২. দুতিযৰিহারসুত্তৰণ্ণনা

১২. দুতিযে পটিসল্লানকারণং ৰুত্তনযেনেৰ ৰেদিতব্বং. মিচ্ছাদিট্ঠিৰূপসমপচ্চযাতি মিচ্ছাদিট্ঠিৰূপসমো নাম সম্মাদিট্ঠি. তস্মা যং সম্মাদিট্ঠিপচ্চযা ৰেদযিতং ৰুত্তং, তদেৰ মিচ্ছাদিট্ঠিৰূপসমপচ্চযা ৰেদিতব্বং. ইমস্মিং পন সুত্তে ৰিপাকৰেদনং অতিদূরেতি মঞ্ঞমানা ন গণ্হন্তীতি ৰুত্তং. ইমিনা নযেন সব্বত্থ অত্থো ৰেদিতব্বো. যস্স যস্স হি ৰূপসমপচ্চযাতি ৰুচ্চতি, তস্স তস্স পটিপক্খধম্মপচ্চযাৰ তং তং ৰেদযিতং অধিপ্পেতং. ছন্দৰূপসমপচ্চযাতিআদীসু পন ছন্দৰূপসমপচ্চযা তাৰ পঠমজ্ঝানৰেদনা ৰেদিতব্বা. ৰিতক্কৰূপসমপচ্চযা দুতিযজ্ঝানৰেদনা. সঞ্ঞাপচ্চযা ছসমাপত্তিৰেদনা. সঞ্ঞাৰূপসমপচ্চযা নেৰসঞ্ঞানাসঞ্ঞাযতনৰেদনা. ছন্দো চ ৰূপসন্তোতিআদীনি ৰুত্তত্থানেৰ.