৰত্তকথা নিট্ঠিতা.

মানত্তচারিকৰত্তকথা

৯০. মানত্তচারিকস্স ৰত্তেসু ‘‘দেৰসিকং আরোচেতব্ব’’ন্তি ৰিসেসো.

৯২. রত্তিচ্ছেদেসু ঊনে গণেতি এত্থ গণোতি চত্তারো ৰা অতিরেকা ৰা; তস্মা সচেপি তীহি ভিক্খূহি সদ্ধিং ৰসতি, রত্তিচ্ছেদো হোতিযেৰ. মানত্তনিক্খেপসমাদানেসু ৰুত্তসদিসোৰ ৰিনিচ্ছযো. সেসং সব্বত্থ উত্তানমেৰাতি.

মানত্তচারিকৰত্তকথা নিট্ঠিতা.

পারিৰাসিকক্খন্ধকৰণ্ণনা নিট্ঠিতা.