৮. আদিত্তপরিযাযসুত্তৰণ্ণনা

২৩৫. অট্ঠমে অনুব্যঞ্জনসো নিমিত্তগ্গাহোতি ‘‘হত্থা সোভনা পাদা সোভনা’’তি এৰং অনুব্যঞ্জনৰসেন নিমিত্তগ্গাহো. নিমিত্তগ্গাহোতি হি সংসন্দেত্ৰা গহণং, অনুব্যঞ্জনগ্গাহোতি ৰিভত্তিগহণং. নিমিত্তগ্গাহো কুম্ভীলসদিসো সব্বমেৰ গণ্হাতি, অনুব্যঞ্জনগ্গাহো রত্তপাসদিসো ৰিভজিত্ৰা হত্থপাদাদীসু তং তং কোট্ঠাসং. ইমে পন দ্ৰে গাহা একজৰনৰারেপি লব্ভন্তি, নানাজৰনৰারে ৰত্তব্বমেৰ নত্থি.

নিমিত্তস্সাদগথিতন্তি নিমিত্তস্সাদেন গন্থিতং বদ্ধং. ৰিঞ্ঞাণন্তি কম্মৰিঞ্ঞাণং. তস্মিং চে সমযে কালং করেয্যাতি ন কোচি সংকিলিট্ঠেন চিত্তেন কালং করোন্তো নাম অত্থি. সব্বসত্তানঞ্হি ভৰঙ্গেনেৰ কালকিরিযা হোতি. কিলেসভযং পন দস্সেন্তো এৰমাহ. সমযৰসেন ৰা এৰং ৰুত্তং. চক্খুদ্ৰারস্মিঞ্হি আপাথগতে আরম্মণে রত্তচিত্তং ৰা দুট্ঠচিত্তং ৰা মূল়্হচিত্তং ৰা আরম্মণরসং অনুভৰিত্ৰা ভৰঙ্গং ওতরতি, ভৰঙ্গে ঠত্ৰা কালকিরিযং করোতি. তস্মিং সমযে কালং করোন্তস্স দ্ৰেৰ গতিযো পাটিকঙ্খা, ইমস্স সমযস্স ৰসেনেতং ৰুত্তং.

ইমং খ্ৰাহং, ভিক্খৰে, আদীনৰন্তি ইমং অনেকানি ৰস্সসতসহস্সানি নিরযে অনুভৰিতব্বং দুক্খং সম্পস্সমানো এৰং ৰদামি তত্তায অযোসলাকায অক্খীনি অঞ্জাপেতুকামোতি. ইমিনা নযেন সব্বত্থ অত্থো ৰেদিতব্বো. অযোসঙ্কুনাতি অযসূলেন. সম্পলিমট্ঠন্তি দ্ৰেপি কণ্ণচ্ছিদ্দানি ৰিনিৰিজ্ঝিত্ৰা পথৰিযং আকোটনৰসেন সম্পলিমট্ঠং.

ততিযৰারে সম্পলিমট্ঠন্তি নখচ্ছেদনং পৰেসেত্ৰা উক্খিপিত্ৰা সহধুনট্ঠেন ছিন্দিত্ৰা পাতনৰসেন সম্পলিমট্ঠং. চতুত্থৰারে সম্পলিমট্ঠন্তি বন্ধনমূলং ছেত্ৰা পাতনৰসেন সম্পলিমট্ঠং. পঞ্চমৰারে সম্পলিমট্ঠন্তি তিখিণায সত্তিযা কাযপসাদং উপ্পাটেত্ৰা পতনৰসেন সম্পলিমট্ঠং. সত্তিযাতি এত্থ মহতী দণ্ডকৰাসি ৰেদিতব্বা. সোত্তন্তি নিপজ্জিত্ৰা নিদ্দোক্কমনং. যথারূপানং ৰিতক্কানং ৰসং গতো সঙ্ঘং ভিন্দেয্যাতি ইমিনা ৰিতক্কানং যাৰ সঙ্ঘভেদা পাপকম্মাৰহনতা দস্সিতা. সেসমেত্থ উত্তানমেৰ.